Hanwon 24 - Bible

M̀ɛnii -19-

¹ Ífe tólo kùla sɔnyɔ̂ŋ-ƃela dîa díkɔ̃liŋ mɛni ma kpɛ́ni fêi da fé íyêei. Ífe tela kɔ̀ a gɛɛ í kɛ́ a díƃarâŋ-nuu.

² Kpɛ́ni-fei díkili-ŋa-siai pîlaŋɔɔi ŋwana-lɔɔ ma, m̀ɛnii nɔ́ da lôno é pîlaŋ mai ƃa ŋwana-lɔɔ.

M̀ɛnii -20-

³ Núu a pɛ́rɛ pìlaŋ a táre é dɔɔ a mɛni-ŋa-kaa.

⁴ Núu a sãâ sɔ̃ɔ kpanaŋɔɔ lɛ́lɛɛ-ŋa pù lôŋpo su táre sârai.

M̀ɛnii -21-

⁵ Táre lɛ̂lɛi é tɛ́ɛ wála-wala ma. Táre-nuu a wála-wala-nuu ŋɔwála-walai yée mɛi ɣâle.

⁶ Mɛni kpɛtɛɛ lɛ́lɛɛ kɛ́ í lɛ́ɛ pâi kɔ́ têei. Ya íwoli tɔ̀ɔ lia-woo támaa a pâ a yee-tɛɛ-maa.

M̀ɛnii -22-

⁷ Ƃoo-nuu fa táre-woo ŋá kàa. Da kɛ̀ mɛni kpânaŋ ƃôi koyâŋ su da ƃó târe fé ǹyêei.

M̀ɛnii -23-

⁸ Ǹúui a mɛni nyɔ́mɔɔ kpɛ̀tɛ gíli ŋái, da dòli a wôya-nuu.

⁹ Ƃoo-tua a pâ a sɔnyɔ̂ŋ. Ǹúui a ɣɛ́lɛ-maa kùla núu kponôi, da gbɔ̀ara.

M̀ɛnii -24-

¹⁰ Ya pìli mɛni kpɔ̂lu su, ílii a tòo pôlu, gɛ̀ ní íkaa a fii kpɛ̂ɛ-nuu.

M̀ɛnii -25-

¹¹ Diai nûa da pá dí paâi m̀ɛnii ma nyii dísɔŋ fé zui, dí ŋuŋ ma ƃó.

¹² Ƃà mò yɛ̂ɛ, “Ífe kɛ́ ní a gɔ́lɔŋɔɔ,” Ɣâla é núu-kpune ŋɔkíli-ŋa-siai kɔ́lɔŋ da ǹii-su-mɛni-ŋai. Nyaa ƃé ímaa kpɛɛ̂i. È í kɔ́lɔŋ. A pâi ífela-fei ítii kɛ-perei ma.

M̀ɛnii -26-

¹³ Ńoŋ, kɔ̃́iŋ-wulɔ kpeleɛ lɛ̂lɛɛi. Kɔ̃iŋ-wulɔ nyii gbaŋ mai, nɛ̃ɛ̂i.

¹⁴ Bere nɔ́ táre lɛ̂lɛɛi la máŋ ímɔ̂leŋ mɛni ma. Ƃà gàa, ímɛnii a pâi kɛ̂i a ǹɛ́lɛɛ tínaa tuɛ-pere ǹyaŋ núu fa pɔ̂ri íkili-kɛ-zui kulâi íyêei.

M̀ɛnii -27-

¹⁵ Ífe kɛ̀ yɛ̂ɛ ŋwana-lɔ̂ɔ-nuu nyii a ŋ̀wɛ̂lii é teniŋ ƃô-nuu kɔ̃liŋ kpaa máŋ é ŋɔpɛ́rɛi kúla ǹyêei.

¹⁶ Tɔ̃yâ-nuu a tòo pôlu lɔ́ɔlu mɛi feerɛ, a mu sìɣe ŋɔ́nɔ. Kɛ́lɛ mɛni kpɔ̂lu a wôya-nuu yée mɛi ɣâle.

M̀ɛnii -28-

¹⁷ Íkpɔara-nuui a tòo pôlu, ílii fé nɛ̃ɛ. Dà ǹyée mɛi ɣâle, ífe ǹii-nɛ̃ɛ kùla.

