Dutɛrɔnome 5 - Bible

Dɔ̂ŋ Puui

¹ Mose è Eezuɛ-ŋai kélee ŋáa tɛ̀ ma ǹyɛɛ diai, “Ka káwoli tɔ́ɔ dɔ̂ŋ-ŋai dîa ŋa pâi ŋ̀á lɛ̂i kâai. Ka dímaa kɔ́ri ká sía a wóo.

² Kúɣâlai Yâwɛɛ è ŋ̀óo kɛ̀ kúyêei Olɛ yeei ma.

³ Vé gɛ́ ní kúnâŋ-ni yêei. Kɛ́lɛ è gɛ̀ kúai sâa ɣele mai kúyêei.

⁴ È kɛ̀ lônoi kápɔ ká kɛ́ ŋ̀óo mɛ̀ni gɛ́ kùla ǹyéei su.

⁵ Maa tãi tí ŋá kɛ̀ tɔɔ̂-ni káloai ka dîa-ni ŋ́gɛ ŋ̀óo su-kula kâa, kpɛ́ni fêi, ka kɛ̀ yaôi ŋɔŋ ma káfe lì ní ǹyéei ma. “Yâwɛɛ è mò ǹyɛɛi,

⁶ ‘Ńyãa ƃa Káɣâlai Yâwɛɛ nyii kákula ǹuɛ-laai su Ize lɔii sui.

⁷ “ ‘Káfe Ɣâla da kpɛ́ni fɛli é tée ḿbôlu.

⁸ “ ‘Káfe Ɣâla pɔkɔɔŋ da kpɛ̀tɛ kámɛni ma nyii m̀oloŋɔɔi sɛŋ da mâ nyii gáa ŋ̀elei su ɣelei perei, kpaa máŋ ǹɔii mâ mù-perei, kpaa máŋ ǹyái mu mù-perei,

⁹ ká pɛ́lɛ gɔ́ɔ mu ka vɛli, kpɛ́ni fêi, Ńyãai a Káɣâlai Yâwɛɛ ŋ́gaa a tólo ɣala. Ŋa ǹûai dísɔnyɔ̂ŋ gula maa kɛ̀ a dia. Diai da ŋ́gbɔarai ŋá díkula-maa kɛ̀. Ŋa dílônii díwɔ̂ lonii da díwɔ̂ lônii da díwɔ̂ lônii kula-maa kɛ́.

¹⁰ Kɛ́lɛ ŋa diai kélee wɛ̀li dí ŋ́wɛlinii dí kɛ́ ŋátɔ̂ŋ-ŋai mɛi kâai.

¹¹ “ ‘Káfe Káɣâlai Yâwɛɛ láa tòli kpɛ́ni-kpɛni. Kpɛ́ni fêi, vé pâi diai su-mɛni lɛɛi da ǹáa tòli kpɛ́ni-kpɛnii.

¹² “ ‘Ka vii-tɔɔ ɣelei síɣe a maa waa yɛ̂ɛ berei Káɣâlai Yâwɛɛ è mò la kâai.

¹³ Ka kátii-ŋai kélee kɛ́ fólo lɔ́ɔ mɛi da yée mu.

¹⁴ Kɛ́lɛ káfe tíi kɛ̀ a ŋ̀ele kûui lɔ́ɔlu mɛi feerɛ ɣelei, kpɛ́ni fêi, gáa a ɣele kûu maa waa Yâwɛɛ mɛni ma. Káfe tíi kɛ̀ a maa ɣelei tí, kálônii sinaai, kpaa máŋ kálônii nɛyãai, káluɛ sinaai, kpaa nɛyãai, káwɛlɛ sooi, kpaa zoo-faleŋ, kpaa kátaa-tulɛ-ŋai, da ŋɔ̃ya-ŋai díkaa ká pɛ́rɛ-ŋai lai. Káfe ǹɛɛ naa káyee sinaai, kpaa máŋ nɛyãai dí tíi da kɛ́ a maa ɣelei tí.

¹⁵ Ka gɔ́lɔŋ a gɛɛ ká kɛ̀ a luɛ-ŋa Ize lɔii su. Káɣâlai Yâwɛɛ ƃé kákùla naa é pá a káa a ŋɔwála-walai. Mɛni ƃé a m̀ôi la kâa a gɛɛ ká ŋ̀elei kûui ŋí mɛi káa a maa waa.

¹⁶ “ ‘Ka ŋumɛ maa tɛɛ kánâŋ-ni da kálee-ni pɔ́ yɛ̂ɛ berei ńyãa Yâwɛɛ Káɣâlai ŋa m̀ôi la kâai. Ka gɛ̀ tí, gɛ̀ ní káfulu-laai su a pâi kôyai ǹɔii ma Káɣâlai Yâwɛɛ a dɛɛ̂i kápɔi.

