Lɛɛ gbɔwɔ ɓa 28 - Bible

Zâla láa-soŋ-ƃelai dímaa-ɣîri seɣe-ŋai

¹ “Ílîa Eelɔŋ da ǹônii-sinaai kúla Eezuɛ-ŋai sáma í pá a dia a gɛɛ dí kɛ́ a ŋásâla láa soŋ-ƃela. Pá a Eelɔŋ da ǹônii Nada, Abiyu, Ilieazɛ é pɛ́lɛ Itama ma.

² Ƃaa-kɛ-maa seɣe lɛ́lɛɛ-ŋa kpɛtɛ ílîa Eelɔŋ mì.

³ Nyɛrɛ kɛ́-ƃelai nyii-ŋai kélee ŋá táre tɛ́ɛ dípɔi, m̀ó dîa a gɛɛ dí Eelɔŋ ŋɔseɣe-ŋai kpɛtɛ a gɛɛ é nâa ŋásâla láa-soŋ tii kɔ́ɔ pîlaŋ.

⁴ Zeɣe-ŋai ká ŋí da pâi gbɛtɛ̂i, Seɣe kpua yîƃa kɛ́ɛ mà geŋe lá mɛni ma, ɛfɔ, yokpo, yɛkɛ pɔ̃yɛ, ŋua ƃɔrɔ da bɛ̂ti. Fɛ̂ɛ dí seɣe maa waa-ŋa kpɛtɛ ílîa Eelɔŋ mɛni ma da ǹônii a gɛɛ dí tíi kɛ́ mî a ŋásâla láa-soŋ-ƃela.

⁵ Fɛ̂ɛ nyɛrɛ kɛ́-ƃelai dí díi kɛ́ a gôo, yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu.

⁶ “Fɛ̂ɛ dí ɛfɔi kpɛtɛ a gôo, yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu, dí bɔ̃yɛ a ǹɛ́lɛɛ.

⁷ Fɛ̂ɛ ɛfɔi kâraŋ ŋá-ɣɛlii é kɛ́ m̀éla veerɛ ma a gɛɛ núu é gbulɔ̂ŋ gîe ma.

⁸ Bɛ̂ti palaa lɛ́lɛɛi nyii gáa mai, da ǹyaa dí kɛ́ nɔ́ a díkpɛtɛɛ tɔnɔɔ gîe ma a gôo, yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu.

⁹ Kɔni sɔ̃ɔ kpanaŋɔɔ feerɛ síɣe í Eezuɛ ǹônii láa pɔ̃yɛ dîa.

¹⁰ Ǹɔ́ɔlu mɛi da láa pɔ̃yɛ dɔnɔ ma í ǹɔ́ɔlu mɛi da pɔ̃yɛ gbélii ma yɛ̂ɛ berei dípɔlɔ-pɔlɔ-laa káa lai.

¹¹ Berei kɔni saa-nuu a ŋɔkɔnii pɔ̃yɛ lai, Eezuɛ ǹônii láa pɔ̃yɛ tí gɔni-ŋai dîa. Dímaa tínaŋ a gôo.

¹² Gɔni feerɛi sɔlɔ ɛfɔi kâraŋ ŋá-ɣɛli-ŋai dîa a gɛɛ dí kɛ́ a kili-too-ŋa kɔni-ŋa Eezuɛ ǹônii mɛni ma. Berei-sii ŋí ƃé dílaa a pâi kɛ̂i la Eelɔŋ kâraŋ ŋá ŋɛ́i-tuɛ a gɛɛ díkili é kɛ́ ŋá.

¹³ Gôo kalaŋ-ŋa kpɛtɛ máŋ.

¹⁴ Gôo yɔlɔ feerɛ kpɛtɛ í gbíniŋ yɛ̂ɛ ɣɛli í dísɛ̂lɛŋ gôo kalaŋ-ŋai dîa.

Geŋe lá seɣe-kpuai

¹⁵ “Geŋe lá seɣe kpuai kpɛtɛ mɛni ŋá-tee mɛni ma. Gɛ́ a yɛrɛ-pere yɛ̂ɛ berei í ɛfɔi kpɛ̀tɛ lai. Gbɛtɛ a gôo, yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu.

