Lɛɛ gbɔwɔ ɓa 29 - Bible

Mɛni-ŋai bîlaŋɔɔi Eelɔŋ da ǹônii dísee-mɛni mai

¹ “M̀ɛnii ŋí ƃé ƃa pɔ̂ri gɛ̂i a Eelɔŋ da ǹônii sinaai a gɛɛ dí sâla láa-soŋ-tii kɛ́ mî. Niŋa-sirɛ naɣa tɔnɔ siɣe da ƃála-sirɛ feerɛ nyii-ŋai kɔlɔ-fela fé diai.

² Tɛ́-sɛŋ-fe-zu kpolo siɣe da tɛ́-sɛŋ féu kpolo nyii gbɛtɛ̂ɛi a wúlɔi, da tɛ́-sɛŋ féu kpolo nyii wúlɔ siâi mai. Díkpɛtɛ a felaƃa lɛ́lɛɛ.

³ Dípu kpɔ̂lɔ tɔnɔ su í dílɛɛ zu í pá a dia é pɛ́lɛ ǹiŋa-sirɛi ma da m̀ála-sirɛ feerɛi í díkula mâ a sâla.

⁴ “Pá a Eelɔŋ da ǹônii ŋásua seɣe pɛrɛi maa waai lá í díwaa a yá.

⁵ Zeɣe-ŋai síɣe í ǹyɛkɛ̂i tóo Eelɔŋ ma da ǹyokpoi. Í ɛfɔi tóo ma da geŋe lá seɣe kpuai. Í ɛfɔi ma bɛtii lá tóo mà.

⁶ M̀ɔrɔi sée ŋ̀ûa í gôo kalaŋ ɣiri mà.

⁷ Nàa pôlu ma í ŋ̀úlɔi síɣe í bú ŋ̀ûa.

⁸ “Pá a Eelɔŋ ǹônii í díyɛkɛ-ŋai tóo dîa.

⁹ Í bɛ̂ti too díleŋei í ƃɔrɔ sée díŋûa. Da pâi kɛ̂i a ŋásâla láa-soŋ-ƃela wɔlɔ-wɔlɔ da wɔlɔ-wɔlɔ yɛ̂ɛ berei ŋá mò lai. Bere sii ŋí ƃé í Eelɔŋ da ǹônii see la dítii mɛi.

¹⁰ “Pá a niŋa-sirɛi ŋasua kɔlɔ-seɣe pɛrɛi láƃelei. Tɔɔ Eelɔŋ da ǹônii dí díyee pɛ́lɛ ŋuŋ ma.

¹¹ Niŋa-sirɛi páa bɛ́rɛi láƃelei ŋɛ́i-tuɛ.

¹² Niŋa ŋãai da siɣe í zia ŋ̀âla-teƃelei ŋɔƃeɣeŋ-ŋai dîa a íyee-gbua. Í gbéli pú ŋ̀âla-teƃelei kɔ́ɔ mu.

¹³ Niŋa wulɔi kúla goi-sãai kélee ma. Ǹíi ma-wulɔ da goi-kɔni-kao feerɛi dímaa wulɔi kúla í díkereŋ a sâla ŋ̀âla-teƃelei ŋá.

¹⁴ Kɛ́lɛ ǹiŋai zua, gɔlɔ da gbó kéreŋ a ŋɔŋ mûui pôlu-pere. Gáa a sɔnyɔ̂ŋ sala.

¹⁵ “M̀ála-sirɛi dɔnɔ siɣe, Eelɔŋ da ǹônii dí díyee pɛ́lɛ ŋuŋ ma.

¹⁶ M̀álai páa í ŋãa táɣa ŋ̀âla-teƃelei mâ í dínaŋ ma.

¹⁷ M̀ála suai tee-tee a gbua-kpua í goi-sãai kélee wáa da gbɔ̂rɔ í bú gîe ma da ŋuŋ.

¹⁸ Gélee kéreŋ a sâla ŋ̀âla-teƃelei ŋá. Gáa a kéreŋ-sala da sâla kúŋ nɛ̃ɛ ḿɛni ma.

¹⁹ “M̀ála-sirɛi kpéli síɣe, Eelɔŋ da ǹônii dí díyee pɛ́lɛ ŋuŋ ma.

