Zɔ̂ŋ Veerɛi 1 - Bible

Laa-ti-maa

¹ Ńyãai ŋ́gaa a núu-pɔlɔi, ŋa kɔlɔ pɔ̃yɛ̂i ǹɛnîi pɔ́ naa nyíi Ɣâla è nɛ̀i da ǹônii, nyíi-ŋai ŋá díwɛli ní dɔ̃yâi sui. Ńyãa tɔnɔ nɔ́ fêi, kɛ́lɛ ǹûai kélee dí dɔ̃yâi kɔ́lɔŋ, kwa dîa-ni ƃe,

² dɔ̃yâi kúkponôi mɛni ma nyíi pâi kɛ̂i kúyêei wɔlɔ-wɔlɔ da wɔlɔ-wɔlɔi.

³ Ƃɛlɛ-sêe, maloŋ kâa, da lii-sêe da pâi kɛ̂i kúyêei é kúla Ɣâla Nàŋ-nuui yêei da Zîsɛ Kôrai, Nàŋ-nuui Ǹóŋ, tɔ̃yâ da wɛli-kɛ-maa su.

Tɔ̃yâ-laa da wɛli kɛ́-maa

⁴ Ńii è nɛ̀ɛ a ŋánaa a gɛɛ ŋá ílônii da-ni káa díkɛ pîlaŋ dɔ̃yâi pôlu, yɛ̂ɛ berei nɔ́ Nàŋ-nuui è mò la kûai.

⁵ Ǹɛnîi, ŋa íkpera fêi, vé yɛ̂ɛ ŋà kɛ̀ tɔ̂ŋ nina pɔ̃yɛɛ̂i yɛ̂, kɛ́lɛ, gáa a dɔ̂ŋ pɔlɔi kú zɔ̀lɔ ƃô gɔ́ɔ pîlanii, a gɛɛ kú kúkîe-ni wɛ́li.

⁶ Ŋ̀ɛli-kɛ-maa ká ŋí, a gɛɛ kú pîlaŋ ŋɔtɔ̂ŋ-ŋai pôlu. Dɔ̂ŋ ká ŋí, yɛ̂ɛ berei ká mɛ̀ni la a gɔ́ɔ pîlaŋ tãi, a gɛɛ ká sîa wɛli-kɛ-maa su.

⁷ Núu-pɛlɛ-ƃela támaa da lí ǹɔii sú, dia ƃa ǹûai dífa fâa Zîsɛ Kôrai pá mɛni ma núu-kpune kponôi. Ǹúu-sii-ŋai ŋí ƃe díkaa a ǹúu-pɛlɛ-ƃelai da Kôrai ŋɔtɔɔ-maa-ƃelai.

⁸ Ka kákpîŋ mɛi káa a gɛɛ zɛŋ ká maa-tii kɛ̂i káfe nàŋ, kɛ́lɛ, a gɛɛ ká m̀aa fela-féi lá fɛ́ɛ sɔlɔ ƃo.

⁹ Ǹúui kélee a lî a gbîŋ nia-perei va kɛ̂ Kôrai ŋɔsɛŋ-lɛɛi sui, Ɣâla fé maa-nuui yêei. Ǹúui gáa Kôrai ŋɔsɛŋ-lɛɛi sui, Nàŋ-nuui da Nòŋ-nuui díkaa ǹyêei.

¹⁰ À kɛ̀ núu kélee à pà kápɔ à wàla pa a zɛŋ-lɛɛi ŋí, káfe káyee sèe mù kápɔ-bɔ̂rɔŋ, kpaa máŋ káfe kála tì mà.

¹¹ Kpɛ́ni fêi, ǹúui a ǹá tì mài, a ŋɔwana-lɔ̂ɔ-tii da sɔlɔ ƃô.

Naa-kaa maa-mɛni-kpɛtɛɛi

¹² Berei máŋ mɛni támaa káa la naa a gɛɛ ŋá bɔ̃̀yɛ kápɔ naai, fé ŋ̀wɛ̂lii ŋá bɔ̃̀yɛ kɔlɔ ma, kɛ́lɛ, gáa ŋ́gili ŋá a gɛɛ ŋá pá ŋá kákaa, ku lóno kúkîe-ni pɔ́ a gɛɛ kúlii-nɛɛi láa é fɛ́ɛ.

¹³ Ísaaƃɔlɔ-nɛnii nyíi Ɣâla è ǹɛi, ǹônii dí fâa kâa.