Lɛɛ gbɔwɔ ɓa 27 - Bible

Ŋ̀âla teƃelei

¹ “Ŋ̀âla-teƃelei kpɛtɛ a kpitili-ƃela. Ŋɔkôya é kɛ́ a kɔ́ɔ-ƃɔlɔni lɔ́ɔlu mɛi feerɛ da gbûra. Ŋɔŋa-kɛtɛ kɛ́ ƃò a kɔ́ɔ-ƃɔlɔni lɔ́ɔlu mɛi feerɛ da gbûra. Ŋɔmɛi-kôya é kɛ́ a kɔ́ɔ-ƃɔlɔni lɔ́ɔlu mɛi feerɛ da gbûra. Ŋɔmɛi-kôya é kɛ́ a kɔ́ɔ-ƃɔlɔni náaŋ da gbûra. M̀éla kélee é kɛ́ a bɔriɛɛ.

² M̀eɣêŋ kula ma zônoŋ naaŋɔɔ ma. M̀eɣêŋ-ŋai dí kɛ́ nɔ́ a díkpɛtɛɛ tɔnɔɔ da ŋ̀âla-teƃelei. Mɛi pɛ́lɛ a ƃara-ƃela.

³ Sɛŋ-fólo-ŋa kpɛtɛ mɛni ma a gɛɛ ǹúui kɛ́ pù zu. Í sɔ̂ƃele-ŋa kpɛtɛ, sɛŋ-folo-ŋa, sua ƃɔ́-kɔli-ŋa da ŋɔŋ pú-pane-ŋa. Ŋ̀âla-teƃelei mu-sɛŋ-folo-ŋai kélee dí kɛ́ a díkpɛtɛɛ a ƃara-ƃela.

⁴ Fɛ̂ɛ í ƃara-ƃelai pála ŋ̀âla-teƃelei mɛni ma máŋ yɛ̂ɛ deɣáŋ, í ziɣe-sãa kpɛtɛ deɣáŋ mɛi zônoŋ naaŋɔɔ su.

⁵ Bɛlɛ teƃelei wóli mu a gɛɛ é ŋ̀âla-teƃelei kpono mɛi pɛ́lɛ é síɣe nàa sâmai é seri gwára.

⁶ Wúru kôya-ŋa kpɛtɛ ŋ̀âla-teƃelei mɛni ma a kpitili-ƃela, í ƃara-ƃela kpíniŋ dîa.

⁷ Ŋ̀úru-koya-ŋai da pâi lɔ̂i ŋ̀âla-teƃelei siɣe-sãai su m̀éla veerɛ ma ziɣe mɛni ma.

⁸ Lóa lɛ́ɛ ŋ̀âla-teƃelei ŋá ŋ̀úru-ƃelai sâmai. Gɛ́ yɛ̂ɛ berei ŋá nɛ̀ la yâ ǹyéei mai.

Ziɣãŋ dínaŋɔ̂ɔi Yâwɛɛ ŋɔsua kɔ̂lɔ seɣe pɛ́rɛ maa waai mai

⁹ “Siɣãŋ tínaŋ Bɛ́rɛi ma a seɣe. Zeɣei é kɛ́ a balaa a seɣe kole nɛnɛ-fɛfɛɛ lɛ́lɛɛ. Ŋɔkôya é kɛ́ a kɔ́ɔ-ƃɔlɔni buu lɔ́ɔlu bɛ́rɛ-ƃelai ŋɔseɣai perei ƃelai mâ.

¹⁰ Zeɣe soŋ-wûru-ŋai dí kɛ́ a wúru buu feerɛ. Bîleki-ŋai da pâi pîlanii zui dí kɛ́ a buu feerɛ. Bîleki-ŋai dí kɛ́ a díkpɛtɛɛ a ƃara. Kɛ́lɛ ŋ̀úru-ŋai díkolo-ŋai da díɣiri-sãai dí kɛ́ a káne.

¹¹ Bere-sii tí nɔ́ ƃé fɛ̂ɛ bɛ́rɛi ŋɔyá-ŋûa-pere ƃelai mâ seɣei ŋɔkôya é kɛ́ la a kɔ́ɔ-ƃɔlɔni buu lɔ́ɔlu. Zeɣe-soŋ wuru-ŋai dí kɛ́ nɔ́ a wúru buu feerɛ. Bîleki-ŋai da pâi pîlanii zui dí kɛ́ ƃò a buu feerɛ. Bîleki-ŋai dí kɛ́ a díkpɛtɛɛ a ƃara. Kɛ́lɛ ŋ̀úru-ŋai díkolo-ŋai da díɣiri-sãai dí kɛ́ a káne.

