Lɛɛ gbɔwɔ ɓa 26 - Bible

Zua-kɔlɔ seɣe pɛ́rɛi

¹ “Ka ŋásua kɔ̂lɔ seɣe pɛrɛi tɔ́ɔ a seɣe-ƃela puu nyii-ŋai balâai a yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lui. Ŋ̀âla-taa kooŋ-sãa pɔkɔɔŋ-ŋa dí kɛ́ a díkpɛtɛɛ dîa a ǹɛ́lɛɛ.

² Zeɣe-ƃela-ŋai dɔnɔ ŋɔkôya é kɛ́ a kɔ́ɔ-ƃɔlɔni náaŋ da gbora. Ŋɔŋa-kɛtɛ kɛ́ ƃò a kɔ́ɔ-ƃɔlɔni lɔ́ɔlu mɛi da. Zeɣe-ƃela-ŋai ŋá é kɛ́ a bɔriɛɛ.

³ Ǹɔ́ɔlu sɔ́lɔ gîe ma í ǹɔ́ɔlui kpéli sɔ́lɔ gîe ma máŋ.

⁴ Sɛ́lɛŋ kpɛtɛ zeɣe-ƃela lɔ́ɔlu sɔ́lɔɔ gîe ŋâi maa-ŋuŋ dɔnɔ mà a seɣe-ƃela bûluŋ kɛ́ɛ. Gɛ́ ŋɔ́nɔ tí a zeɣe-ƃela lɔ́ɔlu sɔ́lɔɔ gîe ŋâi veerɛ-ɣelei.

⁵ Zɛ́lɛŋ-ŋai dí káa zeɣe sɔ́lɔɔ gîe ŋá feerɛi-ŋai ŋí mai dɔnɔ ŋɔi é kɛ́ buu lɔ́ɔlu, gbélii ŋɔi kɛ́ ƃò buu lɔ́ɔlu. Fɛ̂ɛ zɛ́lɛŋ-ŋai ŋí dí kɛ́ díkîe-ni téniŋ ma.

⁶ Gôo kpua buu lɔ́ɔlu kpɛtɛ í díkolo kɛ́ dîa a gɛɛ dí zeɣe feerɛi m̀éla kélee sée gîe ŋí a gɛɛ bɛ́rɛi é kɛ́ a pɛ́rɛ tɔnɔ.

⁷ “Seɣe ƃela puu káo tɔnɔɔ kpɛtɛ máŋ a ƃoli-leɣa í Bɛ́rɛi mɛi pɛ́lɛ la.

⁸ Zeɣe ƃela-ŋai ŋí dɔnɔ ŋɔkôya é kɛ́ a kɔ́ɔ-ƃɔlɔni lɔ́ɔlu ŋɔŋa-kɛtɛ kɛ́ ƃò a kɔ́ɔ-ƃɔlɔni lɔ́ɔlu mɛi da. Fɛ̂ɛ zeɣe ƃela puu káo tɔnɔɔi ŋí kélee dí kɛ́ a dípɔ̂riɛɛ.

⁹ Ǹɔ́ɔlu sɔ́lɔ gîe ŋá. Í ǹɔ́ɔlu mɛi dai sɔ́lɔ gîe ŋá. Zeɣe ǹɔ́ɔlu mɛi dai í dísɔ̀lɔ gîe ŋái, bɛlɛ gîe lá í bɛlɛ Bɛ́rɛi mɛi é sêleŋ ŋɛ́i-tuɛ mɛi.

¹⁰ Sɛ́lɛŋ buu lɔ́ɔlu kpɛtɛ zeɣei maa-ŋuŋ m̀éla dɔnɔ mà, í sɛ́lɛŋ buu lɔ́ɔlu kpɛtɛ veerɛi m̀éla dɔnɔ mà.

¹¹ Ƃara buu lɔ́ɔlu kpɛtɛ í díkolo kɛ́ dîa, í dípili zɛ́lɛŋ-ŋai su a gɛɛ zeɣe feerɛi ŋí m̀éla veerɛ é sée gîe ŋá dí kɛ́ a seɣe tɔnɔ.

