Hanwon 3 - Bible

Ǹia-wooi gáa ǹyáŋkpa-ŋai mɛni mai

¹ Ńoŋ, ífe nìa ŋásɛŋ-lɛɛi ma. Ŋátɔ̂ŋ-ŋai dí lɛ́ɛ íkili ŋá í dímɛi káa.

² Da pâi fúlu-laa su kôyaa tɛɛ̂i ípɔ da lii-see.

³ Ífe nɛ̀ɛ naa wɛli-kɛ-maa da sã́a-laa dí kúla íyêei. Dí tóo íkɔŋ ma, í dípɔ̃yɛ ílii su.

⁴ Ƃà gɛ̀ tí, gɛ̀ ní ƃa pâi ƃaa-kɛ-maa da láa-maa-tɛ sɔlɔ ƃôi Ɣâla yêei da núu-kpune.

⁵ Láa a Ɣâla Yâwɛɛ a ílii kélee. Ífe làa a íkpîŋ tare.

⁶ Tɔɔ Ɣâla Yâwɛɛ é íteniŋ tɔ́ɔ íkɛ-mɛni kélee su. A pâi pere sã́a lɛ̂i yâ.

⁷ Ífe íkpîŋ sìɣe a táre-nuu. Yao Ɣâla Yâwɛɛ ma, í ípôlu tɔɔ mɛni nyɔ́mɔɔ kɛ́ɛ ma.

⁸ À kɛ̀ ƃà gɛ̀ tí, gɛ̀ ní a pâi kɛ̂i yɛ̂ɛ sále lɛ́lɛɛ é ípala-ŋai ƃálo da íkao-soli-ŋai.

⁹ Ƃaa-kɛ-maa tɛ́ɛ Ɣâla Yâwɛɛ pɔ́ a sama-sɛŋ é kúla íkɔ̂liŋ da ísi-sɛŋ-ƃai maa-ŋuŋ kélee su.

¹⁰ Gɛ̀ ní íkêre-ŋai lá a pâi fɛ̂ɛi a mii-sãa, íŋwã̂ai-pui kɛ́-sãai kélee láa é fɛ̂ɛ gɛ́ yèŋ la.

¹¹ Ńoŋ, ífe íŋɛi nàɣiŋ Ɣâla Yâwɛɛ ŋɔtɔŋ-kpɛ-maai mɛi, kpaa máŋ ífii é kpɛ̀ɛ à kɛ̀ à tɔ̂ŋ kpɛ̀ yâ.

¹² Kpɛ́ni fêi ǹúui Ɣâla Yâwɛɛ è ŋ̀wɛli nii, ǹyaa ƃé a tɔ̂ŋ kpɛ̀ ma, yɛ̂ɛ berei nàŋ-nuu a tɔ̂ŋ kpɛ̀ la ǹóŋ ma nyii è ŋ̀wɛli-nii.

¹³ Líi-nɛ̃ɛ káa ǹúui ma a táre sɔlɔ ƃô, da ǹúui a mɛni ŋá kàai.

¹⁴ Kpɛ́ni fêi, vela-fei núu a zɔlɔ ƃô táre sui, ǹɛ̂lɛɛi é tɛ́ɛ vela-fei ma núu a gùla káne sui. M̀ɛni kpanaŋɔ̂i yâ é tɛ́ɛ gôo ma.

¹⁵ Zɔ̃ɔ kpanaŋɔ̂i é tɛ́ɛ kɔni-ŋaa sɔ̃ɔ kpanaŋɔɔ ma. Ǹyaŋ ífa pɔ̂ri gɔ̂ɔnii sɛŋ da kélee ma nyii ŋ̀wɛ́li káa yâi.

¹⁶ Táre a fúlu-laa su kôya tɛ̀ɛ núu pɔ́ a ǹáa mii-yee. Gɛ́ tɔɔ-laa da ƃaa-kɛ-maa tɛ̀ɛ núu pɔ́ a gɔɔ-yee.

¹⁷ Mɛni lɛ́lɛɛ káa dûa-pere kélee su, ŋɔpere-ŋai kélee kɛ́ ƃò a lii-see pere.

