Tɔɔɓɛlaa veelɛ 7 - Bible

¹ Ilasa è ŋ̀óo su tòo ǹyɛɛ mai, “Worɛ̂-woo káa ńyêei ímɛni ma. Yâwɛɛ a góno tée a gɛɛ tínaa felaƃa fũa lɛ́lɛɛ ŋɔpãŋ tɔnɔ sɔ̃ɔ a pâi kɛ̂i a sɛŋ kâo kole kpua tɔnɔ ǹyaŋ bâle fũa lɛ́lɛɛ ŋɔpãŋ feerɛ a pâi kɛ̂i máŋ a sɛŋ kâo kole kpua tɔnɔ Sameria ŋɔgalai lá.”

² Gâloŋ mɛi káa-nuu kɛ́tɛi kɛ̀ naa gâloŋ kɔlɛi è zu tòo ǹyɛɛi, “Ḿve láa-ni la! A nɛ̃ɛ ma kpîŋ Yâwɛɛ é ŋ̀ele kɔ̂lɔŋ lá ƃó a gɛɛ mii-sɛŋ é pú ǹɔii ma, va pɔ̂ri mii-sɛ̂ŋ kɛ́ɛ tí kɛ̂i a gɛɛ é tínaa kɛ́ naa!” Ilasa è ŋ̀óo su tòo ǹyɛɛi, “Ƃa pâi gâai é kɛ́, kɛ́lɛ ífe pâi maa mii-sɛŋ da miî.”

Siria-ŋai dí kɔkuluƃa-ŋai dí pù

³ Maa tãi tɔnɔi tí, sinaa náaŋ díkɛ̀ seêni Sameria galai lá ŋ̀enei ŋá pere nyii núu kpono ma kɔlɔ-fela nyɔ́mɔɔ è kɛ̀ diai. Dí mò díkîe-ni dîa dîyɛɛi, “Kwa pâi kɛ̂i seêni ƃɛ́, kú kɛ́ maa-kpɛ̂ŋ kɛ̀ a gɛɛ kú sáa lé mɛni ma?

⁴ À kɛ̀ kwa mò kûɛ kwa pâi liî daa-lêei su, burui tooɔ̂i naa a zu kɛ́tɛ, gɛ̀ ní kwa pâi saâi. À kɛ̀ kwa lɛ̀ɛ ƃɛ́, kwa pâi saâi. Mɛni ma, yô, kwaa lí Siria-ŋai dí ƃûui su, kwáa kú kpîŋ tɛɛ dípɔ. À kɛ̀ da kú malôŋ kàa, kú lɛ́ɛ a kú fúlu. À kɛ̀ da kú pàa, gɛ̀ ní kú sáa.”

⁵ Maa ɣele-wulii tí, zinâa náaŋ dí dímu sìɣe dí lí Siria-ŋai dí ƃûui su. Tãi dí sèri la mûui sui, dífe núu tɔnɔ kpîŋ da káa ní naa,

⁶ Kpɛ́ni fêi, Ǹuu-namui è gɛ̀ Siria-ŋai dí kɔ́-kɔ keleŋ-ŋa da soo-ŋa tíŋ mɛ̀ni é pɛ́lɛ kɔkuluƃa kpûlu kɛ́tɛ ma. Nya ƃe Siria kɔkuluƃa-ŋai dí mò díkîe-ni dîa dîyɛɛi, “Ka káwoli tɔ́ɔ! Gɛ̂ɛi yɛ̂ɛ nya ƃé Eezuɛ kaloŋ a Ita da Ize kaloŋ-ŋai worɛ̂ tɛɛ da dí kɔkuluƃa-ŋai a gɛɛ dí pá dí pɛ́lɛ kûa.

