Danîa 10 - Bible

Zĩai Danîa è gàa Ǹya-leei Taigiri kɔlɛi

¹ Pɛsia kaloŋ Sarɔ ŋɔkâloŋ-laa koraŋ zaaƃai su, Ɣâla è worɛ̂-woo da zu-kulai lɛ̀ Danîa ma nyii da dòli máŋ a Bɛsaza zĩ̂a su. Ŋ̀orɛ̂-wooi ŋí è kɛ̀ a bîlaŋɔɔ kɔ́ kɛ́tɛ ma. Ǹyaŋ è kɛ̀ a tɔ̃yâ worɛ̂-woo. È ŋ̀orɛ̂-wooi ŋí maa mɛ̂ni ŋá kàa ma zĩ̂a su.

² Ńyãa Danîa, m̀ɛnii ŋí naa káa ḿîi, ŋá malôŋ sèe ƃò a lɔ́ɔkûu saaƃa.

³ Fé mii-sɛŋ lɛ́lɛɛ da mii ní. Fé sua mii ní. Fé ŋwã̂ai da pîlaŋ ní nɛ́ŋ ma kpîŋ. Fé tela ŋuŋ su-kula ní ǹɔ́ɔkûu saaƃai yée mu.

^4-5 Ŋ́gɛɛ tɔɔ̂ni Taigiri Ya-lee kɔlɛ a ŋ̀áloŋ maa-ŋuŋ ŋɔɣele kûu buu feerɛ káo náaŋ ɣelei, ŋá ŋɛ́i tɛ̀ nɔ́ ŋ̀elei su ŋá nalôŋ tɔnɔ káa maa ɣiriɛɛ a seɣe kole nenɛ-fɛfɛɛ, gôo bɛti lɛ́lɛɛ kɛ́ ƃò ǹeŋei.

⁶ Gbono ma è kɛ̀ fôloi yɛ̂ɛ kɔni sɔ̃ɔ kpanaŋɔɔ, ŋ̀ɛ́i kɛ́ kɛ̀ yɛ̂ɛ ŋ̀ele-gbâna ŋɔŋ, ŋ̀ɛ́i-gao kɛ́ kɛ̀ yɛrɛŋ-yɛrɛŋ yɛ̂ɛ kpáleŋ-soŋ, m̀óoŋ da ŋ̀wɛ́rɛ kɛ́ ƃò yɛ̂ɛ da ƃara maa kîiŋ. E kɛ̀ lônoi ŋ̀óo kɛ́ ƃò yɛ̂ɛ núu kpɔ̂ŋ.

⁷ Ńyãa tɔnɔ nɔ́ ƃé m̀ɛnii ŋí naa kàa. Diai kɛ̀ ŋ́gɔlɛi da fé nàa káa ní. Kɛ́lɛ yao è pà díkɔlɔi dí pú dí díloo.

⁸ Ńyãa tɔnɔ ƃé lɛ̀ɛ naa ŋgɛ́ m̀ɛnii maa pɔlɔ-pɔlɔi ŋí naa kàa. Kɔlɔ è kpɛ̀ɛ ḿâ, ŋ́ɛi maa é fáleŋ.

⁹ Nya ƃe è kɛ̀ lônoi ŋ́gɛ ŋ̀óo mɛni. Ŋ́gɛɛ ŋóli tɔɔ̂i mài, ŋá fɔ̃a ŋá tóo ǹɔii ma.

¹⁰ È ńyee sòŋ, ŋá mu-sìɣe, ŋá pîlaŋ ŋ́gbîleŋ ŋá, ńyee pîlaŋɔɔ, ḿaa kɛ́ kpɛ̃liŋ

¹¹ E mò ḿâ, ǹyɛɛi, “Danîa, Ɣâla è íwɛli-ni. Ímu-siɣe í íwoli tɔ́ɔ m̀ɛnii ma ŋa pâi m̀ôi yâi, kpɛ́ni fêi, dí ńdɛ̀ɛ a gɛɛ ŋá m̀ó yâ.” È mò nɔ́ tí ḿâ ŋá m̀u sìɣe ŋá tɔ́ɔ ḿaa kɛ́ kpɛ̃liŋ.

