Lɛɛ gbɔwɔ ɓa 16 - Bible

Ɣâla è mana da kpuyíri tɛ̀ɛ

¹ Nya ƃe Eezuɛ-ŋai kélee dí kùla Iliŋ dí lí Siŋ fɛ̃ɛ-kpalaŋ su, ƃɛ́i nàa káa Iliŋ da Sana díloai, a Eezuɛ-ŋai kuláa Ize lɔii su ŋɔɣaloŋ veerɛi ŋɔfólo buu káo lɔ́ɔlu ɣele.

² Díkelee dí dílii ŋwàna Mose mà da Eelɔŋ vɛ̃ɛ-kpâlaŋ su.

³ Dí mò dîa dîyɛɛi, “Èi pɔ̂ri kɛ̂i a ǹɛ́lɛɛ a gɛɛ Yâwɛɛ é kúpaa Ize lɔii su. Kú kɛ̀ nàa kúkɛ kúlaa mìi a kúnîa-pere. Kɛ́lɛ ka pá a kúa vɛ̃ɛ-kpâlaŋ su ƃɛ́ puru kɛ́ kúpâa.”

⁴ Yâwɛɛ è mò Mose mà ǹyɛɛi, “Gáa, ŋa pâi kpólo kulâi ŋ̀elei su ŋá bu kámɛni ma. Tɔɔ ǹûai dí lí a ɣele kélee dí ɣele tɔnɔ kpólo ɣɛ́ɛ. Bere sîi tí su ƃé ŋa pâi dísu kɔ̂ɔnii la à kɛ̀ da pâi ŋátɔ̂ŋ-ŋai mɛi kâai.

⁵ Tɔɔ dí ɣele-kûu feerɛ ŋɔ ɣɛ́ɛ a ŋ̀ele-kûui mɛi da ɣelei, dí gbɛ̀tɛ.”

⁶ Nya ƃe Mose da Eelɔŋ dí mò Eezuɛ-ŋai kélee dîa dîyɛɛ, “Ka pâi gɔ́lɔnîi ŋ̀ele-wulii ŋí su a gɛɛ Yâwɛɛ ƃé kákùla Ize lɔii su.

⁷ Ka pâi Yâwɛɛ ŋɔfólo-laai kâai tínaa ɣele-wâla. A kálii-ŋwanai maa mɛni mɛ̂ni nyii ká gɛ̀ mai. Gbɛ̂ɛ ƃa kúa a gɛɛ ká kálii ŋwána kûa?”

⁸ Nya ƃe Mose è mò ǹyɛɛi, “Yâwɛɛ ƃé pâi sua tɛ̂ɛi kápɔ ka mii a ɣele-wûlii é kpólo tɛ́ɛ kápɔ a ɣele-wala ka mii kálii é láa. Kpɛ́ni fêi, a kálii ŋwanai maa mɛni mɛ̂ni nyii ká gɛ̀ mai. Gbɛ̂ɛ ƃa kûa a gɛɛ ka kálii ŋwanai pú kûa? Kua fé ka kálii ŋwanai kûa. Kɛ́lɛ Yâwɛɛ ƃè.”

⁹ Nya ƃe Mose è mò Eelɔŋ ma ǹyɛɛi, “M̀ó Eezuɛ-ŋai kélee dîa dí pá dí tɔ́ɔ Yâwɛɛ ŋɛ́i-tuɛ. Kpɛ́ni fêi, a dílii ŋwânai maa mɛ̂ni mɛ̀ni.”

¹⁰ Tãi Eelɔŋ è kɛ̀ lônoi la Eezuɛ-ŋai kélee pɔ́i, dí kɛ̀ vɛ̃ɛ-kpâlaŋ su-pere kâai, ǹyaŋ Yâwɛɛ ŋɔfólo-laai è kùla díŋɛi ɣele-kɔlɔŋ kole su.