²⁰ M̀álai páa í ŋãa da sia Eelɔŋ da ǹônii-ni dílaa-mii yee mɛi woli-kpɛrɛi ma. Í da sia dílaa-mii yee kɔɔ-kpua zɛ-kponoi ma, da díkɔɔ yee kɔɔ-gbua kɛ́tɛi mâ. M̀ála ŋãai táɣa ŋ̀âla-teƃelei kɔ́ɔ mu í dínaŋ ma.

²¹ Ŋãai gáa ŋ̀âla-teƃelei mai da siɣe í bù-ŋua ŋulɔi da siɣe í gbɛ́mɛŋ Eelɔŋ ma da ŋɔseɣei. Í da kpɛ́mɛŋ Eelɔŋ ǹônii dîa da díseɣe-ŋai. Bere sii ŋí ƃé ǹyaa da ǹônii é pɛ́lɛ díseɣe-ŋai dîa dímaa a pâi kɛ̂i la a ŋwaa.

²² “M̀álai ŋ̀úlɔ kúla í ŋ̀óŋ síɣe da goi-sãa ma wulɔi. Ǹíi ma wulɔi kúla, goi-kɔni-kao feerɛ da dímaa wulɔi, í naa-mii yee mɛi wɛrɛi síɣe, kpɛ́ni fêi, gáa a sâla láa soŋ-ƃela seɛɛ dítii mɛi ḿaa ƃála.

²³ Gbɔ̂lɔi gáa ŋɛ́i-tuɛ nyii dɛ́-sɛŋ féu kpoloi káa zui, kpólo kpua tɔnɔ kula naa da kpólo kpûa tɔnɔ nyii gbɛtɛ̂ɛi a wúlɔi, da kpólo ƃela tɔnɔ.

²⁴ Zãai ŋí kélee pú Eelɔŋ yêei da ǹônii dí dísoŋ díyee ŋá a soŋ-nyee-ŋa sala-sɛŋ ŋɛ́i-tuɛ.

²⁵ À kɛ̀ tí í dísoŋ díyêei í díkereŋ ŋ̀âla-teƃelei ma géreŋ salai mɛi a gɛɛ é kɛ́ a kéreŋ sala kúŋ nɛ̃ɛ ŋɛ́i. Gáa a ŋɔŋ sala ŋɛ́i-tuɛ.

²⁶ “Eelɔŋ see ƃalai keŋe lá síɣe í zoŋ íyee ŋá a soŋ-nyee-ŋa sala ŋɛ́i-tuɛ. M̀ála suai íwɔ̂i ká ŋí.

²⁷ “Eelɔŋ da ǹônii see ƃalai keŋe lá sóŋ íyee ŋá a soŋ-yee-ŋa sala, da ŋ̀wɛ́rɛ nyii gáa zâla láa soŋ-ƃelai mɛni mai.

²⁸ Gáa a ŋatɔ̂ŋ kpanaŋ a gɛɛ zua kpua-ŋai ŋí dí kɛ́ a Eelɔŋ da ǹônii dípɔɔ a tãi kélee, nyii-ŋai kùla Eezuɛ-ŋai yêei a sama-sãai. Eezuɛ-ŋai dí gùla dílii-see sama sãai su dí nâai kɛ́ zâla láa soŋ-ƃelai mɛni ma. Gáa a dísama-sɛŋ ḿɛni ma.

²⁹ “Tãi Eelɔŋ a pâi saâi lai ŋɔseɣe maa-waa-ŋai da pâi kɛ̂i a ǹônii pɔ́ɔ a gɛɛ dí doo dîa dí wúlɔ pú díŋûa.

³⁰ Ǹóŋ nyii pâi bɔ́ɔ ŋá siɣêi fɛ̂ɛ é zeɣe-ŋai tí tóo mà a ɣele-kûu lɔ́ɔlu mɛi feerɛ, a tãi a lɔ̂ la ŋasua seɣe pɛrɛ maa waai mu a gɛɛ é tíi kɛ́ naai.

³¹ “Fɛ̂ɛ í zâla láa-soŋ-ƃelai see ƃalai lúu nɛ́ŋ kwaa ma waai ma.

³² Fɛ̂ɛ Eelɔŋ da ǹônii dí m̀ála suai míi ŋasua kɔlɔ seɣe pɛrɛ maa waai láƃelei da gbóloi gáa gbɔ̂lɔi sui.

