Dutɛrɔnome 26 - Bible

Zí-sãai maa-ŋuŋ maa sama-sɛŋ

¹ “Ka sèri ǹɔii ma Káɣâlai Yâwɛɛ a dɛɛ̂i kápɔ a kákɔ̃liŋ ká sée naa,

² ka kási-sãai m̀á maa-ŋuŋ-ŋai da-ŋa siɣe nyii-ŋai ká zì ǹɔii kpîŋ mai, ká dípu kpɔ̂lɔ-ŋa su. Ka lí a dîa ƃɛ́i Yâwɛɛ Káɣâlai è naa lɛ̂ kâa a gɛɛ kákɛ vɛ̀lîi naai. Ǹúui da a ŋ̀ɔi tɛ̂ɛ zâla láa-soŋ-nuui pɔ́,

³ a pâi m̀ôi ma ǹyɛɛi, ‘Ŋa sâa môi Ŋáɣâlai Yâwɛɛ ma a gɛɛ ŋaâ pá ǹɔii ma è góno tèe la kúnâŋ-ni yêei.’

⁴ “Gɛ̀ ní zâla láa soŋ-nuui a pâi gbɔ̂lɔi sonîi ǹyêei é dísee Káɣâlai Yâwɛɛ ŋɔteƃelei ŋéi-tuɛ.

⁵ A mò máŋ ǹyɛɛi, ‘Ńâŋ è kɛ̀ a Araŋ-nuu. È kɛ̀ a sia-sîa kɛ́-nuu. È wɔ́lɔ lì a ŋɔnûai Ize lɔii su, dí wɔ́lɔ kɛ̀ nɔ́ a núu-kpûlu lòŋ dí sée naa. Ŋɔsuui su è kɛ̀tɛ, zu-ƃela wála-wala, dítamaa.

⁶ Kɛ́lɛ ǹɔii tí su-ƃela dí kúsòŋ a nyɔ́mɔɔ. Dí gɛ̀ kú tíi kpânaŋ-ŋa kɛ́ kú mɔ̃lɛ a zu kôyaa.

⁷ Nya ƃe kú wɔ̀lɔ Yâwɛɛ ma nyii gáa a kúnâŋ-ni Díɣâlai. È kúmɔ̃lɛi da mɛni-sôli-ŋai naa kàa é ǹyée sée kúwɔlɔ-wooi mû.

⁸ È kúkùla díyêei a ŋɔwála-wala yeei. È ŋɛi-kɛ-maa támaa kɛ̀ díŋɛi. È gɛ̀ dia máŋ dí mɛni kpɔ̂lu támaa sɔlɔ ƃó. È mɛni mili-mili támaa kɛ̀ a dia.

⁹ È pà a kúa ƃɛ́ é ǹɔii ŋí tɛ́ɛ kúpɔ. Ǹɔii ŋí lɛ́lɛɛi tíi kɛ́ mɛni ma.

¹⁰ Mɛni ma, ŋa pá ípɔ a zí-sãai m̀á maa-ŋuŋ nyii í maa-wala-wala tɛ̀ɛ ḿbɔ a gɛɛ ŋá zii.’ “Ka gbɔ̂lɔi sée Káɣâlai Yâwɛɛ ŋɛ́i-tuɛ ká pɛ́lɛ gɔ́ɔ mu.

¹¹ Ka lii-nɛ̃ɛ kula ka Liiva-ŋai da ŋɔ̃ya-ŋai m̀ɛni lɛ́lɛɛ-ŋai mɛni ma Káɣâlai Yâwɛɛ a gɛ̂i kâai.

¹² “Ka kási-sãai m̀á buu ɣelei ŋáa tɛ́ gîe ma góraŋ saaƃa ɣelei su ká dítɛɛ Liiva-ŋai, dee-lôŋ-ŋai da bɔɔ-nɛyâai pɔ́ dí mii dílii é láa.

¹³ Gɛ̀ ní m̀ó Íɣâlai Yâwɛɛ ma yɛ̂ɛi, ‘Ŋaâ zãa m̀á nyii-ŋai gáa a ípɔɔi kélee kúla ŋápɛrɛi mu ŋa dítɛɛ Liiva-ŋai, dee-lôŋ-ŋai da bɔɔ-nɛyãai pɔ́ yɛ̂ɛ berei í mò la ḿâi. Mɛni-ŋai í mò ḿâi, fé nyée kula ní da mu, fé tela ǹia ní da ma.

¹⁴ Fé da mii ní tãi ŋá kɛ̀ malôŋ-see ƃôi la, kpaa máŋ ŋá da kula ŋápɛrɛi mu tãi máa fé kɛ́ ní a ŋwaa lai. Fé da kula ní saa-nûu da ma a sâla. Ŋaâ íwooi mɛni ŋa m̀ɛnii kélee kɛ́ í mò ḿâi.

¹⁵ Lɛɛ íkwaa ma waai ma Ɣâla-taa í íŋɛi pîlaŋ ǹɔii ma í lûwa láa ínûai Eezuɛ-ŋai dîa da ǹɔii yɛ̂ɛ berei í íkono tèe la kúnâŋ-ni yêei, a gɛɛ ya pâi ǹɔii tɛɛ̂i dípɔ nyii ǹɛ́lɛ̂ɛi tíi kɛ́ mɛni mai.’ ”

Yâwɛɛ kpîŋ ŋɔnûai

¹⁶ Mose è mò ǹyɛɛi, “Káɣâlai Yâwɛɛ a sâa m̀ôi kâa a gɛɛ ka ŋɔtɔ̂ŋ-ŋai maa kpɛ́ɛ ká dímɛi káa a kálii kélee da kámɔlêŋ kélee.

¹⁷ Ka m̀ôi sâa a gɛɛ Yâwɛɛ káa a Káɣâla. Ká kákono têei sâa a gɛɛ ka pâi ŋɔtɔ̂ŋ-ŋai mɛi kâai ká sía a díwoo ká ŋ̀óo mɛni.

¹⁸ Nyaa máŋ a môi sâa a gɛɛ kákaa a ŋɔnûa, ká kɛ́ ƃò ǹyêei yɛ̂ɛ laai-kɛ-sɛŋ mɛni kpanaŋɔɔ yɛ̂ɛ berei è góno-tee la kánâŋ-ni yêei. Fɛ̂ɛ ka ŋɔtɔ̂ŋ-ŋai mɛi káa.

¹⁹ A m̀ôi a gɛɛ a pâi ka kɛ̂i ǹɔii-ŋûŋ-ŋai mɛi. Ǹyaŋ da pâi ƃaa kɛ́-maa tɛɛ̂i kápɔ. Ka pâi kɛ̂i a ŋɔnûa maa-waa-ŋa yɛ̂ɛ berei è góno tèe lai.”