Tɔɔɓɛlaa veelɛ 3 - Bible

Kɔ́ káa Eezuɛ loai da Môa

¹ Eɣa ǹóŋ Zoraŋ è lɛ̀ɛ bɔ́ɔ ŋá a kâloŋ Sameria, Eezuɛ lɔii su a Zuda kaloŋ Zɛosafa ŋɔkâloŋ-laa koraŋ buu káo lɔ́ɔlu mɛi saaƃai, ǹyaŋ è kɛ̀ a kâloŋ a kóraŋ puu káo feerɛ.

² È sɔnyɔ̂ŋ kɛ̀ a Yâwɛɛ kɛ́lɛ vé kɛ́ ní yɛ̂ ǹâŋ da ǹee díwɔ̂i. È gɔni-ɣala pɔkɔŋ Bêe su kàra nyii ǹâŋ è gbɛ̀tɛi.

³ É máŋ kɛ́ tí, è kànaŋ zɔnyɔ̂ŋ-ŋai dîa nyii Neba ǹóŋ Zɛroboaŋ è dí kɛ̂i, nyii Eezuɛ è pìlaŋ gɔ́ɔ pɔɔi. Vé bôlu tɔɔ ní dîa.

⁴ Môa lɔii è kɛ̀ Eezuɛ yée mu. Môa Kaloŋ Misa è kɛ̀ ƃála tɔɔ̂i, ǹyaŋ kóraŋ kélee a kâa ƃála-loŋ ŋɔwála ŋuŋ tɔ̂nɔ (100,000) tɛ̀ɛ Eezuɛ kaloŋ pɔ́ da ƃála sîrɛ ŋɔwála ŋuŋ tɔ̂nɔ ma leɣa a ŋuŋ fela-fei.

⁵ Kɛ́lɛ Eɣa saá pôlu ma, Môa Kaloŋ è tɔ̀ɔ Eezuɛ kaloŋ ma.

⁶ Nya ƃe ma tãi tí, gâloŋ Zoraŋ è kùla Sameria é Eezuɛ kɔ-kuluƃa-ŋai kélee ŋáa tɛ́ díkîe ma kɔ́ kɔ́ mɛni ma da dîa-ni dí lí.

⁷ È ŋ̀orɛ̂-wooi ŋí tɛ̀ɛ máŋ Zuda kaloŋ Zɛosafa mì: “Môa Kaloŋ a tɔɔ ḿâ. Kwa yá kwa pɔ̂ri liî a gɛɛ kú kɔ́ Môa pɔ́?” Gâloŋ Zɛosafa è zu tòo ǹyɛɛi, “Kwa yá kwa pâi liî. Ŋ́gaa nɔ́ yɛ̂ɛ berei íkaa lai, ŋá ǹûai díkaa a ínûa, ŋá soo-ŋai díkaa a ísoo-ŋa.”

⁸ È marê kɛ̀ ǹyɛɛ mai, “Berei nênɛ ƃé kwa pâi tɛɛ̂i lai?” Zoraŋ è zu tòo ǹyɛɛi, “Kwa pâi tɛɛ̂i a Idɔŋ Fɛ̃ɛ-kpalaŋ su pere.”

⁹ Nya ƃe Eezuɛ kaloŋ Zoraŋ è lì é pɛ́lɛ Zuda da Idɔŋ kaloŋ-ŋai dîa. Dí siáa a fólo lɔ́ɔlu mɛi feerɛi, yá fé ŋɔ́nɔ kɛ́ ní gɔkûluƃa-ŋai yêei dí kpele mɛ̂ni ma da dí soo-ŋai.

¹⁰ Eezuɛ kaloŋ è ŋ̀óo tɛ̀ ɣelêi ǹyɛɛi, “Nêi lé! Yâwɛɛ è pà a kúa kaloŋ saaƃai ŋí ƃɛ́ a gɛɛ nɔ́ é kú tɛ́ɛ Môa pɔ́?”

