Ɛsdrasə 4 - Bible

Nûa dí tɔ̀ɔ Ŋ̀âla-pɛrɛ Kɛ́tɛi tɔɔ-ƃelai dîa

¹ Zuda da Bɛŋsima dísuui su-ƃelai díkpɔara-ƃela díkɛ̀ naa. Ǹûai ŋí dí mɛ̀ni a gɛɛ ǹúu suui ŋí su-ƃelai da kula gɔ sôŋ laai su da kɛ́ Eezuɛ Ɣalai Yâwɛɛ ŋɔpɛ́rɛ kɛ́tɛi tɔɔ̂i pôlu.

² Dí lì Zɛrubabɛɛ da ǹúu sûu-ŋai láa túɛ-ƃelai pɔ́ naa dîyɛɛ dîai, “Kwa kâa-ni kwa pâi Yâwɛɛ ŋɔpɛ́rɛi tɔɔ̂i. Kúa máŋ kwa ŋ̀âla-tɔnɔi ŋí fɛ̀li. É síɣe tãi ma Asiria kaloŋ Ɛsɛadɔŋ è pà la a kúa ǹɔii ŋí sui, Ŋ̀âlai ŋí nɔ́ ƃé kwa sâla kùla ma a kóraŋ kélee.”

³ Nya ƃe Zɛrubabɛɛ, Zasua da ǹúu sûu-ŋai láa túɛ-ƃelai dí m̀o dîa dîyɛɛi, “Kúfe kpɔŋ-maa da kélee wɛ̂lii káyêei Ŋ̀âla-pɛrɛ Kɛ́tɛi tɔɔ mɛni ma. Kúa kpîŋ ƃé pâi dɔɔ̂i yɛ̂ɛ berei Pɛsia kaloŋ Sarɔ è m̀o la kûai.”

⁴ Nya ƃe diai gɔ́-soŋ-ƃelai lenéɛɛ pôlu dí dí kàa ǹɔii mai, díkɛ̀ yao pûi ǹûai ŋí kponôi Ŋ̀âla-pɛrɛi ŋí tɔɔ mɛni ma.

⁵ Dí yee pɛ̀lɛ ǹá-sɛŋ-kao tɛ̀ɛ máŋ Pɛsia lɔii kpiniŋ láa túɛ-ƃelai pɔ́ a gɛɛ dí tɔ́ɔ ǹûai ŋí dîa. Dí lɛ̀ɛ m̀ɛnii ŋí kɛ̂i é lɛ́ɛ la zu Sarɔ ŋɔtãi é kpɛ́ɛ Darɔ é bɔ́ɔ ŋá síɣe.

Nûa dí tɔ̀ɔ Zerusâlɛŋ taa-leei tɔɔ-ƃelai dîa

⁶ Tãi dí Atasɛra kɛ̀ la a kâloŋ Pɛsia lɔii mɛi, Zuda da Zerusâlɛŋ-ƃelai díkpɔara-ƃelai dí tɔɔ-maa kɔlɔ pɔ̃yɛ gâloŋ pɔ́ naa é pîlaŋ dîa.

⁷ Nyíŋi pôlu ma, tãi dí Atasɛra kɛ̀ la a kâloŋ Pɛsia lɔii mɛi, Bisilaŋ, Miturɛda, Tabee da m̀arâai dí ŋɔ́nɔ tɔɔ-maa kɔlɔ pɔ̃yɛ gâloŋ pɔ́naa. Dí gɔlɔi ŋí pɔ̃yɛ Aramee-wooi su. Kɛ́lɛ dí bène Pɛsia-ŋai dísîi-wooi su.

⁸ Yufeletii Ya-leei ŋɔfólo liî-pere lɔii kpiniŋ mɛi nuui Leuŋ da Sisai nyii kɛ̀ a gɔlɔ pɔ̃yɛ-nuui, dí tɔɔ-ma kɔlɔ pɔ̃yɛ máŋ Gâloŋ Atasɛra pɔ́naa é pîlaŋ Zerusâlɛŋ ma. Gɔlɔ dí bɔ̃yɛi, ŋ̀óo ká ŋí.

⁹ “Gɔlɔi ŋí a kûlai ńyãa Leuŋ ńyêei kwa ḿarâai, Sisai nyii gáa a gɔlɔ pɔ̃yɛ-nuui, m̀ɛni sâa ƃó-ƃelai, ǹɔii-ƃela gbéli-ŋai nyii-ŋai díkaa a Ɛrɛ, Babelɔŋ da Susa lɔii-ƃelai. Susa taai ŋí káa Elaŋ lɔii kpiniŋ su.

¹⁰ Gɔlɔi ŋí a kulâi máŋ ǹûai yêei nyíi Gâloŋ wála-wala kɛ́tɛi Asubanipa è wɔ́lɔ dí kùla dílɔii su é lí a dia Sameria da kwa da kpɛ́ni ŋa ma, Yufeletii Ya-leei ŋɔfólo liî-pere-lɔii su.”

¹¹ M̀ɛnii dí bɔ̃̀yɛ gɔlɔi sui ǹyaa ká ŋí: “Gɔlɔi ŋí a liî Gâloŋ Atasɛra pɔ́naa, gɛ́ kùla ŋɔlɔii kpîniŋ láa túɛ-ƃelai yêei nyii-ŋai dí káa Yufeletii Ya-leei ŋɔfólo liî-pere lɔii kpiniŋ su.”

