Timote dɔlɔɔ 2 - Bible

Pɔ̂ɔ è Ɣâla-fɛli-pere lɛ̀

¹ Maa-ŋuŋ ŋa m̀ôi a gɛ́ɛ sɛŋ maa-mare-kɛɛ kɛ́ɛ, Ɣâla-fɛliɛ, da sɛɣɛi-féi é kɛ́ núu kélee mɛni ma.

² É kɛ́ kâloŋ ŋa mɛni ma da ǹúu-mɛi-ƃelai kélee a gɛ́ɛ ku kúfulu-laai kɛ́ maa-yeŋ pere su da lii-sêe, ku Ɣâla líi láa, ƃaa kɛ́-maa é kɛ́ kúyêei pere-sii kélee su.

³ Nyíŋi lɛ́lɛɛ̂i, ǹyaŋ gɛ ƃo a lii-laa Kúƃalo-nuui Ɣâla ŋɛi,

⁴ nyíi ŋ̀wɛ̂lii a gɛ́ɛ núu kélee é ƃálo dí dɔ̃yâi maa-tare kɔ́lɔŋ.

⁵ Kpɛ́ni fêi, Ɣâla káa nɔ́ tɔnɔɔ, ǹyaŋ nuu-loai-nuu tɔnɔ nɔ́ ƃe naa nyíi gáa Ɣâla loai da núu-kpunei. Maa-nuui ƃa Zîsɛ Kôrai,

⁶ nyíi gbîŋ tɛ̀ɛ a núu kélee maa-tee-nuui, ǹyaŋ dí nyíŋi m̀aa sêre-faa kɛ̀ tãi ma.

⁷ Dí ńɛ̀ a Ɣâla-woo ƃo-nuu da sia-nuu nyíŋi mɛni ma (ŋa dɔ̃yâi ƃôi, fé lɛ́ɛ kɛ̂i), dí ńɛ̀ a Zɛ̃tai-ŋai dísɛŋ-lɛ-nuu laa-la su da tɔ̃yâ.

⁸ M̀ɛni ma ŋa ŋ̀wɛ̂lii fɛ̂ɛ núu kélee dí Ɣâla fɛli kwaa kélee ma dí díyee maa waa-ŋai tɛ́ ɣelêi dífe dílii ŋwàna, kpaa máŋ dífe laa-sâa kɛ̀;

⁹ a gɛ́ɛ máŋ fɛ̂ɛ ǹɛyâai dí dímaa ɣíri ƃaa kɛ́-maa-pere su da táre a zeɣe-ŋai nyíi-ŋai dísɔ̃ɔ fé kpanaŋ ni, dífe díŋuŋ lâa dí gôo too dîa, kpaa máŋ kɔyɛ̂ŋ-mɛni kpanaŋɔɔ, kpaa máŋ seɣe sɔ̃ɔ kpanaŋɔɔ,

¹⁰ kɛ́lɛ, fɛ̂ɛ dí mɛni lɛ́lɛɛ kɛ́ nyíi ǹɛ́lɛɛ̂i nɛyâa mɛni ma nyíi-ŋai da díkpîŋ tòli a Ɣâla-ƃelai.

¹¹ Nɛnî à kɛ̀ sɛŋ maa kɔ̂rii, fɛ̂ɛ é m̀ɛi sáa maa-yeŋ pere-sii kélee su.

¹² Fa nɛ̀ɛ naa nɛnî é sɛŋ lɛ́, kpaa máŋ wála-wala é kɛ́ ǹyêei sinâa mɛi; gáa a sɛŋ é m̀ɛi sáa.

¹³ Kpɛ́ni fêi, dí Adaŋ kpɛ̀tɛ a maa-ŋuŋ, naa pôlu ma dí Iî kpɛtɛ;

¹⁴ ǹyaŋ Sêtɔŋ fé Adaŋ pɛlɛ ni, kɛ́lɛ, e ǹɛnîi pɛ̂lɛ, ǹɛnîi é kɛ́ a tɔŋ-karaa-nuu.

¹⁵ E máŋ kɛ́ ti, à kɛ̀ nɛnî à kɛ̀ nɔ́ laa-la su, wɛli-kɛ-maa, da maa-waa-laa é pɛ́lɛ ƃaa kɛ́-maa ma, gɛ̀ ní a pâi ƃálôi tãi a kɛ̂ lóŋ maa sɔlɔ ƃôi lai.