Azaya 9 - Bible

¹ É máŋ kɛ́ tí, diai kɛ̀ kpînii da lii-too pôlu su kɛ́tɛ sui, dífe pâi kulâi m̀ɛni kpɔ̂lui ŋí su. Ɣâla è wɔ́lɔ ǹíi ŋwàna Zɛbulɔŋ da Nɛfɛtɛli dísuui su-ƃelai dîa é díkula-maa kɛ́. Kɛ́lɛ tãi kpɛ́-kpɛɛ tɛɛ pôlu ma, ǹɔii-ŋai ŋí su-ƃela da pâi lii-sêe sɔlɔ ƃôi. Da pâi ƃaa kɛ́-maa sɔlɔ ƃôi da diai Mɛditɛrenia Yuoi koo ma, Zɔdiŋ pôlu pere-ƃelai da Galalii ǹɔii-ŋûŋ-ŋai su-ƃelai.

Gâloŋ gáa pâi pâi

² Diai kɛ̀ siâi kpînii, daâ kwaa ponoɔ́ɔ su-kɛ́tɛ káa. Diai kɛ̀ lɔii kpíniɛɛ maa pɔlɔ-pɔlɔɔ sui, díkaa nâa kwaa ponoɔ́ɔ kɛ́tɛ su.

³ Yâwɛɛ, yaâ ǹɔii-ŋûŋ-ŋai su-ƃelai kɛ́ díkɛ ƃûu ƃò, díkɛ lii-nɛ̃ɛ kùla. Dílii lâai, díkɛ lii-nɛ̃ɛ kùla m̀ɛni-ŋai mɛni ma ƃa gɛi, yɛ̂ɛ nûa ƃé lii-nɛ̃ɛ kulâi sí-sãa ƃá kula kûu ma, kpaa máŋ yɛ̂ɛ nûa ƃé kɔ́ su-kula yeei sãa ŋákɔlɛ̂i díkîe-ni loai.

⁴ Ya dímɛni kpɔ̂lu kpiri-ŋai kúla díŋûa, ya gɔli kpîri-ŋai kúla díkâraŋ ŋá. Ya diai yée mɛi ɣále kɛ̀ ínûai lúanîi, díkɛ sãâ kùla díyêei a wôya perei. Í díkùla maa kɛ̂ yɛ̂ɛ berei í gɛ̀ la a Mediaŋ kɔ kuluƃa-ŋai.

⁵ Ǹɔii-ŋuŋ-ŋai kɛ̀ ǹûai lúanîi díkɔ kuluƃa-ŋai kɔ́ɔ ŋá-kɔlɔ-ŋai, da díŋãa sêɣe-ŋai da fé pâi lɛɛ̂i. Gélee a pâi kérenîi ŋɔŋ su.

⁶ Daâ lóŋ maa sɔlɔ ƃó kûɛ! Daâ lóŋ-surɔ̂ŋ tɛ̀ɛ kúpɔ! Ǹyaa ƃé pâi kɛ̂i a kúkâloŋ. Kwa pâi kɛ̂i ma, “Ǹia-woo ƃó-nuu Kɛ́tɛi, Ŋ̀wála-wâla kélee Ɣalai, Ŋ̀wɔ́lɔ-wɔlɔ da Wɔ́lɔ-wɔlɔ Naŋ. Ǹii-sêe Tɛɛ Kâloŋ.”

⁷ Ŋɔwála-walai kóyaŋ fé pâi wɔ́lɔ kɛ̂i ma. Lii-sêe a pâi wɔ́lɔ kɛ̂i nɔ́ ŋɔkâloŋ-laai su. Ǹyaa ƃé pâi kɛ̂i Gâloŋ Deeƃé pɔ́ɔ ŋá a kâloŋ. Wôya mɛni da kélee fé pâi kɛ̂i ŋɔkâloŋ-laai su wɔ́lɔ-wɔlɔ da wɔ́lɔ-wɔlɔ. Ǹyaŋ Ŋ̀wála-wâla Kélee Yâwɛɛ ƃé pâi m̀ɛni-ŋai ŋí kélee kɛ̂i dí kɛ́.

Yâwɛɛ a pâi Eezuɛ kula maa kɛ̂i

⁸ Ǹuu-namui a m̀ó a gɛɛ a pâi Zeeka ŋɔsuui su-ƃelai dímɛnii ŋá têei Eezuɛ lɔii su.