³³ Fɛ̂ɛ dí zãai míi nyii-ŋai dí tíi kɛ̀ a dîa dísɔnyɔ̂ŋ-ŋai su-mɛni lɛ́ɛ mɛni ma a dílɛ tãi da dísee tãi. Sâla láa-soŋ-ƃela nɔ́ ƃa mii-sɛŋ ŋí da m̀ii. Kpɛ́ni fêi, maa waâi.

³⁴ À kɛ̀ zuai da gbóloi da à lɛ̀ɛ ɣele à ƃɔ̀, fɛ̂ɛ ká géreŋ. Núu da fé mìi ŋɔ́nɔ, kpɛ́ni fêi, maa waâi.

³⁵ “Mɛni-ŋai ŋá mò yâ a gɛɛ í díkɛ a Eelɔŋ da ǹônii, díkɛ. Dísee dítii mɛni ma a ɣele-kûu lɔ́ɔlu mɛi feerɛ.

³⁶ Niŋa-sirɛ kula a sɔnyɔ̂ŋ sala a ɣele kélee sɔnyɔ̂ŋ su-mɛni-lɛɛ mɛni ma. Ƃà sɔnyɔ̂ŋ sala kùla, gɛ̀ ní ƃa sɔnyɔ̂ŋ waa ŋ̀âla-ƃelei ma. Gɛ̀ ní ƃa pɔ̂ri wúlɔ pûi ma í zee díi maa waai kɛ́-mɛni ma.

³⁷ Sɔnyɔ̂ŋ su-mɛni-lɛɛ sala kula ŋ̀âla-ƃelei mɛni ma a ɣele-kûu lɔ́ɔlu mɛi feerɛ í zee díi maa waa kɛ́-mɛni ma. Gɛ̀ ní a pâi kɛ̂i a maa waa. Ǹyaŋ núu da sɛŋ kélee pâi lɛɣɛ̂i mai, a pâi kɛ̂i a maa waa.

Ŋele kélee salai

³⁸ “Zâlai ŋí ƃé fɛ̂ɛ í gula ŋ̀âla-ƃelei ma. Fɛ̂ɛ í kóraŋ tɔnɔ ƃala-lonii feerɛ kúla a sâla ŋ̀âla-teƃelei ŋá a ɣele kélee.

³⁹ Dɔnɔ kùla a sâla a ɣele-wala í dɔnɔ kula a ɣele-wulii.

⁴⁰ Fɛ̂ɛ í felaƃa fũa lɛ́lɛɛ ŋɔpãi lɔ́ɔlu mɛi saaƃa sumo a ɔle-wúlɔ lɛ́lɛɛ pãi saaƃa í díkula a sâla a mála-loŋ maa-ŋuŋ. Fɛ̂ɛ í ŋwãai pãi saaƃa kúla máŋ a kpele-sɛŋ sala.

⁴¹ Ye m̀ála-loŋ veerɛi kúla a sâla a ŋ̀ele-wulii. Fɛ̂ɛ í mii-sɛŋ sala kula la da kpele-sɛŋ sala yɛ̂ɛ berei í gɛ̀ la a Ŋ̀ele-wâlai, a gɛɛ é kɛ́ a sâla kúŋ nɛ̃ɛ da kéreŋ sala mɛ̂ni ma.

⁴² Ká géreŋ salai ŋí kúla a tãi kélee káfulu-laai su da kásuui, ŋasua-kɔlɔ seɣe pɛrɛ maa waai láƃelei ƃɛ́ ḿɛni ma. Nàa ƃé ŋa pâi kákâai naa ŋá lóno kápɔ.

⁴³ Nàa ƃé ŋa pâi Eezuɛ-ŋai kâai naa. Nàa ƃe ŋa pâi m̀aa waâi a ŋáfolo-laai.

⁴⁴ Ŋa pâi ŋasua-kɔlɔ seɣe pɛrɛi maa waâi da ŋ̀âla-teƃelei. Ŋa pâi Eelɔŋ seêi da ǹônii a gɛɛ dí sâla láa soŋ-tii kɛ́ mî.

⁴⁵ Ŋa pâi kɛ̂i Eezuɛ-ŋai sáma. Ŋá kɛ́ a Díɣâla.

⁴⁶ Da pâi gɔ́lɔŋ-nîi a gɛɛ ńyãa ƃa Yâwɛɛ Díɣâlai nyii díkùla Ize lɔii su a gɛɛ ŋá kɛ́ dísama. Ńyãa ƃa Yâwɛɛ nyii gáa a Díɣâlai.”