Lɛɛ gbɔwɔ ɓa 25 - Bible

Zua-kɔlɔ seɣe pɛrɛi maa sama-sɛŋ

¹ Yâwɛɛ è mò Mose ma ǹyɛɛi,

² “M̀ó Eezuɛ-ŋai dîa a gɛɛ dí sama-sɛŋ tɛ́ɛ mɛ̂ni ma. Diai kélee ŋ̀wɛ̂lii dí dɛ́ɛ a lii-nɛ̃ɛi dí dɛ̀ɛ ípɔ.

³ Ǹyaŋ zama-sãai ká ŋí da pâi dɛɛ̂i. Gôo, kane da ƃara.

⁴ Seɣe kɔle nɛnɛ-fɛfɛɛ, yee bûluŋ kɛ́ɛ, yee kpɔ̂lu mù tɛiɣɛɛ, da ƃála-leɣa kpɔlu, seɣe kɔle nɛnɛ-fɛfɛɛ lɛ́lɛɛ, seɣe nyii dí gbɛ̀tɛ a ƃoli-lêɣai,

⁵ ƃála kɔlɔ pâa nyii dí bɔ̃yɛɛ tôo a gbɔlu, ƃoli kɔlɔ nyii dí bɔ̃yɛɛ tôo a gbɔlu, da kpitili ƃela,

⁶ wúlɔ nyii gáa laŋpo-ŋai mɛni mai, sɛŋ kúŋ nɛ̃ɛ nyii gáa ŋ̀úlɔi da bù núu-ŋûai mɛni mai, da nyii gáa kéreŋ sɛŋ kúŋ nɛ̃ɛ mɛni mai,

⁷ kɔni sɔ̃ɔ kpanaŋɔɔ-ŋa da maa ɣîri-sãa sɔ̃ɔ kpanaŋɔɔ-ŋa nyii-ŋai díkaa zâla láa soŋ-nuu kɛ́tɛi ŋɔmaa-ɣiri seɣe-ŋai mɛni mai.

⁸ M̀ó dîa dí kwaa ma waa mâ kpɛ̀tɛ maa mɛni ma a gɛɛ ŋá kɛ́ naa dísama.

⁹ Berei ŋa pâi môi la kâa a gɛɛ ká ŋasua kɔlɔ seɣe pɛrɛ maa waai tɔ́ɔ la da mu-sãa kéleei, bere ƃé ká dɔɔ la.”

Gbanaŋ-woo-kɛɛ Maa-kãlai

¹⁰ Gbanaŋ-woo-kɛɛ maa gãlai kpɛ̀tɛ a kpitili-ƃela nyii ŋɔkôya é kɛ́ a kɔ́ɔ-ƃɔɔni kɔ́ɔ-ƃɔlɔnii náaŋ, ŋɔŋa-kɛtɛ kɛ́ ƃò a kɔ́ɔ-ƃɔlɔnii feerɛ, ŋɔmɛi kôya kɛ́ ƃò a kɔ́ɔ-ƃɔlɔnii feerɛi

¹¹ Ka gôo pú bôlu-pere da zu-pere. Ká gôo tínaŋ ma ká doo gîei.

¹² Ka gãlai siɣe-sãai kpɛtɛ a gôo, ká dípu gãlai kpóŋ ŋá, m̀éla naaŋɔɔ ma. Veerɛ é kɛ́ m̀éla dɔnɔ ma, veerɛ kɛ́ ƃo m̀éla kpélii ma.

¹³ Ka wúru kôya feerɛ kpɛtɛ a kpitili, ká gôo pú dîa.

¹⁴ Ka ŋ̀úru kôya-ŋai lɔ́ gãlai siɣe-sãai su a gɛɛ ká ziɣe la.

¹⁵ Ŋ̀úru kôya-ŋai dí lɛ́ɛ gãlai siɣe-sãai su. Káfe díkula naa.

¹⁶ Gɔni ƃela-ŋai dɔ̂ŋ-ŋai pɔ̃yɛ̂ɛi diai, nyii-ŋai ŋa pâi dɛɛ̂i kápɔi, ka dípu gãlai su.

¹⁷ “Ka gãlai mɛi pɛ́lɛ-sɛŋ kpɛtɛ a gôo tee-tee, ŋɔ ŋa kɛ̂tɛ é kɛ́ a kɔ́ɔ-ƃɔlɔni feerɛ.

¹⁸ Ka ɣâla-taa kooŋ-sãai pɔkɔɔŋ feerɛ kpɛtɛ a gôo ká díɣale a kpɔ́kpɔ gãla lá tɛ́-sɛŋ gwaa feerɛ ma.

¹⁹ Dɔnɔ é kɛ́ gãlai lá tɛ́-sɛŋ gwaa tɔnɔ ma, gbéli kɛ́ ƃò gwaa tɔnɔ ma. Gãlai lá tɛ́-sɛŋ da bɔkɔɔŋ-ŋai dí kɛ́ nɔ́ a díkpɛtɛɛ a gôo tɔnɔi.

²⁰ Bɔkɔɔŋ-ŋai koôŋ é sâla gãlai lá tɛ́-sɛŋ mɛi a gɛɛ dí mɛi pɛ́lɛ a díkoôŋ, díŋɛi páa díkîe-ni pɔ́-pere díkɛ gãlai lá tɛ́-sɛŋ kâa.