¹² Ziɣãŋ ŋɔfólo-liî pere seɣei ŋɔkôya é kɛ́ a kɔ́ɔ-ƃɔlɔni buu feerɛ káo lɔ́ɔlu. Zeɣe soŋ-wurii kɛ́ ƃò a wúru puu da bîleki puu.

¹³ Ziɣãŋ túɛ-pere-ƃelai nyii gáa vóloi kulâi-perei, nàa-pere seɣei ŋɔkôya é kɛ́ a kɔ́ɔ-ƃɔlɔnii buu feerɛ káo lɔ́ɔlu.

¹⁴ Bɛ́rɛi láƃelei kɔɔ-yee mɛi pere-seɣei ŋɔkôya é kɛ́ a kɔ́ɔ-ƃɔlɔni lɔ́ɔlu mɛi feerɛ da gbûra, seɣe-soŋ-wuru saaƃa da bîleki saaƃa.

¹⁵ Laa-mii-yee mɛi-pere-seɣei ŋɔkôya é kɛ́ máŋ a kɔ́ɔ-ƃɔlɔni lɔ́ɔlu mɛi feerɛ da gbûra, seɣe soŋ-wuru saaƃa da bîleki saaƃa.

¹⁶ Seɣe kpɛtɛ ziɣãŋ láƃelei kpîŋ-kpîŋ mɛni ma a yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu. Zeɣei ŋí ŋɔkôya é kɛ́ a kɔ́ɔ-ƃɔlɔni saaƃa. Maa nɛ̃ɛ̂i yɛrɛ-kɛ́-nuu é bɔ̃yɛ a ǹɛ́lɛɛ. Seɣe-soŋ-wuru náaŋ é kɛ́ naa m̀ɛni ma da bîleki náaŋ.

¹⁷ Zeɣe soŋ-wûru-ŋai kélee díkaa góraŋ mai, dí kɛ́ a díɣiriɛ díkîe-ni dîa. Díɣiri-sɛŋ é kɛ́ a gbɛtɛɛ a káne. Díkolo-ŋai dí kɛ́ a gbɛtɛɛ a káne. Dísòŋ-bîleki-ŋai díkɛ a gbɛtɛɛ a ƃara.

¹⁸ Ziɣãaŋ ŋɔkôya é kɛ́ a kɔ́ɔ-ƃɔlɔni puu káo lɔ́ɔlu mɛi da, da gbora. Ŋɔŋa-kɛtɛ é kɛ́ a kɔ́ɔ-ƃɔlɔni lɔ́ɔlu mɛi saaƃa. Ŋɔmɛi kôya é kɛ́ a kɔ́ɔ-ƃɔlɔni lɔ́ɔlu mɛi da, da gbûra. Ziɣãŋ tɔɔ-seɣe-ŋai dí kɛ́ a gbɛtɛɛ a seɣe kole nɛnɛ-fɛfɛɛ lɛ́lɛɛ, bîleki-ŋai dí ƃò a dí kpɛtɛɛ a ƃara.

¹⁹ Fɛ̂ɛ Bɛ́rɛi tii-kɛ-sãai da dɔɔ-sãai kélee é pɛ́lɛ ziɣãŋ tɔɔ-sãai kélee dîa díkɛ a díkpɛtɛɛ a ƃara.

Laŋpoi mɛi káa pere

²⁰ “M̀ó Eezuɛ-ŋai dîa a gɛɛ dí pá ípɔ a ɔle wulɔ lɛ́lɛɛ laŋpoi mɛni ma a gɛɛ í zee é kɛ́ sônii a tãi kélee.

²¹ Eelɔŋ da ǹônii dí laŋpoi ŋí mɛi káa a kpíni da fólo ŋasua kɔlɔ seɣe pɛrɛi mu ƃɛ́i ŋa pâi kɛ̂i ŋánûai kâai naai. Dí zée zeɣei ŋɛ́i-tuɛ gãlai ŋɛ́i-tuɛ nyii dɔ̂ŋ-ŋai díkaa zui. Fɛ̂ɛ Eezuɛ-ŋai dí dɔ̂ŋ ŋí mɛi káa dífulu-laai su da dísuui su wɔlɔ-wɔlɔ da wɔlɔ-wɔlɔ.”