Lɛɛ gbɔwɔ ɓa 20 - Bible

Dɔ̂ŋ puui

¹ Ɣâla è ŋ̀óo-ŋa ŋí kélee ƃò ǹyɛɛi,

² “Ńyãa ƃa Yâwɛɛ Ɣâla nyii íkùla ǹuɛ-lâai su Ize lɔii sui.

³ “Ífe ɣâla da kpɛ́ni fɛ́li é tée ḿbôlu.

⁴ “Ífe ɣâla da kpɛ́ni kpɛ̀tɛ ímɛni ma í móloŋ sɛŋ nyii kélee gáa ŋ̀elei su da sɛŋ nyii kélee gáa ǹɔii ma da nyii kélee gáa ǹyái su ǹɔii sui dîa.

⁵ Ífe pɛ̀lɛ díkɔɔ mu kpaa máŋ í dífɛli. Kpɛ́ni fêi, ńyãai a Yâwɛɛ Íɣâlai, ŋgáa a tólo Ɣala. Ŋa lóŋ-naŋ-ŋa kélee dísɔnyɔ̂ŋ maa tɔ̂ŋ pú dílônii dîa. Ŋa bù dílônii díwɔ-lônii dîa da díwɔ lonii nyii-ŋai da ŋ́gbɔarai.

⁶ Kɛ́lɛ ŋa wála támaa malôŋ káa diai da ŋ́wɛ̂lii dí ŋatɔ̂ŋ-ŋai mɛi káai.

⁷ “Ífe Yâwɛɛ Íɣâla láa toli kpɛ́ni-kpɛni. Kpɛ́ni fêi, ǹúui a ǹáa toli kpɛ́ni-kpɛni, ŋa pâi tɔ̂ŋ kpɛ̂i ma.

⁸ “Vii-tɔɔ-ɣelei é lɛ́ɛ íkili ŋá í mɛi káa a maa waa.

⁹ Ítii-ŋai kélee kɛ́ fólo lɔ́ɔlu mɛi da yée mu.

¹⁰ Kɛ́lɛ mɛ̀i feerɛ ɣelei káa a fii tɔɔ ɣele Yâwɛɛ Íɣâla mɛni ma. Ífe tíi da kélee kɛ̀ a maa-ɣele tí, ƃía é pɛ́lɛ íloŋ-surɔ̂ŋ mâ da íloŋ-nɛnii, é pɛ́lɛ íyee mu-surɔ̂ŋ ma da íyee mu-nɛnii, da ítaa-tulɛi é pɛ́lɛ ŋɔ̃yai ma gáa ítaai sui.

¹¹ Kpɛ́ni fêi, fólo lɔ́ɔlu mɛi da yée mu ƃé Yâwɛɛ è ŋ̀elei kpɛ̀tɛ la da ǹɔii da ǹyái da zɛŋ kélee gáa dísui é víi tɔ́ɔ a mɛi feerɛ ɣelei. Mɛni ƃé Yâwɛɛ è lûwa làa la Vii-tɔɔ-ɣelei mâ é maa wáa.

¹² “Ƃâa kɛ́ ínâŋ ma da ílee a gɛɛ ífulu-laai su é kôya ǹɔii ma nyii Yâwɛɛ Íɣâla a dɛɛ ípɔi.

¹³ “Ífe núu pàa

¹⁴ “Ífe wulu-wulu kɛ̀.

¹⁵ “Ífe ŋúma kɛ̀.

¹⁶ “Ífe wôya sere-faa kɛ̀ a íbarâŋ-nuu.

¹⁷ “Ífe íƃarâŋ-nuu ŋɔpɛ́rɛ maa liî tèe. Ífe íƃarâŋ-nuu ŋɔnɛnîi maa liî tèe, é pɛ́lɛ ǹyée ŋá surɔ̂ŋ ma, ǹyée ŋá nɛnîi, ŋɔni-ŋai, da ŋɔsoo-falaŋ é pɛ́lɛ gɔ̃liŋ kélee ma.”

Ǹûai dí yào

¹⁸ Tãi ǹûai kélee dí ŋ̀ele-gbânai tíŋ mɛni la, dí ŋ̀ele-gbânai ŋɔmãla-mãlai kâai, dí dúru-wooi mɛ̀ni, dí nurii káa kulâi ǹyéei mai, dí kpɛ̀liŋ a yao dí pú dí lí dítɔɔ kwaa kôya ma.

¹⁹ Dí mò Mose ma dîyɛɛi, “Lóno kúpɔ, kwa pâi íwoo mɛnii. Kɛ́lɛ Ɣâla à lòno kúpɔ kwa pâi saâi.”

²⁰ Nya ƃe Mose è mò ǹûai dîa ǹyɛɛ, “Káfe yào. Ɣâla a pâi nɔ́ a gɛɛ é kásu kɔ̂ɔŋ a gɛɛ ŋɔyao-maai é kɛ́ nɔ́ kákponôi, a gɛɛ káfe sɔnyɔ̂ŋ kɛ̀.”

²¹ Ǹûai dí kɛ̀ tɔɔ̂-ni kwaa kôya ma, Mose è lɛ́ɣɛ a ŋ̀ele-kɔlɔŋ kole su kpiniɛɛ ƃɛ́i Ɣâla è kɛ̀ naai.

Dɔ̂ŋ-ŋai bîlaŋɔɔi ŋ̀âla-teƃelei mai

²² Nya ƃe Yâwɛɛ è mò Mose ma a gɛɛ é mó Eezuɛ-ŋai dîa ǹyɛɛi, “Ka gáa kákpîŋ a gɛɛ Ńyãa Yâwɛɛ ŋa kula Ɣâla-taa ŋa lóno kápɔ.

²³ Káfe sɛŋ da kpɛ́ni kpɛ̀tɛ kámɛni ma a gɛɛ dí kɛ a káɣâla-ŋa ká dí fɛli kwa dia-ni à nɛ̃ɛ ma kpîŋ dí kɛ a kane da gôo.

²⁴ Ɣâla-teƃele kpɛ̀tɛ mî a pɔ̂rɔ í kéreŋ sala kúla ŋá da ílii-see salai é pɛ́lɛ íƃala-salai ma da íniŋa-salai. Ƃɛ́i kélee ŋa ǹaa sìɣe a gɛɛ ká ḿvɛli naai. Ŋa pâi pâi naa ŋá lûwa láa kâa.

²⁵ À kɛ̀ ƃà ɣâla-teƃele kpɛ̀tɛ ḿî a kɔni, ífe gbɛ̀tɛ a gɔnii nyii núu-kpune è ŋòloi. Kpɛ́ni fêi, ƃà ŋ̀olo a kpɔ́kpɔ, gɛ̀ ní màa fé pâi kɛ̂i a ŋwaa mɛni ma.

²⁶ Ífe íkɔɔ tɔɔ̂i kɛ̀ ŋátêbelei mâ a gɛɛ í tɛ́ ma, ífa lâa íkaŋ lɛ́ la ḿâ.”