Hanwon 11 - Bible

¹ Ɣâla Yâwɛɛ a ǹûai kpɔ̀ara diai da dí-sɛŋ kɔ̂ɔŋ-kɔli-ŋai ɣîrii, kɛ́lɛ ǹíi lâai dɔ̃yâ sɛŋ-kɔɔŋ-kɔli namelai yêei.

² Zu-mɛni kɛ̂tɛ-nuui a pâi ŋumɛ̂i, kɛ́lɛ táre a pâ ǹúui pɔ́ ǹíi maa yeŋɔɔ̂i.

³ Tɔ̃yâ-laa ƃa núu sãa téniŋ tɔ̀ɔ, kɛ́lɛ ŋ̀ôya-nuui ŋɔwôyai a gbîŋ pàa.

⁴ Tɔɔ-laa fa núu kùla Ɣâla ŋɔtɔŋ kpɛ́-maai yêei, kɛ́lɛ teniŋ ƃô-laa a núu ŋuŋ ma ƃò Ɣâla ŋɔtɔŋ kpɛ́-maai yêei.

⁵ Tɔ̃yâ-nuu ŋɔsãa-laai a ŋɔfúlu-laai kɛ̀ a ǹɛ́lɛɛ, kɛ́lɛ ŋwana-lɔ̂ɔ-nuu ŋɔwôyai a gɛ̀ é tóo.

⁶ Tɔ̃yâ-nuu ŋɔtɔ̃yâ-laai a m̀alo, kɛ́lɛ ŋ̀wana-lɔ̂ɔ-nuui a tôo gbîŋ ƃarei ŋá.

⁷ Ŋwana-lɔ̂ɔ-nuu à sàa, ŋɔkíli-kɛ-zui máŋ a sâa, vá pɔ̂ri ŋɔ́nɔ gíli pûi ŋɔtɔɔ-sãai ma.

⁸ Tɔ̃yâ-nuu a kûla mɛni kpɔ̂lu su, kɛ́lɛ ŋwana-lɔ̂ɔ-nuu a lɛ̀ɛ zu.

⁹ Ŋwana-lɔ̂ɔ-nuu lóno-woo a gɔlɛ-maa-nuui su kàra, kɛ́lɛ tɔ̃yâ-nuu a ƃâlo ŋɔtárei sârai.

¹⁰ À kɛ̀ dɔ̃ya-nuui a mɛni lɛ́lɛɛ sɔlɔ ƃô, daa-ƃelai líi a lâa, kɛ́lɛ ŋwana-lɔ̂ɔ-nuu à sàa, daa-ƃelai líi a nɛ̃ɛ.

¹¹ Dɔ̃yâ-nuui ŋɔlûwai a daai tɔ̂ɔ, kɛ́lɛ ŋwana-lɔ̂ɔ-nuui lóno-woo a daai wôlo.

¹² Ǹúui a ɣɛ́lɛ-maa kùla m̀arâŋ-nuu kponôi, maa nuui fé táre ní, kɛ́lɛ mɛni-ŋa-kaa-nuu a m̀ɛi sâa.

¹³ Ǹúui mɛni fa tɔ̂ɔ ǹái, dífa loo-mɛni ƃò ma, kɛ́lɛ tɔ̃yâ-nuu a núu ŋɔloo-mɛ̂nii mɛi pɛ̂lɛ.

¹⁴ Ƃɛ́i núu téniŋ-tɔɔ-ƃela dífe naai, ǹûai láŋɔɔ̂i naa, kɛ́lɛ à kɛ̀ núu téniŋ-tɔɔ-ƃela támaa da kɛ̀ kwaa ma nyii-ŋai da ǹûai lia-woo ƃòi, ǹûai da kpɔŋ-maa sɔlɔ ƃô.

¹⁵ À kɛ̀ ƃà tɔ̀ɔ ŋɔ̃ya láa túɛ kpa-soŋ mɛni ma, ƃa mɛni-soli kàa. Vé lɛ́lɛ ní í íyee píli ŋɔkpa mɛnii su.

¹⁶ Nɛnî sɔŋ lɛ́lɛɛ a ƃaa-kɛ-maa sɔlɔ ƃô, kɛ́lɛ ŋwana-lɔ̂ɔ-nuu a tɔɔ-laa sɔlɔ ƃô ŋɔŋwana-lɔ̂ɔ-tua kɛ́ɛi su.

