Lɛɛ gbɔwɔ ɓa 19 - Bible

Eezuɛ-ŋai díkaa Sana Yeei ma

¹ Eezuɛ-ŋai kuláa Ize lɔii su maa-ɣaloŋ zaaƃai ŋɔɣele-kûui maa-ŋuŋ, dí sèri Sana fɛ̃ɛ-kpalaŋ su.

² Tãi dí kùla la Lɛfidiŋ dí pá Sana fɛ̃ɛ-kpalaŋ sui, dí díƃûui pù naa Sana Yeei ŋɛ́i-tuɛ.

³ Nya ƃe Mose è tɛ̀ ǹyêei su. Ɣâla è dòli naa ǹyɛɛ mai, “Mɛni ŋí ƃó Zeeka ŋɔnûai dîa nyii-ŋai díkaa a Eezuɛ-ŋai.

⁴ Ká mɛni-ŋai kâa ŋá gɛ̀ a Ize-ŋai, da berei ŋá gɛ̀ la ká pá ḿbɔ yɛ̂ɛ kuɛ a ǹônii sɛ̀lɛŋ goôŋ ma é koôŋ a diai.

⁵ Mɛni ma kà ŋ́oo mɛ̀ni ká ŋátɔ̂ŋ-ŋai mɛi káa, gɛ̀ ní ka pâi kɛ̂i a ŋánûa kpîŋ-ŋa núu-sii kélee sáma. Ǹɔii kélee káa a ḿbɔɔ.

⁶ Ka pâi kɛ̂i a ŋalɔii-ŋuŋ su-ƃela nyii-ŋai pâi tíi kɛ̂i mî yɛ̂ɛ sâla láa-soŋ-ƃelai. Ka pâi kɛ̂i a ŋánûa maa-waa-ŋa. Ŋóo-ŋai ŋí ƃé í m̀ó ǹûai dîa.”

⁷ Nya ƃe Mose è pà é ǹûai túɛ-ƃelai kélee tóli é m̀ɛni-ŋai kélee pú díŋɛi nyii-ŋai Yâwɛɛ è mò mai.

⁸ Ǹûai kélee dí ŋ̀óo su tòo a gîe dîyɛɛ, “Mɛni kélee Yâwɛɛ è mòi kwa pâi gélee kɛ̂i.” Nya ƃe Mose è wóoi ŋí su kùla Yâwɛɛ ma.

⁹ Yâwɛɛ è mò Mose ma ǹyɛɛi, “Ŋa pâi pâi ípɔ ɣele-kɔlɔŋ kole su-kiniɛɛ su a gɛɛ ǹûai dí kúlono-woo mɛni kwa yá, dí láa a yá wɔlɔ-wɔlɔ da wɔlɔ-wɔlɔ.” Nya ƃe Mose è ǹûai wóoi ŋí su kùla Yâwɛɛ ma.

¹⁰ Yâwɛɛ è mó Mose ma ǹyɛɛi, “Lí ǹûai pɔ́ naa í kpɔ́ŋ dîa dí díkpîŋ kpɛ̀tɛ sâa da tínaa ḿvɛli mɛni ma. Dí díseɣe-ŋai wáa.

¹¹ Dí kɛ́ a díkpîŋ kpɛtɛɛ a ŋ̀ele-kûui zaaƃa ɣelei. Kpɛ́ni fêi, maa-ɣelei tí ƃé, ńyãa Yâwɛɛ, ŋa pâi pâi la Sana Yeei ma ǹûai kélee ŋɛ́i.

¹² Póniŋ láa ǹyéei da ǹûai díloai í m̀ó dîa a gɛɛ dífe bóniŋ ma tíyeŋ dí lɛ̀ɣɛ ǹyéei ma. Ǹúui pâi lɛɣɛ̂i ǹyéei mai, a pâi saâi.

