Samuɛlə dɔlɔɔ 6 - Bible

Felesia-ŋai dí Gono-tee Gãlai tɛ̀ɛ pôlu

¹ Ǹuu-namui Ŋɔkono-tee Gãlai kɛ́ɛ a gɛ́ Felesia-ŋai dílɔii su a ɣáloŋ lɔ́ɔlu mɛi feerɛi,

² Felesia-ŋai dí dísâla láa soŋ-ƃelai tòli da dítɛli-kpɛ-ƃelai dîyɛɛ dîai, “Lé ƃé kwa pɔri gɛ̂i a Ǹuu-namui Ŋɔkono-tee Gãlai? Ka zɛŋ lɛ́ kûa kwa pɔri bɛlɛ̂i ma kú dɛ̀ɛ ƃɛ́i è kùla naai.”

³ Dîyɛɛ dîai, “Kà kɛ̀ dɛ̂ɛi, káfe dɛ̀ɛ kpɛ́ni-kpɛni. Ka sama-sɛŋ pɛlɛ ma ká dɛ́ɛ Eezuɛ-ŋai Díɣâlai pɔ́ a kásɔnyɔ̂ŋ fela fêi. À kɛ̀ tí, ka pâi ƃâloi, ka m̀ɛnii kɔ́lɔŋ gɛ̀ Ǹuu-namui kɛ́ mɛni kpɔ̂lui ŋí làa kâai.”

⁴ Dîɛ dîai, “Gɛ̀ ní, lé ƃé kwa pɔri dɛɛ̂i?” Dísâla láa soŋ-ƃelai da dítɛli kpɛ́-ƃelai dí mò dîa dîɛi, Felesia-ŋai láa-tuɛ-ƃelai díkaa lɔ́ɔlu, ǹyaŋ gɔlɔ-felai ŋí káa díkelee dîa.

⁵ Mɛni ma, ka gôo lɔ́ɔlu kpɛtɛ m̀óloŋɔɔ pala ma da gôo lɔ́ɔlu nyíi m̀óloŋɔɔ ŋína ma nyíi-ŋai dí káa ká sí-sɛŋ-ŋai karâi. À kɛ̀ kà ƃaa kɛ́-maa kɛ́ɛ tí tɛ̀ɛ Eezuɛ-ŋai Díɣâlai pɔ́ a zama-sãai ŋí, tãi da a pâi kperâi m̀ɛni kpɔ̂lu saŋ kɛ́ɛ ŋí lâai kâa ka káɣâla-ŋai da kási-sãai.

⁶ Ká fé kɛ̀ yɛ̂ɛ Ize-ƃelai da díkâloŋ. Dí kɛ̀ a díwôlii kpɔlɔɔ. Kɛ́lɛ Eezuɛ-ŋai Díɣâlai kɛ́ɛ a díkula maa kɛ́ a ŋ̀ánaai, dí tèe dîa dí lí.

⁷ Ka wúru-ƃela keleŋ nina siɣe ká bɛlɛ niŋa saa feerɛ ma nyíi-ŋai díkaa niî dílônii ŋáa kɔnîi. Díkɛ a niŋa nyíi vé tá wúru keleŋ ɣála níi. Ka géleŋ kpulɔ̂ŋ dîa. Kɛ́lɛ ka lí a dílônii pôlu ƃɛ́i da nyìi naai.

⁸ À kɛ̀ tí, ka Ǹuu-namui Ŋɔkono-tee Gãlai sée géleŋ su. Ka gôo ŋína-ŋai da gôo pala-ŋai pú ƃɔrɔ su ká zee géleŋ su Gono-tee Gãlai kɔlɛ. À kɛ̀ tí, ká tée dípôlu dí berei síɣe.

⁹ À kɛ̀ tí, ka tɔɔ ká gáa à kɛ̀ a pâi berei siɣêi é lí Eezuɛ-ŋai dítaai su nyíi da dòli a Bɛ-simɛ. À kɛ̀ a lì gbɔ́ɔi lɔii su, gɛ̀ ní ka pâi gɔ̂lɔnii a gɛ́ɛ Ǹuu-namui yée pɔɔ káa mɛni sôlii ŋí su kwa gâai. Kɛ́lɛ à kɛ̀ Gono-tee Gãlai à wàla lí pôlu gbɔ́ɔi lɔii su pere, gɛ̀ ní Ǹuu-namui yée pɔɔ fé gɔlɔ-felai ŋí su kûai. Kɛ́lɛ gáa nɔ́ a kɔlɔ-fela da kpɛ́ni.

¹⁰ Nya ƃe dí m̀ɛnii kɛ̀ dí mò dîai. Dí niŋa kɔ̃lee feerɛ sìɣe dí díkpulɔ̂ŋ wúru-ƃela keleŋ ma dí dílônii sìɣe dí lí a dia dí ǹáa galai su dí ǹá tɛ́ dîa.

¹¹ Dí Gono-tee Gãlai làa géreŋ su da m̀ɔrɔ gôo ŋína pɔɔkɔ̂ŋ da bala pɔkɔɔŋ díkɛ̀ zui.