¹¹ Kɛ́lɛ Zɛosafa è mare kɛ̂ɛ kɛ̀ ǹyɛɛi, “Yâwɛɛ ŋɔlóno kɛ́-nuu da fé ƃɛ́ a gɛɛ kú Yâwɛɛ marê kɛ́ zârai?” Eezuɛ kaloŋ ŋɔyée-mu-nuui dɔnɔ è zu tòo ǹyɛɛi, “Sâfa ǹóŋ Ilasa káa ƃɛ́. Nya ƃe à kâa kɛ̀ a Ilaza ŋɔyée mù-nuu.”

¹² Zɛosafa è zu tòo ǹyɛɛi, “Gáa a Yâwɛɛ ŋɔlóno-kɛ-nuu a tɔ̃yâ.” Nya ƃe Eezuɛ kaloŋ Zɛosafa da Idɔŋ kaloŋ dí saaƃaŋɔɔ dí lì Ilasa pɔ́.

¹³ Ilasa è mò Eezuɛ kaloŋ ma ǹyɛɛi, “Ƃa ŋ̀wɛ̂lii ŋá kpɔŋ mâa tɛɛ ípɔ lé mɛni ma? Lí ínâŋ da ílee-ni díɣâlai ŋɔlóno-kɛ-ƃelai pɔ́.” Eezuɛ kaloŋ è zu tòo ǹyɛɛi, “Kpaa, kpɛ́ni fêi, Yâwɛɛ ƃé kúa saaƃai ŋí kú tòli gîe ma a gɛɛ é kú tɛ́ɛ Môa pɔ́.”

¹⁴ Ilasa è zu tòo ǹyɛɛi, “Ŋá ŋ́oo míi gɛ̀ ɣele ma ɣalai Yâwɛɛ láai su nyii ŋ́gaa tíi kɛ̂i mìi. Eêi kɛ̀ ƃaa kɛ́-maa è wàla kɛ́ ǹyêei é pîlaŋ Zuda kaloŋ Zɛosafa kɛ́ɛ ká sámai ma, ḿvêi pâi fâai ma ŋá ká káa kpaa máŋ ŋá ńyee sée ká mu.

¹⁵ Kɛ́lɛ ka pa ḿî a kɔnîŋ ɣale-nûu tɔnɔ.” Gɔnîŋ ɣale-nûui kɛ́ɛ ŋɔkɔnîŋ ɣalêi, Yâwɛɛ ŋɔmɔ̂leŋ è pà Ilasa kponôi.

¹⁶ È mò ǹyɛɛi, “M̀ɛnii ká ŋí Yâwɛɛ a môi: Ka lóa-ŋa tée diŋ-tiŋ ŋí su gwaa kélee ma.

¹⁷ Kpɛ́ni fêi, m̀ɛnii ká ŋí Yâwɛɛ a môi: Káfe pâi fãa tíŋ mɛnîi kpaa máŋ ká tuna káa é pú. É máŋ kɛ́ tí, diŋ-tiŋ ŋí láa a pâi fɛ̂ɛi a yá, káa, kásoo-ŋai da kátaa-tûlɛi-ŋai kélee ka pâi kákpelêi.

¹⁸ M̀ɛnii ŋí káa a mɛni fíi kpɛɛ Yâwɛɛ ŋɛ́i. A pâi máŋ gɛ̂i a gɛɛ ká Môa yée mɛi ɣále.

¹⁹ Ka pâi dí taa-lêe lɛ́lɛɛ-ŋai maa tínaŋɔɔ a siɣãŋ-ŋai yée mɛi ɣâlei da dítaa kpaya-kpayai kélee. Ka pâi dí ƃá-wûru lɛ́lɛɛ-ŋai kélee pɔnîi, ká dí tɛɛ yâ-ŋai kélee kpéra dífa ŋɔ́nɔ ɣìliŋ. Ka pâi dísi-sãa kpalaŋ lɛ́lɛɛ-ŋai kélee su karâi ká dí mɛi pɛ́lɛ a kɔni-ŋa.”

