Filipə 2 - Bible

Kôrai ŋɔmaa-yeŋ da ŋɔmaa-tɛi

¹ Mɛni ma à kɛ̀ ŋa-nɛnɛ káa Kôrai kponôi, wɛli-kɛ-maa kpɔŋ-maa, kámɔ̂leŋ ni ka-kɛ-zu-tɔnɔɔi, da wɛli-kɛ-maa, é pɛ́lɛ maloŋ-kaa ma,

² ka ŋálii-nɛ̃ɛi lá fɛ́ɛ a kili-ŋa-sia tɔnɔ, wɛli-kɛ-maa tɔnɔ, a gɛ́ɛ ká kɛ́ zu tɔnɔɔ kili-ŋa-sia tɔnɔ é kɛ́ káyêei.

³ Káfe ŋɛi-kpala-mɛni kélee da kɛ̀ kpaa máŋ yoŋka-mɛni kélee, kɛ́lɛ, ka kákpîŋ maa yeŋ, ka káƃarâai siɣe a nûa lɛ́lɛɛ e tɛɛ káa kpîŋ kâa.

⁴ Káa tɛi-tɛi ŋí káfe kákpîŋ-mɛni su kàa nɔ́, kɛ́lɛ ka káƃarâai dímɛni su kaa máŋ.

⁵ Gili-ŋa-siai ŋí kɛ́ kákili ŋá, nyíi kɛ̀ Zîsɛ Kôrai kponôi.

⁶ Berei máŋ è kɛ̀ la a Ɣâlai, ve kánaŋ ni Ŋɔɣâla-laai ma.

⁷ Kɛ́lɛ, e Ŋɔɣâla-mɛnii làa, é gbîŋ kɛ́ yɛ̂ɛ luɛ. Dí zɔlɔ ƃo yɛ̂ɛ núu-kpune.

⁸ Gɛ́ɛ yɛ̂ɛ núu-kpune, è gbîŋ maa yeŋ é kɛ́ a woo-mɛni-nuu. Ŋɔwoo-mɛnii ŋí è gɛ̀ kpɔ́ é fáa a gɛ́ɛ é sáa. È sàa máŋ wúru su-tíyeŋɔɔ ma.

⁹ Maa-mɛni ma Ɣâla e m̀aa tɛ̂ a gɛ́tɛ, e láa see ma nyíi dɛɛ̂i láa kélee mai,

¹⁰ a gɛ́ɛ Zîsɛ láai su núu kélee dí pɛlɛ díŋumɛ ŋá, diai kélee díkaa ŋ̀elei sui, kpaa máŋ diai kélee díkaa ǹɔii mai, kpaa máŋ diai kélee díkaa ǹɔii mu-perei,

¹¹ a gɛ́ɛ ŋɔ́nɔ la-gbɔ kélee e m̀o a gɛ́ɛ Zîsɛ Kôrai káa a Kúnuu-namui Kúnâŋ-Ɣala ŋɔfólo-laai mɛni ma.

Díkaa fólôi yɛ̂ɛ kwaa-ponoɔ ŋ̀éniɛi su

¹² Mɛni ma ŋáwɛli-kɛ-maa-ƃelai, yɛ̂ɛ berei ka wɔ́lɔ wóo mɛni kɛ̀ lai, ka nâa kákpîŋ ƃalo-laa kɔri a yao-maa da maa kpɛ̃liŋ. Vè kɛ̀ nɔ́ a ŋ́ɛi, kɛ́lɛ, fɛ̂ɛ nɔ́ ká gɛ́ máŋ ŋ́ɛi pôlu.

¹³ Kpɛ́ni fêi, Ɣâla káa tíi kɛ̂i kákponôi a gɛ́ɛ ká ŋɔnîa-mɛnii kɛ́ ká tíi kɛ́ ŋɔnîa-mɛni lɛ́lɛɛi mɛni ma.

¹⁴ Ka mɛni kélee kɛ́, káfe káŋuŋ-su-woo sàa, káfe mare-kɛɛ kɛ̀,

¹⁵ a gɛ́ɛ kásɔŋ fè kɛ̀ káa kámaa e waa, kakɛ a Ɣâla ǹônii nyíi-ŋai dísɔŋ fe diai, tãi kákaa la ŋulu-ƃelai da moo-ƃelai sama, nyíi-ŋai ka fôlo dísama yɛ̂ɛ kwaa-ponoɔ ŋ̀éniɛi sui.