⁷ Kwaa kú kúla ƃɛ́ a maa félaa kú pú!” Nya ƃe dí pù dí kúla díƃûui su a maa kpinii tí. Dí dísua-kɔlɔ pɛrɛ-ŋai, dísoo-ŋai da dísoo-fáleŋ-ŋai lɛ̀ɛ naa dí pú dílɛ̂woi maa kɔ̃ɔ mɛni ma.

⁸ Tãi ǹúu-kpono-ma kɔlɔ-fela kpakolo náaŋ dí sèri la Siria-ŋai dí ƃûui kɔlɛ mai, núu da kélee fé kɛ́ ní naa. Dí lɔ̀ zua-kɔlɔ-pɛrɛi dɔnɔ mu dí dílaa míi dí díkpele naa. Naa pôlu ma dí seɣe-ŋa, sɛŋ kâo kole da gôo sìɣe dí lí a dia dí díloo. Dí ŋɔ́nɔ lène pôlu dí lɔ́ zua-kɔ̂lɔ-pɛrɛi da kpɛ́ni mu dí sãa sìɣe naa dí lí a dia dí díloo.

⁹ Nya ƃe dí mò díkîe-ni dîa dîyɛɛi, “Mɛnii ŋí kwa gɛ̂i vé lɛ́lɛ ní. Sâa káa a tuŋ lɛ́lɛɛ ƃó ɣêle. Kwà kɛ̀ nɔ́ naâi kɛ̂i kúkpîŋ mɛni ma, kúfe môi núu da kpɛ́ni ma, à kɛ̀ kwa maa-kpɛ̂ŋ kɛ̀ é lɛ́ɛ la zu ɣele é ƃɔ́, tɔŋ-kpɛ́ maa a pâi pâi kúpɔ. Kwaa lí a maa félaa a gɛɛ kú duŋ lɛ́lɛɛi ŋí ƃó gâloŋ ŋɔpɛ́rɛ kɛ́tɛi lá.”

¹⁰ Dí lì pôlu Sameria dí galai mɛi-káa-ƃelai tóli dí mó dîa dîyɛɛi, “Kú lì Siria-ŋai díƃûui su kúfe kpakolo tɔnɔ kpîŋ káa ní naa. Ífa núu tɔnɔ kpîŋ tíŋ mɛ̀ni. Zoo-ŋai da zoo-fáleŋ-ŋai nɔ́ ƃé dí kpulɔ̂ŋɔɔi, zua-kɔlɔ pɛrɛ-ŋai kélee lá ƃóɔɔ, núu da fé dímu.”

¹¹ Galai mɛi-káa-ƃelai dí duŋ ŋí ƃò gâloŋ ŋɔpɛ́rɛ kɛ́tɛi lá.

¹² Gâloŋ è mù sìɣe a gbínii tí é mó ŋɔtíi-kɛ-ƃela kpaya-kpayai dîa, ǹyɛɛi, “Ŋá mɛ̀nii kɔ́lɔŋ Siria-ŋai da gɛ̂i a kúai. Dí gɔ́lɔŋ a gɛɛ puru toôɔi kûa a zu kɛ́tɛ. Mɛni ma daâ kula m̀ûui su da lí da díloo naa kɔlɛ ma díkɛ díkili ŋá sìa dîyɛɛi, ‘Da pâi pâi mii-sɛŋ kɔ̂rii. Gɛ̀ ní kwa pâi dí sonîi a dífulu kú lí kú dí taa-leei síɣe.’ ”

¹³ Gâloŋ ŋɔtíi-kɛ-ƃela kpaya-kpayai dɔnɔ è zu tòo ǹyɛɛi, “Soo kpûlu káa kúyêei. Kúfa pɔ̂ri gbakoloi da-ni tɛɛ̂i dí zoo-ŋai ǹɔ́ɔlu síɣe dí lí Siria-ŋai dí ƃûui su a gɛɛ dí mɛnii káa gáa kɛ̂i? Kwa pâi saâi máŋ nɔ́ yɛ̂ɛ diai da sàai.”

