Tɔɔɓɛlaa veelɛ 21 - Bible

Dí Manasɛ kɛ̀ a kâloŋ Zuda

¹ Manasɛ è kɛ̀ a kóraŋ puu káo feerɛ tãi è pɛ̀lɛ gâloŋ-laai kɛ̂i la Zuda lɔii sui. Manasɛi ŋí ǹee láa ƃé kɛ̀ a Ɛziba. Manasɛ è kɛ̀ gâloŋ-laai su a kóraŋ buu lɔ́ɔlu káo lɔ́ɔlu. Zeɛ́ɛ è kɛ̀ Zerusâlɛŋ taa-leei su.

² Manasɛ è Yâwɛɛ wóo pìli a bîlaŋɔɔ mɛni nyɔ́mɔɔ-ŋai kɛ́ɛ pôlu nyii ǹɔii-ŋûŋ-ŋai dí kɛ̀ gɛ̂i Yâwɛɛ kɛ́ díkpɛ̀ Eezuɛ ŋɛ́i-tuɛi.

³ È ŋâla-pɔkɔɔŋ fɛli-kwaa-ŋai ma tɔ̀ɔ pôlu ƃɛ́i-ŋai ǹâŋ Gâloŋ Ɛsekaya è dísu kàrai. È Ɣâla-teƃele-ŋa kpɛ̀tɛ Bêe ɣâla-pɔkɔɔŋ mɛni ma, ǹyaŋ è wúru kôya kpɛ̀tɛ máŋ ŋâla-pɔkɔɔŋ Asira laai mɛni ma yɛ̂ɛ berei Eezuɛ kaloŋ Eɣa è wɔ́lɔ gɛ̀ lai. È kɛ̀ bɛ̂mɛlɛŋ-kao-ŋai fɛlîi máŋ.

⁴ È Ɣâla-pɔkɔɔŋ fɛli têƃele-ŋa kpɛ̀tɛ ŋâla-pɛrɛ kɛ́tɛi mu, ƃɛ́i Yâwɛɛ è mò a gɛɛ naa ƃé fɛ̂ɛ ǹûai dí vɛli naai.

⁵ Manasɛ è ɣâla-pɔkɔŋ-ŋa fɛli têƃele-ŋa kpɛ̀tɛ bɛ̂mɛlɛŋ-kao-ŋai fɛli mɛni ma ŋâla-pɛrɛ kɛ́tɛi banaŋ ma méla veerɛ ma.

⁶ Manasɛ è kɛ̀ a póniŋ da wúlu-kɛ-nuu kɛ́tɛ. A kâa lì tɛli-kpɛ-ƃela pɔ́ tɛli kpɛ̂i da tuɛ-mɛni ƃó-ƃela. È ǹóŋ-surɔŋ kùla a kéreŋ sala. È mɛni nyɔ́mɔɔ támaa kɛ̀. È gɛ̀ Yâwɛɛ líi é wána kpɔ́ ma a zu kɛ́tɛ.

⁷ Yâwɛɛ è wɔ́lɔ mò gâloŋ Deeƃé da ǹóŋ Saloma ma, “Ŋâla-pɛrɛ Kɛ́tɛi ŋí mu da Zerusâlɛŋ taa-leei su ƃé ŋa dí síɣe zu Eezuɛ lɔii kélee su a gɛɛ ŋa ŋ̀wɛ̂lii ǹûai kélee díkɛ ḿvɛlîi naa. Naa káa a ŋ́gbɔɔi pɔ̀ɔ. Ńaa a pâi kɛ̂i naa ma ǹyaŋ naa ƃé da pâi kɛ̂i ḿvɛlîi naa wɔ́lɔ-wɔlɔ da wɔ́lɔ-wɔlɔ. Ŋ̀âla-pɛrɛi ŋí mu ƃé Manasɛ è ŋ̀úru kôyai tɔ̀ɔ naa ŋ̀âla-pɔkɔɔŋ Asira fɛli mɛni ma.”

⁸ Yâwɛɛ è ŋɔ́nɔ mò ǹyɛɛi, “À kɛ̀ Eezuɛ-ƃela da pâi m̀ɛnii kélee kɛ̂i dí dɔ̂ŋ-ŋai kélee káa ŋá dɛ̀ɛ ŋátii-kɛ-nuui Mose pɔ́ é dɛɛ dípɔi, gɛ̀ ní, fé pâi nɛɛ̂i naa nûa dí díkpɛ ǹɔii ŋí ma nyii ŋá wɔ́lɔ dɛ̀ɛ dínuu pɔlɔ-ŋai pɔi.”

⁹ Kɛ́lɛ Zuda-ƃelai dífe díwoli tɔɔ ní Yáawɛ wóo ma. Manasɛ ƃé dí díwoli tɔ̀ɔ ma. È gɛ̀ da dîa-ni dí sɔnyɔ̂ŋ-ŋa kɛ́ a zu kɛ́tɛ é tɛ́ɛ ǹɔii-ŋuŋ da kpɛ́ni-ŋai dîa nyii-ŋai Yâwɛɛ è díkpɛ̀ ǹɔii ma a tãi ŋɔnûai dí kɛ̀ pâi la a gɛɛ dí sée naai.

¹⁰ Ɣele tɔnɔ ta Yâwɛɛ è mò ŋɔlóno-kɛ-ƃelai da-ni dîa ǹyɛɛi,

¹¹ “Gâloŋ Manasɛ a mɛni maa liƃiɛɛ támaa kɛ́ a tɛɛ Amora-ŋai dîa nyii-ŋai ǹɔii su dítuɛi. Ǹyaŋ ŋánûai da pîlaŋ gɔ́ɔ pɔ̂ɔi da sɔnyɔ̂ŋ kɛ́ a ńyãa a ŋɔɣâla-pɔkɔŋ-ŋai fɛliɛɛ.