¹⁶ M̀éla kélee é kɛ́ a bɔriɛɛ, bɛlɛɛ gîe lá. Ŋɔkôya é kɛ́ a îŋse lɔ́ɔlu mɛi náaŋ, ŋɔŋa-kɛtɛ kɛ́ ƃò a îŋse lɔ́ɔlu mɛi naaŋ.

^17-20 Kɔni sɔ̃ɔ kpanaŋɔɔ-ŋa pú ma a ŋɛli náaŋ. Gɔni-ŋai ŋí kélee dísîi é kɛ́ tɛi-tɛi. Kɔni saaƃa é kɛ́ ŋɛlii maa-ŋuŋ mâ, zaaƃa é kɛ́ ŋɛlii veerɛi mâ, zaaƃa kɛ́ ƃò ŋɛlii ǹáaŋ mâ. Gɔni-ŋai ŋí maa tínaŋ a gôo.

²¹ Eezuɛ ǹônii láa pɔ̃yɛ gɔni-ŋai dîa tɛi-tɛi a gɛɛ dí tɔ́ɔ ŋɔsuu puu káo feerɛi pɔ́ɔ ŋá. Dí dípɔ̃yɛ yɛ̂ɛ berei kɔni saa-nuu a ŋɔkɔnii pɔ̃yɛ lai.

²² Yɔlɔ kpɛtɛ a gôo kpîŋ-kpîŋ í gbiniŋ yɛ̂ɛ ɣɛli geŋe lá seɣe kpuai mɛni ma.

²³ Geŋe lá seɣe kpuai gólo kpɛtɛ a gôo mɛi-pere sonoŋ feerɛi su.

²⁴ Gôo yɔlɔ feerɛi lɔ́ geŋe lá seɣe kpuai ŋɔkólo feerɛi su.

²⁵ Gôo yɔlɔ feerɛi ŋuŋ kpulɔ̂ŋ gôo kalaŋ feerɛi ma. Díkpulɔ̂ŋ máŋ a berei sii ŋí ɛfɔi kâraŋ ŋí-ɣɛli-ŋai dîa nàa túɛ-pere.

²⁶ Geŋe lá seɣe kpuai gólo feerɛ kpɛtɛ a gôo í bú mu-pere-ƃelai kwára-pere sonoŋ veerɛ ma.

²⁷ Kólo feerɛ kpɛtɛ ŋɔ́nɔ a gôo í bú ɛfɔi kâraŋ ŋá-ɣɛli-ŋai mu nàa túɛ-pere bɛ̂tii kpulɔ̂nii mɛi-pere.

²⁸ Geŋe lá seɣe kpuai ŋɔkólo-ŋai kpulɔ̂ŋ ɛfɔi ŋɔkólo-ŋai dîa a ɣɛlii buluŋ kɛ́ɛ a gɛɛ geŋe lá seɣe kpuai é láa bɛ̂tii mɛi-pere a gɛɛ vé fùluŋ.

²⁹ “Tãi Eelɔŋ a lɔ̂ la Gwaa Maa Waai mai, a pâi geŋe lá seɣe kpuai ŋí pɛlɛ̂i geŋe lá nyii Eezuɛ ŋɔsuu puu káo feerɛi láa pɔ̃yɛi mai, a gɛɛ Ńyãai Yâwɛɛ, ŋánûai kíli é lɛ́ɛ ŋá wɔlɔ-wɔlɔ da wɔlɔ-wɔlɔ.

³⁰ Mɛni ŋá-tee sãai pú geŋe lá seɣe kpuai ma nyii-ŋai da dítòli a Uliŋ da Tumiŋ, a gɛɛ dí kɛ́ Eelɔŋ keŋe lá tãi a lî la ŋákwaa Maa Waai mai. Fɛ̂ɛ nɔ́ é zeɣe kpuai ŋí pɛ́lɛ geŋe lá a tãi kélee a lí la Gwaa Maa Waai mai a gɛɛ é ǹîa-mɛnii kɔ́lɔŋ ŋánûai Eezuɛ-ŋai mɛni ma.

Zâla láa soŋ-ƃelai dímaa ɣîri seɣei kpéli-ŋai

³¹ “Ye yokpo kpɛtɛ a seɣe bûluŋ kɛ́ɛ nyii gáa ɛfɔi mɛni mai.