¹² “Gâloŋ, kwa ŋ̀wɛ̂lii í gɔ́lɔŋ a gɛɛ Zuda-ŋai kùla ílɔii kpîniŋ da-ŋa su, dí pá Zerusâlɛŋ taa-leei sui, da kɛ́ daa-leei ŋí tɔɔ̂i pôlu nyíi zu-ƃela tûa-pere nyɔ̂mɔɔi, dí ƃò a tɔɔ-mâ-ƃelai. Da pɛlɛ ziɣãŋ-ŋai tɔ̂ɔ ma ǹaa vé pâi tûai díkɛ kpɛɛ dîa.

¹³ Gâloŋ, yà ǹɛɛ naa ǹûai da daa-leei ŋí tɔ̀ɔ pôlu dí siɣãŋ-ŋa tínaŋ ma, ŋuŋ-fela fei-ŋa kpɛɛ-mɛni da lɔii ŋɔzuti kpɛɛ mɛni da pâi kperâi. À kɛ̀ tí, sɛŋ-kao da fé pâi ŋɔ́nɔ kɛ̂i íkâloŋ laai su.

¹⁴ Kúkaa a ítii kɛ́-ƃela. M̀ɛni ma, kúfe ŋ̀wɛ̂lii dí daa leei ŋí tɔ́ɔ pôlu. M̀ɛnii kwa ŋ̀wɛ̂lii í gɛ́i ǹya ka ŋí.

¹⁵ Gɛ́ dí gâloŋ-pɔlɔ-ŋai dímɛni-pɔlɔ kɔlɔ-ŋai su káa ŋɔ́nɔ. Da gɛ̀ tí, da pâi gâai a gɛɛ daa-leei ŋí su-ƃelai dí wɔ́lɔ kɛ̀ a tɔɔ-mâ-ƃela. Dí wɔ́lɔ mɛni kpânaŋ ŋánaa tɛ̀ɛ ǹuu láa túɛ-ƃelai pɔ́ ǹɔii kpîniŋ-ŋai su. Dífa kâa ƃaa kɛ-maa tɛ̀ɛ dípɔ. M̀ɛnii ŋí ƃé gɛ̀ daa-leei ŋí kɛ́ wòlo.

¹⁶ Kú gɔ́lɔŋ kpɔ́ a ǹɛ́lɛɛ a gɛɛ da daa-leei ŋí tɔ̀ɔ pôlu, dí siɣãŋ-ŋa tínaŋ mà, wála-wala-laa fé pâi ŋɔ́nɔ kɛ̂i íyêei Yufeletii Ya-leei ŋɔfólo liî-pere-ƃelai mɛi.”

¹⁷ Nya ƃe gâloŋ è díkɔlɔi ŋá pène tɛ̀ɛ ǹyɛɛi, “Leuŋ, yái íkaa a Yufeletii Ya-leei ŋɔfólo liî-pere lɔii kpiniŋ mɛi nûui, ka Sisai nyii gáa a gɔlɔ pɔ̃yɛ-nuui é pɛ́lɛ káƃarâi dîa nyii-ŋai díkaa Sameria da diai dí káa Yufeletii Ya-leei ŋɔfólo liî-pere lɔii kpiniŋ sui, ŋá fáa kâa.”

¹⁸ “Gɔlɔi ká dɛ̀ɛ ḿîi, daâ ǹóno mî, ŋaâ ŋ̀á káa.

¹⁹ M̀ɛnii ká bɔ̃yɛ gɔlɔi sui, ŋá ŋ̀aa-see kɛ̀. M̀ɛnii kélee ká bù zui, dí káa a tɔ̃yâ. Daa-leei ŋí su-ƃela díkaa a tɔɔ-mâ-ƃela. Dífa kâa ƃaa kɛ́-maa tɛ̂ɛ kâloŋ da kélee pɔ́.

²⁰ Diai kâloŋ-laa kɛ̀ daa-leei ŋí sui da Yufeletii Ya-leeii ŋɔfólo liî-perei, ǹûai díkɛ̀ ŋuŋ-fela-fei kpɛɛ̂i díyêei da ǹɔii ŋɔzûti.

²¹ M̀ɛni ma, ka m̀ó dîa dí kpéra díi ma é lɛ́ɛ la zu dí wóo mɛni é kúla ńa.

²² Ka gɛ́ tí a maa félaa a gɛɛ ŋákâloŋ-laai fa lâa túmo la.”

²³ Tãi kpɔ́ nɔ́ Leuŋ, Sisai da díƃarâi dí díkɔlɔi ŋ̀aa-pene sɔlɔ ƃô lai, dí dímù-siɣe a maa félaa dí lí Zerusâlɛŋ dí Zuda-ŋai kpéra díi ma a wála-wala-laa.

Ǹûai dí pɛ̀lɛ ŋɔ́nɔ Ŋ̀âla-pɛrɛ Kɛ́tɛi tɔɔ tîi ma

²⁴ Ǹûai dí kpèra Ŋ̀âla-pɛrɛ Kɛ́tɛi tɔɔ-mɛni ma a tãi su kôyaa. Kɛ́lɛ dí ŋɔ́nɔ díi kɔ́ɔ pîlaŋ Pɛsia kaloŋ Darɔ ŋɔkâloŋ-laa kòraŋ veerɛi su.