Samuɛlə dɔlɔɔ 4 - Bible

Felesia-ŋai dí Gbanaŋ-woo-kɛɛ Gãlai sìɣe

¹ Maa tãi tí ma Eezuɛ-ŋai dí lì a gɛ́ɛ dí kɔ́ pɛ́lɛ Felesia-ŋai dîa. Dí díƃûui pù Ɛbɛnizɛ taai kɔlɛ, Felesia-ŋai diaŋ dí díwɔ̂i pú Afɛ taa-leei kɔlɛ.

² Felesia-ŋai dí sɔ̀ɔŋ Eezuɛ-ŋai dîa a wála-wala-laa dí díyee mɛi ɣále. Dí Eezuɛ ŋɔkɔ-kuluƃa-ŋai ŋɔwála náaŋ (4,000) pàa.

³ Eezuɛ-ŋai kɛ́ɛ da pá pôlu díƃûui sui, dínuu pɔlɔ-ŋai dí mò dîyɛɛi, “Yâwɛɛ aâ gɛ́ Felesia-ŋai da kúsu pú ŋí sâa lé mɛni ma? Kwaa kú Gbanaŋ-woo-kɛɛ gãlai kúla Silo kú pá la a gɛ́ɛ é kúla kúkpɔara-ƃelai yêei é kɛ́ kúsama.”

⁴ Dí worɛ̂ tɛ̀ɛ Silo a gɛ́ɛ dí pá a Ŋ̀wála-wâla kélee Ɣalai Yâwɛɛ Ŋɔkpanaŋ-woo kɛ́ɛ maa gãlai nyíi kɛ̀ ŋ̀âla-taa kooŋ-sɛŋ pɔkɔɔŋ-ŋai loai. Ǹyaŋ Ilai ǹônii-sinaa feerɛi, Ofini da Finiɣa dí kpɔŋ ḿâa tɛ̀ɛ a gɛɛ dí lí a gãlai.

⁵ Díkɛɛ da pá la m̀ûui sui, Eezuɛ-ŋai dí làɣi kpɔ́ a zu kɛ́tɛ ǹɔii é kpɛ̃lîŋ.

⁶ Díwooi ŋí mɛniɛɛ Felesia-ŋai dîɛi dí mò dîyɛɛi, “Ibulu-ŋai da lâɣii m̀ûui su lé mɛni ma?” Gɛ́ɛ da gɔ́lɔŋ a gɛ́ɛ ǹûai da pá a Yâwɛɛ Ŋɔkpanaŋ-woo kɛ́ɛ maa Gãlai m̀ûui sui,

⁷ dí yào dí m̀ó dîyɛɛi, “Ŋ̀âla-ŋai daâ pá m̀ûui su. Kpalo a ƃéla kûa! M̀ɛnii ŋí da fé tá kɛ́ ní a bɔlɔ.

⁸ Gbɛ̂ɛ ƃé pâi kúkulâi ŋ̀âla-ŋai ŋí díwala-walai yêei. Ŋ̀âla-ŋai ŋí ƃé wɔ́lɔ m̀ɛni kpɔ̂lui làa Ize-ŋai dîa vɛ̃ɛya-kpâlaŋ su.

⁹ Káai a Felesia-ŋai, ka kálii kúla ká kákpîŋ kpɛtɛ yɛ̂ɛ kpakolo-ŋa. À wàla kɛ́ tí, ka pâi kɛ̂i a luɛ-ŋa Ibulu-ŋai yêei yɛ̂ɛ berei dí wɔ́lɔ kɛ̀ la káyêei a luɛ-ŋai. M̀ɛni ma, ka kákpîŋ kpɛtɛ yɛ̂ɛ kpakolo-ŋa namu kɔ́ mɛni ma.”

¹⁰ Felesia-ŋai dí kɔ̀ Eezuɛ-ŋai pɔ́ dí díyee mɛi ɣále dí pú dí lí dípɔ-taai tɛi-tɛi. Dí Eezuɛ-ŋai dámaa pàa. Gɔ-kuluƃa-ŋai dí dípàai dí kɛ̀ a wála buu saaƃa (30,000).

¹¹ Dí Ɣâla Ŋɔkpanaŋ-woo kɛ́ɛ maa Gãlai kùla díyêei. Dí Ilai ǹônii-sinaa feerɛi páa.

