Amɔsə 8 - Bible

Zĩ̂ai bîlaŋɔɔi ŋ̀úru-ƃa kpɔlɔi mai

¹ Ɣâla Yâwɛɛ è ŋɔ́nɔ zĩ̂a da kpɛ́ni lɛ̀ ḿâ. Zĩai ŋí su, ŋá wúru-ƃa-kpɔlu kpɔlɔ tɔnɔ kàa.

² È mò ǹyɛɛi, “Emɔ, lé ƃé ƃa gâai?” Ǹyɛ̃ɛ mà, “Wúru-ƃa kpɔlu kpɔlɔ tɔnɔ.” Nya ƃe Ɣâla Yâwɛɛ è mò ḿâ, ǹyɛɛ, “Ŋánûai Eezuɛ-ŋai dítãi kpɛɛ ŋá a seri. Fé pâi ŋɔ́nɔ dísu-mɛni lɛɛ̂i.

³ Kúnuu-namui Ɣâla è mò ǹyɛɛ, Ŋ̀âla-pɛrɛ Kɛ́tɛi mu wule-woo-ŋai da pâi penêi a wɔ́lɔ-wôo a ŋ̀elei tí. Boma-ŋai da pâi kɛ̂i a dítamaa. Da pâi kɛ̂i a dímɛi saá díkɛ boma-ŋai pìli díkîe-ni mɛi kwaa kélee ma.”

Eezuɛ ŋɔsɔnyɔ̂ŋ-ŋai

⁴ Ka nyíŋi mɛ́ni, káai ka ƃɔ̂rɔŋ diai dîa kpɔŋ-maa wɛ̂lii, kákɛ gôlo-ƃelai su kàra ǹɔii sui,

⁵ ká kɛ́ mò, kâai, “Mí tãi ƃé ŋ̀áloŋ-ninai a pâi kpɛɛ̂i la a gɛɛ kú kúmii-sãai kɔ́lɛ, da Vii-tɔɔ-ɣelei a gɛɛ kú wîi kɔ́lɛ, a gɛɛ kú kúmii-sɛŋ kɔ̂ɔŋ kɔpu-ŋai kɛ́ a guro té kú zɔ̃ɔ kɛ́tɛ, kúkɛ wôya kɛ̀ kúsɛŋ-kɔ̂ɔŋ-sãai su,

⁶ a gɛɛ kú gôlo-ƃelai yá a káne kú diai kpɔŋ-maa wɛ̂lii ku díya a kpaŋ-kpali, a gɛɛ kú m̀ii-sɛŋ-pɔrɔi kɔlɛ máŋ?”

⁷ Ɣâla Yâwɛɛ nyii gáa a Eezuɛ Ŋɔɣâlai a vóo Zeeka ŋɔyoŋkai maa-mɛni ma, ǹyɛɛi, “Tɔ̃yâ ma, fé pâi ŋɔ́nɔ niâi díkɛ-mɛni-ŋai dɔnɔ kpîŋ ma.

⁸ Nyíŋi mɛni ma, ǹɔii a pâi kpɛ̂linii, zu-ƃelai kélee dí wɔ́lɔ, ǹɔii kélee é túmo, gɛ́ tɛ̀ gɛ́ yèŋ pôlu ŋɔ́nɔ yɛ̂ɛ Ǹâai Ya-leei Izei.”

⁹ Kúnuu-namui Ɣâla è mò, ǹyɛɛ, “Ŋa pâi vóloi kɛ̂i a maa-ɣelei tí é yéŋ a vólo tɛɛ-ŋuŋ mai, ŋá ǹɔii su kpíni a fólo ŋá.

¹⁰ Ŋa pâi kákuu-ŋai penêi a wɔ́lɔ-kuu, ŋá káwule-ŋai kélee pene a wɔ́lɔ-woo. Ŋa pâi maloŋ tôo-maa sêɣe toôi kákelee káleɣei, ŋá kpúlaŋ tóo kaŋûa nyii pâi ǹɛ̂i a gɛɛ kákaa maloŋ tôo-maa su. Ká pâi kɛ̂i wɔ̂lɔi yɛ̂ɛ núu ƃé lóŋ tɔnɔ kpéŋ maa-wɔlɔ kɛ̂i. M̀ɛni-ŋai ŋí kélee kpɛɛ-ŋa a pâi a maloŋ too-maa kɛ́tɛ.”

¹¹ Kúnuu-namui Ɣâla è mò, ǹyɛɛ, “Ka gáa, ŋ̀elei káa pâi tãi ŋa pâi puru tɛɛ̂i la ǹɔii sui. Ve pâi kɛ̂i a mii-sɛŋ puru, kpaa máŋ kpele-wɛli, kɛ́lɛ a pâi kɛ̂i a Nuu-namui ŋɔwóoi mɛni-puru.

¹² Da pâi ɣilînii dí síɣe yúo ma dí sere yúo ma, dí síɣe yá ŋûa-pere dí seri vóloi kulâi-pere. Da pâi kîrɛ siɣêi kwaa kélee ma díkɛ Ǹuu-namui ŋɔwóoi kɔ̀ri, kɛ́lɛ dífe pâi gâai.

¹³ Maa-ɣêlei tí nɛnî-kpela-ŋa da nyáŋkpa-ŋa da pâi fôai a kpele-wɛ̂li.

¹⁴ Diai da dífòo Asima ma nyii gáa Sameria, díkɛ m̀ó, dîyɛɛi, ‘Óo Daŋ, íɣâlai káa ɣele ma,’ Dîyɛɛ, ‘Óo Bɛɛsiba, ímɛi-kaa-ɣalai káa ɣele mai,’ da pâi toôi, dífe pâi ŋɔ́nɔ dímu siɣêi pôlu.”