Lɛɛ gbɔwɔ ɓa 17 - Bible

Mose è yá kùla gɔnii su

¹ Eezuɛ-ŋai kélee díkùla Siŋ fɛ̃ɛ-kpalaŋ su díkɛ pà a ƃûu pú berei-su yɛ̂ɛ berei Yâwɛɛ è mò la dîa, é lɛ́ɛ la zu dí seri Lɛfidiŋ dí díƃûui pú naa. Kɛ́lɛ yá fé kɛ́ ní naa díkpele mɛni ma.

² Ǹûai dí laa-saa pɛ̀lɛ Mose mà dîyɛɛ mai, “Yá tɛ́ɛ kúpɔ kú gbele.” Mose ǹyɛɛ diai, “Ka laa-saa pɛlɛ̂i ḿâ lé mɛni ma? Ka Yâwɛɛ su kɔ̂ɔnii lé mɛni ma?”

³ Kɛ́lɛ kpele-wɛli è kɛ̀ ǹûai kɛ̂i a ŋánaa. Maa mɛni ma dí dílii ŋwana Mose ma dîyɛɛ mai, “Í kúkùla Ize lɔii su lé mɛni ma? Ƃa ŋ̀wɛ̂lii í kúpaa a kpele-wɛli kwa kúnîa-pɛlɛɛi da kútaa-tulɛ-ŋai?”

⁴ Nya ƃe Mose è Ɣâla fɛ̀li kpɔ́ a gbanaŋɔɔ kpɔŋ-mâ mɛni ma ǹyɛɛi, “Lé ƃé ŋa pâi gɛ̂i a ǹûai ŋí? Da nâa díkpîŋ kpɛtɛ a gɛɛ dí ńzɔɔ a kɔni.”

⁵ Nya ƃe Yâwɛɛ è Mose mà ǹyɛɛi, “Eezuɛ nuu-pɔlɔ-ŋai da-ni siɣe ka dia-ni ká tɔ́ɔ ǹûai túɛ. Lí a zia-wurii nyii í nɔ̀ Ǹâai Ya-leei sui.

⁶ Ŋa pâi tɔɔ̂i káŋɛi-túɛ gɔnii ma Orɛ. Ísia wurii kiîŋ nɔ́ gɔnii ma, ǹyaŋ yá a pâi kulâi zu a gɛɛ ǹûai dí gbele.” Nya ƃe Mose è gɛ̀ tí Eezuɛ-ŋai dínuu-pɔlɔ-ŋai ŋɛ́i-tuɛ.

⁷ Mose è nàa tòli a Mâsa da Mɛliba. Kpɛ́ni fêi, Eezuɛ-ŋai dí laa-saa pɛ́lɛ Mose mà dí su-kɔɔŋ tɛ̀ɛ Yâwɛɛ pɔ́ a marê-kɛɛi dí gɛ̀ dîyɛɛi, “Yâwɛɛ káa kúkɔlɛ, kpaa vé kúkɔlɛ?”

Eezuɛ da Amalaka-ŋai dí kɔ́ kɔ̀

⁸ Amalaka-ŋai dí pà dí kɔ́ pɛ́lɛ Eezuɛ-ŋai dîa Lɛfidiŋ.

⁹ Nya ƃe Mose è mò Zasua ma ǹyɛɛi, “Kpakolo da-ni siɣe kúmɛni ma, ka dîa-ni ka lí ká kɔ́ pɛ́lɛ Amalaka-ŋai dîa. Ŋa pâi tínaa tɔɔ̂i ǹyéei tôŋ su zia-wurii kɛ́ ƃò ǹyêei nyii Ɣâla è dɛ̀ɛ ḿbɔi.”

¹⁰ Nya ƃe Zasua è gɛ̀ yɛ̂ɛ berei Mose è mò la mai. È kɔ́ pɛ̀lɛ Amalaka-ŋai dîa. Mose, Eelɔŋ da Ɔ̂ɔ dí lì dí tɔ́ɔ ǹyéei tôŋ su.

¹¹ Tãi Mose a kâa ǹyée tɛ̀ la ɣelêi, Eezuɛ-ŋai díwala-walai a tɛ̂ɛ Amalaka-ŋai díwɔi ma. Kɛ́lɛ tãi a ǹyée yèŋ lai, Amalaka-ŋai díwala-walai a tɛ̂ɛ Eezuɛ-ŋai díwɔi ma.

¹² Ǹyaŋ Mose yée è nâa kɛ̀ saâi. Nya ƃe Eelɔŋ da Ɔ̂ɔ dí kɔni sìɣe dí ǹáa Mose é sée mɛi, Eelɔŋ da Ɔ̂ɔ dí ǹyée veerɛ sòŋ dí dɛ́ ɣelêi, ǹúui dɔnɔ kɛ́ ƃò ǹyée dɔnɔ ma, m̀arâŋ-nuui kɛ́ ƃò ǹyée gbélii ma. Nyée è lɛ̀ɛ a dɛ́ɛ ɣelêi é lɛ́ɛ la zu ɣele-wulii é kɛ́.

¹³ Zasua è nâa Amalaka-ŋai yée mɛi ɣàle a maa ɣelei ti.

¹⁴ Nya ƃe Yâwɛɛ è mò Mose mà ǹyɛɛi, “M̀ɛnii ŋí pɔ̃yɛ kɔlɔ ma a gɛɛ é lɛ́ɛ kákili ŋá í m̀ó Zasua ma a gɛɛ ŋa pâi Amalaka-ŋai dísuui kélee su karâi ŋ̀éniɛi su.”

¹⁵ Nya ƃe Mose è ɣâla-teƃele tɔ̀ɔ naa é ǹáa sée a “Yâwɛɛ káa a ŋá ƃenâ.”

¹⁶ Mose è mò ǹyɛɛ, “Ka káyee kɛ́ Yâwɛɛ ŋɔƃenâi ma! A pâi kɔ̂i Amalaka-ŋai pɔ́ wɔlɔ-wɔlɔ da wɔlɔ-wɔlɔ.”