²⁰ Bôlu ma ɣele-walai, a ŋ̀ele-wâla sala kula tãi, berei è kɛ̀ lai, yá è kɛ̀ ɣilînii é kúla Idɔŋ pere. Ǹɔii láa è fɛ̀ɛ a yá.

²¹ Tãi Môa-ƃelai dí nâa mɛ̀ni la a gɛɛ gâloŋ-ŋai dí pà kɔ̂i dípɔi, dí zinâai kélee tòli díkîe ma, núu-ŋûnu da núu-pɔ̂lɔ nyii-ŋai pɔri-mâa è kɛ̀ dîɛ a gɛɛ dí kɔ́ kɔ́i, dí dítòli dí dítɛɛ goyaŋ perei ma.

²² Tãi dí dímu sìɣe la a bôlu ma ɣele-wala pɛpɛi, vóloi è kɛ̀ toôi ǹyái ŋá. Môa-ƃelai kɛ̀ ǹyái pôlui, ǹyái ŋɛ́i è kɛ̀ a gbɔlɔɔ dí ŋɛ́i yɛ̂ɛ ŋãa.

²³ Dí mò dîyɛɛi, “Ŋãa ká tí. Tãi da gâloŋ-ŋai tí dí namu kɔ̀ díkîe-ni loai dí díkîe-ni paa. Môa-ƃela, kwa nâa lí díƃûui su kwáa díyee ŋá sãa siɣe.”

²⁴ Kɛ́lɛ tãi Môa-ƃelai dí pà la Eezuɛ-ŋai díƃûui sui, Eezuɛ-ŋai dí dímu sìɣe dí kɔ́ dípɔ é lɛ́ɛ la zu Môa-ƃelai dí pú. Eezuɛ-ŋai dí pɛ̀lɛ dí kpɛ́ɛ ma dí kɛ́ lì a dípaa.

²⁵ Dí dítaa-lêe-ŋai su kàra. Kpakolo tɛi-tɛi kélee dí lɛ̀ɛ kɔni pilîi díkpâlaŋ lɛ́lɛɛ-ŋai ŋá é lɛ́ɛ la zu dí gélee mɛi pɛ́lɛ. Dí dɛ̀ɛ-ya-ŋai kélee kɛ̀ dí kpéra ɣilînii dí mƃá-wûru lɛ́lɛɛ-ŋai kélee pɔ́ŋ. Môa taa-lee kɛ́tɛi, Kîɛ Arisa nɔ́ ƃé lɛ̀ɛ dífe zu kara ní kɛ́lɛ kpakolo da-ni nyii-ŋai vûma-ŋa díkɛ̀ díyêei, dí tìnaŋ naa ma a kɔ́ máŋ.

²⁶ Tãi Môa Kaloŋ è gàa la a gɛɛ gɔ́i è kɛ̀ ǹyée mɛi ɣâlei, è ƃóa sɔ̂kpɔ kɔ̀ kɔ́-ƃela ŋuŋ lɔ́ɔlu mɛi feerɛ sìɣe a gɛɛ dí tɛ́ɛ ŋɔkpɔara-ƃelai sáma a kîrɛ dí lí Idɔŋ kaloŋ pɔ́ naa, kɛ́lɛ dífe pɔri ní tɛɛ̂i.

²⁷ Nya ƃe Môa Kaloŋ è ǹóŋ-surɔŋ maa-ŋuŋ sìɣe nyii maa nɛ̃ɛ̂i kɛ̀ é lɛ́ɛ bɔ́ɔ ŋá a kâloŋ, é gúla a sâla daa-lêe kɛ́tɛi ŋɔgalai ma. Tãi Eezuɛ-ŋai dí nyíŋi kàa lai, dílaa è kpàla dîa. Dí kùla naa dí pene pôlu díkpɔɔi lɔii su.