Timote dɔlɔɔ 6 - Bible

¹ Diai kélee díkaa luɛ-laa ŋɔɣɛlii sui, tɔɔ dí dímɛi-ƃelai káa a ǹûai dí maa nɛɛ̂i a gɛ́ɛ ƃaa kɛ́-maa kélee é lí dípɔ a gɛ́ɛ Ɣâla láai da zɛŋ-lɛɛi dífe kàra.

² Luɛ-ŋa dífe ƃâa kula dímɛi-ƃelai dîa nyíi-ŋai díkaa a laa-la-ƃelai, kpɛ́ni fêi, díkaa a díƃarâa; ǹɛ́lɛɛ̂i dí tíi kɛ́ dîɛ kpɔ́ a dámaa, kpɛ́ni fêi, diai da mɛni lɛ́lɛɛ kùla dítii sui, díkaa a laa-la-ƃela da wɛli-kɛ-maa-ƃela. Díi-ŋai ŋí lɛ́ dîa í dília-woo ƃo díkɛ-mɛni ma.

Lɛ́ɛ Ɣâla-mɛni lɛ́ɛ da tɔ̃yâ tɔɔ-laa

³ À kɛ̀ núu da ŋɔsɛŋ-lɛɛi à kɛ̀ a da kpɛni, nyíi da Kúnuu-namui Zîsɛ Kôrai ŋɔtɔ̃yâ-wooi dífe ǹɛɛ ni é pɛ́lɛ zɛŋ-lɛɛi ma nyíi gáa Ɣâla-mɛni-kɛɛ ŋɔperei mai,

⁴ gɛ̀ ní maa-nuui líi kɛ́tɛ̂i, ve mɛni da kɔ́lɔŋ; a kili-ŋa-sia nyɔ́mɔɔ wɛ̂lii mare-kɛɛ mɛni ma da wóo da-ni maa-sia-toɔɔ nyíi-ŋai da pâ a tólo, laa-saa, laa-kara, da núu maa-kili-ŋa-sia nyɔ́mɔɔ,

⁵ díkɛ sîa too ǹûai sama nyíi-ŋai díkili káa kpɛni-kpɛni, dɔ̃yâi fé díyêei. Ǹûai ŋí da gàa a gɛ́ɛ Ɣâla-mɛni-kɛɛ káa a sɛŋ sɔlɔ ƃoɔ maa-pere.

⁶ É máŋ kɛ́ ti Ɣâla-mɛni-kɛɛ a lii-laa káa a sɛŋ-sɔlɔ-ƃoɔ kɛ́tɛ;

⁷ kpɛ́ni fêi, kúfe pá ní a sɛŋ da ŋ̀éniɛi ŋí su, ǹyaŋ (gáa a tɔ̃yâ) kúfa pɔri sɛŋ da kulâi ŋ̀éniɛi ŋí su ku li la;

⁸ kɛ́lɛ, à kɛ̀ mii-sɛŋ káa kúyêei da seɣe kúlii a pâi lâai.

⁹ Kɛ́lɛ, diai da tɔɔ-laa wɛ́li kɛ̀i, da pîli yee-laa-maa su, díkɛ pîli ƃáre ŋá, díkɛ pîli ƃoo-mɛni-wɛliɛ támaa su da sɛŋ-soli maa-mɛni nyíi-ŋai da núu su kàrai.

¹⁰ Kpɛ́ni fêi, sɛŋ-kao wɛ́liɛɛ káa a sɔnyɔŋ-sii kélee ŋɔsame; zɛŋ-wɛli-sii ŋí ƃa gɛ́ núu da-ni da kula naa-lai ma, maloŋ-mɛni támaa a dílii-ŋai láa fɛ́ɛ.

Naa-lai maa-namu lɛ́lɛɛi

¹¹ Kɛ́lɛ, à kɛ̀ a yái íkaa a Ɣâla ŋɔnúui, tée nyíŋi kélee ma; kɔ́ a gɛ́ɛ í kɛ́ a tɔ̃yâ-nuu, í kɛ́ a Ɣâla-mɛni kɛ́-nuu, laa-la é kɛ́ íyeêi, wɛli-kɛ-maa, fɔlɔ-fɔlɔ, da sɔŋ-lɛlɛ-laa.

