Ɛsdrasə 8 - Bible

Ǹûai da Ɛzura-ni dí kùla gɔ-soŋ-laai sui

¹ Tãi Gâloŋ Atasɛra è kɛ̀ la a kâloŋ Pɛsia lɔii mɛi, Ɛzura da ǹûai kùla gɔ-soŋ-laai su Babelɔŋ dí pá pôlu Zerusâlɛŋ, dísuui láa túɛ-ƃelai láa káa ŋí:

^2-3 Gɛsɔŋ è kɛ̀ a Finiya ŋɔsuui su-ƃelai láa túɛ-nuu, Dania kɛ́ ƃò a Itamai ŋɔsuui su-ƃelai láa túɛ-nuu. Atu nyii kɛ̀ a Sɛkania ǹóŋ-surɔŋ ƃé kɛ̀ a Deeƃé ŋɔsuui su-ƃelai láa túɛ-nuu. Zɛkɛraya ǹyaŋ kɛ́ ƃò a Parosisii ŋɔsuui su-ƃelai láa túɛ-nuu. Dí kɛ̀ kpakolo ŋuŋ tɔ̂nɔ pôlu buu lɔ́ɔlu (150) dí kúla ǹúu suui ŋí su. Dínûa pɔlɔ-ŋai maa mɛ̂ni pɔlɔ-kɔlɔi káa naa.

⁴ Oliɛonai nyii kɛ̀ a Zeraya ǹóŋ-surɔŋ ƃé kɛ̀ a Paa-moa ŋɔsuui láa túɛ-nuu. Kpakolo ŋuŋ-feerɛ (200) ƃé kɛ̀ ǹyée mu.

⁵ Zaaziɛ ǹóŋ Sɛkania ƃé kɛ̀ a Zatu ŋɔsuui su-ƃelai láa túɛ-nuu. Kpakolo ŋuŋ saaƃa (300) ƃé kɛ̀ ǹyée mu.

⁶ Zonetaŋ ǹóŋ Eeƃɛ ƃé kɛ̀ a Idiŋ ŋɔsuui su-ƃelai láa túɛ nuu. Kpakolo buu lɔ́ɔlu ƃé kɛ̀ ǹyée mu.

⁷ Atalia ǹóŋ Zesaya ƃé kɛ̀ a Elaŋ ŋɔsuui su-ƃelai láa túɛ-nuu. Kpakolo buu lɔ́ɔlu mɛi feerɛ ƃé kɛ̀ ǹyée mu.

⁸ Sɛfatia ǹóŋ Zebadia nyii kɛ̀ a Makɔ ǹóŋ ŋɔsuui su-ƃelai láa túɛ-nuu. Kpakolo buu lɔ́ɔlu mɛi saaƃa ƃé kɛ̀ ǹyée mu.

⁹ Zeiɛɛ ǹóŋ Obadaya ƃé kɛ̀ a Zoa ŋɔsuui su-ƃelai láa túɛ-nuu. Kpakolo ŋuŋ feerɛ pôlu puu káo lɔ́ɔlu mɛi saaƃa (218) ƃé kɛ̀ ǹyée mu.

¹⁰ Zosifaya ǹóŋ Silomi ƃé kɛ̀ a Bani ŋɔsuui su-ƃelai láa túɛ-nuu. Kpakolo ŋuŋ tɔ̂nɔ pôlu buu lɔ́ɔlu mɛi da (160) ƃé kɛ̀ ǹyée mu.

¹¹ Bebai ǹóŋ Zɛkɛraya ƃé kɛ̀ a Bebai ŋɔsuui su-ƃelai láa túɛ-nuu. Kpakolo buu feerɛ káo lɔ́ɔlu mɛi saaƃa ƃé kɛ̀ ǹyée mu.

¹² Akata ǹóŋ Zonanaŋ ƃé kɛ̀ a Azika ŋɔsuui su-ƃelai láa túɛ-nuu. Kpakolo ŋuŋ tɔ̂nɔ pôlu puu (110) ƃé kɛ̀ ǹyée mu.

