Egaa 2 - Bible

Ŋ̀âla-pɛrɛ ninai ŋɔlɛ́lɛ-laai

¹ Dâlɔ kɛ́ɛ a kâloŋ maa kóraŋ veerɛi su, ŋ̀áloŋ ǹɔ́ɔlu mɛi feerɛi ŋɔfólo buu feerɛ káo tɔnɔ su, Yâwɛɛ ŋɔwóoi è pà ŋɔlóno kɛ́-nuui Egaa pɔ́ ǹyɛɛ,

² “Lóno Siatiɛ ǹóŋ Zɛrubabɛɛ pɔ́ nyii gáa a gɔmɛnɛ-nuu kɛ́tɛi Zuda-lɔii mɛi, da Zɛosadai ǹóŋ Zasua, nyii gáa a zâla láa-soŋ-nuu kɛ́tɛi, da ǹúui gbêli-ŋai kélee yɛɛ dîa,

³ ‘Gbɛ̂ɛ ƃé kásama è wɔ́lɔ bɛrɛi ŋí maa-ŋuŋ kàa berei è kɛ̀ a ǹɛ́lɛɛ lai? Gáa sáa léŋ káŋɛi? Vé káŋɛi nɔ́ kpɛ́ni-kpɛni?

⁴ Óo Zɛrubabɛɛ, ílii kpéle, óo Zɛosada ǹóŋ Zasua, íkaa a zâla láa-soŋ-nuui, ílii kpéle, bɛ́lɛɛ ǹúui gbéli-ŋai kélee dîa. Ka tíi kɛ́, kpɛ́ni fêi, ŋ́gaa kákɔlɛ, ŋ́gaa a Ŋ̀wála-wâla kélee Yâwɛɛ,

⁵ yɛ̂ɛ berei ŋá ŋ́gono tèe la káyêei tãi ká kùla la Ize-lɔii sui. Ŋámɔ̂leŋ káa kákɔlɛ ma, káfe yào.’ ”

⁶ Nya ƃe Ŋ̀wála-wâla kélee Yâwɛɛ è mò, “Nàa fé pâi tûai ŋa pâi ŋɔ́nɔ ŋ̀elei su tumôi da ǹɔii, ǹyái da ǹɔii kpâlai.

⁷ Ǹyaŋ ŋa pâi ǹɔii-ŋûŋ-ŋai kélee túmo-tûmoi dí pá a dítɔɔ-sãai ƃɛ́ ŋá ƃɛ́rɛi ŋí láa fɛ́ɛ a sɛŋ lɛ́lɛɛ-ŋa.

⁸ Gánei da gôoi ǹɔii sui, díkaa a ḿbɔɔ.

⁹ Bɛ́rɛ ninai a pâi fôloi é tɛ́ɛ bɔ́lɔi ma. Ŋa pâi tɔɔ-laa tɛɛ̂i ŋánûai pɔ́ da lii-sêe gwaa ŋí ma.”

Ɣâla ŋɔlóno kɛ́-nuui è zâla láa-soŋ-ƃelai marê kɛ̀

¹⁰ Ŋ̀áloŋ lɔ́ɔlu mɛi náaŋ ŋɔfólo buu feerɛ káo náaŋ su, Dâlɔ kɛ́ɛ a kâloŋ ŋɔkóraŋ veerɛi su, Ŋ̀wála-wâla kélee Yâwɛɛ è lòno ŋɔlóno kɛ́-nuui Egaa pɔ́ ǹyɛɛi,

¹¹ “Zâla láa-soŋ-ƃelai marê kɛ́ dí díkili ŋá sía é pîlaŋ marê-kɛɛi ŋí ma:

¹² ‘À kɛ̀ zâla láa-soŋ-nuui dɔnɔ a sua kpûa maa waa sìɣe é ǹɔ́ ŋɔyokpoi ǹyîƃa su, ŋɔyîƃai à lɛ̀ɣe kpólo ma, kpaa máŋ wúlɔ sane kpaa máŋ mii-sɛŋ sii kélee, a pɔ̂ri gɛ̂i maa é waa?’ ” Zâla láa-soŋ-ƃelai dí zu tòo “Kpao.”

¹³ Nya ƃe Egaa è mò ǹyɛɛ, “À kɛ̀ núu da maa fé waa ní, kpɛ́ni fêi, a lɛ̀ɣɛ saa ma, a lɛ̀ɣɛ zãai ŋí da ma, maa fa kɛ̂ a ŋwáa?” Zâla láa-soŋ-ƃelai dí ŋ̀óo su tòo dîyɛɛ, “Óoei, maa fa kɛ̂ a ŋwáa.”