¹⁸ Ƃà gɛ̀ tí, Ɣâla Yâwɛɛ à gàa, ǹíi fa lâa íyêei. Tãi da a ŋɔlii-ŋwanai sìɣe pôlu.

M̀ɛnii -29-

¹⁹ Ílii fè ŋwàna núu nyɔ́mɔɔ-ŋa mɛni ma. Ífe ŋwana lɔɔ-ƃela maa lii tèe,

²⁰ kpɛ́ni fêi, ŋwana-lɔ̂ɔ-nuu ŋɔmɛni gbɛɛ ŋá fé lɛ́lɛ ní. Wôya-nuu ŋɔlâŋpoi a pâi líinîi.

M̀ɛnii -30-

²¹ Ńoŋ, yao Ɣâla Yâwɛɛ ma da gâloŋ. Ífe pìli diai sáma da ŋ̀wɛ̂lii dí tɔ́ɔ dîai.

²² Kpɛ́ni fêi, mɛni kpɔ̂lu a pâi pâi dípɔ a maa félaa da su-karaa. Gbɛ̂ɛ ƃé m̀ɛni kpɔ̂lui kɔ́lɔŋ Ɣâla Yâwɛɛ da gâloŋ da pâi ǹâai dîai?

Dáre-wooi da-ŋa ká ŋí

²³ Dáre-ƃelai dí ŋɔ́nɔ m̀ɛni-ŋai ŋí ƃò: Mɛni ŋá téɛɛ a wôya-pere fé lɛ́lɛ-ni.

²⁴ Ǹúui a mò ŋ̀wana-lɔ̂ɔ-nuui ma, “Ímɛnii lɛ̂lɛɛi,” ǹúui kélee a maa nûui tí kpɔ̀ara, díkɛ vòo.

²⁵ Kɛ́lɛ diai da ŋwana-lɔ̂ɔ-nuu ŋɔpɔara mɛni maai lɛ̀ mai, dílaa lɛ́lɛɛ a taa-taa, lûwa kɛ́ ƃò dîa.

²⁶ Tɔ̃yâ-nuu a núu wóo su tòo a zã́a. Ǹyaŋ nyíŋi a ǹɛ a gɛɛ gáa a m̀arâŋ-nuu lɛ́lɛɛ.

²⁷ Ílɔii maa mɛ̂ni su sã́a a maa-ŋuŋ da íkpâlaŋ ŋá tíi. Ǹaa pôlu ma, ƃa pɔ̂ri ípɛrɛi tɔɔ̂i.

²⁸ Ífe wôya-sere-faa kɛ̀ a íkɔlɛ-ma-nuui. Ífe mɛni nyɔ́mɔɔ ƃò a ǹáa.

²⁹ Ífe mò yɛ̂ɛi, “M̀ɛnii è gɛ̀ a ńyãai, ŋa pâi bɔɔ-too kulâi. Ŋa pâi gba kulâi mà.”

³⁰ Ŋá tɛ̀ɛ nyɛ̃ŋ-nyɛŋ-nuu ŋɔkpâlaŋ ŋá, ǹúui va mɛni ŋá kâai, ŋá ŋɔkpɔmɔ-kpalaŋ kâa.

³¹ Gáa, ŋalêŋ-kpɔlɔ a nàa mɛi pɛ́lɛ, ǹɔii gwaa kélee káa a kala tee-tee. Gbâlaŋ ŋɔzĩɣaŋ nyii dí dɔ̀ɔ a kɔnii, gélee a wólo.

³² Tãi ŋá m̀ɛnii ŋí naa kàa lai, ŋá kɛ̀ ŋ́gili ŋá siâi. Nya ƃe ŋá sɛŋ maa kɔ̂ri zu.

³³ Ǹyɛ̃-nyɛŋ-nuui a mò ǹyɛɛi, “Ŋa pâi nyîi a guro, ŋá ḿvii tɔ́ɔ a guro ŋá ńyee kpulɔ̂ŋ ḿâ ŋá láa.”

³⁴ Gɔ́lɔŋ a gɛɛ tãi íkaa nyiî lai, kôlo-laa a pâi pâi ípɔ yɛ̂ɛ ŋúma-nuu, zãâi ǹɛ̂lɛɛi íkɛ-ɣeniɛi kɛ́ mɛni mai a pâi kulâi íyêei yɛ̂ɛ sɛŋ kula yêei kɛ́-nuu a gùla íyêei.