Ilai è sàa

¹² Bɛŋsima ŋɔsuui su kɔ-kuluƃa-ŋai dɔnɔ è pù é kúla naa é pá Silo a maa ɣelei tí ŋɔseɣei fála-falaa pɔ̂rɔ siáa ŋ̀uŋ ma.

¹³ Tãi è sèri lai, è Ilai kàa seeni ŋɔsee-sɛŋ ŋá gɛ́ berei su pere kàa. Ǹíi è kɛ̀ sɛ̂lɛni Ɣâla Ŋɔkpanaŋ-woo kɛ́ɛ maa Gãlai mɛni ma. Ǹyaŋ bàa daa-leei su é duŋ ŋí tóoi, ǹûai kélee dí wɔ̀lɔ.

¹⁴ Ilai kɛ́ɛ a ǹûai wɔ́lɔ wooi ŋí mɛnii, è mò ǹyɛɛi, “Lé yoo-yoo woo ƃé tɛ̂i ŋí?” Ǹalôŋ è pà bɔ́ naa a kîrɛ é duŋ tóo mà.

¹⁵ Ilai è kɛ̀ a kóraŋ buu lɔ́ɔlu mɛi náaŋ káo lɔ́ɔlu mɛi-saaƃa. Ŋ̀ɛ́i è kɛ̀ a búɔɔ.

¹⁶ Ǹalôŋ è mò Ilai ma ǹyɛɛi, “Ŋá sâa pù ŋá kúla gɔ́i túɛ.” Ilai ǹyɛɛ m̀ai, “Ǹaa káa léŋ ńoŋ?”

¹⁷ Ǹalôŋ ǹyɛɛ m̀ai, “Eezuɛ-ŋai daâ pú Felesia-ŋai yêei. Eezuɛ-ŋai dámaa dí sàa. Íloŋ surɔŋ feerɛi dí lɛ̀ɛ gɔ́i su. Felesia-ŋai dí lì a Ɣâla Ŋɔkpanaŋ-woo kɛ́ɛ maa Gãlai.”

¹⁸ Gbanaŋ-woo kɛ́ɛ maa Gãlai maa mɛni mɛniɛɛ Ilai mii, è kàƃa bôlu pere zee-sɛŋ ŋá é tóo ziɣãŋ kɔlɛ. È tòo é gɔŋ ɣále é sáa ŋ̀á ma. È kɛ̀ a bɔlɔɔ, ŋ̀uyiɛɛ. È kɛ̀ Eezuɛ láa túɛ a kóraŋ buu náaŋ.

Finiɣa ŋɔnɛnîi è sàa

¹⁹ Ǹyaŋ Ilai ǹóŋ surɔŋ Finiɣa ŋɔnɛnîi è kɛ̀ kpáaŋ su a maa tãi tí. Ŋɔtãi è nâa lɛ̀ɣɛ a gɛ́ɛ é ǹáa yéŋ. Gɛ́ɛ a mɛ̀ni a gɛɛ Felesia-ŋai da Gbanaŋ-woo kɛ́ɛ maa Gãlai síɣei, ŋɔsurɔ̂ŋ da ŋɔsurɔ̂ŋ ǹâŋ da lɛ̀ɛ gɔ́i sui, koi-tee è zòŋ é ǹáa yéŋ ŋ̀á ma.

²⁰ Gɛ́ɛ saa-yee tɛ̂i vɛ̃ɛ-lee zoo-ŋai dí mò ma dîyɛɛi, “Ífe yào, yaâ lóŋ-surɔŋ maa sɔlɔ ƃó.” Kɛ́lɛ vé mɛni da ƃó ní kpaa máŋ é ŋ̀óli tɔ́ɔ dîa.

²¹ È ǹolôŋ láa sèe a Ikabɔ zu-kulâi ƃa, “Vólo-laai a kula Eezuɛ. Kpɛ́ni-fêi, da Ɣâla Ŋɔkpanaŋ-woo kɛ́ɛ maa Gãlai kúla naa, ŋɔsurɔ̂ŋ da ǹâŋ da sàa.”

²² Ǹyɛɛi, “Vólo-laai a kula Eezuɛ, kpɛ́ni fêi, da Ɣâla Ŋɔkpanaŋ-woo kɛ́ɛ maa Gãlai kúla naa.”