Lɛɛ gbɔwɔ ɓa 21 - Bible

Luɛ-ŋa soŋ-pere

¹ “Dɔ̂ŋ-ŋai ká ŋí ƃa pâi bûi Eezuɛ-ŋai ŋɛ́i:

² À kɛ̀ ƃà Ibulu-luɛ yà é tíi kɛ́ yɛ̂ a kóraŋ lɔ́ɔlu mɛi da, mɛi feerɛ-ɣelei í ŋ̀uŋ ma ƃó é lí kpɛ́ni-kpɛni.

³ À kɛ̀ ǹyaa tɔnɔ ƃé pâi, é lí nɔ́ ǹyaa tɔ̂nɔ. À kɛ̀ è pà a ŋɔnɛnîi, da ŋɔnɛnîi dí lí.

⁴ À kɛ̀ m̀ɛi-nuui à nɛnî tɛ̀ɛ bɔ́ da ǹyaa dí lônii-sinaa da nɛyâa maa sɔlɔ ƃó, mɛi-nuui pɔ́ɔ ƃa nɛnîi da ǹônii. Ǹuɛi ǹyaa tɔnɔ nɔ́ é lí.

⁵ Kɛ́lɛ à kɛ̀ ǹuɛi à mò a gɛɛ è ŋɔmɛi-nuui wɛ́lini da ŋɔnɛnii é pɛ́lɛ ǹônii dîa mɛni ma vé ŋuŋ-maa-ƃô wɛ̂lii,

⁶ gɛ̀ ní fɛ̂ɛ ŋɔmɛi-nuui é pá la Ɣâla pɔ́. Fɛ̂ɛ é pá la bɛ́rɛi láƃelei é dɔɔ gbôŋ-soŋ-wurii kɔlɛ é ŋ̀óli ƃɔ́ a seme. Gɛ̀ ní a pɔ̂ri nâa tíi kɛ̂i ŋɔmɛi-nuui mî é lɛ́ɛ la zu ŋɔkɛ-ɣéniɛi é kpɛɛ.

⁷ “À kɛ̀ núu a ǹóŋ-nɛnii kɔ̀lɛ a luɛ, ŋɔmɛi-nuui fé ŋuŋ-ma ƃò yɛ̂ɛ luɛ-surɔ̂ŋ.

⁸ À kɛ̀ ǹuɛ-nɛnîi mɛi-nuui à gbɛ̀tɛ gíli ŋá a gɛɛ é ziɣe a ŋɔnɛnî, ǹyaŋ màa-mɛni fé m̀ɛi-nuui líi láa-ni, fɛ̂ɛ é ŋ̀uŋ ma ƃô. Vé a sɛŋ a gɛɛ é gɔ̀lɛ ŋɔ̃ya ma, kpɛ́ni fêi, vé tûa ní la a ǹɛ́lɛɛ.

⁹ À kɛ̀ à gbɛ̀tɛ gíli ŋá a gɛɛ é ziɣe a ǹóŋ-surɔ̂ŋ ŋɔnɛnî, fɛ̂ɛ é tûa la yɛ̂ɛ ǹóŋ nɛnî.

¹⁰ À kɛ̀ à nɛnî da kpɛ́ni kùla, fɛ̂ɛ é ǹuɛ-nɛnîi ŋá kɔ́ŋ é seɣe pú mà, da nɛnî da kpɛ́nii dítɔɔ̂i é kɛ́ a bɔriɛ.

¹¹ À wàla mɛni saaƃai ŋí kɛ́, gɛ̀ ní fɛ̂ɛ ǹuɛ-nɛnii é ŋuŋ-ma-ƃo sɔlɔ ƃó. Dífa ŋɔ́nɔ pɔ̂ri ŋɔsɛŋ-kaoi da tɛɛ̂i bɔ pôlu.

M̀ɛni nyɔ́mɔɔ-ŋai maa tɔ̂ŋ-ŋai

¹² “Núu à m̀arâŋ nùu lòkwa à bàa, fɛ̂ɛ dí maa ǹúui páa.

