Egaa 1 - Bible

Yâwɛɛ è mò a gɛɛ dí Ŋɔpɛ́rɛi tɔ́ɔ ŋɔ́nɔ

¹ Dâlɔ kɛ́ɛ a kâloŋ ŋɔkóraŋ veerɛi su, ŋ̀áloŋ lɔ́ɔlu mɛi-dai ŋɔfólo maa-ŋuŋ ɣele Yâwɛɛ è worɛ̂ tɛ̀ɛ a ŋɔlóno kɛ́-nuui Egaa. È ŋ̀orɛ̂-wooi ŋí tɛ̀ɛ a gɛɛ dí mó Siatiɛ ǹóŋ Zɛrubabɛɛ ma nyii kɛ̀ a gɔmɛnɛ-nuu kɛ́tɛi Zuda-lɔii mɛi. È ŋ̀orɛ̂-woo tɔnɔi ŋí tɛ̀ɛ máŋ Zɛosada ǹóŋ Zasua pɔ́ nyii kɛ̀ a zâla láa soŋ-nuu kɛ́tɛi.

² Ŋ̀wála-wâla kélee Yâwɛɛ è mò ǹyɛɛ, “Ǹûai dîyɛɛ tãi fé niî seri ní a gɛɛ dí Ŋ̀âla-pɛrɛ Kɛ́tɛi tɔ́ɔ pôlu.”

³ È kɛ̀ tí, Yâwɛɛ ŋɔwóoi è pà ŋɔlóno kɛ́-nuui Egaa pɔ́:

⁴ “Gáa a mɛni lɛ́lɛɛ kákɛ nyìi kápɛrɛ lɛ́lɛɛ-ŋai mu Ŋápɛrɛi wóloɔ?

⁵ Ka kákili ŋá sía a ƃerei kákpɛtɛ-pêre káa la sâai.

⁶ Ka sí-sɛŋ támaa sì, kɛ́lɛ ka m̀á kuro-té kùla. Ka mii-sɛ̂ŋ mìi, kɛ́lɛ káfa pîla. Ka lɔɔ kpêle, kɛ́lɛ kákoo láa fa fɛ̂ɛ. Ka seɣe támaa tòo kâa kɛlɛ kátɔnɔ kpîŋ kponôi fé niî fãa ní. Ǹúui a sɛŋ-kao tii kɛi, a bù bɛ̂bɛ su nyii lóa káa mai.

⁷ Ka kákili ŋá sía a berei kákpɛtɛ-pêre káa la sâai.

⁸ Ka lí ǹyée-ŋai ma ká wúru-ŋa tée ká Ŋápɛrɛi tɔ́ɔ nyii pâi ńii lâai ŋáfolo-laai é lɛ́i.

⁹ “Ká sɛŋ támaa kɔ̀ri, kɛ́lɛ guro-té nɔ́ ƃé gáa káyêei. Tãi ká pâ la kápɛrɛ-ŋai mui, ŋa gélee fɛ̀ɛ. Ŋa gɛ̀ tí lé mɛni ma? Kpɛ́ni fêi, ŋápɛrɛi a wôloi, kákɛ kɔ̀ a gɛɛ ká kápɛrɛ-ŋai tɔ́ɔ.

¹⁰ Maa mɛni ƃé tuna fé pâi pûi la a gɛɛ sí-sɛŋ é kpɛtɛ.

¹¹ Nya ƃe ŋá gɛ̀ ǹɔii a kpála da ǹyée-ŋai, kágbai-kpalaŋ a kpála, kpɔmɔ-ƃa-kpalaŋ da káwulɔ-wuru-ŋai da zí-sɛŋ-ŋai kélee da ƃai, ŋá pà a lɔii-kpala núu-kpune pɔ́ da sua-ŋa é pɛ́lɛ zí-sɛŋ kélee ma ká zìi.”

Ǹûai dí Yâwɛɛ Ŋɔtɔ̂ŋ sîɣe

¹² Nya ƃe Siatiɛ ǹóŋ Zɛrubabɛɛ da Zɛosadai ǹóŋ Zasua nyii kɛ̀ a zâla láa-soŋ-nuu kɛ́tɛi, é pɛ́lɛ ǹúui gbêli-ŋai nyii dífe li ní luɛ-lâa sui, dí nyii-ŋai dífe li ní luɛ-lâa sui, dí Yâwɛɛ wóo mɛ̀ni nyii gáa a Díɣâlai. Nya ƃe dí Ɣâla ŋɔlóno kɛ́-nuui Egaa wóo mɛ̀ni, kpɛ́ni fêi Dínuu-namui Ɣâla ƃé dɛ̀ɛ. Ǹyaŋ ǹûai dí yào Dínuu-namui ma.

¹³ Nya ƃe Yâwɛɛ ŋɔworɛ̂-woo ƃó-nuui Egaa è Yâwɛɛ ŋɔworɛ̂-wooi ƃò ǹûai dîa ǹyɛɛi, “Ŋ́gaa kákɔlɛ ma.”

¹⁴ Nya ƃe Yâwɛɛ è Siatiɛ ǹóŋ Zɛrubabɛɛ nyii kɛ̀ a gɔmɛni-nuu kɛ́tɛi Zuda lɔii mɛi kponôi kpànaŋ da Zɛosada ǹóŋ Zasua nyii kɛ̀ a zâla láa-soŋ-nuui é pɛ́lɛ ǹúu gbêli-ŋai dîa nyii kùla ǹuɛ-laai sui. Nya ƃe díkelee dí pà dí tíi kɛ́ Ŋ̀wála-wâla kélee Ɣalai Yâwɛɛ ŋɔpɛ́rɛi ma,

¹⁵ a vóloi buu-feerɛ káo náaŋ, ŋ̀áloŋ ǹɔ́ɔlu mɛi-dai su, Dâlɔ kɛ́ɛ a kâloŋ ŋɔkóraŋ veerɛi.