¹³ Adonikaŋ ŋɔsuui su-ƃelai láa túɛ-ƃelai ƃé kɛ̀ a Ɛlifelɛ, Zeuɛ da Simaya. Kpakolo buu lɔ́ɔlu mɛi da ƃé kɛ̀ díyee mu. Ǹúu-kpului ŋí su-ƃelai dí lɛ̀ɛ pôlu a gùro dí lɛ́ɛ pâi.

¹⁴ Utai da Zakɔ ƃé kɛ̀ a Biivai ŋɔsuui su-ƃelai láa túɛ-ƃela. Kpakolo buu lɔ́ɔlu mɛi feerɛ ƃé kɛ̀ díyee mu.

Ɛzura è Liiva-ŋa sìɣe Ŋ̀âla-pɛrɛ Kɛ́tɛi mu tii kɛ́ mɛni ma

¹⁵ Nya ƃe ŋá gɛ̀ ǹûai dí díŋaa tɛ́ gîe mà ǹya-leei kɔlɛ nyii a lî Aava taai ma perei. Kú gɛ̀ naa a ɣele kûu saaƃa. Ŋá gàa a gɛɛ zâla laá soŋ-ƃelai nɔ́ ƃé kɛ̀ naa. Kɛ́lɛ Liiva-ŋai da fé kɛ́ ní naa.

¹⁶ Nya ƃe ŋá ǹúu láa túɛ-ƃelai ǹɔ́ɔlu mɛi náaŋ woorɛ̂ tɛ̀ɛ da dɔ̂ŋ lɛ́-ƃelai veerɛ. Dia ƃé kɛ̀ a Ilieza, Ariɛ, Simaya Ɛnatâŋ, Zaribi, Ɛnatâŋ, Neetɔŋ, Zɛkɛraya da Mɛsulaŋ. Dɔ̂ŋ lɛ́-ƃelai láa ƃé kɛ̀ a Zoari da Ɛnatâŋ.

¹⁷ Tãi ǹûai ŋí dí pà lai, ŋá dí tɛ̀ɛ Idoo pɔ́ naa. Idoo è kɛ̀ a Kasifia kolii láa túɛ-nuu. Ŋá dí tɛ̀ɛ bɔ́ naa a gɛɛ dí marê kɛ́ da m̀arâai é pɛ́lɛ Ŋ̀âla-pɛrɛ Kɛ́tɛi mu tii kɛ́-kpakolo-ŋai dîa a gɛɛ dí nûa tɛɛ díkɛ tíi kɛ̀ Kúɣâlai ŋɔpɛ́rɛi mu.

¹⁸ Nya ƃe Ɣâla ŋɔmaloŋ kâai sârai, dí Sɛribia tɛ̀ɛ. Sɛribia è kɛ̀ a gbonôi kpanaŋɔɔ. È kùla Mai ŋɔsuui su. È kɛ̀ a Liiva nuu. È lì a kpakolo puu káo lɔ́ɔlu mɛi saaƃa nyii-ŋai kɛ̀ a ǹônii da ŋɔkáayɔɔ-ŋai.

¹⁹ Dí Azabia da Zesaya tɛ̀ɛ máŋ. Ǹûai ŋí díkɛ̀ a Melali ŋɔsuui su-ƃela. Dí dítɛ̀ɛ da díkaayɔɔ-ŋai buu feerɛ.

²⁰ É kúla ǹûai ŋí pôlu, Ŋ̀âla-pɛrɛi mu tii kɛ́-kpakolo da kpɛ́ni-ŋa díkɛ̀ naa. Díkɛ̀ a núu ŋuŋ-feerɛ pôlu buu feerɛ (220). Gâloŋ Deeƃé da ŋɔtíi kɛ́-ƃela kpaya-kpayai ƃé wɔ́lɔ ǹûai ŋí dínâŋ-ni sìɣe a gɛɛ díkɛ kpɔŋ mâa tɛ̀ɛ Liiva-ŋai pɔ́ Ŋ̀âla-pɛrɛ Kɛ́tɛi mu. È díkelee dílaa pɔ̃yɛ.

