Filipə 4 - Bible

Ka lii-nɛ̃ɛ kula Kúnuu-namui kponôi

¹ Mɛni ma, ŋánûa, káai ŋa káwɛli ni, ŋ́gɛ ŋ̀wɛli a gɛ́ɛ ŋá kákaâi, ŋálii-nɛ̃ɛi da ŋákâloŋ-bɔrɔi, ka tɔɔ a gbanaŋɔɔ Kúnuu-namui kponôi, ŋáwɛli-kɛ-maa-ƃelai.

² Ŋa Yuwôdia da Siŋtake kpera fe a gɛ́ɛ díwoo é kɛ́ zu tɔnɔɔ Kúnuu-namui kponôi.

³ Ŋa ímarê kɛ̂i máŋ Sizigɔ, yái íkaa a tɔ̃yâ-nuu. Kpɔŋ nɛni-ŋai ŋí dîa, kpɛ́ni fêi, kwa dîa-ni kwa tíi kɛ̀ Duŋ Lɛ́lɛɛi su, e pɛlɛ Kilɛmɛ ma da marâa-tii-kɛ-ƃelai kpeli-ŋai, nyíi-ŋai dílaa káa vulu-laa-kɔlɔi sui.

⁴ Ka lii-nɛ̃ɛ kula Kúnuu-namui kponôi a ɣele kélee; ŋa ŋɔ́nɔ m̀ôi káa a gɛ́ɛ ka lii-nɛ̃ɛ kula.

⁵ Tɔɔ núu kélee e kálii-lɛ̂lɛi kɔlɔŋ. Kúnuu-namui a nâa lɛɣɛ.

⁶ Káfe kpaaŋ mɛni kélee ma, kɛ́lɛ, Ɣâla fɛliɛ su da mare-kɛɛ e pɛlɛ sɛɣɛi-fei ma, mɛni kélee ka ŋ̀wɛ̂lii ka ǹɛɛ naa Ɣâla é gɔ́lɔŋ.

⁷ Ŋ̀âla-lii-sêei, nyíi dɛɛ̂i táre kélee mai, a pâi kálii mɛi kâai, da kákili, Kúnuu-namui Zîsɛ Kôrai sârai.

Ka kákili ŋá sia mɛni-ŋai ŋí dîa

⁸ Gbɛɛ ŋái, ŋánûa, mɛnii nyíi kélee gáa a tɔ̃yâi, zɛŋ nyíi kélee ƃaa kɛ́-maa káa mai, tenîŋ mo-mɛni kélee, zɛŋ nyíi kélee maa waâi, zɛŋ nyíi kélee ǹɛ́lɛɛ̂i, zɛŋ nyíi kélee laa-maa-tɛ káa mai, mɛni lɛ́lɛɛ kélee à kɛ̀ naa, da zɛŋ nyíi kélee maa nɛɛ̂i dí ǹáa maa tɛ́i, ka kákili ŋá sia e pîlaŋ mɛni-ŋai ŋí dîa.

⁹ Mɛni-ŋai kélee ka maa kɔ́ri ńyêei, ka zɔlɔ ƃó ńyêei, ka mɛni ǹái, ka ŋ́gaa gɛ̂i, ka díkɛ. Nii-see-Ɣalai a pâi kɛ̂i kákɔlɛ.

Dísama-sãai maa-kili-ŋa-ponoi

¹⁰ Ǹíi nɛɛ̂i Kúnuu-namui kponôi a dámaa a gɛ́ɛ gbɛɛ ŋái ka ŋɔ́nɔ kpáaŋ ḿaa-mɛni ma; tɔ̃yâ ma, ká kɛ̀ a kákpaaŋɔɔ ḿaa-mɛni ma, kɛ́lɛ, pɔ̂ri fe kɛ́ ni kâa.