¹² Ńyãa Yâwɛɛ, Eezuɛ Ŋɔɣâlai, ŋa pâi nâa Zerusâlɛŋ da Zuda su karâi! Nûa da pâi duŋ mɛnii, kɛ́lɛ dífe pâi lâai la.

¹³ Zerusâlɛŋ-ƃelai sɔŋ nyɔ́mɔɔi a ŋánaa kpɔ́ nɔ́ yɛ̂ɛ berei Gâloŋ Eɣa da Sameria-ƃelai dí wɔ́lɔ kɛ̀ lai. Mɛni ma, ŋa pâi Zerusâlɛŋ-ƃelai su-karai yɛ̂ɛ berei ŋa wɔ́lɔ gɛ̀ la a Sameria-ƃelai, ŋá naa kɔɔ yɛ̂ɛ núu a kawúlu wàa é zu kɔ̀ɔ, é bene é bɛlɛ a gɛɛ ma é kpála a ǹɛ́lɛɛ.

¹⁴ Ŋa pâi ńyãa fêi kpîŋ ŋánûai dîɛ nyii-ŋai pâi lɛɛ̂i a dífulu. Ŋa pâi dí tɛɛ̂i díkpɔara-ƃelai pɔ́ nyii-ŋai pâi díyee mɛi ɣâlei dí dílɔii su sãa kélee síɣe.

¹⁵ Ŋa pâi nyíŋi kɛ̂i a ŋánûai kpɛ́ni fêi, da sɔnyɔ̂ŋ kɛ́ a ńyãa é síɣe tãi ma dínûa pɔlɔ-ŋai dí kùla la Ize lɔii su é tóo sâai ŋí ma.”

¹⁶ É kúla nyíti-ŋai kélee pôlu, Manasɛ è núu támaa pàa nyii-ŋai dísɔŋ fé kɛ́ ní zu. Ǹûai ŋí díkɛ̀ kpɔ́ a dí támaa a sɛŋ dí ŋãa kpôloŋ kɛ́ tɛ̀ɛ Zerusâlɛŋ taa-leei su, é síɣe daai ƃéla tɔnɔ ma é tóo gbéli ma. Zuda-ƃelai dí pìlaŋ gɔ́ɔ pɔ̂ɔi dísɔnyɔ̂ŋ kɛ́, dí Yâwɛɛ wóo píli. Vé fáa ní ma a gɛɛ diai dísɔŋ fé dîai é dí maa-kɔ̃ɔ.

¹⁷ Mɛni-ŋai kélee Manasɛ è gɛ̀ a tãi è kɛ̀ la a kâloŋ Zuda lɔii mɛi, zɔnyɔ̂ŋ-ŋai è dí kɛ̀ a maa-pɔlɔ-pɔlɔi, gélee pɔ̃yɛ̂i Zuda kaloŋ-ŋai dí mɛni-pɔ̂lɔ kɔlɔi su.

¹⁸ Gâloŋ Manasɛ è sàa dí nòo Uza Suai su ŋɔkâloŋ-pɛrɛ kɛ́tɛi kɔlɛ ma. Naa pôlu ma, dí ǹóŋ-surɔŋ Amɔ kɛ̀ a kâloŋ bɔ́ɔ ŋá.

Dí Amɔ kɛ̀ a Kâloŋ Zuda

¹⁹ Amɔ è kɛ̀ a kóraŋ buu feerɛ káo feerɛ tãi dí gɛ̀ la a kâloŋ Zuda. Zeɛ́ɛ è kɛ̀ Zerusâlɛŋ taa-leei su. È kɛ̀ gâloŋ laai su a kóraŋ feerɛ. Ǹee láa ƃé kɛ̀ a Misulɛmɛ nyii kɛ̀ a Zoba-nuui Aru ǹóŋ-nɛnii.

²⁰ Amɔ è Yâwɛɛ wóo pìli kpɔ́ nɔ́ yɛ̂ɛ berei ǹâŋ Manasɛ è wɔ́lɔ gɛ̀ lai.

²¹ Gâloŋ Amɔ è wɔ́lɔ kɛ̀ ŋ̀âla pɔkɔɔŋ-ŋai fɛlîi nyii-ŋai Manasɛ è díkpɛ̀tɛ gɛ́ dí fɛ̀lii.

²² Laa-la fé kɛ́ ní ǹyêei é pîlaŋ Yâwɛɛ ma, Ŋâlai nyii ǹâŋ pɔlɔ-ŋai dí wɔ́lɔ kɛ̀ vɛlîi.

²³ Amɔ ŋɔgɔmɛnɛi su-ƃela kpaya-kpayai da-ni dí wɔ́lɔ tɔ̀ɔ ma. Dí pɛ̀lɛ ma ŋɔkâloŋ pɛrɛ kɛ́tɛi mu dí baa.

²⁴ Zuda-ƃelai dí ǹûai kélee pàa nyii-ŋai Gâloŋ Amɔ paai. Nyíti pôlu ma, ǹûai dí ǹóŋ-surɔŋ Zosâya kɛ̀ a kâloŋ bɔ́ɔ ŋá.

²⁵ Mɛni-ŋai kélee Gâloŋ Amɔ è gɛ̀ a tãi è kɛ̀ la a kâloŋ, gélee pɔ̃yɛ̂i Zuda kaloŋ-ŋai dímɛni pɔ̂lɔ kɔlɔi su.

²⁶ Dí Gâloŋ Amɔ poma lòo Uru Suai su ŋɔkâloŋ-pɛrɛ kɛ́tɛi kɔlɛ.