Dutɛrɔnome 30 - Bible

Berei Yâwɛɛ a pâi pâi la a káa pôlu é lûwa láa kâai

¹ “Ŋa mɛni-ŋai kélee ŋá lɛ́ kâa Káɣâlai Yâwɛɛ a pâi gɛ̂i a káa. Kà wàla káwoli tɔ́ɔ ma a pâi kátɛɛ̂i lɔii-ŋuŋ da kpɛ́ni-ŋa su mɛni-ŋai ŋí da kɛ̀ kɛ̂i a káa ǹɔii-ŋûŋ-ŋai su ŋ̀óo kíli a pâi toôi kákili ŋá.

² À kɛ̀ ka kálônii ka pâi tínânii Yâwɛɛ pɔ́ naa a kálii kélee ká ŋɔtɔ̂ŋ-ŋai mɛi káa ŋa dɛɛ̂i kápɔi,

³ Káɣâlai Yâwɛɛ a pâi kámalôŋ kâai. A pâi kákulâi naa é pá a káa pôlu é gɛ́ káƃûu ƃó.

⁴ A nɛ̃ɛ ma kpîŋ ká kɛ́ kwaa kôyaa ma ǹɔii kpóŋ ma a pâi káŋaa tɛ̂i gîe ma é ká kúla naa é pá a káa.

⁵ A pâi ǹɔii tɛɛ̂i kápɔ pôlu kánâŋ-ni dí wɔ́lɔ kɛ̀ mai. A pâi gɛ̂i káƃûu ƃó ká naa láa fɛ́ɛ kátɛɛ kánuu-pɔlɔ-ŋai dîa kɛ̀ naa a bɔlɔi.

⁶ A pâi gɛ̂i ká kɛ́ ƃò nɔ́ ǹɔii ma ka ŋ̀óo mɛni ka ŋ̀wɛlii.

⁷ A pâi ǹaɣaŋ-ŋai kélee pûi kákpɔara-ƃelai dîa nyii-ŋai kɛ̀ kámɔ̃lɛi dí kɛ́ káluaŋ.

⁸ A kɛ̀ tí ka pâi ŋ̀óo mɛnii ka ŋɔtɔ̂ŋ-ŋai kélee mɛi káa ŋa dɛɛ̂i kápɔ sâai.

⁹ M̀ɛnii kélee ka káyee pìli zui a pâi gɛ̂i é ƃûu ƃó. Ka pâi nîa-pɛlɛɛ támaa maa sɔlɔ ƃôi. Kátaa tulɛ-ŋai dí ƃûu ƃó, kási-sãai dí kɛ̀ kpɛ̀tɛ. Ǹîa mɛni ƃa a gɛɛ káƃûu ƃó yɛ̂ɛ berei kánâŋ-ni dí kɛ̀ lai.

¹⁰ Kɛ́lɛ fɛ̂ɛ ka ŋ̀óo mɛni ká ŋɔtɔ̂ŋ-ŋai kélee mɛi káa nyii-ŋai bɔ̃yɛ̂ɛi dɔ̂ŋ-kɔlɔi ŋí sui. Fɛ̂ɛ ká tínaŋ bɔ́ naa-pere a kálii kélee.

¹¹ “Dɔ̂ŋ-ŋai ŋa dɛɛ̂i kápɔi dífe a tɔ̂ŋ kpanaŋ nyii káfa pɔ̂ri ŋ̀á kâai. Dífe tela tɛ̀ɛ ní kákpono ma.

¹² Dífe ŋ̀elei su-pere nyii ka pɔ̂ri m̀ôi kâai, ‘Gbɛ̂ɛ ƃé pâi tɛ̂i naa é pîlaŋ a dia kuɛi, a gɛɛ kú mɛni kú tíi kɛ́ lai.’

¹³ Dífe yúo pôlu-pere nyii ka pâi m̀ôi kâai, ‘Gbɛ̂ɛ ƃé pâi ǹyái tiyênii é pá a dia a gɛɛ kú mɛni kú dímɛi káa?’

¹⁴ Kpao, díkaa káyêei. Ka díkɔlɔŋ, ká kɛ́ dílòno. Mɛni ma, fɛ̂ɛ nɔ́ ka dí mɛi káa.

¹⁵ “Ŋa sâa mɛni feerɛ ƃôi kâa a gɛɛ ká dɔnɔ siɣe zu. Mɛni lɛ́lɛɛ kpaa mɛni nyɔ́mɔɔ, fúlu-laa kpaa saa.

¹⁶ À kɛ̀ ka Káɣâlai Yâwɛɛ ŋɔtɔ̂ŋ-ŋai mɛi kâa, ka ŋ̀wɛ́li, gɛ̀ ní kákɛ-mɛni a pâi ƃûu ƃôi ka ǹɔii láa fɛ́ɛ. A pâi lûwa lâai kâa ǹɔii ma ka pâi kɛ̂i naai.

¹⁷ Kɛ́lɛ ka wàla ŋ̀óo mɛ́ni ka tínaŋ ɣâla da kpɛ́ni-ŋa pɔ́ naa pere ká kɛ́ dífɛ̀li,

¹⁸ a pâi kásu-karai. Ŋa kália-woo ƃôi. À wàla kɛ́ tí káfulu-laai su fé pâi kôyai lɔii ma ka liî zu Zɔdiŋ Ya-leei pôlu perei.

¹⁹ Ǹɔii da ŋ̀elei díkaa a ŋásêre-ŋa a gɛɛ ŋa m̀ôi kâa ka kánîa siɣe zɛŋ feerɛi ŋí sáma, Ɣâla ŋɔƃɛlɛ-seei da ŋɔnáɣaŋ, saa da fúlu-laa.

²⁰ Ka Káɣâlai Yâwɛɛ wɛ́li, ka ŋ̀óo mɛni, ka tɔ̃yâ mɛni kɛ́. Ka gɛ̀ tí, gɛ̀ ní a pâi gɛ̂i kánîa-pɛlɛɛi dí kɛ́-ɣeniɛ kɛ́ ǹɔii ma è dɛ̀ɛ kánâŋ-ni Eberaɣɛ̃ɛ, Aise da Zeeka pɔ́i.”