¹² Ǹiŋa-ŋai dí berei sîɣe nyíi a lî Bɛ-simɛ dí kɛ́ wɔ̀lɔ. Dífe tínaŋ ní kɔɔ-yee mɛi-pere kpaa máŋ laa-mii-yee mɛi-pêre. Kɛ́lɛ gâloŋ lɔ́ɔlui kɛ̀ Felesia-ŋai dílɔii mɛi dí lɛ̀ɛ ǹiŋa-ŋai pôlu é lɛ́ɛ la zu dí lí Bɛ-simɛ lɔii ŋɔgɔyɛŋ-perei ma.

¹³ Bɛ-simɛ-ƃelai dí kɛ̀ wîi têei gbotoloi su. Gɛ́ɛ da díŋɛi tɛ̀ ɣelêi dí Gono-tee Gãlai kâai, dí líi è nɛ̃ɛ kpɔ́ a ŋ̀ánaa dí kpéra wîi teêi, dí pɛ́lɛ koi-nɛ̃ɛ kulâi.

¹⁴ Ǹiŋa-ŋai dí tìnaŋ dí kúla berei ma dí tɛ́ gbâlaŋ ŋá ƃɛ́i ǹûai díkɛ wîi têei naai. Gbâlaŋ ŋí è kɛ̀ a Zasua pɔ́ɔ nyíi kɛ̀ Bɛ-simɛi. Ǹiŋa-ŋai dí kpèra kɔni kɛ́tɛ tɔnɔ kɔlɛ. Nya ƃe dí géleŋ taa dí ŋuru-ƃelai síɣe, dí niŋa-ŋai páa dí díkula a kéreŋ-sala Ǹuu-namui ma.

¹⁵ Nya ƃe zâla-laa soŋ-nuui-laa soŋ-ƃelai dí Ǹuu-namui Ŋɔkono-tee Gãlai sìɣe da m̀ɔrɔi nyíi gôo ŋí pɔɔkɔ̂ŋ da bala pɔkɔɔŋ è kɛ̀ zui dí dísee gɔni kɛ́tɛi ŋa. Nya ƃe Bɛ-simɛ-ƃela dí kéreŋ sala kula. Dí máŋ sâla-ŋa kùla Ǹuu-namui ma a ŋ̀elei tí.

¹⁶ Gɛ́ɛ Felesia kaloŋ lɔ́ɔlui dí mɛnii ŋí naa kàa lai, dí pene pôlu dí lí Ɛkulɔŋ a maa ɣelei tí.

¹⁷ Zama-sãai ká ŋí Felesia-ŋai díkâloŋ-ŋai dí dɛ̀ɛ a dísɔnyɔ̂ŋ maa sâla kulâi. Dí gôo pala pɔkɔɔŋ lɔ́ɔlu tɛ̀ɛ. Dí dɔnɔ tɛ̀ɛ Asɔdɔ mɛni ma, dí dɔnɔ tɛ̀ɛ Geza mɛni ma, dí dɔnɔ tɛ̀ɛ Gâa mɛni ma, dí gbéli tɛ́ɛ Ɛkulɔŋ mɛni ma.

¹⁸ Dí ŋɔ́nɔ gôo ŋina pɔkɔɔŋ-ŋa tɛ̀ɛ tɛi-tɛi yɛ̂ɛ berei daa lêe-ŋai dí káa lai Felesia kaloŋ lɔ́ɔlui mɛni ma. Dí zãai ŋí tɛ̀ɛ daa-ŋai kɛ̀ siɣâŋ sui kpaa máŋ daa pɛlɛ-pɛlɛɛi dífe kɛ́ ní siɣâŋ sui dímɛni ma. Ǹyaŋ gɔni kɛ́tɛi dí Gono-tee Gãlai see ŋá Zasua nyíi kùla Bɛ-simɛ ŋɔkpala-ŋai, gáa naa a kili-too-ŋa sɛŋ mɛnii kɛ̂i m̀ɛni ma.

¹⁹ Ǹuu-namui Ɣâla è Bɛ-simɛ sinaa buu-lɔ́ɔlu mɛi-feerɛ pàa, kpɛ́ni fêi, dí Ǹuu-namui Ŋɔkono-tee Gãlai su kàa. Malôŋ támaa è tòo Bɛ-simɛ-ƃelai dîa, kpɛ́ni fêi, Ǹuu-namui è núu támaa pàa dísama.

Dí Gono-tee Gãlai tɛ̀ɛ Kiria-Zeriŋ

²⁰ Bɛ-simɛ-ƃela dí mò dîyɛɛi, “Gbɛ̂ɛ ƃa pɔri tɔɔ̂i Ǹuu-namui ŋɛ́i tuɛ, nyíi gáa a Ŋ̀âla maa waai? Mí ƃé kwa pɔri dɛɛ̂i naa é kúla kúŋɛi?”

²¹ Nya ƃe dí worɛ̂ tɛ̀ɛ Kiria-Zeriŋ-ƃelai pɔ́-naa dîyɛɛi, “Felesia-ŋai daâ Ǹuu-namui Ŋɔkono-tee Gãlai tɛ́ɛ pôlu. Ka pá ká ziɣe ká lí la kápɔ-naa.”