¹⁷ Ǹúui a núu malôŋ kàai, a kpɔ̂ŋ gbîŋ ma, kɛ́lɛ ŋwana-lɔ̂ɔ-nuu a mɛni kpɔ̂lu tòli gbîŋ ma.

¹⁸ Ŋwana-lɔ̂ɔ-nuu ŋɔfela-fei káa nɔ́ kpɛ́ni-kpɛni, kɛ́lɛ tɔ̃yâ-nuu ŋɔfela-fêi a lɛ̂ɛ ǹyêei.

¹⁹ Tɔ̃yâ-tua kɛ́ɛ a pâ a fúlu-laa, kɛ́lɛ ǹúui a kânaŋ sɔnyɔ̂ŋ mai, a sâa.

²⁰ Wôya-nuu a Ɣâla Yâwɛɛ líi sòli, kɛ́lɛ tɔ̃yâ-nuu tûa-pere a ǹíi làa.

²¹ Sɔnyɔ̂ŋ-nuu a pâi tɔ̂ŋ-kpɛ-maa sɔlɔ ƃôi, kɛ́lɛ tɔ̃yâ-nuu a pâi ƃâloi.

²² Nɛnî lɛ́lɛɛ nyii táre fé ŋuŋ sui, gáa yɛ̂ɛ ƃoi nyii gôo gbono káa zũâi.

²³ M̀ɛnii tɔ̃yâ-nuu kíli káa mai, a mɛni lɛ́lɛɛ sɔlɔ ƃô zu, kɛ́lɛ m̀ɛnii ŋwana-lɔ̂ɔ-nuu kíli káa mai, mɛni kpɔ̂lu nɔ́ ƃé a zɔlɔ ƃô zu.

²⁴ Núu-nyii ǹyée foâŋɔɔi ma sɛŋ kɔlɛ mɛ̂ni mai, gɔ̃liŋ da a pû ma, núui nyii gala kpanaŋɔ̂i mai, ŋɔkôlo-laai a kɛ̂ nɔ́ ma.

²⁵ Ƃɛlɛ-see kɛ́-nuu a ƃɛlɛ-see támaa sɔlɔ ƃô. Ǹúui a kpɔ̂ŋ núu mai, a kpɔŋ-maa sɔlɔ ƃô.

²⁶ Ǹúui va fâa ma a gɛɛ é ŋɔmii-sãai da kɔlɛ nûa dîa kpɛ́ni fêi zɔ̃ɔ toɔɔ̂i mui, da vòo, kɛ́lɛ núui a ŋɔmii-sãai kɔ̂lɛ nûa dîa a tãi kélee, da lûwa làa ma.

²⁷ Ǹúui a mɛni lɛ́lɛɛ kɔrii, a mɛni lɛ́lɛɛ sɔlɔ ƃô, kɛ́lɛ mɛni-nyɔ́mɔɔ kɔ́ri-nuu a mɛni nyɔ́mɔɔ sɔlɔ ƃô.

²⁸ Ǹúui a gíli kɛ̀ ŋɔtɔɔ-sãai mai, a tôo yɛ̂ɛ láa kpâla, kɛ́lɛ tɔ̃yâ-nuu a pâi ƃɔlɔ̂i yɛ̂ɛ wúru nyii gáa tɔɔ̂ni yá kɔlɛi.

²⁹ Ǹúui a pâ a mɛni kpɔ̂lu ŋɔpɛ́rɛi mui, va mɛni lɛ́lɛɛ sɔlɔ ƃô. Ƃoo-nuu káa a táre-nuu ŋɔluɛ.

³⁰ Tɔ̃yâ-laa a pâ a fúlu-laa, kɛ́lɛ ŋwana-lɔ̂ɔ a fúlu-laa làŋ.

³¹ À kɛ̀ Ɣâla a tɔ̃yâ-nuu ŋɔfela-fei tɛ̀ɛ ƃɔ́ ŋ̀éniɛi ŋí su, vé pâi ŋwana-lɔ̂ɔ-nuu da sɔnyɔ̂ŋ-nuu díwɔ̂i tɛɛ̂i dípɔ?