²¹ Gɔni-ƃela feerɛi ŋa pâi dɛɛ̂i kápɔi ká bú gãlai su, ka gãlai lá tɛ́-sɛŋ pɛlɛ ǹá.

²² Ŋa pâi ŋ́gbîŋ lɛ̂i naa yâ. Ŋa pâi lônoi ípɔ gãlai lá tɛ́-sɛŋ mɛi ŋ̀âla-taa kooŋ-sɛŋ pɔkɔɔŋ-ŋai loai é pîlaŋ ŋátɔ̂ŋ-ŋai kélee dîa ŋa pâi dɛɛ̂i ípɔ Eezuɛ-ŋai mɛni mai.”

Teƃelei gáa gbólo maa waai mɛni mai

²³ “Teƃelei kpɛtɛ a kpitili-ƃela, ŋɔsɔkpɔ é kɛ́ a kɔ́ɔ-ƃɔlɔni saaƃa. Ŋɔŋa-kɛtɛ é kɛ́ a kɔ́ɔ-ƃɔlɔni tɔnɔ da gbûra, ŋɔmɛi-koya kɛ́ ƃò a kɔ́ɔ-ƃɔlɔni feerɛ.

²⁴ Gôo pú ŋ̀á í gôo karaŋ tínaŋ ma é doo gîei.

²⁵ Wúru-ƃela láa teƃelei wóli lá nyii ŋɔŋa-kɛtɛ káa a núu yée ŋá tɔnɔ, í dínaŋ ma. Gôo tínaŋ ŋ̀úru-ƃelai ma í doo gîei.

²⁶ Teƃelei siɣe-sɛŋ kpɛtɛ náaŋ a gôo í dípu teƃelei zônoŋ náaŋ su tɛi-tɛi ƃɛ́i-ŋai teƃelei kɔ́ɔ-ŋai díkaa naai.

²⁷ Teƃelei siɣe-sãai nyii-ŋai díkaa ŋ̀úru kôya-ŋai mɛni ma teƃelei siɣe-mɛni mai, fɛ̂ɛ dí kɛ́ ŋ̀úru-ƃelai kɔlɛ nyii dínaŋɔɔi teƃelei wóli lái.

²⁸ Wúru-ŋa kpɛtɛ a kpitili í gôo pú dîa nyii-ŋai pâi kɛ̂i a teƃelei siɣe-wuru-ŋai.

²⁹ Peleti-ŋa kpɛtɛ, kɔ̂pu-ŋa, sane-ŋa da kawulu-ŋa, dí kɛ́ a tíi kɛ́ sãa gbele-sɛŋ salai maa mɛni mà. Fɛ̂ɛ dí gélee kpɛtɛ a gôo tee-tee.

³⁰ Gbólo maa waai pú teƃelei ma ŋɛ́i-tuɛ a tãi kélee.”

Laŋpo see-wurii

³¹ Laŋpo see-wûru kpɛtɛ a gôo tee-tee. Gɔ́ɔ da gbono ɣále a kpɔ́kpɔ, í wúru-poa pɔkɔɔŋ-ŋa kpɛtɛ gbono ma a màa ɣiri-sɛŋ.

³² É dãɣa lá kúla mà lɔ́ɔlu mɛi da, zaaƃa kɛ́ ƃò m̀éla tɔnɔ ma, zaaƃa kɛ́ ƃò m̀éla kpéli ma.

³³ Kɔ̂pu saaƃa kpɛtɛ í dísee dãɣa-ŋai kélee ŋá tɛi-tɛi. Kɔ̂pu-ŋai ŋí díke yɛ̂ɛ ama-wuru-poa.

³⁴ Kɔ̂pu náaŋ kpɛtɛ yɛ̂ɛ ama-wuru-poa í dísee laŋpo see-wurii kpîŋ ŋá.

³⁵ Wúru-ŋɛi-loŋ kpúlɔ tɛi-tɛi kpɛtɛ dãɣai zaaƃa mu laŋpo see-wurui kpono mâ ḿela feerɛ mà dãɣa-ŋai mú-pere.

³⁶ Laŋpo see-wurui da kɔ̂pu-ŋai é pɛ́lɛ dãɣa-ŋai dîa dí kɛ́ nɔ́ a díkpɛtɛɛ a gôo tɔnɔ. Díkelee dí kɛ́ a díɣaleɛɛ a kpɔ́kpɔ.

³⁷ Laŋpo lɔ́ɔlu mɛi feerɛ kpɛtɛ laŋpo see-wurii mɛni ma. Dísee ŋ̀á a gɛɛ dísoŋ a pɔ̂ri dúɛ-pere ponôi.

³⁸ Laŋpo maa tîi kɛ́-sãai dí kɛ́ a díkpɛtɛɛ a gôo.

³⁹ Laŋpo see-wurii da gbɛtɛ-sãai kélee kpɛtɛ a gôo tee-tee nyii ŋɔwiyɛ káa a pãŋ buu lɔ́ɔlu mɛi feerɛ káo lɔ́ɔlu.

⁴⁰ Tãi siɣe a gɛɛ í díkɛ yɛ̂ɛ berei ŋá nɛ̀ la yâ ǹyéei mai.