Dutɛrɔnome 27 - Bible

Ɣâla Ŋɔtɔ̂ŋ-ŋai kɛ̀ gɔni-ƃela-ŋai diai

¹ Mose da Eezuɛ ǹúu-pɔlɔ-ŋai dí mò ǹûai dîa dîyɛɛi, “Ka dɔ̂ŋ-ŋai kélee mɛi káa ŋa sâa dɛɛ̂i kápɔi.

² Tãi ka seri la ǹɔii su Káɣâlai Yâwɛɛ a dɛ̀ɛ kápɔi, ka kɔni-ŋa láa gîe mɛi ka màa sia a pɔ̂rɔ.

³ Ka ŋ̀óo-ŋai kélee pɔ̃yɛ ma nyii Yâawɛ a m̀ôi kâai. Ǹɔii ŋí lɛ̂lɛɛi sí-sãa sí mɛni ma yɛ̂ɛ berei Yâwɛɛ è góno tèe la kánâŋ-ni yêei bere ƃé a gɛ̂i la káyêei.

⁴ Ka Zɔdiŋ Ya-leei tìyeŋ ka da tɔɔ Ibaa Yeei ma ka zia yɛ̂ɛ berei ŋa môi la kâai.

⁵ Ka ɣâla-teƃele tɔɔ naa Káɣâlai Yâwɛɛ mɛni ma a kɔni. Káfe kɔni da làa naa nyii ká kɔli-sɛŋ pɛ̀lɛ mai.

⁶ Ka ŋ̀âla-teƃelei tɔ́ɔ a kɔni-ŋa nyii kɔli-sãa pɔ́ɔ fé diai ká kéreŋ sâla kula naa Káɣâlai Yâwɛɛ ma.

⁷ Ka kɛ gîe pôlu sala kula naa ka m̀aa sala-sãai míi ka lii-nɛ̃ɛ kula Káɣâlai Yâwɛɛ ŋɛ́i-tuɛ.

⁸ Ka dɔ̂ŋ-ŋai ŋí kélee pɔ̃yɛ gɔni-ŋai dîa a zu-ponoɔɔ.”

⁹ Nya ƃe Mose da Liiva sala láa-soŋ-ƃelai dí mò Eezuɛ-ŋai dîa dîyɛɛi, “Óo Eezuɛ-ŋa, ka kámɛi sáa. Kaâ kɛ́ a Káɣâlai Yâwɛɛ pɔ́ɔ.

¹⁰ Ka ŋ̀óo mɛni ka ŋɔtɔ̂ŋ-ŋai mɛi káa nyii ŋai ŋa sâa dɛɛ̂i kápɔi.”

Naɣâŋ-ŋai gáa woo-pîli mɛni mai

¹¹ M̀aa ɣele tɔnɔi tí Mose è mò ǹûai dîa ǹyɛɛi,

¹² “Ka Zɔdiŋ Ya-leei tìyeŋ, ǹúu-sûu-ŋai ŋí dí tɔ́ɔ Gɛriziŋ Yeei ma dí lûwa láa ǹûai dîa: Simiɔŋ, Liiva, Zuda, Isaka, Zosɛ da Bɛŋsima.

¹³ Ǹyaŋ ǹúu-sûu-ŋai ŋí da pâi tɔɔ̂i Ibaa Yeei ma dí ǹáɣaŋ-lâa wooi-ŋai ƃó: Lubiŋ, Gâa, Asɛ, Zɛbulɔŋ, Daŋ da Nɛfɛtɛli.

¹⁴ Da kɛ̀ ǹaɣaŋ-lâa woo-ŋai ƃôi, Liiva-ŋai da pâi kɛ̂i ǹáa serîi Eezuɛ-ŋai dîa ɣelei-pere.

¹⁵ “ ‘Náɣaŋ káa ǹúui ma a Ɣâla pɔkɔɔŋ sàa a wúru kpaa máŋ kɔni gɛ̀ vɛ̀li loo-pêre sui, nyii Yâwɛɛ fé wɛ́li ní lai.’ “Ǹûai kélee da pâi m̀ôi dîyɛɛi, ‘É kɛ́ tí.’

¹⁶ “ ‘Náɣaŋ káa ǹúui ma va ƃaa kɛ́-maa tɛ̀ɛ ǹâŋ kpaa máŋ ǹee pɔ́i.’ “Ǹûai kélee da pâi m̀ôi dîyɛɛi, ‘É kɛ́ tí.’

¹⁷ “ ‘Náɣaŋ káa ǹúui ma a m̀arâŋ-nuu ŋɔlɔii maa goyaŋ-pere kɔni sîɣe ǹáai.’ “Ǹûai kélee da pâi m̀ôi dîyɛɛi, ‘É kɛ́ tí.’

¹⁸ “ ‘Náɣaŋ káa ǹúui ma a pere lɛ̂ ŋɛi-pu-nuu ma a ǹyɔ́mɔɔ.’ “Ǹûai kélee da pâi m̀ôi dîyɛɛi, ‘É kɛ́ tí.’

¹⁹ “ ‘Náɣaŋ káa ǹúui ma nyii a ŋɔ̃ya, tee-loŋ kpaa máŋ pɔɔ-nɛni ŋɔmɛni-saa ƃò a wôya-perei.’ “Ǹûai kélee da pâi m̀ôi dîyɛɛi, ‘É kɛ́ tí.’

²⁰ “ ‘Náɣaŋ káa ǹúui ma a lɔ-pɔ̂rɔŋ kɛ̀ a ǹâŋ ŋɔnɛnîi. Gáa a ƃaa kula maa ǹâŋ ma.’ “Ǹûai kélee da pâi m̀ôi dîyɛɛi, ‘É kɛ́ tí.’

²¹ “ ‘Náɣaŋ káa ǹûui ma a lɔ-pɔ̂rɔŋ kɛ̀ a fɛnɛ-sɛŋ sii kélee dai.’ “Ǹûai kélee da pâi m̀ôi dîyɛɛi, ‘É kɛ́ tí.’

²² “ ‘Náɣaŋ káa ǹúui ma a lɔ-pɔ̂rɔŋ kɛ̀ a zaaƃɔlɔi, ǹâŋ ǹóŋ nɛni kpaa máŋ ǹee ǹóŋ nɛni.’ “Ǹûai kélee da pâi m̀ôi dîyɛɛi, ‘É kɛ́ tí.’

²³ “ ‘Náɣaŋ káa ǹúui ma a lɔ-pɔ̂rɔŋ kɛ̀ a ǹyûarai.’ “Ǹûai kélee da pâi m̀ôi dîyɛɛi, ‘É kɛ́ tí.’

²⁴ “ ‘Náɣaŋ káa ǹúui ma a m̀arâŋ-nuu pàa loo-pêre sui.’ “Ǹûai kélee da pâi m̀ôi dîyɛɛi, ‘É kɛ́ tí.’

²⁵ “ ‘Náɣaŋ káa ǹúui ma a sɛŋ-kâo sòŋ a gɛɛ é núu da ŋɔfúlu-laai láŋ.’ “Ǹûai kélee da pâi m̀ôi dîyɛɛi, ‘É kɛ́ tí.’

²⁶ “ ‘Náɣaŋ káa ǹúui ma va dɔ̂ŋ-ŋai ŋí mɛi kâai.’ “Ǹûai kélee da pâi m̀ôi dîyɛɛi, ‘É kɛ́ tí.’