Samuɛlə dɔlɔɔ 30 - Bible

Deeƃé è Amɛlɛka-ŋai su-kara

¹ Deeƃé da ŋɔkɔ-kuluƃa-ŋai dí Ziki-laa a ŋ̀ele kûui zaaƃa ɣelei. Dí tɛ́ɛ naai, dí gàa a gɛ́ɛ Amɛlɛka-ŋai da tòo Zuda kwára pere da ǹaa sãai síɣe da pɛ̀lɛ Zikila ma da naa kéreŋ,

² dí ǹɛyâai da dîai kélee kɛ̀ naai soŋ a kɔ-soŋ-ŋa.

³ Deeƃé da ŋɔkɔ-kuluƃa-ŋai kɛ́ɛ da seri Zikilai, dí gàa naa è kɛ̀ a géreŋɔɔ da ǹɛyâai, dílônii-sinaai, da dílônii-nɛyãai kélee sóŋ a kɔ-soŋ-ŋa.

⁴ Deeƃé da ŋɔkɔ-kuluƃa-ŋai dí wɔ́lɔ kpɔ́ a ŋ̀ánaa. Dí lɛ̀ɛ wɔ̂lɔi kɔlɔ é kpɛ́ɛ dîa.

⁵ Dí máŋ Deeƃé ŋɔnɛnîi veerɛŋɔɔ sòŋ, Zariɛɛ nɛnii Ainɔaŋ da Aƃigee nyíi kɛ̀ a Neeba ŋɔpɔɔ nɛniî nyíi kùla Kamɛɛi.

⁶ Deeƃé líi è tòo pôlu a ŋ̀ánaa, kpɛ́ni fêi, ǹûai díkɛ̀ ŋ̀wɛ̂lii dí zɔ̀ɔ a kɔni. Díkelee díkɛ̀ kpɔ́ a dílii ŋwánaa dílônii-sinaai da dílônii-nɛyãai mɛni ma. Kɛ́lɛ Yâwɛɛ, Deeƃé Ŋɔɣâlai è wála-wala tɛ̀ɛ bɔ́.

⁷ Deeƃé è mò zâla-laa soŋ-nuui láa soŋ-nuui Aƃiata nyíi kɛ̀ a Aimelɛ ǹóŋ ma ǹyɛɛi, “Pá mî a Ɛfɔi” Aƃiata è pà la bɔ́.

⁸ Nya ƃe Deeƃé è Yâwɛɛ marê kɛ̀ ǹyɛɛi, “Ŋá lɛ́ɛ doo-ma kɛ́-ƃelai ŋí pôlu? Ŋa pâi dísônii?” Yâwɛɛ ǹyɛɛ m̀ai, “Lɛɛ dípôlu. Tɔyâ ma ya pâi dísonii í ínûai kúla díyêei.”

⁹ Deeƃé da gbakolo ŋuŋ lɔ́ɔlu mɛi-dai kɛ̀ bôlui dí pà Bisɔɔ Ya-loŋ ma. Da-ni dí lɛ̀ɛ naa.

¹⁰ Da ŋɔkɔ́ kɔ́-ƃela ŋuŋ náaŋ dí lɛ̀e ǹûai pôlu, kɛ́lɛ ŋuŋ gbakolo ŋuŋ feerɛ fíi è kɛ̀ kpɛɛ̂i dífa pɔri kɛ̀ ǹya-loŋ tîyenii.

¹¹ Dí Ize nuu tɔnɔ kàa víyeŋ ŋá dí zóŋ dí pá la Deeƃé pɔ́-naa. Dí mii-sɛŋ da yá tɛ̀ɛ bɔ́,

¹² kpólo kpua feerɛ da loasiŋ kpoma feerɛ. È mìi é tóo gbonoi, kpɛ́ni fêi, vé nii kɛ̀ mii-sɛŋ da mii ní kpaa máŋ é yá kpéle a fólo saaƃa da kpíni saaƃa.

¹³ Deeƃé ǹyɛɛ m̀ai, “Gbɛ̂ɛ ŋɔnúu ƃa yá, mí ƃé íkùla naai?” Ǹyɛɛ m̀ai, “Ŋ́gaa a Ize nuu. Kɛ́lɛ ŋ́gaa a luɛ Amɛlɛka nuu tɔnɔ da yêei. È ńɛɛ pôlu, kpɛ́ni fêi, ŋá kɛ̀ kɔlɛ̂i a fólo saaƃa.

¹⁴ Kú tòo Kɛrita-ŋai Dífɛ̃ɛ-kpâlaŋ su lɔii-kpiniŋ su Zuda kwára pere lɔii-kpiniŋ su-ƃelai sáma Kelɛ ŋɔlɔii-kpiniŋ su kú Zikila kéreŋ.”

¹⁵ Deeƃé ǹyɛɛ m̀ai, “Ya pɔri berei kulâi a ńyãa a gɛ́ɛ ŋá seri too-ma kɛ́-ƃelai ŋí pɔ́-naa?” Ǹyɛɛ m̀ai, “Í fóo mî Ɣâla ŋɛ́i a gɛ́ɛ ífe pâi ḿbaâi, kpaa máŋ í ńdɛɛ ŋánuu-namui pɔ́-naa, gɛ̀ ní ŋa pâi liî a yá naa.”