¹¹ Fe ŋ̀wɛ̂lii ŋa mɛni da kélee ƃo e pîlaŋ sɛŋ nyíi kélee ma ŋa ŋ̀wɛ̂lii; kpɛ́ni fêi, ŋa nâa gɔ́lɔŋ a gɛ́ɛ à nɛ̀ɛ ma ŋ́gɛ-pere é kɛ́ leŋ, ńii lâai.

¹² Ŋa berei kɔlɔŋ ŋa pɔ̂ri ŋ́gbîŋ maa yenîi lai. Ŋa berei kɔlɔŋ ŋa pɔ̂ri sɛŋ támaa sɔlɔ ƃôi lai. Pere-sii kélee su ŋa dáre kɔlɔŋ berei ŋa pɔ̂ri pelâi la da berei ŋa puru siɣêi la, berei ŋa pɔ̂ri sɛŋ támaa sɔlɔ ƃo la da berei ŋa pɔ̂ri kɛ̂i la a kôlo-nuui.

¹³ Ŋa pɔ̂ri mɛni kélee kɛ̂i gbonôi nyíi a ńzu kpanaŋ.

¹⁴ Kɛ́lɛ, ka sɔŋ-lɛlɛ kɛ̀ a gɛ́ɛ kwa ka-ni ku ŋámɛni-kpɔ̂lui siɣe.

¹⁵ Ǹyaŋ káai a Felepâ-ŋai kákpîŋ ka gɔ́lɔŋ a gɛ́ɛ Duŋ Lɛ́lɛɛi kɔ́ɔ pîlaŋ-tãi, tãi ŋa kùla la Masadonia-Korai-toli-kpɔŋ tɔnɔ máŋ fe kpɔŋ ni mâ sama-sãa tɛɛ-mɛni su da zɔlɔ ƃo-mɛni, fɛ̂ɛ nɔ́ káa tɔnɔ;

¹⁶ kpɛ́ni fêi, ka kpɔŋ-maa tɛ̀ɛ ḿbɔ máŋ Tɛsɛlonaika é tɛ́ɛ tɔnɔɔ ma.

¹⁷ Zu-kulai fa a gɛ́ɛ ŋa sama-sɛŋ kɔ́rîi; kɛ́lɛ, ńii lâai zɛŋ mɛni ma Ɣâla a pâi dɛɛ̂i kápɔ zama-sɛŋ mɛni mai.

¹⁸ Ŋa fela-fei sɔlɔ ƃo a ǹáa fɛɛ, dɛɛ nyíti ma máŋ. Náa fɛɛ̂i. Zama-sɛŋ ka dɛ̀ɛ a Ipɛfɔlɔdaitɔi, ŋa zɔlɔ ƃò. È kɛ̀ a sâla-sɛŋ kúŋ nɛ̃ɛ nyíi Ɣâla e ǹyée see mu lii-laa sui.

¹⁹ Ŋáɣâlai a pâi kánîa-sɛŋ kélee tɛɛ̂i kápɔ é kúla ŋɔfólo-laai su-tɔɔ-laai su Zîsɛ Kôrai kponôi.

²⁰ Fólo-laa é kɛ́ Káɣâlai ma, nyíi gáa a Kúnâŋ wɔlɔ-wɔlɔ da wɔlɔ-wɔlɔ. É kɛ́ tí.

Ǹaa-ti-maai gbɛɛ ŋái

²¹ Ka kála ti Ŋ̀âla-ƃelai kélee dîa Zîsɛ Kôrai kponôi. Káƃarâai nyíi-ŋai kwa dîa-ni kúkaa naai, dí fàa kâa.

²² Ŋ̀âla-ƃelai kélee dí fàa kâa. Gâloŋ Siizɛ ŋɔpɛ́rɛi mu-ƃelai kpîŋ díwɔ̂i tɛɛ̂i.

²³ Kúnuu-namui Zîsɛ Kôrai ŋɔƃɛlɛ-sêei é kɛ́ kámɔ̂leŋ kɔlɛ.