¹⁸ Táre a fúlu-laa tɛ̀ɛ diai pɔ́ da kânaŋ mai. Diai da zòŋ a gbanaŋɔɔi, dílii a pâi nɛ̃ɛ̂i.

¹⁹ Ɣâla Yâwɛɛ è ǹɔii kpɛ̂tɛ a táre. È ŋ̀elei kpɛ̂tɛ a ŋɔmɛni ŋá-kaai.

²⁰ Ŋɔtárei ƃé gɛ̀ ǹɔii lá é ƃó a gɛɛ yá é kúla naa, ŋ̀ele-kɔlɔŋ é tuna pú ǹɔii ma.

²¹ Ńoŋ, táre da mɛni ŋá-kaa sóŋ a gbanaŋɔɔ. Ífe nɛ̀ɛ naa dí kúla íŋɛi-tuɛ.

²² Da pâi kɛ̂i a fúlu-laa ímɔ̂leŋ mɛni ma, dí íkɛ-ɣeniɛi kɛ́ a ǹɛ́lɛɛ.

²³ Gɛ̀ ní ŋuŋ maa ƃô a pâi kɛ̂i íyêei ísia-perei su, ífe pâi íkɔɔ tuâi sɛŋ da ma.

²⁴ Ƃà lì lâai, ífe pâi yaôi, ƃa pâi nyiî a ǹɛ́lɛɛ.

²⁵ Ífe yào a gɛɛ mɛni kpɔ̂lu a pâi kulâi yâ ítɛ̂i-pere, kpaa máŋ í yao m̀ɛni kpɔ̂lui mâ a lâa ŋ̀wana-lɔ̂ɔ-ƃelai dîai.

²⁶ Ɣâla Yâwɛɛ a pâi ímaa kɔ̃ɔ̂i. Vé pâi ǹɛɛ̂i naa í píli mɛni kpɔ̂lu su.

²⁷ Ífe kpèra kpɔŋ-mâ tɛɛ̂i diai pɔ́ maa nɛ̃ɛ̂i í dɛɛ dípɔi.

²⁸ À kɛ̀ íkɔlɛ ma-nuui à pà ípɔ kpɔŋ-mâ mɛni ma, maa-sɛŋ à kɛ̀ íyêei, ífe kɛ̀ ma lí í pá tínaa zɛŋ ƃa ŋ̀wɛ̂lii ŋa pâi dɛɛ̂i ípɔ.

²⁹ Ífe mɛni nyɔ́mɔɔ kpɛ̀tɛ íkili ŋá íkɔlɛ-ma-nuui mɛ̂ni ma, kpɛ́ni-fei díkaa a íkɔlɛ ma-ƃela, dí láa a yá.

³⁰ Ífe laa-saa pɛ̀lɛ íkɔlɛ ma-nuui ma kpɛ́ni-kpɛni nyii vé mɛni nyɔ́mɔɔ kɛ́ ní a yai.

³¹ Ífe tólo kùla wôya-nuu ma ŋɔtɔɔ-sãai mɛ̂ni ma kpaa máŋ í pîlaŋ dûa-perei pôlu,

³² kpɛ́ni fêi, mɛni nyɔ́mɔɔ kɛ́-ƃela ƃɛlɛ kpɛɛ̂i Ɣâla Yâwɛɛ koi, kɛ́lɛ gáa a teniŋ ƃô-ƃela da tɔ̃yâ-ƃela dí wɛli kɛ́-maa-nuu.

³³ Ɣâla Yâwɛɛ ŋɔnáɣaŋ káa ŋ̀wana-lɔ̂ɔ-nuui ŋɔpɛ́rɛi ma, kɛ́lɛ ŋɔlûwai káa tɔ̃yâ-nuu ŋɔpɛ́rɛi ma.

³⁴ Dɔɔ̂i ǹyoŋka-ƃelai dîa, gɛ́ lûwa tòo m̀aa-yeŋ-ƃelai dîa.

³⁵ Dáre-nuui a pâi ƃaa-kɛ-ma sɔlɔ ƃôi, kɛ́lɛ ǹúui va mɛni ŋá kàa a ǹɛ́lɛɛi a pâi ŋumɛ̂i.