¹² È mò ŋɔ́nɔ ḿâ ǹyɛɛi, “Danîa, ífe yao. Vóloi tí í pɛ̀lɛ la a í kpîŋ maa yeŋɔɔ Íɣâlai ŋɛ́i-túɛ a ƃaa kɛ́-maa perei a gɛɛ í mɛni ŋá káa a ǹɛ́lɛɛi, è ǹyée sèe ífɛli-wooi mu. Ŋaâ pá a gɛɛ ŋá íwoo su too.

¹³ Kɛ́lɛ Pɛsia lɔii ŋɔɣâla-taa kela kɛ́tɛi è ŋ́gbèra. Ŋá gɛ̀ ǹyéei a ɣele kûu buu feerɛ káo tɔnɔ. Nya ƃe Makɔɔ, nyii gáa a Ŋ̀âla-taa kela-ŋai láa túɛ-ƃelai dɔnɔi è pà é ŋ́uŋ mâ ƃò ǹyêei.

¹⁴ M̀ɛni ma ŋá pá a gɛɛ ŋá m̀ɛnii ŋá lɛ yâ pâi kɛ̂i a ínûai tínaa tuɛ-perei. Zĩai ŋí káa tínaa tuɛ-pere mɛni ma.”

¹⁵ Gɛ́ɛ m̀ɛnii ŋí ƃôi ḿâi fé lóno ní. Ŋá ŋuŋ ma pîlaŋ ǹɔii ma.

¹⁶ Nya ƃe zɛŋ tí ŋá gàa m̀oloŋɔɔ núu-kpune mai, è ǹyée lɛ̀ɣɛ ńa-gbɔ ma ŋá pɛ́lɛ lónoɔɔ ma. Ŋá mò mà ńyɛɛ̂i, “Zĩâi tɛ̀ɛ a ńyãai maa lii-too-pôlu káa ḿâa a ŋánaa. A gɛ́ kɔlɔ a kpɛ̀ɛ ma.

¹⁷ Ŋa pɔ̂ri lóno pere kɛ̂i léŋ ípɔ ŋánuu-namui? Ḿvii a kpɛɛ̂i ḿâa kɛ́ kpɛ̃lɛŋ, fa pɔ̂ri ńɛ̂wo toôi a ǹɛ́lɛɛ.”

¹⁸ È ǹyée lɛ̀ɣɛ ŋɔ́nɔ ḿâ ŋ́gonôi é kpanáŋ.

¹⁹ E mò mâ ǹyɛɛi, “Ɣâla è íwɛli-ní. Ífe yào. Lii-see é kɛ́ íyêei. Kɛ́ a íkponôi kpanaŋɔɔ.” Tãi è lòno la ḿbɔi, kponoi kpânaŋ è pà ḿbɔ ńyɛ̂ɛ mai, “Ŋánuu-namui yâ gɛ́ ŋ́gbonôi a kpanáŋ, lóno ḿbɔ.”

²⁰ E m̀o ḿâ ǹyɛɛi, “Í gɔ́lɔŋ m̀ɛnii ŋá pà la ípɔi? Ŋa pá kɔ́ pɛ́lɛ̂i Pɛsia lɔii ŋɔɣâla-taa kela kɛ́tɛi mà tãi kpɔ́ nɔ́ ŋa lî la pôlui. Ǹyaŋ tãi ŋa lî lai, Gurii lɔii ŋɔɣâla-taa kela kɛ́tɛi a pâi pâi.

²¹ Kɛ́lɛ maa-ŋuŋ ŋa pâi m̀ɛnii ƃôi yâ bɔ̃yɛ̂i Dɔ̃yâ Kɔlɔi sui. Ŋákpɔŋ mâa nuu da fé naa fɛ̂ɛ nɔ́ Makɔɔ nyii gáa a Eezuɛ-ŋai díɣâla-taa kela-ŋai díkâloŋ kɛ́tɛi.