Lɛɛ gbɔwɔ ɓa 9 - Bible

Daa-tûlɛ-ŋai dí sàa

¹ Yâwɛɛ è mò Mose mà ǹyɛɛi, “Lí Gâloŋ pɔ́ naa í mó mà a gɛɛ Yâwɛɛ nyii gáa a Ibulu-ŋai Díɣâlai, ǹyɛɛ, Ǹɛɛ naa a gɛɛ ŋánûai dí lí dí ḿvɛli.

² Kɛ́lɛ à gɛ̀ ƃà wàla fáa ŋɔ́nɔ a gɛ́ɛ dí lí, ƃà dísòŋ,

³ gɛ̀ ní ŋa pâi tɔ̂ŋ kpanaŋɔɔ kpɛ̂i yâ a kɔlɔ-fela nyɔ́mɔɔ ítaa-tulɛ-ŋai dîa, ísoo-ŋai, íwɛlɛ-sôo ŋai, ísoo-falaŋ-ŋai da ítaa-tulɛ kpéli-ŋai.

⁴ Kɛ́lɛ Yâwɛɛ a pâi Eezuɛ-ŋai da Ize-ŋai dítaa-tulɛ-ŋai loai lâai a gɛ́ɛ Eezuɛ-ŋai díwɔ̂ taa-tulɛ-ŋai dífe sàa.

⁵ Yâwɛɛ è tãi lɛ̀ ǹyɛɛi, ‘Ŋa pâi nyíŋi kɛ̂i tínaa.’ ”

⁶ Nya ƃe Yâwɛɛ è gɛ̀ nɔ́ yɛ̂ɛ berei è mò lai. Ize-ŋai dítaa-tulɛ-ŋai kélee dí sàa. Kɛ́lɛ Eezuɛ-ŋai díwɔ̂-ŋai dɔnɔ kpîŋ fé saa ní.

⁷ Nya ƃe Gâloŋ è núu tɛ̀ɛ a gɛɛ é nàa káa. Kɛ́lɛ dí gàa a gɛ́ɛ Eezuɛ-ŋai dítaa-tulɛ-ŋai dɔnɔ kpîŋ fé saa ní. Kɛ́lɛ Gâloŋ líi su è kɛ̀ nɔ́ niî a gbanaŋɔɔ. Vé ǹûai lɛ́ɛ ní naa dí lí.

Mũai

⁸ Nya ƃe Yâwɛɛ è mò Mose da Eelɔŋ dîa ǹyɛɛi, “Ka luu kɔ́ɔ ŋɔŋ-tûnuŋ su ká káyee láa fɛ́ɛ la a gɛɛ Mose é bili ŋ̀elei su Gâloŋ ŋɛ́i-tuɛ.

⁹ A pâi kɛ̂i yɛ̂ɛ muluŋ-kpolo Ize lɔii mɛi gwaa kélee. Kɛ́lɛ a pâi gɛ̂i mũa é tɔ́ɔ núu-kpune kélee mà Ize lɔii su da daa-tulɛ-ŋai kélee.”

¹⁰ Nya ƃe dí nùui kɔ̀ɔ dí tɔ́ɔ la Gâloŋ ŋɛ́i-tuɛ. Mose è bìli ŋ̀elei su. È pène a mũa é tɔ́ɔ ǹûai kélee da daa-tulɛ-ŋai kélee dîa.

¹¹ Gâloŋ ŋɔpóniŋ kɛ́-ƃelai dífe pɔ̂ri ní tɔɔ̂i Mose ŋɛ́i. Kpɛ́ni fêi, mũai è tɔ̀ɔ dîa kpîŋ dîa da Ize-ŋai kélee.

¹² Kɛ́lɛ yɛ̂ɛ berei Yâwɛɛ è mò la Mose mai, Yâwɛɛ è Gâloŋ líi su kpànaŋ. Vé ŋ̀óli tɔ̀ɔ ní Mose-ni dîa.

Zãoi

¹³ Yâwɛɛ è mò Mose ma ǹyɛɛi, “Ímu siɣe a ŋ̀ele-wala pɛpɛi í tɔ́ɔ Gâloŋ ŋɛ́i-tuɛ yɛ̂ɛ mai, Yâwɛɛ nyii gáa a Ibulu-ŋai Díɣâlai ǹyɛɛi, ‘Ǹɛɛ naa ŋánûai dí lí dí ḿvɛli.

¹⁴ Tãi ŋí su a pâi ŋɔtɔ̂ŋ-kpɛ-maai kɛ̂i a yá ka ítii-kɛ-ƃelai é pɛ́lɛ ínûai dîa a gɛɛ ká gɔ́lɔŋ a gɛɛ Ɣâla da kélee fé naa ǹɔii gwaa kélee yɛ̂ɛ ǹyaa.

¹⁵ Èei kɛ̀ a wɔ́lɔ kɔlɔ-fêla sîi nyɔ́mɔɔ píli yâ ka ínûai, gɛ̀ ní ka wɔ́lɔ saa.

¹⁶ Kɛ́lɛ a wɔ́lɔ ímalôŋ kâai a gɛɛ í lɛ́ɛ ɣele ma a gɛɛ é ŋɔwála walai lɛ́ yâ a gɛɛ núu kélee dí náa tòli ǹɔii su gwaa kélee.

