Dutɛrɔnome 15 - Bible

Ka kákpa-namelai su-mɛni lɛɛ a góraŋ ǹɔ́ɔlu mɛi-feerɛi

¹ “Gba-ŋai kélee ká bìli káƃarâai diai, ká káyee kúla m̀ɛni su a kóraŋ lɔ́ɔlu mɛi feerɛ kpɛɛ ŋá tãi kélee.

² Berei ŋí ƃé ka pɔ̂ri gɛ̂i la ká ŋí. Ǹúui ŋɔkpa káa m̀arâŋ-nuu mai é ǹyée kúla maa kpa mɛnii su. Vé ŋɔ́nɔ m̀arê kɛ̀ m̀ɛni ma, kpɛ́ni fêi, tãi Yâwɛɛ è nɛ̀ kpa soŋ-nuu su-mɛni lɛɛ mɛni mai a nâa seri.

³ Ka pɔ̂ri kákpa-ŋai kpɛ̂i ŋɔ̃ya-ŋai dîa, kɛ́lɛ káƃarâ Eezuɛ-ŋai fêi.

⁴ “Ka gɛ̀ tí, gɛ̀ ní kôlo-nuu fé pâi kɛ̂i kásama, kpɛ́ni fêi, Yâwɛɛ Káɣâlai a pâi lûwa lâai kâa kákɛ mɛni-ŋai kélee su ǹɔii su ka liî naai.

⁵ A pâi lûwa lâai kâa, kpɛ́ni fêi, ka siâi a ŋɔtɔ̂ŋ wóo.

⁶ A pâi lûwa lâai kâa yɛ̂ɛ berei è gono tèe lai, ǹyaŋ pɔ̂ri maa a pâi kɛ̂i kâa ka kpá pili lɔii-ŋuŋ-ŋa dîa. Kɛ́lɛ káfe pâi dímarê kɛ̂i a gɛɛ dí kpa pili kâa. Ka pâi wɔ́lɔ kɛ̂i lɔii-ŋuŋ-ŋa láa túɛ. Kɛ́lɛ lɔii-ŋuŋ da fé pâi kɛ̂i kálaa túɛ.

⁷ “À kɛ̀ káƃarâŋ-nuu da káa kásama kátaa-ŋai su ǹɔii su nyii Yâwɛɛ Káɣâlai a dɛɛ̂i kápɔ nyii goloɔ̂ɔi, káfe kɛ̀ ŋɛi-kpala ŋánaa kɛ̂i la.

⁸ Ka kɛ́ a káyee lá ƃóɔɔ berei. Zɛŋ kélee a ŋ̀wɛ̂lii ka bili ma a kpâi, ka dɛɛ bɔ́.

⁹ Ka tãi siɣe. Káfe kákili ŋá sìa a bere sîi nyɔ́mɔɔ tarei ŋí kâai, ‘Kpa soŋ-nuu su-mɛni lɛɛ koraŋ a nâa lɛɣɛ. Kúfe ŋɔ́nɔ kpa pilîi núu da ma.’ Nyíŋi a pâi gɛ̂i káfa kpɔŋ mâa tɛ̀ɛ kákɔlɛ ma-nuui pɔ́. Ǹyaŋ maa nuui a wɔ̀lɔ, Yâwɛɛ a pâi maa sɔnyɔ̂ŋ kula maa kɛ̂i a káa.

¹⁰ Ka kpɔŋ mâa tɛɛ nuui kélee pɔ́ kpɔŋ mâa wɛ̂lii é kúla kálii su. Kà gɛ̀ tí, Káɣâlai Yâwɛɛ a pâi lûwa lâai kâa mɛnii kélee su ka pâi kɛ̂i gɛ̂i.

¹¹ Kôlo-ƃela da pâi kɛ̂i kásama a tãi kélee. Mɛni ma ka kɛ́ a káyee lá ƃóɔɔ dípere a tãi kélee. Ka kpɔŋ mâa tɛɛ gôlo-ƃelai pɔ́ da diai pɔ̂ri maa fé diɛi.

