Lɛɛ gbɔwɔ ɓa 7 - Bible

¹ Yâwɛɛ è mò Mose ma ǹyɛɛi, “Gáa, ŋa pâi íkɛ̂i yɛ̂ɛ Ɣâla Gâloŋ ŋɛ́i-tuɛ, ŋá ílîa Eelɔŋ kɛ́ a ílono kɛ́-nuu.

² Mɛnii kélee ŋa pâi môi yâi m̀ó Eelɔŋ ma. A pâi môi Gâloŋ mâ a gɛɛ é Eezuɛ-ŋai lɛ́ɛ naa dí kúla ŋɔlɔii su.

³ Kɛ́lɛ ŋa pâi Gâloŋ líi su kpananîi. Berei máŋ ŋa pâi ŋɛi-kɛ-maa támaa kɛ̂i la Ize lɔii sui,

⁴ Gâloŋ fé pâi ŋ̀óli tɔɔ̂i káwoo mâ. Gɛ̀ ní ŋa pâi nyée lâai Ize mɛi a mɛni ŋá-teɛɛ ŋá ŋakɔ́ kɔ́-ƃelai kúla Ize lɔii su, nyii-ŋai dí káa a Eezuɛ-ŋai.

⁵ Ize-ŋai da pâi gɔ́lɔnîi a gɛɛ ŋgáa a Yâwɛɛ ŋa pâi nyée làai Ize mɛi a mɛni ŋá-teɛɛ ŋá Eezuɛ-ŋai kúla dísamai.”

⁶ Mose da Eelɔŋ dí mɛni-ŋai kɛ̀ Yâwɛɛ è mò diai.

⁷ Mose è nâa kɛ̀ a kóraŋ buu lɔ́ɔlu mɛi saaƃa, Eelɔŋ kɛ́ ƃò a kóraŋ buu lɔ́ɔlu mɛi saaƃa káo saaƃa a tãi dí li la Gâloŋ pɔ́i.

Eelɔŋ ŋɔsia-wurii

⁸ Yâwɛɛ è mò Mose da Eelɔŋ dîa ǹyɛɛi,

⁹ “Gâloŋ à mò kâa a gɛɛ ká kákpîŋ lɛ́ a ŋɛi-kɛ-maa kɛ́ɛ, m̀ó Eelɔŋ ma a gɛɛ é ŋɔsia-wurii síɣe é dòo ǹɔii mâ Gâloŋ ŋɛ́i-tuɛ a gɛɛ é pene a kali.”

¹⁰ Nya ƃe Mose da Eelɔŋ dí lì Gâloŋ pɔ́ naa dí m̀ɛnii kɛ́ Yâwɛɛ è mò dîa a gɛɛ dí gɛi. Eelɔŋ è ŋɔsia-wurii tôo ǹɔii ma Gâloŋ ŋɛ́i-tuɛ da ŋɔtii-kɛ-ƃelai, é pene a kali.

¹¹ Nya ƃe gâloŋ è ŋɔtáre-ƃelai tòli da ŋɔpóniŋ kɛ́-ƃelai, dí ŋɛi-kɛ-maa tɔnɔi tí da kɛ́.

¹² Díkelee dí pene a kali. Kɛ́lɛ Eelɔŋ ŋɔsia-wurii è dísia-wûru-ŋai kpéle.

¹³ Kɛ́lɛ yɛ̂ɛ berei Yâwɛɛ è mò lai, Gâloŋ líi su è kɛ̀ nɔ́ nîi a gbanaŋɔɔ. Vé ŋ̀óli tɔɔ ní díwoo ma.

Mɛni kpɔ̂lu è làa Ize lɔii mâ Ŋãai

¹⁴ Yâwɛɛ è mò Mose mà ǹyɛɛi, “Gâloŋ líi su kpanaŋɔ̂ɔi. Vé ŋ̀wɛ̂lii é ǹûai lɛ́ɛ naa dí lí.