¹⁷ Kɛ́lɛ ƃa ŋɔnûai sóŋ ífe ŋ̀wɛ̂lii í dílɛɛ naa dí lí.

¹⁸ Mɛni ma tãi à kɛ̀ ŋí tínaa a pâi são támaa tɛɛ̂i nyii Ize lɔii fé niî zɔlɔ ƃó ní é síɣe gɔ́ɔ-pilaŋ-tãi mai.

¹⁹ Mɛni ma íwoo tɛ́ɛ a gɛɛ ítaa-tulɛ-ŋai da zɛŋ kélee íyêei gbâlaŋ ŋái, dí gélee lɔ̂i kɛ́ ma. Kpɛ́ni fêi, zãoi a pâi pûi núu kélee ma da fɛnɛ-sɛŋ kélee nyii-ŋai pâi lɛɛ̂i banaŋ mai, ǹyaŋ díkelee da pâi saâi.’ ”

²⁰ Diai kélee yào Yâwɛɛ wóo ma Gâloŋ ŋɔtíi kɛ́-ƃelai sámai, dí díluɛ-ŋai da dítaa-tulɛ-ŋai lɔ̂i kɛ̀ ma.

²¹ Kɛ́lɛ diai dífe díwoli tɔ̀ɔ ní Yâwɛɛ wóo mai, dí díluɛ-ŋai da dí taa-tulɛ-ŋai lɛ̀ɛ banaŋ ma.

²² Nya ƃe Yâwɛɛ è mò Mose ma ǹyɛɛi, “Íyee tɛ́ ŋ̀elei su. São a pâi pûi Ize lɔii gwaa kélee núu-kpune ma da zua-ŋai é pɛ́lɛ galai kélee ma gbâlaŋ ŋai.”

²³ Nya ƃe Mose è ŋɔsia-wurii sãa ŋ̀elei su Yâwɛɛ é ŋ̀ele-kpana tɛ̀ɛ da são, ŋ̀ele-kpanai ŋɔŋ é seri ǹɔii mâ. Yâwɛɛ è são pù Ize lɔii mâ.

²⁴ Zãoi è kɛ̀ kpɔ́ a zu kɛ́tɛ a sɛŋ ŋ̀ele-gbânai ŋɔŋɔŋ è kɛ̀ teei zu, nyii kɛ̀ a zu kɛ́tɛ, nyii da fé niî wɔ́lɔ pú ní Ize lɔii su é síɣe gɔ́ɔ-pilaŋ-tãi mai.

²⁵ Zãai kélee lɛ̀ɛ Ize lɔii su banaŋ mai, zãoi è dípàa. É núu-kpune su kàra, é gala-ŋai kélee páa, é ŋ̀úru-ŋai kélee ɣále.

²⁶ Kɛ́lɛ Gosɛŋ lɔii nyii Eezuɛ-ŋai dí kɛ̀ zui, nàa nɔ́ ƃé zãoi da fé pú ní naa.

²⁷ Nya ƃe Galoŋ è Mose da Eelɔŋ dí tòli ǹyɛɛ diai, “Ŋa sɔnyɔ̂ŋ kɛ́ tãi ŋí su. Yâwɛɛ ŋ̀ɔi lɛ̂lɛɛi. Kwa ŋánûai kúwɔi fé lɛ́lɛ ní.

²⁸ Yâwɛɛ kpera fé, kpɛ́ni fêi, ŋ̀ele-gbanai da zãoi dí su kɛ̂tɛi kú mɛni ma. Ŋa pâi kálɛɛ̂i naa ká lí, káfe pâi ŋɔ́nɔ lɛɛ̂i ƃɛ́.”

²⁹ Mose ǹyɛɛ mai, “Tãi ŋa pâi kúlâi la daa-leei ŋí sui, ŋa pâi ǹyée sãai Yâwɛɛ pɔ́naa. Nya ŋ̀ele-gpanai a pâi kperâi. São fé ŋɔ́nɔ pâi pûi a gɛɛ ká gɔ́lɔŋ a gɛɛ ǹɔii káa a Yâwɛɛ pɔ́ɔ.

³⁰ Kɛ́lɛ ŋá gɔ́lɔŋ a gɛɛ ka ítii-kɛ-ƃelai, káfe niî yao ní Yâwɛɛ Ɣâla ma.”

³¹ Zí-sãai nyii-ŋai kɛ̀ a dí pɔlɔɔi dí sàa.

³² Kɛ́lɛ nyii-ŋai dífe niî kɛ̀ pɔ̀lɔ-nii, dífe saa ní.

³³ Nya ƃe Mose è Gâloŋ lɛ̀ɛ naa é kúla daa-leei su, é nyée sãa Yâwɛɛ pɔ́ naa. Ŋele-gbanai da zãoi dí kpéra, tuna fé ŋɔ́nɔ pú ní.

³⁴ Kɛ́lɛ tãi Gâloŋ è gàa la a gɛɛ dunai, zãoi da ŋ̀ele-gbanai dí kpèra lai, da ŋɔnûai dí sɔnyɔ̂ŋ kɛ̀ ŋɔ́nɔ dí dílii su kpanaŋ.

³⁵ Yɛ̂ɛ berei Yâwɛɛ è mò la Mose sârai. Gâloŋ è ǹíi su kpànaŋ. Vé Eezuɛ-ŋai lɛ̀ɛ ní naa dí lí.