¹¹ Yâwɛɛ è mò Mose mà ǹyɛɛi,

¹² “Ŋa Eezuɛ-ŋai dílii-ŋwanai maa mɛ̂ni m̀ɛni. M̀ó dîa a gɛɛ da pâi sua miî a ŋ̀ele-wulii, gbóloi kélee da ŋ̀wɛ̂lii dí mii a Ŋ̀ele-wâlai. Gɛ̀ ní da pâi gɔ́lɔnii a gɛɛ ŋgáa a Yâwɛɛ nyii gáa a Díɣâlai.”

¹³ Nya ƃe kpuyíri-ŋa dí pà a ŋ̀ele-wûlii dí mûui láa fɛ́ɛ. Ɣele-wala kɛ́ɛ, lúu è pɛ̀lɛ mûui mɛi.

¹⁴ Tãi ǹúui è tàa lai, sɛŋ da-ni dí lɛ̀ɛ vɛ̃ɛ-kpâlaŋ su a m̀éla kpua-kpua yɛ̂ɛ lúu kane ŋa

¹⁵ Tãi Eezuɛ-ŋai dí gàa lai, dí díkîe-ni marê kɛ̀ dîyɛɛi, “Lé ƃé ŋí?” Kpɛ́ni fêi, dífe kɛ́ ní a gɔ́lɔŋɔɔ. Nya ƃe Mose è mò dîa ǹyɛɛi, “M̀ii-sɛŋ ká tí Yâwɛɛ a dɛɛ kápɔ mìi mɛ̂ni mai.

¹⁶ Yâwɛɛ a è mò a gɛɛ ká ŋɛ́ɛ tɛi-tɛi nyii ka pɔ̂ri miî. Núu kélee é ŋɛ̀ɛ yɛ̂ɛ berei ŋɔpɛ́rɛi mu ƃelai díkaa lai.”

¹⁷ Nya ƃe Eezuɛ-ŋai dí gɛ̀ tí. Ǹúui da-ni dí dámaa ɣɛ̀ɛ, da-ni dífe dámaa ɣɛ́ɛ ni.

¹⁸ Kɛ́lɛ tãi dí gɔ̀ɔŋ lai, diai dámaa ɣɛ̀ɛi, díwɔi da fé kula ní pôlu. Diai dífe dámaa ɣɛ́ɛ níi, da fé lɛ̀ɛ ní pôlu. Nyii nɔ́ núu tɛi-tɛi kélee da pɔ̂ri miî, ǹyaa nɔ́ ƃé dí ŋɛ̀ɛ.

¹⁹ Mose è mò dîa ǹyɛɛi, “Káfe da lɛ̀ɛ ɣele wâla mɛni ma.”

²⁰ Kɛ́ɛ dífe díwoli tɔ̀ɔ ní Mose wóo ma. Nuui da-ni dí díwɔi da lɛ̀ɛ é lɛ́ɛ la zu ɣele-wala é kɛ́. Ŋ̀ele-walai kɛ́ɛi, kolo è pù zu é kara. Mose líi è ŋwàna dîa.

²¹ Nyii da kâa pɔ̂ri miî a ɣele tɔnɔi, dí ŋɛ̀ɛ a ɣele wâla kélee. Kpɛ́ni fêi, vóloi a kâa kùla nɔ́, é séɣeŋ.

²² Dí ɣele-kûu feerɛ kpolo ɣɛ̀ɛ a ŋ̀ele-kûui mɛi da ɣelei, nyii kɛ̀ a omɛ feerɛ núu tɔnɔ mɛni mai. Eezuɛ-ŋai laa tuɛ-ƃelai kélee dí pà dí m̀ó Mose ma.

²³ È mò dîa ǹyɛɛi, “M̀ɛnii ŋí ƃé Yâwɛɛ è mò ǹyɛɛi, tínaa ƃa fii-tɔ̂ɔ ɣele nyii gáa a ɣele maa waa Yâwɛɛ mɛni mai. Gbóloi nyii ka pâi gbɛtɛ̂i ka gbɛtɛ, m̀ii-sɛŋ ka pâi ŋîlii ká ŋíli. Nyii pâi lɛɛ̂i, ka zêei kɛ́ tínaa mɛni ma.”

