Ɛsdrasə 9 - Bible

Dí Ɛzura kíli ŋá pòno a gɛɛ Zuda-ŋai díkaa sîi da kpɛ́ni-ŋa kulâi a nɛnî

¹ M̀ɛni-ŋai ŋí kélee kɛ́ɛ pôlu ma, Eezuɛ láa túɛ-ƃelai da-ŋa dí pà ḿbɔ naa. Dí m̀o ḿâ a gɛɛ zâla láa soŋ-ƃelai, Liiva-ŋai da Eezuɛ-ƃelai da díyee píli sîi da kpɛ́ni-ŋa dílônii-nɛyãai kùla mɛni su a dínɛyâa. Ǹɛyâai ŋí díkaa a Amɔŋ, Môa da Ize-ƃelai dílônii-nɛyaa kpaa máŋ dí kùla Keena-ŋai, Ita-ŋai, Pɛriza-ŋai, Zɛbuza-ŋai da Amola-ŋai dísuui su. Da kɛ́ tûai a ƃaa kûla ma pere yɛ̂ɛ berei ǹɔii ŋí su-ƃelai kpaa máŋ ǹúu suu-ŋai ŋí su-ƃelai da tûa lai.

² Zûu kpakolo-ŋai díkɛ̀ sîi da kpɛ́ni-ŋa dílônii-nɛyaai kulâi a dínɛyâa. Dí da-ŋa kùla a nɛyâa dílônii-sinaai mɛni ma. M̀ɛnii ŋí a gɛ́ nani a kɛ́ Ɣâla ŋɔnûai dîa. Ǹúu láa túɛ-ƃelai ƃé díkaa m̀ɛnii ŋí kɛ́-mɛni láa túɛ.

³ Tãi ŋá m̀ɛnii ŋí mɛ̀ni lai, ńii è tòo pôlu a ŋ̀ánaa. Nya ƃe ŋá ŋáseɣe fàla-fala ḿâ ŋá ŋ́uŋ lêɣa wêeŋ, ŋá ńa-leɣa pú, ŋá sée ǹɔii ma a malôŋ-pere.

⁴ Diai Eezuɛ Ɣalai wóo mɛ̀ni é pîlaŋ zɔnyɔ̂ŋ ŋí ma nyii gɔ́-soŋ-ƃelai lène pôlu a maa ŋúŋ díkɛ̀ gɛ̂i, dí yào dí kpɛ̃lîŋ. Dí pà dí tínaŋ ḿâ. Ŋá lɛ̀ɛ seê-ni-naa malôŋ-pere su é lɛ́ɛ la zu ŋ̀ele-wulii sala kúla sáma-sɛŋ tɛɛ tãi é seri.

⁵ Tãi ŋ̀ele-wuli sala kùla tãi è sèri lai, ŋá m̀u sìɣe ŋá kúla ƃɛ́i ŋá kɛ̀ seê-ni naa m̀alôŋ-perei sui. Ŋá seɣe fála-falaai è kɛ̀ ḿâ, ŋá ŋ́gbêleŋ pîlaŋ ǹɔii ma ŋá ńyee sã́a ŋá Ŋáɣâlai Yâwɛɛ fɛli.

⁶ Ŋá m̀o ńyɛ̂ɛi, “Óo Ŋáɣâlai, ŋumɛ káa ḿâ a gɛɛ ŋá ŋ́uŋ mu siɣe íŋɛi túɛ. Kúsɔnyɔ̂ŋ su a kɛ́tɛ a tɛɛ kúkpono ma, a tɛ́ ŋ̀ele-kɔlɔŋ su.

⁷ É kúla kúnuu-pɔlɔ-ŋai díwɔ̂ ɣele-ŋai dîa, é tóo sâa ma, kúai a ínûai, kwa sɔnyɔ̂ŋ kɛ́ a yá a zu kɛ́tɛ. Kúsɔnyɔ̂ŋ-ŋai da gɛ́ kúkâloŋ-ŋai da kúsâla láa soŋ-ƃelai é pɛ́lɛ kúla kpîŋ kûa kwa too lɔii ŋuŋ da kpɛ́ni-ŋa mɛi kâloŋ-ŋa yêei. Da kú ta-ŋa paa, da sãâ kula kú ta-ŋa yêei, da lí a kúta-ŋa luɛ-laa su. Da ƃaâ kula kûa a ŋ̀ánaa, ǹyaŋ díkaa nɔ́ niî sɔnyɔ̂ŋ kɛ̂i.