¹⁷ “ ‘Káfe núu pàa.

¹⁸ “ ‘Káfe wulu-wulu kɛ̀.

¹⁹ “ ‘Káfe ŋúma kɛ̀.

²⁰ “ ‘Káfe wôya sere-faa kɛ̀ a káƃarâŋ-nuu láa.

²¹ “ ‘Káfe káƃarâai dínɛyâai maa wɛli kɛ-maa pù kálii su, dípɛrɛi kpaa máŋ dílɔii, díyee mu sinaai kpaa máŋ díyee mu nɛyãai, díniŋai, dísoo fáleŋ da díkɔ̃liŋ kpéli-ŋai kélee.’

²² “Dɔ̂ŋ-ŋai ká ŋí Yâwɛɛ è kɛ̀ dɛɛ̂i kápɔ ǹyéei su ŋ̀óo kɛ́ kula ŋ̀ele-kɔlɔŋ su kpiniɛɛ su gɛ́ tɛ̀ɛ ŋɔŋ sui. Vé mɛni da kpɛ́ni kélee pɛlɛ ní ma. Nya ƃe è gélee pɔ̃yɛ kɔni-ƃela feerɛ a ma é dɛɛ ḿbɔ.

Ǹûai dí yào

²³ “Tãi ka ŋ̀óo mɛni lai kánuu laa-tuɛ-ƃelai da ǹúu-pɔlɔ-ŋai kélee dí pà ḿbɔ.

²⁴ Ǹyaŋ ká mò mâ kâai, ‘Yâwɛɛ aâ ŋɔfólo-laai da ŋɔwála-walai lɛ́ kûa. Kwaâ sâa ŋ̀óo mɛni a kùla ŋ̀ɔŋ su. Kwaâ sâa gɔ́lɔŋ a gɛɛ Ɣâla a lòno núu da pɔ́ maa nuui a lɛɛ ɣele ma.

²⁵ Kɛ́lɛ kwa pâi saâi lé mɛni ma? Ŋɔŋ su kɛ́tɛi ŋí a pâi kúsu-karai à kɛ̀ Kúɣâlai Yâwɛɛ a lòno kúpɔ a tãi veerɛ ɣelei.

²⁶ Núu-kpune nenɛ̂ ƃé a tá gɛ-ɣele ma Ɣalai wóo mɛ́ni gɛ́ lòno bɔ́ ŋ̀óo kɛ́ kùla ŋɔŋ su maa nuui é lɛ́ɛ ɣele ma yɛ̂ɛ berei a kɛ́ la a kúai?

²⁷ Lɛɣɛ naa í mɛ̀nii mɛ́ni Kúɣâlai Yâwɛɛ a m̀ôi. Gɛ̀ ní pá pôlu í gélee ƃó kûa. Kwa pâi mɛnîi kú woo mɛni kɛ́.’

²⁸ “Ká lónoɔɔ ḿbɔi Yâwɛɛ è káwoo mɛ̀ni é mó mâ ǹyɛɛi, ‘Ŋaâ mɛnii mɛ́ni ǹûai ŋí dí mò yâi. Mɛnii kélee dí mò yâi, ǹɛ̂lɛɛi.

²⁹ À kɛ̀ bere ƃé dílii su káa la dí kɛ́ ŋátɔ̂ŋ-ŋai mɛi kâa ŋâi pà gɛ̂i díƃûu ƃó lûwa kɛ́ ƃò díkɛ mɛni ma.

³⁰ Lí í mó dîa dí lí pôlu dísua kɔlɔ seɣe pɛrɛ-ŋai lá.

³¹ Kɛ́lɛ ya pâi lɛɛ̂i ŋ́gɔlɛ ŋá dɔ̂ŋ-ŋai kélee tɛ́ɛ ípɔ ŋá berei lɛ́ yâ ya pâi díteniŋ tɔɔ̂i la tãi da pâi kɛ́ la ǹɔii ma ŋa dɛɛ̂i dípɔ.’

³² “Mɛni ma, Eezuɛ-ƃela, ka káwoli tɔ́ɔ m̀ɛnii ma Káɣâlai Yâwɛɛ a pâi mòi kaai. Káfe da kùla ma kpaa máŋ ká da pú ma.

³³ Ka sia a m̀ɛnii kélee Káɣâlai Yâwɛɛ a mò kaai, a gɛɛ ká lɛ́ɛ ǹɔii su a pâi dɛɛ̂i kápɔ fúlu-laa su kôyaa sui.