²⁴ Gbóloi nyii lɛ̀ɛi, dí zeêi kɛ é lɛ́ɛ la zu ɣele-wala é kɛ́ yɛ̂ɛ berei Mose è mò la diai. Kolo fé pú ní zu, ǹyaŋ vé kara ní.

²⁵ Mose è mò dîa ǹyɛɛi, “Ka mii sâa, kpɛ́ni fêi, sâa ƃa fii-tɔnɔ ɣele Yâwɛɛ mɛni ma. Káfe pâi sâa kpólo kâai vɛ̃ɛ-kpâlaŋ su.

²⁶ Ka ŋɛ̀ɛ a fólo lɔ́ɔlu mɛi da, kɛ́lɛ mɛi feerɛ ɣelei, nyii gáa a vii-tɔɔ ɣelei, káfe pâi da kâai.”

²⁷ Ǹûai da-ni dí lì vɛ̃ɛ-kpâlaŋ su a ŋ̀ele-kûui mɛi feerɛ-ɣelei a gɛɛ dí kpólo ɣɛ́ɛ dífe da káa ní.

²⁸ Nya ƃe Yâwɛɛ è Mose marê kɛ̀ ǹyɛɛ mai, “Tãi ɣɛɛlu ƃé káfe pâi fâai la a gɛɛ ka ŋatɔ̂ŋ-ŋai mɛi káa ká ŋalîa-woo-ŋai siɣei?

²⁹ Ka gáa, ŋa Vii-tɔɔ ɣelei tɛ́ɛ kápɔ. M̀ɛni ƃé ŋa mii-sɛŋ tɛ̀ɛ la kápɔ ɣele-kûu feerɛ mɛ̂ni ma a ŋ̀ele-kûui mɛi da ɣelei. Núu da fé kùla panaŋ ma a ŋ̀ele-kûui mɛi feerɛ ɣelei.”

³⁰ Nya ƃe ǹûai dí dífii tɔ̀ɔ a ŋ̀ele-kûui mɛi feerɛ ɣelei.

³¹ Eezuɛ-ŋai dí nâa gbóloi ŋí tòli a mana. È kɛ̀ yɛ̂ɛ mɛsɛ kao, golɛɛ. È kɛ̀ a nɛ̃ɛ yɛ̂ɛ kɔ̃́iŋ-wulɔ kpolo.

³² Nya ƃe Mose è mò ǹyɛɛi, “M̀ɛnii ŋí ƃé Yâwɛɛ è mò ǹyɛɛi, ‘Ka ŋɔomɛ tɔnɔ seêi kɛ́ kálônii díwɔ lonii mɛni ma a gɛɛ dí m̀ii-sɛŋ káa ŋá káŋa kɔ̀ŋ la vɛ̃ɛ-kpâlaŋ su tãi ŋá kákùla la Ize lɔii sui.’ ”

³³ Mose è mò Eelɔŋ ma ǹyɛɛi, “Sane síɣe í Manai ŋɔkɔ̂pu tɔnɔ pú zu í zee Yâwɛɛ ŋɛ́i-tuɛ a gɛɛ ká zeêi kɛ́ kálônii díwɔ̂ lonii mɛni ma.”

³⁴ Eelɔŋ è zèe Yâwɛɛ ŋɛ́i-tuɛ zeêi kɛ́ mɛni ma, yɛ̂ɛ berei Yâwɛɛ è mò la Mose mai.

³⁵ Eezuɛ-ŋai dí mana mìi a kóraŋ buu náaŋ é lɛ́ɛ la zu dí seri ǹɔii su ƃɛ́i nûa dí kɛ̀ naai. Dí lɛ̀ɛ mana mîi dí seri Keena lɔii ŋɔkoyaŋ-perei ma.

³⁶ Omɛ tɔnɔ káa a kɔ̂pu náaŋ, êfa kɛ́ ƃò a kɔ̂pu buu náaŋ, nyii gáa a kulûŋ tɔnɔi.