⁸ Tãi kpuai ŋí yée mu, Kúɣâlai Yâwɛɛ, ya kúmalôŋ káa ya ǹɛɛ naa kwa kula luɛ-laa su, kwa pá gwaa ma waai ŋí ma ŋuma-ƃo kɛ́ ƃò kúyêei. Ya kú kúla luɛ-laa su ya gɛ́ kúkɛ ƃò fúlu lâa nina su.

⁹ Kú kɛ́ a luɛ-ŋa, kɛ́lɛ ífe íyee kula ní kú mù. Í gɛ̀ Pɛsia kaloŋ-ŋai dí wála-wala làa tɛ̀ɛ kúpɔ a gɛɛ kú Ŋ̀âla-pɛrɛ Kɛ́tɛi tɔ́ɔ pôlu nyíi nûa dí wɔ́lɔ ŋ̀oloi. Ya gɛ́ kwa kɛ́ Zerusâlɛŋ taa-leei da Zuda lɔii gwaa kélee su ŋuŋ-ma ƃô su.

¹⁰ “Kɛ́lɛ loníi ma, Óo Kúɣâlai, lé ƃé kwa pɔ̂ri m̀ôi m̀ɛni-ŋai ŋí kélee da kɛ̂i, ǹaa pôlu ma? Kwa ítɔ̂ŋ-ŋai kara.

¹¹ Ítɔ̂ŋ-ŋai í dɛ̀ɛ ítii kɛ́-ƃelai pɔ́ nyii-ŋai díkaa a ílono kɛ́-ƃelai, kúfe kúyee see ní mu. Dí m̀o kûa a gɛɛ ǹɔii kwa liî zui, gáa a nani lɔii. Diai kɛ̀ naai dí ǹaa maa tĩa kàra a ƃaa kûla maa tua-ŋa kɛ́ɛ. Dí mɛni nyɔ́mɔɔ sii támaa kɛ̀ naa.

¹² Dí m̀o kûa a gɛɛ kúfe ǹaa-ƃelai dílônii-nɛyãai da kùla a nɛnî kúmɛni ma kpaa máŋ kú kúlônii-nɛyãai da tɛɛ dípɔ a gɛɛ dí díkula a nɛnî. Kúfe tela kpɔŋ mâa tɛ̀ɛ da pɔ́ a gɛɛ é tɔ́ɔ kpaa máŋ kú lào-laa kɔ́ri díyêei, à kɛ̀ kwa ŋ̀wɛ̂lii kú ǹɔii kpîŋ ŋ̀aa nɛ̃ɛ kula, kwa sìɣe naa, ǹaa é tínaa lɛ́ɛ kúlônii yêei wɔ́lɔ-wɔlɔ da wɔ́lɔ-wɔlɔ.

¹³ Berei máŋ ya kúkula maa kɛ́ la kúsɔnyɔ̂ŋ-ŋai da kútûa-pere nyɔ̂ŋ-ŋai mɛni mai, kú gɔ́lɔŋ a gɛɛ yá Ɣâla, íkaa a Kúɣâla. M̀ɛni kula mai í gɛ̀ a kúai, vé seri ní máŋ kúsɔnyɔ̂ŋ-ŋai da dua-pere nyɔ̂ŋ-ŋai su nyíi kú gɛ̀ a yai. Ya téla fáa ma kúkaa ɣele ma.

¹⁴ Kwa pɔ̂ri ŋɔ́nɔ kúyee kulâi ítɔ̂ŋ-ŋai mu kwa ǹúu nyɔ́mɔɔ-ŋai ŋí kú nɛnî kula kúkîe-ni loai? Kwa gɛ̀ tí, ya pâi ílii ŋwânai kpɔ́ kûa í kúsu kara kútɔnɔ kpîŋ fa lɛ̂ɛ ɣele ma.

¹⁵ Óo Yâwɛɛ, Eezuɛ Ŋɔɣâlai, íkaa a teniŋ ƃô Ɣala. Ya fáa ma a gɛɛ kúkɛ ƃò ɣéniɛ. Kwa kúsɔnyɔ̂ŋ-ŋai ƃôi yâ. Kúmaa fé nɛ̃ɛ ní a gɛɛ kú pá íŋɛi túɛ.”