³² Ǹyokpoi kɔŋ su tée a núu ŋuŋ lɔ̂i. Í gɔŋ su pala é dínaŋ ma a gɛɛ vé fàla.

^33-34 Fɛ̂ɛ é pɔmegurane pɔkɔɔŋ-ŋa kpɛtɛ ǹyokpoi wóŋ lá a yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu. Gôo taniŋ-ŋa pîlaŋ pɔmegurane pɔkɔɔŋ-ŋai loai í dínaŋ ǹyokpoi wóŋ lá.

³⁵ Fɛ̂ɛ Eelɔŋ é ǹyokpoi ŋí tóo mà ŋɔsâla láa soŋ-tii kɛ́ɛi su. Dánîŋ wóo a pâi tɛ̂i tãi a pâi liî la Gwaa Maa Waai ma Yâwɛɛ ŋ̀ɛ́i túɛ da tãi a kûla la naai. À nyíŋi kɛ̀, gɛ̀ ní vé pâi saâi.

³⁶ “Í gôo kalaŋ kpɛtɛ í ŋ̀óo-ŋai ŋí pɔ̃yɛ dîa, ‘Maa Waâi Yâwɛɛ ŋɛ́i.’ Dípɔ̃yɛ yɛ̂ɛ berei yɛrɛ-kɛ-nuu a ŋɔkɔli mâ pɔ̃yɛ lai.

³⁷ Ŋiri ŋûa m̀ɔrɔi ma a ɣɛli bûluŋ kɛ́ɛ. É kɛ́ m̀ɔrɔi túɛ-pere.

³⁸ Fɛ̂ɛ Eelɔŋ é m̀ɔrɔi ŋí sée ŋ̀ûa a tãi kélee a gɛɛ ńyãa Yâwɛɛ ŋá ńyee sée Eezuɛ-ŋai dísâla-sãai kélee mu da dɛ̀ɛ ḿbɔi, à nɛ̃ɛ ma kpîŋ ǹûai dí pɔara-maa kɛ́ a dɛ́ɛ pere ḿbɔ.

³⁹ “Ye Eelɔŋ ŋɔyɛkɛi kpɛtɛ a seɣe kole nɛnɛ-fɛfɛɛ lɛ́lɛɛ, í ŋûa ƃɔrɔ kpɛtɛ a seɣe kole nɛnɛ-fɛfɛɛ lɛ́lɛɛ, í bɛ̂ti kpɛtɛ máŋ í bɔ̃yɛ.

⁴⁰ “Yɛkɛ-ŋa kpɛtɛ máŋ Eelɔŋ ǹônii-sinaai mɛni ma, bɛ̂ti-ŋa da ƃɔrɔ-ŋa. Díkpɛtɛ ƃaa-kɛ-maa mɛni ma da maa ɣîri-mɛni.

⁴¹ Zeɣe-ŋai ŋí tóo ílîa Eelɔŋ ma da ǹônii-sinaai. Nàa pôlu ma díseɣe í dítɛɛ ḿbɔ a wúlɔ púɔɔ díŋûa a gɛɛ dí kɛ́ a ŋásâla láa-soŋ-ƃela.

⁴² Seɣe kole nɛnɛ-fɛfɛɛ bɛrɛ-kpôa ŋa kpɛtɛ dímɛni ma é kúla díleŋei é yéŋ díwɛrɛ ma a gɛɛ dífe díkaŋ lɛ̂.

⁴³ Fɛ̂ɛ zeɣe-ŋai ŋí dí kɛ́ Eelɔŋ m̀a da ǹônii a tãi kélee dí lɛ́ɛ liî zua-kɔlɔ seɣe pɛrɛi mu kpaa máŋ dí lɛ́ɛ lɛɣɛ̂i ŋ̀âla-teƃelei kɔlɛ a gɛɛ dí tíi kɛ́ mî Gwaa Maa Waai ma. À wàla kɛ́ tí, sɔnyɔ̂ŋ a pâi kɛ̂i dîa, ǹyaŋ gɛ̀ ní da pâi saâi. Tɔ̂ŋ kpanaŋ ká ŋí Eelɔŋ mɛni ma da ŋɔsuui.”