¹² Zeɣei nyii pâi lɛɛ̂i, zɛ̂lɛŋ Bɛ́rɛi pôlu-pere é seri gɔ́ɔ tɔɔ̂i.

¹³ Zeɣei wóli é sɛ̂lɛŋ Bɛ́rɛi m̀éla veerɛ mà yɛ̂ɛ kɔ́ɔ-ƃɔlɔni tɔnɔ a gɛɛ é mɛi pɛ́lɛ.

¹⁴ “Bɛ́rɛi mɛi-pɛlɛ-sɛŋ feerɛ kpɛtɛ máŋ. Dɔnɔ é kɛ́ a ƃála-sirɛ kɔlɔ pâa nyii bɔyɛ̃ toɔɔ a gbɔlu. Mɛi pɛ́lɛ-sɛŋ veerɛ-ɣelei é kɛ́ a sua-kɔlɔ pâa lɛ́lɛɛ.

¹⁵ “Bɛ́rɛi pîlaŋ-wuru-ŋai kɛ́ a kpitili.

¹⁶ Díkôya é kɛ́ a kɔ́ɔ-ƃɔlɔni puu káo lɔ́ɔlu, díŋa kɛ̂tɛ kɛ́ ƃò a kɔ́ɔ-ƃɔlɔni feerɛ.

¹⁷ Ŋ̀úru-ŋai tɔ́ɔ gîe-ni kɔlɛ feerɛ-feerɛ í gbamo a wúru-ƃela kpua-kpua. Bɛ́rɛ pîlaŋ-wuru-ŋai kélee kɛ́ tí.

¹⁸ Ƃà kɛ̀ bɛ́rɛ-wurii pîlanii, buu feerɛ pîlaŋ seɣai-pere.

¹⁹ Bîleki buu náaŋ kpɛtɛ a káne í lóa tée gélee su tɛi-tɛi. Dísee bɛ́rɛ-pîlaŋ wûru buu feerɛi kɔ́ɔ mu. Veerɛ sée ŋ̀úruii dɔnɔ kɔ́ɔ mu a gɛɛ gɔ́ɔ veerɛ é lɔ́ zu.

²⁰ Bɛ́rɛ-pîlaŋ wurii buu feerɛ pîlaŋ bɛ́rɛi ŋɔyá-ŋûa-pere ƃelai mâ.

²¹ Bîleki buu náaŋ kpɛtɛ a káne, í veerɛ sée ŋ̀úrii kélee kɔ́ɔ mu tɛi-tɛi.

²² Wúru lɔ́ɔlu mɛi da pîlaŋ Bɛ́rɛi ŋɔseɣai-pere ƃelai mâ.

²³ Wúru feerɛ-feerɛ tɔ́ɔ Bɛ́rɛi pôlu sônoŋ feerɛi su tɛi-tɛi.

²⁴ Bɛrɛi sônoŋ-su wûru feerɛi ŋí dí kɛ́ a díŋa kɔlɛɛ díkɔɔ pîlanii pere, kɛ́lɛ dípuɔ díkîe ma dí kpɛɛ ŋá. Zônoŋ feerɛi su-wuru-ŋai dí kɛ́ tí máŋ. Maa nɛ̃ɛ̂i dí kɛ́ a Bɛ́rɛi zônoŋ-ŋa.

²⁵ Mɛni ma da pâi kɛ̂i a wúru lɔ́ɔlu mɛi saaƃa da bîleki puu káo lɔ́ɔlu mɛi da nyii-ŋai díkpɛtɛɛi a kánei. Veerɛ a pâi kɛ̂i ŋ̀úruii dɔnɔ mu. Veerɛ kɛ́ ƃò dɔnɔ mu.

²⁶ “Wúru kôya-koyaa puu káo lɔ́ɔlu kpɛ̀tɛ a kpitili-ƃela. Ǹɔ́ɔlu lâa bɛ́rɛ pîlaŋ wûru-ŋai ŋá Bɛ́rɛ-ƃelai dɔnɔ mâ tɛi-tɛ́i.