Luɛ-ŋa soŋ-pêre

¹² “À kɛ̀ Ibulu-ŋai da, nɛnî kpaa surɔ̂ŋ a gbîŋ kɔ̀lɛ káta mà é tíi kɛ́ maa nuui mî a kóraŋ lɔ́ɔlu mɛi da, fɛ̂ɛ maa nuui é ǹuɛi kpîŋ ŋuŋ maa ƃó a góraŋ ǹɔ́ɔlu mɛi feerɛ ɣelei kpɛɛ ŋá tãi.

¹³ Ǹyaŋ núu da à kɛ̀ luɛ surɔ̂ŋ ŋuŋ maa ƃôi vé dɛ̀ɛ a ǹyée fôlo.

¹⁴ É daa-tulɛi, mìi-sãai da ŋwãai ŋ̀ɔi tɛ́ɛ bɔ́. É dɛɛ bɔ́ yɛ̂ɛ berei Yâwɛɛ è lûwa làa la dîa da ǹuɛi.

¹⁵ Ka gɔ́lɔŋ a gɛɛ ká kɛ̀ a luɛ-ŋa Ize lɔii su Yâwɛɛ Káɣâlai é káŋuŋ maa ƃó. Mɛni ƃé ŋa dɔ̂ŋ ŋí tɛɛ̂i la kápɔ sâa.

¹⁶ “Kɛ́lɛ a kɛ̀ ǹuɛi fé ŋ̀wɛ̂lii a gɛɛ é lí, kpɛ́ni fêi, ŋɔmɛi-nuui ŋɔwɛli kɛ́-maa lii káa goi, ǹíi láa ǹyêei mɛni sîi kélee sui,

¹⁷ ŋɔmɛi nuui a pâi seme siɣêi é ŋ̀óli ƃɔ́ la, ǹyaŋ a pâi kɛ̂i ǹyêei a luɛ tãi nɔ́ ǹuɛi kpîŋ káa la ɣele mai. À kɛ̀ a luɛ nɛnî, mɛni tɔnɔi tí kɛ́ nɔ́ la.

¹⁸ Ka luɛ da ŋuŋ ma ƃò, káfe káŋuŋ su woo sàa mɛni ma, kpɛ́ni fêi, góraŋ lɔ́ɔlu mɛi da tii a gɛ̂i zɔ̃ɔ a pɔ̂ri kɛ̂ a kwii-tii kɛ́-nuu ŋɔkóraŋ puu káo feerɛ fela-fei. Gɛ̀ ní Yâwɛɛ, Káɣâlai a pâi lûwa lâai kâa ká kɛ́-mɛni kélee su.

M̀ɛnii ka pɔ̂ri gɛ̂i a kátaa-tulɛ lonii maa-ŋuŋ-ŋai

¹⁹ “Kátaa-tulɛ lonii sirɛ maa-ŋuŋ-ŋai kélee káa a maa waa Káɣâlai Yâwɛɛ mɛni ma. Káfe tíi da kɛ̀ a maa ǹiŋa lonii sirɛi kpîŋ da, káfe tela m̀ála lonii sirɛ maa-ŋuŋ-ŋai da léɣa tèe ma.

²⁰ Ka kálônii ka pâi vɛnɛ-sãai paâi ká mii Káɣâlai Yâwɛɛ ŋɔkwaa maa waai ma a kóraŋ kélee.

²¹ Káfe taa-tulɛ sirɛ ǹóŋ maa-ŋuŋ kɔ̃liŋɔɔ da kùla Yâwɛɛ Káɣâlai ḿâ a sâla yɛ̂ɛ nyii gɔ́ɔ púɔɔ̂i, ŋ̀ɛ́i púɔɔ kpaa máŋ kɔlɔ-fela sii da kɛ́ ƃò mai.

²² Kɛ́lɛ ka maa taa-tulɛ kɔ̃liŋɔɔ-ŋai míi kákpɔɔi taa-ŋai su. Diai dímaa fé waa níi da pɔ̂ri da miî, yɛ̂ɛ berei nɔ́ dîi pɔ̀ri toa kpaa máŋ pîlaŋ sua mîi lai.

²³ Kɛ́lɛ káfe zua ŋãai da mìi. Ka ŋãa kélee kúla zu ká bú ǹɔii ma yɛ̂ɛ yá.