Ɛsdrasə 5 - Bible

¹ Zuda-ŋai kɛ́ɛ da lène pôlu Zuda lɔii da Zerusâlɛŋ taa-leei sui, Ɣâla è ŋɔlono kɛ́-ƃelai Eegaa da Zɛkɛraya tɛ̀ɛ ǹaa. È dí tɛ̀ɛ a gɛɛ dí Ŋ̀âla-pɛrɛ Kɛ́tɛi tɔɔ-ƃelai líi kúla, ǹyaa Eezuɛ Ɣalai ǹáai su. Zɛkɛraya ǹâŋ-láa ƃé kɛ̀ a Ido.

² Tãi Sɛtiɛ ǹóŋ Zɛrubabɛɛ da Zasua ǹóŋ Zosada dí ŋ̀orɛ̂-woo-ŋai ŋí mɛni lai, dí pɛ̀lɛ ŋɔ́nɔ Ŋ̀âla-pɛrɛ Kɛ́tɛi tɔɔ̂ ma Zerusâlɛŋ taa-leei su. Ɣâla ŋɔlono kɛ́-ƃela feerɛi ŋí dí kpɔŋ-maa tɛ̀ɛ dípɔ.

³ Ǹaa kɛ́ɛ tíi, Tatɛnai nyíi kɛ̀ Yufeletii Ya-leei ŋɔfólo liî-pere lɔii kpiniŋ mɛi, Sɛta-bozenai da díƃarâi nua kpaya-kpayai dí pà Zerusâlɛŋ dí dímarê kɛ́ dîyɛɛ dîai, “Gbɛ́ɛ ƃé fàa ma a gɛɛ ká Ŋ̀âla-pɛrɛ Kɛ́tɛi ŋí tɔ́ɔ ƃɛ́ pôlui?”

⁴ Dí dímarê kɛ̀ dîyɛ dîai, “Gbɛ́ɛ-ni ƃé Ŋ̀âla-pɛrɛi ŋí tɔɔ-mɛni láa tuɛi?”

⁵ Kɛ́lɛ Ɣâla è tɔ̀ɔ Zuda-ŋai ŋí láa túɛ-ƃelai pôlu. Pɛsia nuu kpaya-kpayai dí gbɛ̀tɛ a gɛɛ dífe mɛni da kɛ̀ a Zuda-ŋai é lɛ́ɛ la zu dí kɔlɔ pɔ̃yɛ Gâloŋ Darɔ pɔnaa dí ǹá woo mɛni.

⁶ M̀ɛnii dí bù gɔlɔi ŋí sui, nya ká ŋí.

⁷ “Gâloŋ Darɔ, lii-see é kɛ́ íyêei íkâloŋ-laai su.

⁸ “Gâloŋ, kwa m̀ôi yâ a gɛɛ kú lì Zuda lɔii kpiniŋ su. Kú liɛɛ̂i, kú gàa a gɛɛ dí káa Ŋ̀âla-pɛrɛ Kɛ́tɛi tɔɔ̂i pôlu Zerusâlɛŋ taa-leei su. Díkaa Ŋ̀âla-pɛrɛ Kɛ́tɛi ŋí tɔɔ̂i a kɔni kpaya-kpaya saa-ŋa dí kɛ́ wúru-saa lɛ́lɛɛ-ŋa tɔ̀ɔ gɔ́ɔ mu, díkɛ siɣãŋ tînaŋ ma. Díi ŋí a liî kpɔ́ tuɛ-pere a ǹɛ́lɛɛ.

⁹ “Nya ƃe kú Zuda-ŋai láa túɛ-ƃelai marê kɛ̀ a gɛɛ dí ǹúui láa lɛ́ kûa nyii ŋ̀wála-wala laai tɛ̀ɛ dípɔ a gɛɛ dí Ŋ̀âla-pɛrɛ Kɛ́tɛi tɔ́ɔ pôlui.