²⁷ Ǹɔ́ɔlu é kɛ́ Bɛ́rɛi pîlaŋ-wuru-ŋai ŋá Bɛ́rɛi-ƃelai dɔnɔ ma. Ǹɔ́ɔlu kɛ́ ƃò Bɛrɛ-pîlaŋ-wuru-ŋai ŋá bɛrɛ-ƃelai nyii gáa voloi-liî perei ŋá, Bɛ́rɛ-pôlu pere.

²⁸ Ǹaa-ŋa wúrii nyii gáa zamɛi é kɛ́ a gôyai dɛ̀ɛ bɛ́rɛ pîlaŋ-wuru-ŋai nyii-ŋai dí pîlaŋɔɔi Bɛrɛi-ŋɛ́i-tuɛ perei da bôlu pere ŋɔ-ŋai dîa, é siɣe bɛ́rɛ m̀éla tɔnɔ mâ é seri gberi ma.

²⁹ Gôo pú bɛ́rɛ pîlaŋ-wuru-ŋai dîa í ǹaa-ŋá wúru-ŋai soŋ-sɛŋ kpɛtɛ dîa a gôo. Gôo pú ǹaa-ŋá wûru-ŋai dîa máŋ.

³⁰ Bɛ́rɛi ŋí kpɛtɛ nɔ́ yɛ̂ɛ berei ŋá nɛ̀ la yâ ǹyéei mai.

³¹ “Seɣe kpɛtɛ a yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu. Ŋ̀âla-taa kooŋ-sãa pɔkɔɔŋ-ŋa dí kɛ́ a díkpɛɛ ma.

³² Zeɣei sɛ̂lɛŋ wúru kôya náaŋ ma nyii-ŋai díkpɛtɛɛ̂i a kpitili-ƃelai. Gôo pú ŋ̀úru kôya náaŋ ŋí dîa í díkolo kɛ́ dîa. Bîleki náaŋ kpɛtɛ a káne í lóa tée zu í ŋ̀úru-koya náaŋ pîlaŋ zu.

³³ Zeɣei sɛ̂lɛŋ ŋ̀úru kôya-ŋai kólo ma bɛ́rɛi mu. Gbanaŋ-woo-kɛɛ maa gãlai sée zeɣei pôlu pere, zeɣei a pâi Gwaa Maa Waai ma da Gwaa Maa Waai ŋɔkwaa maa Waai loai lâai.

³⁴ Gãlai mɛi pɛ́lɛ-sɛŋ pɛlɛ mɛi Gwaa Maa Waai ŋɔkwaa Maa Waai ma.

³⁵ Teƃelei sée zeɣei ŋɛ́i-tuɛ-pere í laŋpo-see-wurii tɔ́ɔ nàa ŋɔseɣai-pere teƃelei téniŋ ma í teƃelei sée nàa ŋɔyá-ŋûa-pere.

³⁶ “Seɣe kpɛtɛ Bɛ́rɛi láƃelei mɛni ma a yee bûluŋ kɛ́ɛ, yee-kpɔ̂lu m̀u tɛiɣɛɛ da ƃála-leɣa kpɔ̂lu. Maa nɛ̃ɛ̂i yɛrɛ-nuu é bɔ̃yɛ a ǹɛ́lɛɛ.

³⁷ Wúru kôya lɔ́ɔlu kpɛtɛ a kpitili-ƃela zeɣei ŋí mɛni ma í gôo pú dîa. Díkolo kɛ́ dîa a gôo. Bîleki lɔ́ɔlu kpɛtɛ a ƃara í lóa tée zu ŋ̀úru kôya-ŋai ŋí mɛni ma. Gôo pú dîa. Díkolo kɛ́ dîa a gôo. Bîleki lɔ́ɔlu kpɛtɛ a ƃara í lóa tée zu ŋ̀úru kôya-ŋai ŋí mɛni ma.”