¹³ Kɛ́lɛ à kɛ̀ ǹúui fé gíri ní kɛ́lɛ è kɛ̀ nɔ́ a píyɔŋ nyii è m̀arâŋ pàa zui, gɛ̀ ní ŋa pâi kwaa da ma lɛ̂i ƃɛ́i a pɔ̂ri pûi é lí naai.

¹⁴ Kɛ́lɛ à kɛ̀ núu à gìri à pɛ̀lɛ m̀arâŋ-nuu ma dɛ̂i-pere à bàa, fɛ̂ɛ í maa-nuui kúla ŋ̀âla-teƃelei ma a gɛɛ é sáa.

¹⁵ “Ǹúui a ǹâŋ da ǹee lôkwai, fɛ̂ɛ dí maa nûui páa.

¹⁶ “Ǹúui a m̀arâŋ-nuu sòŋ a wála-wala-laa a gɛɛ é gɔ̀lɛ kpaa máŋ é gɛ́ ǹyêei loo perei, fɛ̂ɛ dí maa-nuui páa.

¹⁷ “Ǹúui a ǹâŋ làraŋ da ǹeei, fɛ̂ɛ dí maa-nuui páa.

¹⁸ “A kɛ̀ núu feerɛ da kɛ̀ kɔ̂i, ǹúui dɔnɔ é m̀arâŋ-nuui túa a kɔni kpaa máŋ a m̀ɔ-tâai, kɛ́lɛ vé baa ní, dífe tɔ̂ŋ kpɛ̀ ǹúui ma m̀arâŋ-nuui tùai, kɛ́lɛ à kɛ̀ ǹúui dí dùai, à kɛ̀ kɔ̂lɛi gɛ̀ ƃò láani gbìŋ ŋá,

¹⁹ tãi à kɛ̀ sia-sia lai, à nɛ̃ɛ ma kpîŋ é kɛ́ siâi a sia-wûru, fɛ̂ɛ ǹúui dùai é ŋɔtãi fela-fe kɛ́ é kpɔŋ-maa tɛ́ɛ bɔ́ é lɛ́ɛ la zu é ƃálo.

²⁰ “À kɛ̀ núu à ŋɔluɛ lòkwa a sia-wûru, nɛnî kpaa surɔ̂ŋ, ǹuɛi à sàa ŋ̀á ma, fɛ̂ɛ dí tɔ̂ŋ kpɛ́ maa-nuui ma.

²¹ Kɛ́lɛ ǹuɛi à wàla sàa fólo tɔnɔ yée mu kpaa máŋ fólo feerɛ, gɛ̀ ní dífe tɔ̂ŋ kpɛ̀ maa-nuui ma. Kpɛ́ni fêi, ǹuɛi káa a ŋɔsɛŋ-kao.

²² “À kɛ̀ nûa da lɛ̀ɛ kɔ̂i, ǹúui dɔnɔ é sɔ́ɔ koo-nɛni ma mɛni-nyɔmɔɔ é gɛ, kɛ́lɛ nɛnî fé saa ní, fɛ̂ɛ ǹúui sɔ̀ɔ mai, dí tɔ̂ŋ pú ma a sɛŋ kélee nɛnîi ŋɔsurɔ̂ŋ a ǹáa ƃòi. Ǹyaŋ nyii mɛni-ƃo-ƃelai da faa mai, ǹyaa ƃé a gɔ̀lɛ.

²³ Kɛ́lɛ à kɛ̀ nɛnîi à sàa, gɛ́ ní fɛ̂ɛ ǹúui sɔ̀ɔ mai é nɛwo fela-fêi kɛ́ a ŋɔlɛ̂woi.

²⁴ Ŋ̀ɛ́i fela-fêi ƃa ŋɛ́i. Nyíŋ fela-fêi ƃa nyíŋ. Yée fela-fêi ƃa yée. Kɔ́ɔ fela fei ƃa kɔ́ɔ.

