Amɔsə 4 - Bible

¹ “Basãŋ niŋa-ŋai káai kákaa Sameria-yeei sui, ka ŋ́óoi ŋi mɛni, káai ka gôlo-ƃelai luaŋ, diai kpɔŋ-maa wɛ̂lii kakɛ́ dímɔ̃lɛ, kakɛ́ mò kasinâai dia, ‘Ka pá a kpele-sɛŋ ku gbele!’

² Kúnuu-namui e vòo a ŋɔfólo-laai a gɛɛ-tã káa pâi, tãi da pâi kákulâi la a kpawɔi, da pâi kákpɛɛ-ŋai kulâi máŋ a nyɛ̃ɛ kula-kpâwɔ.

³ Kúnuu-namui e mò, ǹyɛɛ, ka pâi tɛɛ̂i ziɣâŋ wolo ma ká kúla ŋenei ŋá, nú kélee kɛ́ dúɛ-pere kàa. Da pâi kapilîi Amaŋ-pere.”

M̀ɛni-ŋai maa-nɛ̃ɛ̂i Eezuɛ é gɛ́ kɛ́lɛ vé gɛ̂i

⁴ Ɣâla Yâwɛɛ è mò, ǹyɛɛ, “Ka lí Bɛtɛ ká sɔnyɔ̂ŋ kɛ́. Ka lí Geega ká kásɔnyɔ̂ŋ su kɛ́tɛ. Ka pá a kásâla-sãai a ɣele-wala kélee, kákɛ kákɔ̂liŋ buu-ɣelei tɛ̀ɛ a ɣele saaƃa kélee kpɛɛ ŋá.

⁵ Ka kpólo kéreŋ a sɛɣɛi fei-sala, nyii tɛ́-sɛŋ káa zui, ká káɣâla sama-sɛŋ maa-lolo too a gɛɛ núu kélee é gɔ́lɔŋ kpɛ́ni fêi, nyíŋi ƃé ká ŋ̀wɛli ní a gɛɛ ká gɛ́, káai a Eezuɛ-ƃelai!”

⁶ Kúnuu-namui è mò, ǹyɛɛ, “Ŋá puru tôo kataa-lee-ŋai kélee su, ŋa mii-sɛŋ mɛni kpanaŋ kakwaa-ŋai kélee ma berei máŋ gáa ti lai, káfe pa ni ḿbɔ́ pôlu.”

⁷ “Ŋa dunai sòŋ a ɣáloŋ saaƃa zi-sɛŋ ba kula-tãi é lɛ́ɛ serîi. Ŋa tuna pú taa-lee tɔnɔ su, fé tuna pú ní taa-lee da kpɛ́ni su. Tuna è pù kpâlaŋ tɔnɔ ŋá, ǹyaŋ gbâlaŋ nyii tuna fé pú ní ŋái, ŋ̀á è kpàla.

⁸ M̀ɛni ma taa-lee feerɛ kpaa saaƃa dí lì taa-lee tɔnɔ su a gɛɛ dí yá kpéle kɛ́lɛ délii fé láa ní. Berei máŋ è kɛ̀ tí lai, káfe pá ní pôlu ḿbɔ.”

⁹ “Ŋá kási-sãai kɛ̀ dí kpála dí sáa. Ŋá kasûa-ŋai da kakpɔmɔ kpalaŋ-ŋai kɛ̀ dí fɔ̃aya. Gotó-ŋai dí káfîi wuru-ŋai míi da káwulɔ-wuru-ŋai. Bere máŋ è kɛ̀ tí lai, káfe pá ní ḿbɔ pôlu.”

¹⁰ “Ŋa see-kɔlɔ-fela tɛ̀ɛ kásama yɛ̂ɛ Ize ŋ̀ɔi. Ŋá ká nyáŋkpa-ŋai pàa a ƃɔ́a-sɔ̂kpɔ, ŋá kásoo-ŋai síɣe, ŋá káƃûui kúŋ nyɔ́ŋ kásũai. Berei máŋ è kɛ̀ tí lai, káfe pá ní ḿbɔ pôlu.”

¹¹ “Ŋá káseêi kùla yɛ̂ɛ berei ŋá Sodɔŋ da Gomola kùla lai, ǹyaŋ ká kɛ̀ yɛ̂ɛ da ŋɔŋ-kɔi tuɛ-kpua kula ŋɔŋ ŋá. Berei máŋ e kɛ̀ ti lai, dafe pa ni ḿbɔ́ pôlu.”

¹² “M̀ɛni ma, óo Eezuɛ, bere ƃé ŋa pâi gɛ̂i la a káa. Ka kákpîŋ kpɛtɛ ká Kaɣâlai káa, óo Eezuɛ, kpɛ́ni fêi, ŋa pâi m̀ɛnii ŋí kɛ̂i a káa!”

¹³ Ka gáa, Ɣâla ƃé ǹyéei kpɛ̀tɛ é vãai kpɛtɛ é núu-kpune ŋɔkili-ŋa-siai lɛ́ mà. A ŋ̀ele ƃɔ́ɔi pène a kpíni, gɛ́ gɔ́ɔ tɔ̀ɔ ǹyée-ŋai ma ǹɔii su. Ǹáa ƃa Yâwɛɛ Ŋ̀wála-wâla kélee Ɣalai!