¹⁴ Nya ƃe dí kɔ́kɔ-keleŋ feerɛ sìɣe dí dɛ̀ɛ gbakolo-ŋai pɔ́. Gâloŋ è mò dîa a gɛɛ dí lí dí gáa lé ƃé Siria-ŋai dí kɔ-kuluƃa-ŋai kɛi.

¹⁵ Gbakolo-ŋai dí lì é lɛ́ɛ la zu dí seri Zɔdiŋ Ya-leei ma. Dí kɛ́ɛ liî dí Siria-ŋai dí kɔ́-kuluƃa-ŋai díseɣe-ŋa da díyêei kɔ-kɔ́ sãa kàa dáa-tàa berei ma gwaa kélee, nyii-ŋai dí dípìli tãi dí kɛ̀ pûi la a kîrɛ yao pêre sui. Dífe dí ta káa ní. Gbakolo-ŋai dí pà pôlu dí díkoraŋ ƃó gâloŋ mî.

¹⁶ Nya ƃe ǹûai dí lì Siria-ŋai díƃûui su dí naa sãa kélee síɣe. Zãai dí zìɣei dí kɛ̀ kpɔ́ a dámaa díkɛ felaƃa fũa lɛ́lɛɛ ƃɔrɔ tɔnɔ kɔ̀lɛ a sɛŋ kâo kole kpua tɔnɔ, bâle ƃɔrɔ feerɛ kɛ́ ƃò a sɛŋ kâo kole kpua tɔnɔ nɔ́ yɛ̂ɛ berei Yâwɛɛ è mò lai.

¹⁷ Maa tãi tí Eezuɛ kaloŋ è mɛi káa nuu kɛ́tɛi tɔ̀ɔ diai mɛi kɛ̀ galai lá mɛi kâai a gɛɛ dí naa mɛi káa. Ǹúui ŋí ƃé gâloŋ kíli è kɛ̀ ma tãi è lì la Ilasa ŋɔpɛ́rɛi lá naa kâai. Ǹûai kùla daa-lêei su a kîrɛi dí lɛ̀ɛ siâi mɛi galai lá é lɛ́ɛ la zu é sáa nɔ́ yɛ̂ɛ berei ŋâla-naloŋ è mò la Gâloŋ liɛɛ naa kâai.

¹⁸ È kɛ̀ nɔ́ yɛ̂ɛ berei Ŋâla-naloŋ è mò la Gâloŋ ma ǹyɛɛi, “Tínaa ƃɛ́-tãi ŋí, felaƃa fũa lɛ́lɛɛ ƃɔrɔ tɔnɔ sɔ̃ɔ a pâi kɛ̂i a sɛŋ kâo kole kpua tɔnɔ, bâle fũa ƃɔrɔ feerɛ sɔ̃ɔ kɛ́ ƃò a sɛŋ kâo kole kpua tɔnɔ Sameria taa-leei ŋɔgalai lá.”

¹⁹ Gâloŋ mɛi káa-nuu kɛ́tɛi ŋí è mò ŋâla-naloŋ ma ǹyɛɛi, “Ḿve láa ní la! À nɛ̃ɛ ma kpîŋ Yâwɛɛ é tínaa ŋ̀ele-kɔlɔŋ lá ƃó a gɛɛ mii-sɛŋ é pú ǹíi ma, va pɔ̂ri mii-sɛŋ kɛ́ɛ tí kɛ̂i a gɛɛ é tínaa kɛ́ naa!” Ŋâla-naloŋ è ŋ̀óo su tòo ǹyɛɛi, “Ƃa pâi gâai é kɛ́, kɛ́lɛ ífe pâi maa mii-sɛŋ da miî.”

²⁰ Ǹyaŋ mɛnii tí kpɔ́ nɔ́ ƃé kɛ̀ la, kpɛ́ni fêi, ǹûai dí sìa mɛi galai lá é sáa.