Galatə 1 - Bible

La-ti-maa

¹ Ńyãa Pɔ̂ɔ ŋ́gaa a sia-nuu-núu-kpune fe ŋ́gɛ̀ ní a sia-nuu, kpaa máŋ fe kɛ́ ni a sia-nuu núu-kpune sârai, kɛ́lɛ, ŋá kɛ̀ a sia-nuu Zîsɛ Kôrai sârai da Ǹaŋ-nuui Ɣâla nyíi Kôrai mu siɣe saa yêei,

² ńyãa kwa ḿarâai kélee nyíi-ŋai díkaa ŋ́gɔlɛi, Kôrai-toli-kpɔŋ-ŋai nyíi-ŋai díkaa Galesiai:

³ Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai,

⁴ nyíi gbîŋ tɛ̀ɛ kúsɔnyɔ̂ŋ mɛni ma a gɛ́ɛ é kúkula ŋ̀wana-lɔ̂ɔ ɣeniɛi ŋí su yɛ̂ɛ berei Kúnâŋ Ɣâla ŋɔnîa-mɛnii káa lai;

⁵ nyíi fólo-laa káa nɔ́ ma wɔ́lɔ-wɔlɔ da wɔlɔ-wɔlɔi. É kɛ́ tí.

Duŋ Lɛ́lɛɛi da kpɛ́ni fé naa

⁶ Gulâi a ńyãa a gɛ́ɛ kákaa káyee kulâi Kôrai mu a maa félaa nyíi kátòli ŋɔƃɛlɛ-sêei sui, kakɛ tinaŋ tuŋ da kpɛni pɔ naa-pere

⁷ zu-kulai fa a gɛ́ɛ tuŋ da kpɛni káa naa, kɛ́lɛ, núu da-ni díkaa naa da káfũa-fũa, díkɛ ŋ̀wɛli dí Kôrai ŋɔtuŋ lɛ́lɛɛi maa faleŋ.

⁸ Kɛ́lɛ, à kɛ̀ máŋ a kúa, kpaa máŋ Ɣâla-taa-kela é kúla ŋ̀elei su é tuŋ da kpɛni ƃó é kúla nyíi pôlu ku mò kâai, tɔɔ náɣâŋ é kɛ́ maa-nuui ma.

⁹ Yɛ̂ɛ berei ku mò la káa a maa-ŋuŋ, ŋ́gaa ŋɔ́nɔ m̀ôi kâa, À kɛ̀ núu da káa tuŋ da kpɛni ƃôi káa é kúla nyíi pôlu ká zɔlɔ ƃôi, tɔɔ náɣâŋ é kɛ́ maa-puui ma.

¹⁰ Ŋ́gaa ŋɛi lɛ́lɛɛ̂i núu-kpune yêei, kpaa Ɣâla? Kpaa máŋ ŋ́gaa kɔ̂i a gɛ́ɛ ŋá núu-kpune líi láa? Ŋâi kɛ̀ núu-kpune líi lâai, fêi pɔ̂ri kɛ̂i a Kôrai yée-mu-nuu.

Berei Pɔ̂ɔ è Duŋ Lɛ́lɛɛi sɔlɔ ƃô la gɛ́ maa-tîi kɛ̀i

¹¹ Kpɛ́ni fêi, ŋánûa, ŋá nɛ̀ɛ naa ká gɔ́lɔŋ a gɛ́ɛ Duŋ Lɛ́lɛɛi ŋá mòi, ve a núu-kpune ŋɔtuŋ lɛ́lɛɛi.

¹² Kpɛ́ni fêi, fe gula ni núu-kpune yêei, kpaa máŋ núu-kpune fe ǹɛ́ ní ḿâ, kɛ́lɛ, Zîsɛ Kôrai ƃe nɛ̀ ḿâ.

¹³ Kpɛ́ni fêi, ka ŋáfulu-laai kɔ́ɔ pîlanii maa-mɛni mɛni Zûu-ŋai Díɣâla-mɛnii su, berei ŋá Ɣâla ŋɔtóli-kpɔŋ kpɔ̂ara la a ŋ̀wana-lɔ̂ɔ-pere, ŋ́gɛ kɔ̀ a gɛ́ɛ ŋá zu karai;

¹⁴ ńdɔɔ̂i è kɛ̀ kpɔ́ a gɛ́tɛ Zûu-ŋai Díɣâla-mɛnii su é tɛ́ɛ ḿbɔri támaa ma ŋánûai sama. Maa-mɛni ƃe ŋá kɔ̀ kpɔ́ la a gbanaŋɔɔ ŋánûa-pɔlɔ-ŋai tua-perei maa-mɛni ma.

¹⁵ Kɛ́lɛ, tãi ǹúui ńzee dí lɛ́ɛ pâi ḿaa sɔlɔ ƃôi, e ńdòli la ŋɔƃɛlɛ-sêei sârai,

¹⁶ ǹíi è làa a gɛ́ɛ e Ǹóŋ lɛ̀ ḿâ a gɛ́ɛ ŋá maa-mɛni ƃó Zɛ̃tai-ŋai sáma, ǹyaŋ fé ŋuŋ pîlaŋ ní a núu-kpune da,

¹⁷ kpaa máŋ fé li ní Zerusâlɛŋ diai pɔ́ dí kɛ̀ a sia-ƃela ńduɛi, kɛ́lɛ, ŋá lì Arebia, ŋá lene ŋɔ́nɔ pôlu Dimɛika.

¹⁸ Kóraŋ saaƃa tɛ̂ɛi pôlu ma ŋá lì Zerusâlɛŋ Sîfa naa kâai, ŋá gɛ́ naa a ɣele kûu puu kao lɔ́ɔlu.

¹⁹ Kɛ́lɛ, fe zia-ƃelai da kaa ni naa, fɛ̂ɛ nɔ́ Zĩi, nyíi kɛ̀ a Kúnuu-namui ǹêɣei.

²⁰ (Mɛnii ŋí ŋá bɔ̃̀yɛ kápɔ naai, Ɣâla e gɔ́lɔŋ a gɛ́ɛ fe lɛ́ɛ kɛ̂i!)

²¹ Nàa pôlu ma ŋá lì Siria-kpiniŋ su da Sɛlisia.

²² Ǹyaŋ Kôrai-toli-kpɔŋ-ŋai kɛ̀ Zudai dífe niî kɛ̀ ŋ́gɔlɔŋ ni ŋ́gbono ma;

²³ dí mɛ̀ni nɔ́, dîyɛɛi, “Ǹúui wɔ́lɔ kúkpɔ̀arai gáa nâa ǹaa-lai maa-mɛni ƃôi nyíi e wɔ́lɔ kɔ̀ a gɛ́ɛ é zu karai.”

²⁴ Ǹyaŋ dí Ɣâla ŋɔfólo-laai maa tɛ̂ ḿaa-mɛni ma.