Lɛɛ gbɔwɔ ɓa 1 - Bible

Dí Eezuɛ-ŋai sôŋ a ǹyɔ́mɔɔ Ize

¹ Zeeka ǹônii-sinaai láa ká ŋí da dínûai, nyii-ŋai da dîa-ni dílì Ize lɔii sui.

² Lubiŋ, Simiɔŋ, Levi da Zuda,

³ Isaka, Zɛbulɔŋ Bɛŋsima,

⁴ Daŋ da Nɛfɛtɛli, Gâa da Asɛ.

⁵ Zeeka ŋɔnúu-suui kélee dí kɛ̀ a núu buu lɔ́ɔlu mɛi feerɛ. Zosɛ è kɛ̀ Ize lɔii su Zeeka da ŋɔnûai dí lɛ́ɛ liî naa.

⁶ Zosɛ da nîa-ni é pɛ́lɛ ŋɔnúu-pɔlɔ-ŋai kélee dîa dí nâa sàa.

⁷ Kɛ́lɛ Eezuɛ-ŋai dí ƃûu ƃò dí táma dí ǹɔii láa fɛ́ɛ, wála-wala kɛ́ ƃò díyêei.

⁸ Nya ƃe kâloŋ nina è kɛ̀ Ize lɔii mɛi, nyii vé kɛ́ ní a Zosɛ kɔ́lɔŋɔɔi.

⁹ È mò ŋɔnûai dîa ǹyɛɛi, “Ka gáa, Eezuɛ-ŋai da nâa táma wála-wala kɛ́ ƃò díyêei kúmɛi.

¹⁰ Kwaa kú táre-pere da kɔ́ri a gɛɛ kú díkpera dífe ŋɔ́nɔ ƃûu ƃó à wàla kɛ́ tí, tãi kɔ́ a pâi pâi la kûai, da pâi kpɔnîi kúkpɔara-ƃelai dîa dí kɔ́ kúpɔ dí pú dí kúla ǹɔii ŋí su.”

¹¹ Mɛni ma dí díkɛ̀ a luɛ-ŋa. Dí nûa pú dímɛi a gɛɛ dí Pitɔŋ da Laŋse tɔɔ mì, nyii-ŋai kɛ̀ a daa-lee-ŋai ƃɛ́i è mii-sãai ŋá tɛ̀ naa gîe mai.

¹² Kɛ́lɛ berei dí kɛ̀ dímɔ̂lɛ̃i lai bere nɔ́ ƃé dí kɛ̀ támai la ǹɔii gwaa kélee. Ize-ŋai dí nâa kɛ̀ yaôi dîa.

¹³ Mɛni ma dí Eezuɛ-ŋai mɔlɛ̃ kpɔ́ a ŋwana-lɔ̂ɔ-pere,

¹⁴ Dí dífulu-laai kpanaŋ díyêei a tíi kpanaŋ kɛ́ɛ. Dí kɛ̀ pɔ̂rɔ kanêi díkɛ̀ tíi sii támaa kɛ̀ gbâlaŋ-ŋai ŋá.

¹⁵ Nya ƃe Ize kaloŋ è mò Ibulu fɛ̃ɛ-lee zoo-feerɛi, Sifɛla da Pua dîa, ǹyɛɛ diai,

¹⁶ “Tãi kà lí la a gɛɛ ká Ibulu nɛnî kélee da maa fúloŋ, ǹolôŋ a kɛ̀ a surɔ̂ŋ-loo ka baa. Kɛ́lɛ, a kɛ̀ a nɛnî-loo, ka fé bàa”

¹⁷ Kɛ́lɛ vɛ̃ɛ-lee zoo-ŋai dí kɛ̀ yaôi Ɣâla ma dífe gâloŋ wóo sìɣe ní. Nya ƃe dí zinaa-nɛyãai lɛ̀ɛ a dífulu.

¹⁸ Nya ƃe Ize kaloŋ è vɛ̃ɛ-lee zoo-ŋai tòli é dímarê kɛ́ ǹyɛɛ diai, “Ká zinâa-nɛyãai lɛ̀ɛ a dífulu lé mɛni ma?”

¹⁹ Vɛ̃ɛ-lee zoo-ŋai dí mò Gâloŋ mâ dîyɛɛi, “Kpɛ́ni fêi, Ibulu-nɛyãai dífe yɛ̂ɛ Ize-nɛyãai. Dímaa fúloŋ-la fé wála ni. Dímaa a fúloŋ vɛ̃ɛ-lee zooi é lɛ́ɛ pâi serîi dîa.”

²⁰ Mɛni ma Ɣâla è tɔ̀ɔ vɛ̃ɛ-lee zoo-ŋai pôlu. Eezuɛ-ŋai dí ƃûu ƃò wála-wala kɛ́ ƃò díyêei.

²¹ Ɣâla è gɛ̀ vɛ̃ɛ-lee zoo-ŋai suu sú é kɛ́tɛ, kpɛ́ni fêi, dí yào mà.

²² Nya ƃe è mò ŋɔnûai kélee dîa ǹyɛɛi, “Ibulu-ŋai kélee da a lóŋ-surɔ̂ŋ maa sɔlɔ ƃô ka bili Ǹâai Ya-leei su. Kɛ́lɛ, ka dílônii nɛyãai kélee lɛ́ɛ a dífulu.”