Hebreu 1 - Bible

Ɣâla è lòno Ǹóŋ sârai

¹ Tãi pɔlɔi su Ɣâla è lòno kúnâŋ pɔlɔ-ŋai pɔ́ ŋɔlóno-kɛ-ƃelai sârai pere-sii da kpɛni támaa su.

² Kɛ́lɛ, ŋ̀ele kpɛɛ-ŋa-ŋai ŋí su Ɣâla a lóno kúpɔ Ǹóŋ sârai. È nɛ̀ a gɛɛ é kɛ́ a sɛŋ kélee-namu nyíi. È ŋ̀éniɛi kpɛ̀tɛ zarâi.

³ È Ɣâla ŋɔfólo-laai lɛ̀, gɛ ƃo a Ɣâla kɛ́-perei pɔɔ-ŋa-nuu. A ǹyée kɛ̀ ŋ̀éniɛi ma a ŋɔwala-wala-wooi. Tãi è núu maa-waa-laa la sɔnyɔ̂ŋ mɛni mai, è sèe Ŋ̀âla kɛ́tɛi láa-mii-yee mɛi Ɣâla-taa.

Ɣâla Ǹóŋ ŋɔkɛ́tɛ-laai

⁴ Dɛɛ̂i ŋ̀âla-taa-kela-ŋai dîa kpɛ́ni fêi ǹáai è zɔlɔ ƃôi gɛ́tɛ̂i é tɛ́ɛ díwɔ̂i ma.

Nòŋ-nuui-mɛni tɛɛ̂i ŋ̀âla-taa-kela-ŋai dîa

⁵ Ŋ̀âla-taa-kelai nênɛ ƃe Ɣâla a wɔ́lɔ m̀ó ma, “Íkaa a Ńôŋ, ŋa sâa ímaa sɔlɔ ƃói”? Kpaa máŋ, “Ŋa pâi kɛ̂i a ǹâŋ, ǹyaŋ é kɛ́ a ńôŋ”?

⁶ Tãi ŋɔ́nɔ a pâi pâi la a nòŋ-nuui maa-ŋuŋ ǹɔii sui, a pâi m̀ôi, nyɛɛi, “Tɔɔ Ɣâla Ŋɔɣâla-taa-kela-ŋai kélee dí vɛli.”

⁷ Gáa lônoi gɛ pîlaŋ ŋ̀âla-taa-kela-ŋai dîa, nyɛɛi, “E ŋɔkéla-ŋai pène a fãa, é ǹyée-mu-ƃelai kɛ́ a ŋɔŋ-soŋ.”

⁸ Kɛ́lɛ, gáa lônoi gɛ́ pìlaŋ Ǹóŋ ma, ǹyɛɛi, “Óo Ɣâla, íkâloŋ-see-sɛŋ káa nɔ́ naa wɔ́lɔ-wɔlɔ da wɔ́lɔ-wɔlɔ. Deniŋ-mo-wurii ƃa íkâloŋ-laai su-wurii.

⁹ Í tɔ̃yâ-laa wɛ́li ní. Ya wôya-mɛni kpɔara. Mɛni ma Ɣâla nyíi gáa a Íɣâlai a ísiɣe zu a líi-nɛ̃ɛ kɛ́tɛ da ƃaa-kɛ-maa kɛ́tɛ tɛ́ɛ ípɔ a tɛ̂ɛ íƃarâai dîa.”

¹⁰ Ǹyaŋ, “Yái a Kúnuu-namui, yá ƃe ǹɔii kpɛ́tɛ a maa-ŋuŋ. Ŋ̀ele-kɔlɔŋ káa a íyee ŋɔtíi.

¹¹ Da pâi tɛɛ̂i, kɛ́lɛ, ya pâi lɛɛ̂i nâa. Ǹyaŋ díkelee da pâi pɔlɔ̂i yɛ̂ɛ seɣe.

¹² Ya pâi díkpininîi yɛ̂ɛ yokpo. A kɛ̀ tí, dímaa a pâi fálenîi yɛ̂ɛ seɣe. Kɛ́lɛ, ímaa fa wɔ́lɔ fàleŋ. Íkoraŋ-ŋai dífa wɔ́lɔ kpɛ̀ɛ.”

¹³ Kɛ́lɛ, ŋ̀âla-taa-kelai nênɛ ƃe Ɣâla a wɔ́lɔ m̀ó ma, nyɛɛi, “See ńaa-mii-yee mɛi, é lɛ́ɛ la zu ŋa íkpɔara-ƃelai pú íkɔɔ mui”?

¹⁴ Díkelee dífe a tii-kɛ-mɔ̂leŋ-ŋa nyíi-ŋai Ɣâla è dítɛ̀ɛ a gɛɛ dí tíi kɛ́ diai mɛni ma da pâi ƃalo-laa sɔlɔ ƃôi?