¹⁰ Kú ŋɔ́nɔ dí marê kɛ̀ a gɛɛ dí dílaa túɛ-ƃelai láa lɛ́ kûa a gɛɛ kú bɔ̃yɛ kɔlɔ ma kú dɛɛ yɛ̂.

¹¹ “Nya ƃe dí kúwoo su tòo dîyɛɛi, ‘Kúkaa a ŋ̀elei da ǹɔii kpɛtɛ Ɣâlai yée mu-ƃela. Kúkaa Ŋ̀ala-pɛrɛ kɛ́tɛi ŋí tɔɔ̂i pôlu nyíi Eezuɛ kaloŋ wála-walai è wɔ́lɔ dɔ̀ɔi. È dɔ̀ɔ é siɣãŋ-ŋa tínaŋ ma é mu-sãa kélee pú mù. M̀ɛni-ŋai ŋí kɛ́ɛ mii a tɛɛ a kóraŋ támaa.

¹² Kɛ́lɛ kúnuu-pɔlɔ-ŋai dí wɔ́lɔ ŋ̀elei kpɛtɛ Ɣâlai líi ŋwàna. Nya ƃe Ɣâla è ǹɛɛ naa Nɛbukinaza nyíi kɛ̀ a kâloŋ Babelɔŋ lɔii mɛi é dí yée mɛi ɣále. È díyee mɛi ɣâle é Ŋ̀âla-pɛrɛ Kɛ́tɛi su kara, é lí a dia luɛ-laa su Babelɔŋ.

¹³ Kɛ́lɛ Sarɔ kɛ́ɛ da gɛ́ a kâloŋ Babelɔŋ lɔii mɛi, ŋɔkâloŋ-laa koraŋ maa-ŋuŋ su, è wála-wala-laa tɛ̀ɛ Zuda-ŋai pɔ́ a gɛɛ dí Ŋ̀âla-pɛrɛ Kɛ́tɛi tɔ́ɔ pôlu.

¹⁴ Gâloŋ Nɛbukinaza è gôo, da káne kawulu-ŋa kùla Ŋ̀âla-pɛrɛ Kɛ́tɛi mù é lí a dia Babelɔŋ é dípu ŋɔɣâla-pɛrɛi mu. Kɛ́lɛ Gâloŋ Sarɔ è zãâi ŋí kùla naa é dítɛɛ pôlu Zerusâlɛŋ. È ǹyée kpàmo Sɛbasa ma a gɛɛ é kɛ́ a Zuda lɔii mɛi nûu. È zãâi ŋí kélee tɛ̀ɛ bɔ́.

¹⁵ È m̀o ma a gɛɛ é lí a zãâi ŋí a gɛɛ da kpɛ̀ɛ Ŋ̀âla-pɛrɛ Kɛ́tɛi tɔ̂ɔ ma pôlu ƃɛ́i è wɔ́lɔ kɛ̀ naa a bɔlɔi, é dípu mù.

¹⁶ Nya ƃe Sɛbasa è pà é Ŋ̀âla-pɛrɛi kɔ́ɔ pîlaŋ. É kúla tãi tí ma é tóo sâa ma, díkaa nîi dɔɔ̂i dífe niî kpɛɛ ní ma.’ ”

¹⁷ “M̀ɛni ma, gâloŋ, ya fàa mà, gɛ́ dí Babelɔŋ kaloŋ pɔlɔ-ŋai, dímɛni pɔ̂lɔ-kɔlɔ-ŋai su kɔ́ri. Kwa ŋ̀wɛ̂lii kú gáa à kɛ̀ Gâloŋ Sarɔ è wála-wala-laa tɛ̀ɛ Zuda-ŋai pɔ́ Ŋ̀ala-pɛrɛ kɛ́tɛi tɔɔ mɛni ma pôlu Zerusâlɛŋ. À kɛ̀ vé tí, gɛ́ ní m̀ɛnii ílii su é pîlaŋ kûai í m̀ó kûa.”