¹⁶ Ka vulu-laa-wooi sóŋ a gbanaŋɔɔ, a gɛ́ɛ tãi Kôrai ŋɔɣelei a seri lai, ŋá kɛ́ a ńii nɛ̃ɛ a gɛ́ɛ fe kîrɛ siɣe ni kpɛni, kpaa máŋ fe tíi kɛ́ ni kpɛni.

¹⁷ À kɛ̀ máŋ da ŋ́ãa pù zâla-sɛŋ ma nyíi gáa a kálaa-lai da kátii kɛ́ɛ Ɣâla mɛni mai, ńii nɛɛ̂i kwa ka-ni ku kɛ́ lii-nɛ̃ɛ kula kúkelee.

¹⁸ Bere nɔ́ ƃe fɛ̂ɛ káa máŋ kálii e nɛ̃ɛ la kwa ka-ni ku lii-nɛ̃ɛ kula.

Temete da Ipɛfɔlɔdaitɔ

¹⁹ Kili-kɛ-zu káa ńyêei Kúnuu-namui Zîsɛ kponôi a gɛ́ɛ ŋá Temete tɛɛ kápɔ naa a maa félaa a gɛ́ɛ ńii é nɛ̃ɛ a kámɛi-tuŋ mɛniɛɛ.

²⁰ Núu da fe ńyêei é kɛ́ yɛ̂ɛ ǹyaa, nyíi gbaaŋɔɔ̂i kámɛni ma kpɔ́ a tɔ̃yâi.

²¹ Da díkpîŋ-mɛni su kàa, kɛ́lɛ, Zîsɛ Kôrai ŋɔi fei.

²² Kɛ́lɛ, Temete káa a tii-kɛ-nuu lɛ́lɛɛ, ka gɔ́lɔŋ, berei kwa ǹyaa kwa tíi kɛ́ la Duŋ Lɛ́lɛɛi su yɛ̂ɛ loŋ-nuu da nàŋ-nuui.

²³ Mɛni ma gáa ŋ́gili ŋá a gɛ́ɛ ŋa dɛɛ kpɔ́ a maa félaa à kɛ̀ ŋà mɛ̀ni berei ḿaa-mɛni a pâi kɛ̂i lai.

²⁴ Ŋ́gili káa Kúnuu-namui ma a gɛ́ɛ ńyãa kpîŋ máŋ ŋa pâi naa nɔ́ tãi kpua yêe mu.

²⁵ Ŋa ŋ́gili ŋá sía ŋa gáa a gɛ́ɛ ǹɛ́lɛɛ̂i ŋa Ipɛfɔlɔdaitɔ tɛɛ kápɔ naa. Gáa a ḿarâŋ nuu, gɛ ƃo a ḿarâŋ tii-kɛ-nuu. Gáa ŋɔ́nɔ a ḿarâŋ-kɔkuluƃa. Gáa a kákela da ŋákpɔŋ-maa-nuu.

²⁶ Kpɛ́ni fêi, è kɛ̀ ŋ̀wɛ̂lii é kákelee kákaa kpɔ́ a maa félaa, ǹyaŋ mɛni-kpɔ̂lu è kùla ma, kpɛ́ni fêi, ká mɛ̀ni a gɛ́ɛ è kɛ̀ kɔ́lɛ̂i.

²⁷ Tɔ̃yâ ma è kɛ̀ kɔ́lɛ̂i. È kɛ̀ pâi saâi. Kɛ́lɛ, Ɣâla e m̀alôŋ kàa. Ǹyaa tɔnɔ nɔ́ fei, kɛ́lɛ, e ḿalôŋ kàa ńyãa máŋ a gɛ́ɛ malôŋ támaa fe too má.

²⁸ Mɛni ma ŋa ŋ̀wɛ̂lii kpɔ́ a gɛ́ɛ ŋa dɛɛ a gɛ́ɛ kà gàa ka lii-nɛ̃ɛ kula ŋɔ́nɔ, a gɛ́ɛ ŋɔ́nɔ ńii fe sɛlɛŋ a dámaa.

²⁹ Mɛni ma ka káyee see mù a lii-nɛ̃ɛ Kúnuu-namui kponôi; ka ƃâa kɛ́ núu kɛ́ɛ ŋí ma,

³⁰ kpɛ́ni fêi, è kɛ̀ pâi saâi Kôrai ŋɔtíi mɛni ma, e Ǹɛ̃wo see a sɛɣɛ a gɛ́ɛ é kákpɔŋ-maai láa fɛ́ɛ ḿɛni ma.