Azaya 57 - Bible

Yâwɛɛ è tɔ̀ɔ Eezuɛ-ŋai dîa díɣâla pɔkɔɔŋ-ŋai fɛli mɛnii ma

¹ Ǹúu sɔŋ lɛ́lɛɛ-ŋai da sâa, kɛ́lɛ núu da fa târe m̀aa mɛ̂ni-ŋai su, kpaa máŋ nûa díkɛ a díkpaaŋɔɔ m̀ɛni ma. Da sàa, da kûla m̀ɛni kpɔ̂lu-ŋai su.

² Diai da sîa a teniŋ ƃô perei, da sàa da lî lii-sêe su. Da kɛ̂ fii tɔ̂ɔ su.

³ Sɔnyɔ̂ŋ-ƃela, ka pá ká tɔ́ɔ m̀ɛni ŋá-teɛɛi ŋá! Kámaa fé nɛ̃ɛ ní é tɛ́ɛ dɛli kpɛ́-ƃelai, ŋ̀ulu-wulu kɛ́-ƃelai da ǹɛyâai da díkpîŋ tɛ̀ɛ sinâa pɔ́ sɛŋ mɛni mai dîa.

⁴ Gbɛ̂ɛ ƃé ka ɣɛ́lɛ maa kulâi gbonôi? Gbɛ̂ɛ ƃé ka ká lá tâɣai kpɔ́ tí a zu kɛ́tɛ, kákɛ kánɛŋ kùla mai? Káfe a tɔɔ ma-ƃela da diai pɛlɛ káa díkponôi dílônii?

⁵ Ká kɛ̀ nyiî a ǹɛyâai ôo wuru-ŋai mu ƃɛ́i ka káɣâla-pɔkɔɔŋ-ŋai fɛ̂li naai. Ka kɛ̂ kálônii kulâi naa a sâla gɔni-wôlo-ŋai su ǹyée-ŋai loai.

⁶ Ka kɔni-ŋa sàa, ká díkɛ a káɣâla-ŋa, ká kɛ́ dífɛ̀li. Ka kɛ̂ ŋ̀wã̂ai sama-sãa da mii-sãa sama sãa tɛɛ̂i dípɔ. Ká lâai la kátûa-pere sãŋ-ŋai ŋí ƃɛlɛ káa ŋ́goi a gɛ́ɛ ńii é kɛ́ a ǹáa káyêei?

⁷ Ka lî ǹyée kpaya-kpayai tôŋ su ká sâla-ŋa kula naa, ká kɛ́ lɔ-pɔ̂rɔŋ kɛ̀ naa a ǹɛyâai.

⁸ Ka ɣâla pɔkɔɔŋ-ŋai tɔ̂ɔ kákpôŋ-ŋai pôlu da kákpôŋ falaŋ-ŋai ŋá. Ka tɔ̂ɔ ḿâ, ka kámaa sêɣe-ŋai kúla kâa, ka nyíi a káwɛli-ŋai kágbìŋ-ŋai ŋá, ká kákpîŋ líi láa, ká dífela fé. Ka kɛ̂ lâani kagbìŋ-ŋai ŋá, káŋɛi pîlaŋɔɔ díkâŋ ma kákɛ díkàa sĩ́i.

⁹ Ka káwulɔ kúŋ nɛ̃ɛ-ŋai pû kâa, ká wúlɔ kpâne sia, ká lí a gɛ́ɛ ká Molɛ ɣalai fɛli. Ká kɛ̀ ɣâla kɔ̂rii. Ka kéla-ŋa tɛ̀ɛ kwaa kôya-koyaa-ŋa maa ponoɔɔ ma a gɛ́ɛ dí lí dí da-ŋa kɔ́ri kâa. Ká kpîŋ kéla-ŋa tɛ̀ɛ saa táa.

¹⁰ Ká kɔlɔ kpɛ̂ɛ kâa ɣâla da kpɛ́ni-ŋa kɔ́ri mɛni su, kɛ́lɛ káfii fé kpɛ̀ɛ ní nyíŋi kélee su. Ka lâai la káɣâla pɔkɔɔŋ-ŋai da pɔ̂ri kponoi kpânaŋ tɛɛ̂i kápɔ kɔlɔ fa wɔ́lɔ kpɛ̀ɛ kâa.

