Dutɛrɔnome 14 - Bible

Káfe saa-wɔ̂lɔ kɛ̀ yɛ̂ɛ ǹûai kpéli-ŋai

¹ “Káa ƃa Káɣâlai Yâwɛɛ ǹônii. Ka kɛ̀ malôŋ sèe ƃôi saa-nûu mɛni ma, káfe kákpîŋ ŋwàna kpaa máŋ ka kátôŋ lá leɣa kálaŋ.

² Kpáni fêi, kákaa a maa wâa-ƃela Yâwɛɛ ŋɛ́i-tuɛ. Aâ kásiɣe zu núu-kpune kélee sáma ŋ̀éniɛi su a gɛɛ ká kɛ a gbîŋ ŋɔnûa.

Vɛnɛ-sãai maa waai da nyii-ŋai dímaa fé waa níi

³ “Káfe fɛnɛ-sãa maa liƃiɛɛ mìi.

⁴ Zua-ŋai ŋí ƃé ka pɔ̂ri dímiî: niŋa, ƃála, ƃoli,

⁵ pîlaŋ sua da maa sîi kélee.

⁶ Ka pɔ̂ri sua nyii kélee miî díkɔɔ taɣâŋ lá ƃelâi gîei feerɛ díkɛ dílaa mii-sãa mìi gîei feerɛi.

⁷ Ka pɔ̂ri zua-ŋai ŋí kélee miî kɛ́lɛ káfe soo-fáleŋ mii, ŋ̀ela da zua nyii-ŋai da dílaa mìi gêi feerɛ kɛ́lɛ díkɔɔ taɣâŋ lá ƃéla nɔ́ gîei feerɛi. Dímaa fé waa ní kámɛni ma.

⁸ Ƃoi maa fé waa ní kámɛni ma máŋ. Díkɔɔ taɣâŋ lá ƃelai gîei feerɛ, kɛ́lɛ dífa dílaa mii-sãa mìi kɛ̀ gîei feerɛ. Káfe díta mii kpaa máŋ ká lɛɣɛ da poma ma.

⁹ “Vɛnɛ-sãai kélee díkaa yâii, ka pɔ̂ri nyii-ŋai da miî dífili káa dîa da díkalai.

¹⁰ Nyii-ŋai dífili fé dîa da díkalai káfe da mìi. Dímaa fé waa ní kámɛni ma.

¹¹ “Ka pɔ̂ri ŋɔni maa waa-ŋai miî.

^12-18 Kɛ́lɛ káfe nyii-ŋai ŋí mii: Kuɛ sîi kélee, gɔ̃ɔ sii kélee, kpãaŋ sii kélee, póna ŋɔni sii kélee, dua-too-ŋɔni sii kélee, ya-kɔ̂rɔ-kɔrɔ sii kélee, mûu sii kélee, niŋa pôlu leŋkpɛŋ sii kélee, ŋɔni kole sii kélee, fɔ́ŋ sii kélee, da lɔfu sîi kélee.

¹⁹ “Koôŋ-sãa nyii-ŋai da sîa díkpulu mai dímaa fé waa ní kámɛni ma. Ká fé dímîi.

²⁰ Kɛ́lɛ ka pɔ̂ri goôŋ-sãai dímaa waai dímîi.

²¹ “Fɛnɛ-sɛŋ nyii a gbâa saai káfe zua da mìi. Ka pɔ̂ri dɛɛ̂i ŋɔ̃ya-ŋai da pɔ́ kátaa-ŋai da su, kpaa ka gɔlɛ diai dîa da kûla lɔii-ŋuŋ da kpɛ́ni-ŋai sui. Kɛ́lɛ, kákaa a núu maa waa-ŋa Káɣâlai Yâwɛɛ ŋɛ́i-tuɛ. “Káfe ƃoli-loŋ kpaa máŋ ƃála-loŋ ɣìli a ǹee ŋíni-ya.

Dɔ̂ŋ bîlaŋɔɔi núu kɔ̃lîŋ buu-ɣelei tɛɛ mɛni ma Yâwɛɛ pɔ́i

²² “Ka kási-sãai m̀á buu ɣelei ŋáa tɛ́ ma a kóraŋ kélee.

²³ Dia ƃa kámii-sãai, ŋwãai, ɔle wúlɔ da kátaa-tulɛ-lonii maa-ŋuŋ-ŋai. Ka lí a dia ƃɛ́i naa kpɛtɛ̂i Káɣâlai Yâwɛɛ mɛni mai ká mii naa. Ka gɛ́ tí a gɛɛ ká ƃaa kɛ́-maa tɛ́ɛ bɔ́ a tãi kélee.

²⁴ Kɛ́lɛ à kɛ̀ ǹaa koyâai ǹyaŋ zãai Yâwɛɛ è lûwa làa la kâai káfe pɔ̂rii mu ká lí a dia,

²⁵ ka dímaa fáleŋ a sɛŋ-kâo ká lí la.

²⁶ Ka kánîa sãa yá a zɛŋ-kâoi yɛ̂ɛ: taa-tulɛ, ƃála, ŋwãai kpaa máŋ kpele sãa kpona da kpɛ́ni-ŋa. Gɛ̀ ní ka káyee mu-ƃelai ka mii Yâwɛɛ ŋɛ́i-tuɛ ká lii-nɛ̃ɛ kula.

²⁷ “Káfe ǹia Liiva-ŋai dîa kátaa-ŋai su. Díkɔ̃liŋ da fé ma kpaa máŋ sí-sãa yɛ̂ɛ berei gáa la kámɛni mai.

²⁸ Ka kási-sãai m̀á maa-ŋuŋ-ŋai buu ɣelei kélee ŋáa tɛ́ ma ká dípûi kɛ́ kátaa-ŋai su a kóraŋ saaƃa kélee kpɛɛ-ŋa tãi.

²⁹ Ka díŋaa kɔ́lɛ Liiva-ŋai dîa, ŋɔ̃ya-ŋai, dee-loŋ-ŋai, da bɔɔ-nɛyãai dí mii dílii é láa. À kɛ̀ tí, Káɣâlai a pâi lûwa lâai kâa, é gɛ́ ká kɛ́ ƃûu ƃò.