⁹ Ǹyaŋ à kɛ̀ tí, Sameria taa-leei Eezuɛ-lɔii sui, zu-ƃelai kélee da pâi gɔ́lɔnîi a gɛɛ ǹyaa ƃe gɛ̀ tí. Ǹûai tí yoŋkai, dísu mɛni kɛ́tɛ. Da pâi môi dîyɛɛi,

¹⁰ “Bɔ̂rɔ kane pɛrɛ-ŋai aâ wólo. Kɛ́lɛ kwa pâi dítɔɔ̂i a kɔni maa kîiŋɔɔ-ŋa. Sakimo wuru-ŋai daâ ƃúleŋ, kɛ́lɛ kwa pâi sîda wuru lɛ́lɛɛ-ŋa sîi dípɔ ŋá.”

¹¹ Yâwɛɛ a pâi ŋɔ́nɔ gɛ̂i díkpɔara-ƃelai dí díkpîŋ kpɛtɛ kámɛni ma a gɛɛ dí kɔ́ tóo dîa.

¹² Siria kɔ kɔ́-ƃelai da pâi kulâi vóloi kulâi-pere Felesia kɔ kɔ́-ƃelai dí kúla vólo liî-pere. Da pâi kɛ̂i a díkpîŋ kpɛtɛɛ a gɛɛ dí Eezuɛ su-kara. É máŋ kɛ́ tí, Yâwɛɛ a pâi kɛ̂i nɔ́ a ǹíi ŋ̀wánaa é lɛ́ɛ la zu é Eezuɛ kula maa kɛ́.

¹³ Eezuɛ-ƃelai dífe dílii pene ní berei máŋ Yâwɛɛ è dí kula-maa kɛ̂ lai. Dífe niî tínaŋ ní bɔ́-naa pere.

¹⁴ Yâwɛɛ a pâi Eezuɛ-ƃelai láa túɛ-ƃelai ŋuŋ têei dîa da díwoŋ a ɣele tɔ̂nɔ da, é dóu-kɔ̃ɔŋ-ŋai da gbàlo-ŋai kélee tée.

¹⁵ Díŋuŋ ƃa ǹúu pɔ̂lɔ-ŋai da diai nûa da ƃâa kɛ́-maa tɛ̂ɛ dípɔ dílɔii sui, díwoŋ ƃa ǹɛ́ɛ ɣâla-woo ƃó-ƃelai,

¹⁶ kpɛ́ni fêi, dísɛŋ lɛ́ɛi a ǹûai líi su kɛ̂i wúlee, gɛ́ díkùla bere sãai ma.

¹⁷ M̀ɛni ma, Ǹuu-namui fé pâi ǹɛɛ̂i naa dí yáŋkpa-ŋai da é pú é kúla ǹyêei. Vé pâi máŋ dípɔɔ-nɛyãai da dílônii da ŋɛ́i malôŋ kâai pâi lɛɛ̂i dípôlui. Díkelee díkaa a núu nyɔ́mɔɔ-ŋa. Díkɛ-mɛni kélee da dílono-woo kélee káa a ŋwana lɔ̂ɔ tua tee-tee. É máŋ kɛ́ tí, Yâwɛɛ a pâi kɛ̂i nɔ́ a ǹíi ŋ̀wánaa é lɛ́ɛ la zu é Eezuɛ kula maa kɛ́.

¹⁸ Ŋwana lɔ̂ɔ káa yɛ̂ɛ ɣalêŋ-kpɔlɔ kéreŋ ŋɔŋ. Gáa yɛ̂ɛ ŋɔŋ à kɛ̀ wolâ kérenîi, luri kɛ́ tɛ̀.

¹⁹ Ŋ̀wála-wâla kélee Yâwɛɛ ŋɔlii ŋwânai a Eezuɛ-ƃelai kêreŋ yɛ̂ɛ ŋɔŋ. Ǹûai da kɛ̂ a ŋɔlii ŋwâna ŋɔŋ ŋá-tɛ sãa. Nyíŋi a gɛ́ núu da fé ŋɔ́nɔ kpáaŋ ní m̀arâŋ-nuu mɛni ma.

²⁰ Nûa díkaa díkɔɔ ŋá a kpíni da fólo díkɛ díkɔ̃nɔŋ kɔ̀ri, kɛ́lɛ maa mii-sãai fa dílii làa. Da kɛ̂ kpîŋ díkpɔɔi lonii miî.

²¹ Manasɛ da Ifiraŋ dísuui su-ƃelai dítɔɔ̂i díkîe-ni dîa. Díkelee díkaa a Zuda kpɔara-ƃela. É máŋ kɛ́ tí, Yâwɛɛ a pâi kɛ̂i nɔ́ a ǹíi ŋ̀wánaa é lɛ́ɛ la zu é Eezuɛ kula maa kɛ́.