¹⁵ Lí bɔ́ naa a ɣele-wâla, tãi a kɛ̀ kulâi la a gɛɛ é lí ǹyái lai. Maa kpɛ́ŋ zîŋ ŋá. Lí a zia-wurii nyii pene a kalii.

¹⁶ M̀ó mà yɛ̂ɛi, ‘Yâwɛɛ nyii gáa a Ibulu-ŋai Díɣâlai, è ńdɛ̀ɛ ípɔ naa ǹyɛɛ í ŋɔnûai lɛ́ɛ naa dí lí a gɛɛ dí vɛ̀li vɛ̃ɛ-kpâlaŋ su. Kɛ́lɛ gáa, ífe niî íwoli tɔ̀ɔ ní ŋ́oo ma.’ ”

¹⁷ Yâwɛɛ è mò ǹyɛɛi, “Ya pâi gɔ́lɔnîi bere-sîi ŋí su a gɛɛ ŋ́gaa a Yâwɛɛ. Gáa, ŋa pâi Ǹâai Yai lôkwai a zia-wurii ŋí ǹyêei. Ǹyaŋ a pâi penêi a ŋãa.

¹⁸ Ǹyɛ̃ɛ-ŋai da pâi saâi ǹyái su. Ǹyái kúŋ a pâi nyɔ́ŋ nîi kpɔ́ Ize-ŋai dífe pâi pɔ̂rii da kpelêi”

¹⁹ Nya ƃe Yâwɛɛ è mò Mose ma ǹyɛɛi, “M̀ó Eelɔŋ ma a gɛɛ é ŋɔsia-wurii síɣe é ǹɛ́ Ize ya-ŋai kélee mɛi, ǹyá-lêe-ŋai, ǹyá-loa-ŋai da bóa-ŋai kélee. Ǹyá-ŋai kélee da pâi penêi a ŋãa. Ǹyá Ize lɔii gwaa kélee a pâi kɛ̂i a ŋãa. Díkpele sɛŋ-folo-ŋai kélee su yà-ŋai máŋ a pâi kɛ̂i a ŋãa.”

²⁰ Mose da Eelɔŋ dí m̀ɛni-ŋai kɛ̀ Yâwɛɛ è mò diai. Eelɔŋ è zia-wurii sìɣe é Ǹâai Yai lókwa la Gâloŋ ŋɛ́i-tuɛ da ŋɔtíi-kɛ-ƃelai. Ǹâai Ya-leei kélee è pène a ŋãa.

²¹ Nyɛ̃ɛ-ŋai kélee dí sàa ǹyái su. Ǹyái kúŋ é nyɔ́ŋ kpɔ́ Ize-ŋai dífe kɛ́ ní pɔ̂rii da kpelêi. Ize gwaa kélee è kɛ̀ a ŋãa.

²² Kɛ́lɛ Ize lɔii su-poniŋ kɛ́-ƃelai dí mɛni tɔnɔi tí kɛ̀. Gâloŋ líi su è kɛ̀ nɔ́ niî a gbanaŋɔɔ. Vé ŋ̀óli tɔɔ ní Mose da Eelɔŋ dîa yɛ̂ɛ berei Yâwɛɛ è mò lai.

²³ Nya ƃe Gâloŋ è tìnaŋ é lí pôlu ŋɔpɛ́rɛi mu. Vé máŋ kpîŋ ŋ̀óli tɔ̀ɔ ní mɛnii ŋí ma.

²⁴ Nya ƃe Ize-ŋai kélee dí ya-loa-ŋa tèe Ǹâai Ya-leei koo ma díkpele mɛni ma. Kpɛ́ni fêi, dífe kɛ́ ní pɔ̂rii Ǹâai Yai da kpelêi.

²⁵ Ǹyái peneɛɛ Yâwɛɛ mì a ŋãai, fólo lɔ́ɔlu mɛi feerɛ è tɛ̀ɛ.