Tɛsalonikə dɔlɔɔ 1 - Bible

Laa-ti-maa

¹ Pɔ̂ɔ da Seveenɔ é pɛ́lɛ Temete ma, Tɛsɛlonaika-ŋai díkôrai-tóli-kpɔŋ, nyíi gáa Ɣâla Ǹaŋ-nuui kponôi da Kúnuu-namui Zîsɛ Kôrai: Ƃɛlɛ-sêe da lii-sêe dí kɛ́ káyêei.

Tɛsɛlonaika-ŋai dílaa-laai da dítûa-perei

² Kwa sɛɣɛi-fei tɛ̀ɛ Ɣâla pɔ a tãi kélee kákelee ká-mɛni ma kúkɛ kálaa tòli Kúɣâla-fɛliɛɛi su a ɣele kélee.

³ Kálaa-laa-tii kɛ́ɛi a tôo kúkili ŋá Kúnâŋ Ɣâla ŋɛ́i, da káwɛli-kɛ́-maa-mɔ̃lɛ̂i é pɛ́lɛ gíli-kɛ-zui ma gáa káyêei a tãi kélee Kúnuu-namui Zîsɛ Kôrai kponôi.

⁴ Kpɛ́ni fêi, ŋánûa, káai Ɣâla è káwɛli ní, kú gɔ́lɔŋ a gɛ́ɛ a kálɛ,

⁵ kpɛ́ni fêi, kútuŋ lɛ́lɛɛi fé pá ní nɔ́ kápɔ lóno-wôo su, kɛ́lɛ, è pà máŋ kápɔ wála-wâla-laa su da M̀ɔlêŋ Maa Waai é pɛ́lɛ Laa-laa kpanaŋɔɔ ma. Ká gɔ́lɔŋ ǹûai ku kúkpîŋ lɛ̀ kásama a gɛ́ɛ kúkaa la kámɛni mai.

⁶ Ǹyaŋ ká kɛ̀ a kúpɔkɔŋ-ƃela da Kúnuu-namui, kpɛ́ni fêi, ka ŋ̀óoi sɔlɔ ƃo mɛni-kpɔ̂lu támaa su a lii-nɛ̃ɛ nyíi M̀ɔlêŋ Maa Waai e bu kákponôi;

⁷ ǹyaŋ ka kɛ́ nâa a mɛni-kɔɔŋ maa-ƃela naa-laa-ƃelai kélee mɛni ma nyíi-ŋai díkaa Masadonia da Ɛkeyai.

⁸ Kpɛ́-ni fei, Masadonia da Ɛkeya dífe Kúnuu-namui ŋɔwóoi mɛni ni nɔ́ kásârai, kɛ́lɛ, naa-laai gáa káyêei Ɣâla kponôi a lí kwaa kélee a sɛŋ nyíi maa fe nɛ̃ɛ ni ku lóno é pîlaŋ mai.

⁹ Kpɛ́ni fêi, berei ka káyee sèe la kúmu a ǹɛ́lɛɛi dia kpîŋ dí m̀ɛni ƃò da berei ka káyee kùla la ɣâla-pɔɔkɔŋ-ŋa maa-mɛnii su ka tinaŋ dɔ̃yâ-Ɣalai da vulu-laa-Ɣalai pɔ́pere a gɛ́ɛ ka tíi kɛ́ mì,

¹⁰ e pɛlɛ berei ma ka Ǹóŋ maa kpɛ̂ŋ la nyíi kùla Ɣâla-taai. Ɣâla e m̀u siɣe saa yêei. Gáa a Zîsɛ nyíi kúkùla Ɣâla ŋɔlii-ŋwanai su nyíi pâi.