¹⁶ È berei kùla a Deeƃé é lí la Amɛlɛka-ŋai pɔ́-naa. Dí kɛ̀ a dítaa-taa díkɛ̀ lii-nɛ̃ɛ kùla, díkɛ lɔɔ kpêle, díkɛ dílaa mii, kpɛ́ni fêi, zãai dí zìɣe Felesia-ŋai da Zuda-ŋai dílɔii sui zu è kɛ̀ a gɛ́tɛ.

¹⁷ Deeƃé è kɔ̀ dípɔ é síɣe ɣele-ƃɔi kpini ma é lɛ́ɛ la zu vólo-káoi é tóo a bôlu ma ɣelei. Díta fé kùla ní é tée nɔ́ ǹyaŋkpa ŋ̀uŋ náaŋ ma nyíi-ŋai tɛ̀ soo-fáleŋ-ŋaa mɛi dí púi.

¹⁸ Deeƃé è zãai kélee kpɔ́ kùla Amɛlɛka-ŋai yêei da ŋɔnɛyâai veerɛŋɔɔ.

¹⁹ Sɛŋ da tɔnɔ kpîŋ fé kɛ́ ní a ǹáŋɔɔ. Ǹyáŋkpa, núu-pɔlɔ, surɔŋ-loo, kpaa máŋ nɛnî-loo da zãai kélee dí zìɣei ŋ̀áa è kɛ̀ a bɔriɛɛ. Deeƃé è gélee kpɔ́ kùla yêei kɛ̀ é pá a dîa pôlu.

²⁰ È dítaa-tulɛ-ŋai kélee sòŋ. È máŋ dítaa tulɛ-ŋai kélee sìɣe. È gɛ̀ ŋɔnûai dí tɔ́ɔ a zãai ŋí tuɛ-pere. Nya ƃe ǹûai dí mò dîyɛɛi, “Deeƃé ŋɔfela-fei ká ŋí.”

²¹ Deeƃé-ni kɛ́ɛ lenêi pôlui, è tɛ̀ɛ ǹúu ŋuŋ feerɛi pɔ́-naa pere Bisɔɔ Ya-loŋ ma nyíi-ŋai dífii è kɛ̀ kpɛɛ̂i dífe pɔri ní liî. Gɛ́ɛ da gáa gɛ́ pâi, dí pà dí berei tɔ̀ɔ da ǹûai gbéli-ŋai. Dí lɛ̀ɣɛ a díkîe-ni, Deeƃé è ǹáa tì dîa.

²² Kɛ́lɛ, ŋ̀wana-lɔɔ-ƃelai da nàa-saa tée-ƃelai kɛ̀ Deeƃé ŋɔnûai sáma dí mò dîyɛɛi, “Kúfe pâi zãai ŋí da tɛɛ̂i dípɔ, kpɛ́ni fêi, kwa dîa-ni kúfe lì ní. Da pɔri liî a dínɛyâai da dílonii.”

²³ Deeƃé ǹyɛɛ m̀ai, “Kpao ŋánûa. Káfe tùa tí a zãai Yâwɛɛ è dɛ̀ɛ kúpɔi. È kúmɛi kàa é kúkpɔara-ƃelai tɛ́ɛ kúpɔ.

²⁴ Gbɛ̂ɛ ƃé pâi ŋ̀óli tɔɔ̂i nyíŋi mai? Gɔ-kuluƃa-ŋai lɛ̀ɛ zãai kɔlɛi da dîai lì gɔ́i mai díkelee da pâi zãai sɔlɔ ƃôi a bɔriɛɛ.”

²⁵ Deeƃé è m̀ɛnii ŋí pɔ̃̀yɛ a tɔ̂ŋ Eezuɛ-ŋai mɛni ma. Dɔ̂ŋ ŋí káa Eezuɛ é síɣe ŋ̀elei tí ma é tóo sâa ma.

²⁶ Deeƃé da ŋɔkɔ-kuluƃa-ŋai seriɛ́ɛ Zikilai, è zãai da tɛ̀ɛ Zuda nuu-pɔlɔ-ŋai pɔ́ kɛ̀ a ǹɛ́lɛɛ-ni ǹyɛɛ dîai, “Zãai Yâwɛɛ ŋɔkpɔara-ƃelai dí gùla nûa yêei too-ma kɛ́ɛ sui kú gùla díyêei. Káwɔ̂i ká ŋí”

²⁷ Deeƃé è sama-sãa tɛ̀ɛ daa-ŋai ŋí su: Bɛtɛ, Lemɔ, Nɛgɛ, da Zatiɛ.

²⁸ È da tɛ̀ɛ kɛ̀ Aloɛ, Sifimɔɔ, Ɛsitimoa,

²⁹ da Leka. È da tɛ̀ɛ kɛ̀ Zeramila-ŋai da Keniti-ŋai dítaa-lêe-ŋai su,

³⁰ é da tɛ̀ɛ dîai pɔ́ kɛ̀ Ɔma, Bɔrasâŋ, Atasi,

³¹ da Iburɔŋ taa-ŋai su-ƃelai pɔ́. È da tɛ̀ɛ gwaa-ŋai ma da ŋɔkɔ-kûluƃa-ŋai da kâa sìa naai.