¹² Namu lɛ́lɛɛ kɔ́ naa-lai mɛni ma; ŋwɔlɔ-wɔlɔ fulu-laai sóŋ a gbanaŋɔɔ nyíi Ɣâla e ítòli ma tãi í ílaa-lai maa-mɛni ƃò la a ǹɛ́lɛɛ sere támaa ŋɛi.

^13-14 Ŋa m̀ôi yâ Ɣâla ŋɛi nyíi a fulu-laa tɛ̀ɛ sɛŋ kélee pɔi, da Zîsɛ Kôrai nyíi ŋɔsêre-faa-kɛɛ su, e ŋɔlaa-lai maa-mɛni ƃò a ǹɛ́lɛɛ Pɔ̃ŋtiɛ Pâle ŋɛi, a gɛ́ɛ í dɔ̂ŋ mɛi káa ífe pɔ́ɔ kɛ̀ ma. Gɛ́ é kɛ́ a maa waa nûa ŋɛi é lɛ́ɛ la zu Kúnuu-namui Zîsɛ Kôrai é pá.

¹⁵ Ɣâla, nyíi lûwa káa mai, a pâi Zîsɛ Kôrai pá-mɛni ƃôi a tãi lɛ́lɛɛi. Ŋ̀âlai ŋí nɔ́ ƃé gáa a sɛŋ kélee Mɛi-nuu, gɛ ƃo a kâloŋ-ŋa kélee Mɛi-kaloŋ. Gáa a nuu-namu kélee Mɛi-nuu.

¹⁶ Ɣâla ǹyaa tɔnɔ nɔ́ ƃe va sâa, gáa gwaa-ponoɔi su, nyíi núu fa lɛ̂ɣɛ gɔlɛi. Núu da fé niî Ɣâla káa ní, kpaa máŋ núu da fa pɔri gâai. Bàa-kɛ-maa é lí bɔ é kɛ́ sɛŋ kélee mɛi wɔlɔ-wɔlɔ da wɔlɔ-wɔlɔ. É kɛ́ ti.

¹⁷ À kɛ̀ a ŋ̀éniɛi ŋí su tɔɔ-ƃelai, m̀ó dîa a gɛ́ɛ dífe yoŋka tèe, kpaa máŋ dífe díkili-kɛ-zui pu tɔɔ-sãa dîa, nyíi-ŋai núu fa gíli pu dîai, kɛ́lɛ, dí díkili-kɛ-zui pú Ɣâla ma nyíi a sɛŋ kélee tɛ̀ɛ kúpɔ a zu-kɛtɛ a gɛ́ɛ ku kúnîa kɛ́ a diai.

¹⁸ Fɛ̂ɛ dí mɛni lɛ́lɛɛ kɛ́, dí kɛ́ a tɔɔ-ƃela tua-pere lɛ́lɛɛ su, díyee é kɛ́ a vuaŋɔɔ dîa sɛŋ kɔlɛɛ su.

¹⁹ Dà gɛ̀ ti, gɛ̀ ní díkaa díkpîŋ kpɛtɛ̂i tínaa tuɛ-pere mɛni ma a gɛ́ɛ dí vulu-laai sóŋ a gbanaŋɔɔ nyíi gáa a fulu-laa kpíŋ.

Pɔ̂ɔ è mɛnii gbɛɛ ŋái ƃò Temete ma

²⁰ Óo Temete, zɛŋ dí nɛ̀ɛ íyeêi, m̀ɛi káa. Ƃoo-lono nyíi maa fé waa ni, ísu kula ma, da sîa-mɛnii nyíi da dòli a táre lɛ́ɛ-perei sui,

²¹ kpɛ́ni fêi, núu da-ni dí dáre-sii ŋí siɣe a tɔ̃yâ, ǹyaŋ da fɛɣɛ naa-lai mu. Ƃɛlɛ-sêe é kɛ́ káa.