Ɛzura è ǹûai téniŋ tɔ̀ɔ sûŋ siɣéɛɛ da Ɣâla fɛli pere su

²¹ Kú kɛ́ɛ ǹyá-leei kɔlɛ nyii a lî Aava taa-leei ma perei, ŋá m̀o ǹûai dîa a gɛɛ kú sûŋ siɣe, kú ƃaa kɛ́-maa tɛ́ɛ Ɣâla pɔ́, kú marê kɛ́ a gɛɛ è kú téniŋ tɔ́ɔ kú sia-perei su, é kú maa kɔ̃ɔ kwa kúnîa pɛlɛi da kúkɔ̃liŋ kélee.

²² Ŋá kɛ̀ ŋumɛ̂i a gɛɛ ŋá gâloŋ marê kɛ́ a gɛɛ é kɔ́ kɔ́-ƃela tɛ̀ɛ kúpɔ a gɛɛ dí kú mɛi káa kúsiai su. Ŋá gɛ̀ tí kpɛ́ni fêi, ŋá mò ma a gɛɛ diai kélee dí lâai a Kúɣâlai, a dí maa kɔ̃̂ɔ. Diai da dípôlu tɔ̀ɔ mai, a díkula maa kɛ̂.

²³ Nya ƃe kú sûŋ sìɣe, kú Ɣâla fɛli a gɛɛ é kú mɛi kaa. Ɣâla è kúfɛli wôoi su tòo a ǹɛ́lɛɛ.

Zama sãâi Ŋ̀âla-pɛrɛ Kɛ́tɛi mɛni mai

²⁴ Zâla láa soŋ-ƃela kpaya-kpayai sáma, ŋá Sɛribia da Asabia sìɣe é pɛ́lɛ díƃarâi buu ma.

²⁵ Nya ƃe ŋá gánei, gôoi da zɛŋ fôlo-ŋai gâloŋ, ŋɔlia-woo ƃó-ƃelai, ŋɔtíi kɛ́-ƃela kpaya-kpayai da zama-sãai Eezuɛ-ŋai dí pà lai, ŋá gélee kɔ̀ɔŋ ŋá dí tɛ́ɛ zâla láa soŋ-ƃelai ŋí pɔ́ a gɛɛ dí tíi kɛ́ la Kúɣâlai ŋɔpɛ́rɛi mu.

²⁶ Zãâi ŋá dɛ̀ɛ dípɔi, dia ká ŋí: Káne pãŋ wála buu náaŋ kao lɔ́ɔlu mɛi náaŋ (49,000), káne sɛŋ-folo ŋuŋ tɔnɔ (100) nyii ŋɔ wuyɛ a pãŋ ŋuŋ tɔnɔ pôlu buu lɔ́ɔlu (150) da gôo pãŋ wála lɔ́ɔlu mɛi feerɛ pôlu ŋuŋ lɔ́ɔlu (7,500), gôo kawulu buu feerɛ nyii ŋɔwuɛ è kɛ a pãŋ puu káo lɔ́ɔlu mɛi naaŋ é pɛ́lɛ ƃara kawulu lɛ́lɛɛ feerɛ ma nyii zɔ̃ɔ è kɛ̀ nyɛ̂ɛ gôo kawulu feerɛi.

²⁷ Gôo gbuma kawulu buu feerɛ nyíi ŋɔwuɛ è kɛ̀ a dɛ̂ɛ pãŋ lɔ́ɔlu mɛi saaƃa mai. Ƃara kawulu lɛ́lɛɛ feerɛ nyíi ŋɔwuɛ è a dɛɛ́ gôo kawulu tɔnɔ ma.

²⁸ Nya ƃe ŋá m̀o dîa ńyɛ̂ɛi, “Yâwɛɛ nyii gáa a kánûa pɔlɔ-ŋai Díɣâlai, aâ ǹyée lɛ́ kâa a ká kúla ká ƃarâai sáma a ká kɛ́ a ŋɔtíi kɛ́-ƃela. Berei ƃé máŋ gánei da gôo sɛŋ-folo-ŋai ká pà là bɔ́ a sama sãai, a díkɛ la a ŋɔtíi kɛ́-sãa.

