Samuɛlə dɔlɔɔ 7 - Bible

¹ Kiria-Zeriŋ-ƃelai dí pà dí Ǹuu-namui Ŋɔkono-tee Gãlai síɣe dí lí la Abinada ŋɔpɛ́rɛi la ǹyeei ma. Nya ƃe dí díyee pɛ̀lɛ Abinada ǹóŋ Ilieaza ŋûa dí ŋ̀ɛ́i lɛ́ɛ Ǹuu-namui Ŋɔkono-tee Gãlai ma.

Samia káa Eezuɛ-ŋai mɛi

² Ǹuu-namui Ŋɔkono-tee Gãlai è gɛ̀ Kiria-Zeriŋ a kóraŋ buu feerɛ. Tãi tí yée mu, lii too pôlu támaa è kɛ̀ Eezuɛ-ƃelai dîa. Dí Ǹuu-namui fɛ̀li a gɛ́ɛ é kpɔŋ ḿâa tɛɛ dí pɔ́.

³ Samia è mò Eezuɛ-ƃelai dîa ǹyɛɛi, “À kɛ̀ ká ŋ̀wɛ̂lii ká tínaŋ Ǹuu-namui pɔ́-naa pere, gɛ̀ ní ka ǹɛ́ ma. Ká ŋ̀âla da kpɛ́ni-ŋai kélee kúla kásama da ŋ̀âla nɛnii Atarɔ pɔɔkɔ̂ŋ. Ka tínaŋ Ǹuu-namui pɔ́-naa pere a kálii kélee ká vɛli. Gɛ̀ ní a pâi káŋuŋ ma ƃôi Felesia-ŋai yêei.”

⁴ Nya ƃe Eezuɛ-ƃelai dí dípôlu tɔ̀ɔ Bêe da Atarɔ ɣala-ŋai dîa dí tínaŋ Ǹuu-namui pɔ́-naa pere díkɛ vɛ̀li ǹyaa tɔnɔ.

⁵ Samia ǹyɛɛ diai, “Kákelee ka káŋaa tɛ́ gîe ma Mêepa, gɛ̀ ní ŋa pâi Ǹuu-namui fɛlîi kámɛni ma.”

⁶ Díkelee dí díŋaa tɛ̀ ma Mêepa Samia kɛ́ ƃò a dílaa-tuɛ nuu. Dí yá kùla ziŋ-yai su dí bú Ǹuu-namui ŋɛ́i-tuɛ a sama-sɛŋ Ǹuu-namui mɛni ma. Maa ɣelei tí núu tɔnɔ da fé mii-sɛŋ da mii ní. Nya ƃe dí mò dîɛi, “Kwa sɔnyɔ̂ŋ kɛ́ a Ǹuu-namui.”

⁷ Felesia-ŋai kɛ́ɛ da mɛni a gɛ́ɛ Eezuɛ-ƃelai díkɛ̀ Ɣâla fɛlîi Meepâi, díkâloŋ lɔ́ɔlui dí dínûai ŋáa tɛ̀ gîe ma a gɛ́ɛ dí kɔ́ pɛ́lɛ Eezuɛ-ŋai dîa. Eezuɛ-ƃelai kɛ́ɛ da mɛnii ŋí mɛ́nii, dí yào kpɔ́ a ŋ̀ánaa

⁸ dîyɛɛ Samia mai, “Ífe kpera Ɣâla fɛlîi. Ye kɛ́ Ǹuu-namui, Kúɣâlai fɛlîi a gɛ́ɛ é kúŋuŋ ma ƃó kúkula Felesia-ŋai yêei.”

⁹ Nya ƃe Samia è ƃála-loŋ sìɣe é gula Ǹuu-namui ma a kéreŋ sala. Ǹuu-namui è ǹyée sèe ŋɔɣâla fɛli wooi mu.

¹⁰ Samia kɛ́ɛ zâla-laa soŋ-nuuii kulâi, Felesia-ŋai díkɛ̀ pâi a gɛ́ɛ dí pɛ́lɛ Eezuɛ-ŋai dîa. Kɛ́lɛ Ǹuu-namui è gɛ̀ ŋ̀ele-gbana é pɛ́lɛ láɣiɛɛ a maa félaa. Felesia-ŋai dí pɛ̀lɛ yaôi ma díkɛ pù pôlu.

¹¹ Eezuɛ-ŋai dí dímu siɣe Mêepa díkɛ díkpɛ. Dí lɛɛ kpɔ́ díkpɛ̂i é lɛ́ɛ la zu dí lí ǹyéei koo-mu Bɛkaa kɔlɛ ma. Dí dí sòŋ naa, dí gélee pàa.

¹² Nya ƃe Samia è kɔni sîɣe é dɔ̀ɔ Mêepa da Sĩiŋ díloai a kili-too-ŋa, ǹyɛɛi, “Ǹuu-namui a kpɔ̀ŋ kûa a pere sîi kélee.” È ǹaa láa sèe a “Gbɔŋ-ḿâa Kɔnii.” Nyíŋi è kɛ̀ a kili too-ŋa é ǹɛ́ Eezuɛ-ŋai dîa berei Ǹuu-namui è kpɔŋ ḿâa tɛ̀ɛ la dípɔi.

¹³ É síɣe tãi tí ma é lí tuɛ-pere, Felesia-ŋai dífe ŋɔ́nɔ kɔ́ pɛ̀lɛ ní Eezuɛ-ŋai dîa, Samia kɛ́ɛ ɣele mai, kpɛ́ni fêi, Ǹuu-namui ŋɔwála-walai kɛ̀ dímɛi.

¹⁴ Daa lêe-ŋai nyíi Felesia-ŋai dí gula Eezuɛ-ŋai yêei Eezuɛ-ŋai dí gélee kùla díyêei pôlu. Daa lêe-ŋai ŋí dí kɛ̀ Ɛkulɔŋ da Gâa loai. É síɣe tãi ŋí ma, lii-see è nâa kɛ̀ Eezuɛ-ŋai da Amɔra-ŋai loai.

¹⁵ Samia è kɛ̀ a Eezuɛ-ŋai láa-tuɛ é lɛ́ɛ la zu é sáa.

¹⁶ A kâa lì daa lêe-ŋai ŋí su a kóraŋ kélee gɛ́ ǹûai loai kpɛ̀tɛ. Daa lêe-ŋai ŋí ƃé kɛ̀ a Bɛtɛ, Geega da Mêepa ma.

¹⁷ À kɛ̀ tí, a kâa lì pôlu ŋɔpɛ́rɛi lá Lama ƃɛ́i è kɛ̀ díi sîi tɔnɔi ŋí kɛ̂i naai. È Ɣâla-teƃele kpɛ̀tɛ naa Ǹuu-namui mɛni ma.