¹³ Núu fé pâi lɛɣɛ̂i maa nuui ma a ǹyée, kɛ́lɛ da pâi maa nuui sɔɔ̂i a kɔni kpaa máŋ dí m̀óŋ a sɔ̀la é lɛ̀ɛ la zu é saa. A nɛ̃ɛ ma kpîŋ é kɛ́ a núu-kpune kpaa máŋ taa-tulɛ vé lɛ̀ɛ a vúlu. Tãi da dúrii wóo mɛni lai da pâi pâi ǹyéei ma.”

¹⁴ Nya ƃe Mose è kùla ǹyéei tôŋ su é lí ǹûai pɔ́ naa ǹyée kwára é díkɛ dí díseɣe-ŋai wáa.

¹⁵ È mò dîa ǹyɛɛi, “Ka kákpîŋ kpɛ̀tɛ a ŋ̀ele-kûui zaaƃa ɣelei. Káfe lɛ̀ɣɛ nɛnî ma.”

¹⁶ Ŋele-kûui zaaƃa ɣele-walai, ŋ̀ele-gbâna da ŋɔmãla-mãlai dí kɛ̀ toôi ǹyéei ma. Ɣele-kɔlɔŋ kole su-kpiniɛɛ é pɛ́lɛ ǹyéei ma. Túru woo su kpanaŋɔɔ è kɛ̀ tɛ̂i naa. Ǹûai kélee kɛ̀ mûui sui, dí kpɛ̀liŋ a yao.

¹⁷ Nya ƃe Mose è kùla a ǹûai mûui su é pá a dîa é dítɔɔ Ɣâla ŋɛ́i-tuɛ ǹyéei koo mu.

¹⁸ Sana Yeei ma è kpìni kpɔ́ a luru. Kpɛ́ni fêi, Yâwɛɛ è kɛ̀ naa kpɔ́ yɛ̂ɛ suluŋ ŋɔŋ-luru. Ǹûai kélee dí kpɛ̀liŋ kpɔ́ a zu kɛ́tɛ.

¹⁹ Dúru-wooi su è kɛ̀ kɛ̂tɛi. Mose è kɛ̀ lônoi Ɣâla pɔ́. Ɣâla kɛ́ ŋ̀óo su tòo a ŋ̀ele-gbâna tîŋ.

²⁰ Nya ƃe Yâwɛɛ è yèŋ é pîlaŋ Sana Yeei tôŋ su. É Mose tòli ǹyéei tôŋ su é lí naa.

²¹ È mò Mose ma ǹyɛɛi, “Yèŋ ǹyéei kwára í ǹûai lia-woo-ƃô a gɛɛ dífe bòniŋ maa tîyeŋ a gɛɛ dí pá ŋgáa mɛni ma. Dà gɛ̀ tí gɛ̀ ní dítamaa ɣele da pâi saâi.

²² Zâla laa-soŋ-ƃelai máŋ da lɛ̂ɣɛ ŋ́gɔlɛi fɛ̂ɛ dí díkpîŋ kpɛ̀tɛ. À wàla kɛ́ tí, ŋa pâi tɔ̂ŋ kpɛ̂i dîa.”

²³ Nya ƃe Mose è mò Yâwɛɛ ma ǹyɛɛi, “Ǹûai dífa pɔ̂ri pâi ǹyéei ma kpɛ́ni fêi, ƃía kpîŋ í mò kûa a gɛɛ kú póniŋ láa kúloai kwa ǹyéei ní a gɛɛ kú ǹyéei síɣe a maa waa.”

²⁴ Nya ƃe Yâwɛɛ è mò mà ǹyɛɛi, “Pîlaŋ ka Eelɔŋ ká pá. Kɛ́lɛ zâla laa-soŋ ƃelai da ǹûai dífe bòniŋ maa tîyeŋ a gɛɛ dí tɛ́ ƃɛ́ ḿbɔ naa. Dà maa tîyeŋ, ŋa pâi tɔ̂ŋ kpɛ̂i dîa.”

²⁵ Nya ƃe Mose è yèŋ ǹûai pɔ́ naa é m̀ó dîa.