¹¹ Yâwɛɛ a m̀ôi ǹyɛɛi, “Ŋ̀âla-ŋai kɔɔ da kɛ̂ kámaa yaôi, a gɛ́ɛ ká kɛ́ a lɛ́ɛ-ƃela ka nia ḿâ kpɔ́ kpúŋ? Káfe ŋɔ́nɔ yaôi ḿâ, kpɛ́ni fêi, ḿɛi saâi a zu-kôyaai?

¹² A nɛ̃ɛ ma kpîŋ ŋá káteniŋ ƃô-laai da kátua-pere lɛ̂lɛ-ŋai maa mɛni ƃó, dífe pâi kpɔŋ mâa tɛɛ̂i kápɔ.

¹³ Kà wɔ̀lɔ kpɔŋ mâa mɛni ma, tɔɔ ŋaŋ káɣâla pɔkɔɔŋ-ŋai dí kpɔ́ŋ kâa, dí káŋuŋ ma ƃó. Vãai a pâi tɛɛ̂i a dia, ǹyaŋ ńɛwo a pâi dífɛ̂ɛi yɛ̂ɛ láa kpâla. Kɛ́lɛ diai pâi díkili tɔɔ̂i ḿâi, ǹɔii a pâi kɛ̂i a dípɔɔ, ǹyaŋ ŋáyee maa waai ma a pâi kɛ̂i a díkɛ̂i.”

Ɣâla è góno tèe kpɔŋ mâa da ƃâlo-laa mɛni ma

¹⁴ Yâwɛɛ è m̀o ǹyɛɛi, “Ka berei su sã́a, ká zu kpɛtɛ ŋánûai mɛni ma. Ka díperêi kpáaŋ sãai kélee kúla naa. Ka berei su sã́a, ká zu kpɛtɛ ŋánûai tɛɛ mɛ̂ni ma!

¹⁵ “Ŋ́gaa a Ŋ̀âlai nyíi dɛ̂ɛi ɣelêi wɔ́lɔ-wɔlɔ da wɔ́lɔ-wɔlɔi, nyíi ǹáa maa waai. Ŋ́gaa ɣele ma wɔ́lɔ-wɔlɔ da wɔlɔ-wɔlɔ. Ŋ́gɛ̂i káa ŋ̀elêi su póŋ-poŋ gwaa maa waai ma. Kɛ́lɛ ŋ́gaa diai sáma dímaa yeŋɔɔi, díkɛ dílii maa fâleŋ a gɛ́ɛ ŋá dílaa-laai, da díkili-kɛ-zui su-kpanaŋ.

¹⁶ Ŋa fúlu-laa tɛ̀ɛ ŋánûai pɔ́. Fé pâi ŋɔ́nɔ da sɔŋ siɣêi kpaa máŋ ŋá ńii ŋwána dîa wɔ́lɔ-wɔlɔ da wɔ́lɔ-wɔlɔ. Ńyãa ƃé vúlu-laa lɛwoi tɛ̂ɛ dípɔ.

¹⁷ Ŋá ńii ŋwàna dîa dísɔnyɔ̂ŋ-ŋai mɛ̂ni ma, da dísɛŋ wɛ̂li-tuai, ŋá díkula maa kɛ́, ŋá ńyee kúla dímu. Kɛ́lɛ dí kɛ̀ nɔ́ a díwôlii kpɔ̂lɔɔ, dífa dílii maa fàleŋ, díkɛ nɔ́ díkpɔɔi mɛni-ŋa kɛ̀.

¹⁸ “Ŋá dítûa-pere-ŋai maa kpɛ̂ɛ, kɛ́lɛ ŋa pâi díƃâloi. Ŋa pâi díteniŋ tɔɔ̂i, ŋá kpɔ́ŋ dîa. Diai malôŋ see ƃôi díkɛ wɔ̂lɔi, ŋa pâi díŋa-nɛnɛ̂i.

¹⁹ Ŋa lii-sêe tɛ̀ɛ núu kélee pɔ́, diai díkaa kwaa kôyaa mai, da diai dílɛɣɛ̂i a ńyãai. Ŋa pâi ŋánûai ƃâloi. Ńyãa Yâwɛɛ ƃé m̀o tí.

²⁰ Kɛ́lɛ ŋwana-lɔ̂ɔ-ƃela díkaa nɔ́ yɛ̂ɛ yúo nyíi va wɔ́lɔ kpèra toôi. Gáa nɔ́ tɛ̂i gɛ́ tòo gɛ́ pà a kala da pɔ̂rɔ.

²¹ Ŋuŋ ma ƃô kwaa ma fé naa sɔnyɔ̂ŋ-ƃela mɛni ma. Ńyãa Yâwɛɛ ƃé m̀o tí.”