¹⁴ Nya ƃe Yâwɛɛ è mò Egaa ma ǹyɛɛi, “Bere nɔ́ ƃé gáa la a ǹûai ŋí da ǹɔii-ŋûŋ-ŋai ŋ́ɛi túɛ. Bere nɔ́ ƃé gáa la a díi kélee da gɛ̂i, ǹyaŋ zɛŋ kélee da gùla a sâla ḿâi, maa fé waa ní.”

Yâwɛɛ a ŋɔlûwai maa kôno-tee kɛ́

¹⁵ Ka Ɣâla fɛli, ka kákili ŋá sía m̀ɛnii pâi kɛ̂i é síɣe sâa ma é lí túɛ-pere. Ká lɛ́ɛ pâi kɔni lâai gîe mɛi Ŋ̀âla-pɛrɛi ŋí mɛni ma, kákɛ-pere è kɛ̀ léŋ?

¹⁶ Tãi ka kâa kpâlaŋ ŋá tii kɛ̀ la è ƃò kákili ŋá a gɛɛ ka pâi mɔlɔŋ kɔ̂ŋ ŋuŋ lɔ́ɔlu mɛida sɔlɔ ƃôi naai, kɛ́lɛ ká ŋuŋ saaƃa kàa nɔ́. Tãi ka kâa tóu tèe la è ƃò kákili ŋá a gɛɛ ka pâi wúlɔ tiŋ lɔ́ɔlu sɔlɔ ƃôi, kɛ́lɛ ka kâa veerɛ sɔlɔ ƃó nɔ́.

¹⁷ Ŋá kási-sɛŋ-ŋai kɛ̀ dí kpála kákpâlaŋ-ŋai ŋá, ŋá sɛŋ kélee pàa a kpuri-kɔlɔŋ da fãa kɛ́tɛ, kɛ́lɛ káfe pá ni ḿbɔ.

¹⁸ Ka kákili ŋá sía é síɣe sâa ma, ŋáloŋ lɔ́ɔlu mɛi náaŋ ŋɔfólo buu feerɛ kao náaŋ ma. É síɣe maa ɣêlei tí ma tãi ká ńyãa Yâwɛɛ ŋápɛrɛi kɔ́ɔ pìlaŋ la.

¹⁹ Ka kákili ŋá sía: Mɔlɔŋ káa nii gêrei su? Kákpɔmɔ-ƃa-kpalaŋ, káfîi wuru-ŋai, kátulê-wuru-ŋai da káwɔlɔ-wuru-ŋai dífe niî kɛ́ ní ƃâi? É síɣe sâa ma, ŋa pâi kɛ̂i nâa lûwa lâai kâa.

Yâwɛɛ è góno tèe Zɛrubabɛɛ yêei

²⁰ Maa ɣêle tɔnɔ tí Yâwɛɛ ŋɔwóoi è pà ŋɔ́nɔ Egaa pɔ́ a ŋáloŋ ŋɔfólo buu feerɛ káo náaŋ ǹyɛɛi,

²¹ “Lóno Zɛrubabɛɛ pɔ́ nyii gáa a gɔmɛnɛ-nuu kɛ́tɛi Zuda-lɔii mɛi, a gɛɛ ŋa pâi ŋ̀elei da ǹɔii túmo-tûmoi,

²² ńyaŋ ŋa pâi gâloŋ-laa-ŋai wôloi. Ŋa pâi nâa ǹɔii-ŋûŋ-ŋai díwala-wâlai su karâi, ŋá gɔ́-keleŋ-ŋai su kara da diai díkaa géleŋ-ŋai sui. Ǹyaŋ zoo-ŋai da diai seêni dípôlui, da pâi díkîe-ni paâi a ƃóa-sɔkpɔ-ŋa.

²³ Maa ɣêlei tí ńyãai Ŋ̀wála-wâla kélee Yâwɛɛi, ŋa pâi ísiɣei Zɛrubabɛɛ, ŋátíi-kɛ-nuui, Siatiɛ ǹóŋ, ŋa pâi íkɛ̂i yɛ̂ɛ ńyee-ma-gbono kpɛ́ni fêi, ŋá ísiɣe ǹûai sáma.”