Samuɛlə dɔlɔɔ 9 - Bible

Sɔ̂ɔ è Samia kàa

¹ Tɔɔ naloŋ tɔnɔ è kɛ̀ naa, ǹáa ƃé kɛ̀ a Keesi. Ǹalôŋ ŋí è kɛ̀ a Bɛŋsima ŋɔsuui su nuui da. Ǹâŋ ŋɔnaŋ láa ƃé kɛ̀ a Abiɛɛ. Ǹâŋ ŋɔnaŋ láa ƃé kɛ̀ a Zɛɛlɔ, ǹâŋ ŋɔnaŋ-ŋɔnaŋ láa kɛ́ ƃò a Bɛɛkora. Bɛɛkora ǹyaŋ ŋɔnaŋ láa ƃé kɛ̀ a Afia.

² Keesi ǹóŋ surɔŋ láa ƃé kɛ̀ a Sɔ̂ɔ. Sɔ̂ɔ è kɛ̀ a ǹɛ́lɛɛ kpɔ́, mu siɣeɛɛ é tɛ́ɛ Eezuɛ-ŋai kélee dîa.

³ Soo-fáleŋ-ŋa dí kɛ̀ Keesi yêei. Zoo-faleŋ-ŋai ŋí dí pù a ɣele tɔnɔ da. Gɛ́ɛ tii, Keesi è mò Sɔ̂ɔ ma ǹyɛɛi, “Díi kɛ́-nuui dɔnɔ siɣe ká ǹyaa ká lí ká zoo-faleŋ-ŋai kɔ́ri.”

⁴ Sɔ̂ɔ da díi kɛ́-nuui dí sìa kpɔ́ dí tɛ́ɛ Ifiraŋ yee lɔii da Salisa lɔii kpiniŋ su. Kɛ́lɛ dífe zoo-faleŋ-ŋai káa ní. Dí lì dí tɛ́ɛ Salaaŋ da Bɛŋsima lɔii kpiniŋ-ŋai su, dífe dímaa tuŋ dɔnɔ da mɛni ní naa.

⁵ Naa kɛ́ɛ tíi dí lì ǹɔii kpiniŋ su nyíi Zɔfu-ŋai díkɛ naai. Sɔ̂ɔ ǹyɛɛ m̀ai, “Kú lí pôlu. À kɛ̀ kwà wàla lí pôlu, ńâŋ a pâi niâi zoo-faleŋ-ŋai mɛni ma é pɛ́lɛ gíli ŋá siâi kúmɛni ma!”

⁶ Díi kɛ́-nuui è Sɔ̂ɔ wóo su tòo ǹyɛɛi, “Tɔɔ tí! Ɣâla-nuu tɔnɔ káa daai ŋí su kúkɔlɛ ma ƃɛ́. Ǹûai kélee da ƃaa kɛ́-maa tɛ̀ɛ bɔ́, kpɛ́ni fêi, m̀ɛnii kélee a m̀òi gáa a tɔ̃yâ. Kú lí kú lóno bɔ́. Ɣele da a pâi ƃɛ́i lɛɛ̂i kwa pɔri naa kâai zoo-faleŋ-ŋai mɛni mai.”

⁷ Sɔ̂ɔ ǹyɛɛ m̀ai, “Kwa pɔri lônoi léŋ Ɣâla ŋɔlóno kɛ́-nuui pɔ́, ǹyaŋ sɛŋ da fé kúyêei kú dɛɛ bɔ́? Kpólo da fé kúƃɔrɔi su. Lé ƃé kwa pɔri dɛɛ̂i bɔ́i?”

⁸ Díi kɛ́-nuui ǹyɛɛ m̀ai, “Káne kpua loŋ káa ńyêei, kwa pɔri dɛɛ̂i bɔ́, ǹyaŋ a pâi ƃɛ́i lɛ̂i kûa zoo-faleŋ-ŋai díkaa naai.”

⁹ Sɔ̂ɔ ǹyɛɛ m̀ai, “Mɛni lɛ́lɛɛ ká tí. Kú lí ǹalôŋ pɔ́-naa a mɛni-ŋa naa kàa zĩa sui.”

¹⁰ Sɔ̂ɔ è mò tí, kpɛ́ni fêi, ŋ̀ele-ŋai tí su Ɣâla a kâa mare kɛ̂ɛ-ŋa su-kulâi kàa zĩ̂a su Ɣâla ŋɔlóno kɛ́-ƃelai dîɛ.

¹¹ Díkɛɛ ǹyéei tɛ̂i díkɛ lì daai sui, dí nɛnî kpela-ŋa kàa dí kɛ̀ lì yá kɔɔ̂i. Zinaa feerɛi ŋí dí dímarê kɛ̀ dîyɛɛi, “Kwa nalôŋ kɔ̂rii nyíi a mɛni-ŋa naa kàa zĩ̂a. Gáa daai ŋí su?”

¹² Dîyɛɛ dîai, “Owoei, gáa naa. Gáa daai su, kpɛ́ni fêi, díkaa sâa pâi sâla kulâi naa Ŋ̀âla maa waa fɛli kwaai ma. Gáa nɔ́ kátuɛ lônii ma. Ka sia a maa félaa

¹³ ka pâi gâai nɔ́ galai la daai su. Gáa naa berei ma gɛ́ lì ŋ̀âla fɛli kwaai ma a gɛ́ɛ dí dílaa mii da dîai dí ƃɛlɛ-toli ƃò a dîai. Dífe pâi niî dílaa miî fɛ̂ɛ é Ɣâla fɛli niî m̀ii-sɛŋ mɛi. A kɛ̀ ka lì ka pâi gâai lônii ma.”