²⁵ Kéreŋ-pɔ̂ɔ fela-fêi ƃa kéreŋ-pɔ̂ɔ. Pala fela-fêi ƃa pala. Kpimîliŋ fela-fêi ƃa kpimîliŋ.

²⁶ “À kɛ̀ nuɛ-namui a ŋɔluɛ-surɔ̂ŋ kpaa máŋ ŋɔluɛ-nɛnii tùa ŋ̀ɛ́i à ŋ̀ɛ́i wòlo, fɛ̂ɛ é nuɛi ŋuŋ ma ƃó a ŋɛ́i fela-fêi.

²⁷ À kɛ̀ a ŋɔluɛ-surɔ̂ŋ kpaa ŋɔluɛ-nɛnii tùa ǹá à nyíŋ kùla, fɛ̂ɛ é ǹuɛi ŋuŋ ma ƃó a nyíŋ fela-fêi.

Dɔ̂ŋ-ŋai bîlaŋɔɔi fɛnɛ-sɛŋ nyii a m̀araŋ fɛnɛ-sɛŋ kpaa máŋ núu ŋwanai mai

²⁸ “À kɛ̀ niŋa à surɔ̂ŋ pàa kpaa máŋ nɛnî, fɛ̂ɛ dí baa. Kɛ́lɛ núu da kélee fé zuai da mìi. Vé a sɛŋ a gɛɛ dí tɔ̂ŋ kpɛ́ niŋai nâmu ma.

²⁹ Kɛ́lɛ à kɛ̀ niŋai káa wɔ́lɔ nûa ŋwânai, ǹyaŋ díkɛ ǹâmu lia-woo ƃò a gɛɛ é ǹɔ́ kóraŋ su kɛ́lɛ vé gɛ̂i, à surɔ̂ŋ pàa kpaa máŋ nɛnî pàa, fɛ̂ɛ dí baa da ǹâmu.

³⁰ À kɛ̀ da niŋai ǹâmu marê à kɛ̀ a pɔ̂ri ŋɔfúlu-laai ŋuŋ ma ƃôi, gɛ̀ ní fɛ̂ɛ zɛŋ-kaoi da ǹáa ƃò mai, é gɔ̀lɛ.

³¹ À kɛ̀ niŋa à surɔ̂ŋ-loo pàa kpaa máŋ nɛnî-lo, fɛ̂ɛ dí mɛni tɔnɔi tí kɛ́ la.

³² À kɛ̀ niŋai à luɛ-surɔ̂ŋ pàa kpaa máŋ luɛ-nɛnî, ǹâmu é kane kpua-kpua buu saaƃa tɛ́ɛ nuɛ-namui pɔ́, dí niŋai kpîŋ paa.

³³ “Núu à lóa lɛ́ɛ a ǹá ƃóɔɔ kpaa máŋ é lóa tée vé mɛi pɛ̀lɛ ní, niŋa kpaa máŋ wɛlɛ-sôo é tóo zu,

³⁴ fɛ̂ɛ ǹóa-namui é vela-fe kɛ́. Fɛ̂ɛ é sɛŋ-kao tɛ́ɛ nâmu pɔ́, zua-pomai é lɛ́ɛ ǹyêei.

³⁵ À kɛ̀ núu ŋɔniŋa à m̀arâŋ-nuu ŋɔniŋa pàa fɛ̂ɛ dífeerɛ dí niŋa fûlui kɔ́lɛ dí zɛŋ-kaoi ŋá kɔlɛ díloai, dí niŋa pomai tée dí zua ŋá kɔlɛ máŋ díloai.

³⁶ Kɛ́lɛ à kɛ̀ niŋai káa nɔ́ wɔ́lɔ m̀arâai ŋwânai, ǹyaŋ ǹâmu fé nɔ̂i kóraŋ su, fɛ̂ɛ é m̀arâŋ-nuui ŋɔniŋai fela-fe kɛ́ a niŋa. Gɛ̀ ní niŋa pômai a pâi lɛɛ̂i a bɔ́ɔ.”