²⁹ Kà zãâi ŋí mɛi káa kpɔ́ a ǹɛ́lɛɛ é lɛ́ɛ la zu ká seri a dia Kúɣâlai Yâwɛɛ ŋɔpɛ́rɛi kɛ́tɛi lá Zerusâlɛŋ. Kà sèri a dia, ka díwuɛ kɔ̂ɔŋ Ŋ̀âla-pɛrɛi mu zâla láa soŋ-ƃelai, Liiva-ŋai, da Eezuɛ-ŋai láa túɛ-ƃelai kélee ŋɛ́i.”

³⁰ Nya ƃe zâla láa soŋ-ƃelai da Liiva-ŋai dí gánei da gôoi sìɣe é pɛ́lɛ zɛŋ fôlo-ŋai dîa, a gɛɛ dí lí a dia Kúɣâla ŋɔpɛ́rɛ kɛ́tɛi lá Zerusâlɛŋ.

Ǹûai dí lène pôlu Zerusâlɛŋ

³¹ Kú kùla ǹyá lêei kɔlɛ nyii a lî Aava taai ma perei, kú lí pôlu Zerusâlɛŋ a ŋ̀áloŋ maa ŋuŋ ŋɔfólo puu káo feerɛ ɣele. Kúɣâlai è kú maa kɔ̃ɔ kúkpɔara-ƃelai yêei da sɛŋ nyɔ́mɔɔ da kpɛ́ni-ŋa kúsia perei su.

³² Tãi kú seri la Zerusâlɛŋ, kú kúfii tɔ̀ɔ a fólo saaƃa.

³³ Ŋ̀ele kûui ǹáaŋ ɣelei, kú lì Ŋ̀âla-pɛrɛ Kɛ́tɛi lá. Kú gánei, gôoi da zɛŋ fôlo-ŋai wuyɛ kɔ̂ɔŋ kú dí tɛ́ɛ zâla láa soŋ-nuui Mɛrimɔ pɔ́, nyíi kɛ̀ a Yuraya ǹóŋ. Peniya ǹóŋ Ilieza, Liiva nuu feerɛ, Zasua ǹóŋ Zozaba da Bɛnui ǹóŋ Noadia-ni díkɛ ƃò naa díkɔlɛ.

³⁴ Kú zãâi kélee kɔ̀ɔŋ kú dílono kú dílaa síɣe a tãi tɔnɔi tí.

³⁵ Diai kélee kùla gɔ-soŋ-laai su dí lène pôlui, dí pà a kéreŋ sama-sãa Eezuɛ Ŋɔɣâlai mɛni ma. Zãâi ŋí ƃé kɛ̀ a niŋa nâɣa puu káo feerɛ Eezuɛ sii puu káo feerɛ mɛni ma, ƃála sirɛ buu lɔ́ɔlu mɛi náaŋ kao lɔ́ɔlu mɛi da, da ƃála lônii buu lɔ́ɔlu mɛi feerɛ kao lɔ́ɔlu mɛi feerɛ. Dí pà máŋ a ƃoli sîrɛ puu káo feerɛ a sɔnyɔ̂ŋ sama-sãa. Dí pà a daa tûlɛ-ŋai ŋí kélee dí díkereŋ a sama-sàa Yâwɛɛ mɛni ma.

³⁶ Gɔlɔi Pɛsia kaloŋ è dɛ̀ɛ dípɔi, dí pà la máŋ dí dɛɛ Yufeletii Ya-leeii ŋɔfólo liî pere lɔii mɛi nuui pɔ́ da ŋɔlɔii-ƃela kpaya-kpayai. Gɔlɔi ŋí ƃé gɛ̀ ǹûai ŋí díkɛ díyee sèe dímu díkɛ kpɔŋ mâa tɛ̀ɛ dípɔ Ŋ̀âla-pɛrɛ Kɛ́tɛi mu tii kɛ́ mɛnii ma.