¹⁴ Díkɛɛ tɛɛ̂i galai lái, dí Samia kàa gɛ́ nâa lì ƃɛ́i da Ɣâla fɛlii naai.

¹⁵ Ǹuu-namui è lòno Samia pɔ́ a Sɔ̂ɔ páa maa tûa ɣele ǹyɛɛi,

¹⁶ “Ŋaâ gáa berei ŋánûai da mɔ̃lɛi lai. Ŋaâ díwoo mɛni berei da kpɔŋ ḿâa wɛ̂lii lai. Tínaa ɣele à kɛ̀ ŋí, ŋa pâi naloŋ tɔnɔ tɛɛ̂i nyíi pâi kulâi Bɛŋsima ŋɔsuui su. A pâi ŋánûai ŋuŋ ma ƃôi é díkula Felesia-ŋai yée mu. Ŋa ŋ̀wɛ̂lii í ɔle wulɔ pú ŋ̀ûa é nɛ́ a gɛ́ɛ ǹyaa ƃé pâi kɛ̂i a dílaa túɛ-nuu.”

¹⁷ Samia kɛ́ɛ a Sɔ̂ɔ káai, Ǹuu-namui è mò ma ǹyɛɛi, “Ǹalôŋ ká ŋí ŋá kɛ̀ lônoi ípɔ é pîlaŋ m̀ai. Ǹya ƃa nuui pâi kɛ̂i Eezuɛ-ŋai mɛi.”

¹⁸ Sɔ̂ɔ è Samia kàa galai lá ǹyɛɛ m̀ai, “Nalôŋ tɔnɔ káa ƃɛ́ daai ŋí su nyíi a zĩ̂a kàa, ya pɔri ŋɔpɛ́rɛi lá pere lɛ̂i ḿâ?”

¹⁹ Samia ǹyɛɛ m̀ai, “Ńyãa ƃa m̀aa nuui. Lí ƃɛ́i da Ɣâla fɛli naai. Kwa yá kwa pâi kúlaa miî sâa gîe ma. Tínaa ɣele wâla, ŋa pâi ímarê kɛ̂ɛi su toôi.

²⁰ Ífe íkili ŋá sia é pílaŋ ísoo-fáleŋ-ŋai mɛni ma nyíi-ŋai làŋ fólo kûu saaƃa tɛɛ pôlu mai. Daâ díkaa. Sɛŋ nyíi kélee maa mɛni kpanaŋɔɔi Eezuɛi gáa nâa a ípɔɔ ka ínûai.”

²¹ Nya ƃe Sɔ̂ɔ è Samia marê kɛ̀ ǹyɛɛ m̀ai, “Ya mɛnii ŋí ƃôi ma lé mɛni ma? Ŋá kùla Bɛŋsima ŋɔsuui su. Kúa ƃa ǹúu suui guro-tei su-ƃela Eezuɛ-ŋai nuu suui sáma. Ŋánûai maa mɛni fé kpanaŋ ní ǹúu suu-ŋai sáma.”

²² Nya ƃe Samia è Sɔ̂ɔ da ŋɔtíi kɛ́-nuui sìɣe é lí a dia ǹaa mii kwaai ma ŋ̀âla fɛli kwaai ma. Núu kɛ́ɛ yɛ̂ɛ núu buu saaƃa ƃé kɛ̀ naa díkɛ dílaa mii. Kɛ́lɛ Samia è Sɔ̂ɔ da ŋɔtíi kɛ́-nuui seêi kùla ƃaa kɛ́-maa kwaa ma.

²³ Samia è mò mii-sɛŋ kpɛtɛ-nuui ma ǹyɛɛi, “Ŋá sua kpûa lɛ́lɛɛ tɛ̀ɛ ípɔ ŋá m̀ó yâ a gɛ́ɛ ízeêi kɛ́ íkɔlɛ ma. Pá la.”

²⁴ M̀ii-sɛŋ kpɛtɛ-nuui è zuai siɣe é pá la é zèe Sɔ̂ɔ ŋɛ́i túɛ. Samia ǹyɛɛ m̀ai, “Ípɔɔ ká ŋí, ye mii. Ŋá zuai ŋí seêi kɛ̀ ímaa mɛni ma. Ŋá ƃɛlɛ toli ƃò a ǹûai ŋí a gɛ́ɛ ka dîa-ni ká kálaa míi gîe ma.” Sɔ̂ɔ da Samia-ni kpɛ́ɛ a dílaa miɛɛi,

²⁵ dí lì pôlu daai su dí kúla ŋ̀âla fɛli kwaai ma. Dí Sɔ̂ɔ lâai kùla gbìŋ ŋá Samia ŋɔpɛ́rɛi ŋ̀elei pere.

²⁶ Nya ƃe Sɔ̂ɔ è nyíi naa. Gɛ́ɛ ɣele a ƃɔi, Samia è Sɔ̂ɔ tòli nyíi kɛ̀ bɛ̂rɛi tôŋ su ǹyɛɛ m̀ai, “Tãi aâ seri a gɛ́ɛ í ímu siɣe. Ŋa ŋ̀wɛ̂lii a gɛ́ɛ ŋá lí ŋá ítɔɔ perêi.” Nya ƃe Sɔ̂ɔ è mù sìɣe da Samia dí lì a gîe.

Samia è wúlɔ pù Sɔ̂ɔ ŋûa

²⁷ Díkɛɛ pâi serîi berei ŋuŋ lái, Samia è kpèra é tɔ́ɔ ǹyɛɛ Sɔ̂ɔ mai, “Tɔɔ ítii kɛ́-nuui é tɛ́ɛ tuɛ-pere. Ye lɛɛ pôlu a da-loŋ, gɛ̀ ní ŋa pâi m̀ɛnii ƃôi yâ Ɣâla è mò ḿâi.”