Samuɛlə dɔlɔɔ 26 - Bible

Deeƃé è ŋɔ́nɔ tèe Sɔ̂ɔ ma

¹ Naa pôlu ma, Zifi suui su-ƃelai da-ni dí pà Sɔ̂ɔ pɔ́-naa Giƃea dîyɛɛ m̀ai, “Deeƃé a ǹoôi Akila yeei ma Zɛsimɔŋ kɔlɛ ma vóloi kulâi-pere vɛ̃ɛ-kpâlaŋ su.”

² Sɔ̂ɔ è kɔ-kuluƃa lɛ́lɛɛ wála saaƃa kùla Eezuɛ kɔkuluƃa-ŋai sáma é lí a dîa a gɛ́ɛ da dia-ni dí Deeƃé kɔ́ri Zifi Fɛ̃ɛ-kpalaŋ su.

³ Sɔ̂ɔ è ŋɔƃûui pù Akila yeei ma, nyíi kɛ̀ bere-ƃelai nyíti ma Zɛsimɔŋ perei. Deeƃé è kɛ̀ ǹoôi vɛ̃ɛ-kpâlaŋ su pere. Deeƃé kɛ́ɛ a mɛni a gɛ́ɛ Sɔ̂ɔ è kɛ̀ lɛɛ̂i bôlui,

⁴ è mɛni maa kpɛɛ-ƃela tɛ̀ɛ a gɛ́ɛ dí naa káa à kɛ̀ è kɛ̀ a tɔ̃yâ.

⁵ Deeƃé è mù sìɣe é lí Sɔ̂ɔ ŋɔƃûui su. È gàa a gɛ́ɛ Sɔ̂ɔ da ŋɔkɔ-kuluƃa kɛ́tɛi Abinɛ, Nɛ̂ɛ ǹóŋ díkɛ lâani díkɛ nyìi gɔ-kuluƃa-ŋai tínaŋɔɔ dîa dia máŋ díkɛ nyìi.

⁶ Deeƃé è Ita-nuui Aimelɛ da Zôa ǹeɣê Aƃisa ni marê kɛ̀ ǹyɛɛ dîai, “Ǹúui nenɛ̂ ƃé kwa ǹyaa kwa pɔri liî Sɔ̂ɔ ŋɔƃûui sui?” Aƃisa ǹyɛɛ m̀ai, “Ńyãa ƃe!”

⁷ Deeƃé da Aƃisa dí tɔ̀ara a maa kpinii tí dí tɛ́ Sɔ̂ɔ ŋɔƃûui su. Sɔ̂ɔ è kɛ̀ nyiî ŋɔkpálai pîlaŋɔɔ ǹɔii ma ŋuŋ kɔlɛ ma. Abinɛ da ŋɔkúluƃai gbéli-ŋai díkɛ dítinaŋɔɔ ma da dia-ni díkɛ nyìi.

⁸ Aƃisa ǹyɛɛ Deeƃé ǹyɛɛ mai, “Ɣâla aâ nâa ŋuŋ ma ƃo tɛɛ ípɔ a gɛ́ɛ í íyee pɛ́lɛ íkpɔara-nuui ma! Ŋa pâi gbamôi ǹɔii ma a gbɔ́ɔi kpâlai a ḿvîŋ tɔnɔ.”

⁹ Deeƃé ǹyɛɛ m̀ai, “Ífe bàa. Ɣâla a pâi núu kélee ŋɔmɛnii ŋáa teêi. Núu da a ǹyée pɛ̀lɛ ǹúui ma Ǹuu-namui a zìɣe zu a kaloŋ maa nuui fa lì kpɛ́ni-kpɛni.

¹⁰ Yâwɛɛ a pâi Sɔ̂ɔ paâi ǹyaa kpîŋ tãi nɔ́ ǹyaa Yâwɛɛ gáa la ɣele mai kpaa máŋ é sáa gbɔ́ɔi yee ma kpaa máŋ kɔ̂i.

¹¹ Ǹuu-namui é folôŋ ḿâ a gɛ́ɛ ŋá mɛni nyɔ́mɔɔ da kɛ́ a ŋɔkâloŋ è zìɣe zui. Ŋɔkpálai seeni ŋ̀uŋ mɛi pere da ǹya ƃaa-ƃɔrɔŋ nɔ́ ƃé da kú ziɣe lí a dia.”

¹² Deeƃé è gbálai sìɣe da ǹya ƃaa-ƃɔrɔŋ dí kúla a dia m̀ûui su. Sɔ̂ɔ ŋɔkɔ-kuluƃa-ŋai dɔnɔ kpîŋ fé díkaa ní. Dífe kɛ́ ní a m̀ɛnii kɔ́lɔŋɔɔ kɛ̀ kɛ̂i. Dítɔnɔ kpîŋ fé ŋɛ́i lá ƃó ní a dɔnɔ kpîŋ. Yâwɛɛ è gɛ̀ nyíi támaa é tɛ́ɛ a dîa.

¹³ Deeƃé da Aƃisa dí lì dí gbotoloi naɣîŋ dí lí ǹyéei gbéli tôŋ su ƃɛ́i díkɛ̀ a díŋuŋ ma ƃóɔɔ naai.

¹⁴ Deeƃé è tìnaŋ Sɔ̂ɔ ŋɔƃûui su pere é ŋɔkɔ-kuluƃa-ŋai da dílaa túɛ-nuui Nɛ̂ɛ ǹóŋ Abinɛ tóli ɣelêi pere, ǹyɛɛ Abinɛ ma “Yâ ŋ́oo mɛnîi nɔ́ ƃe tí?” Abinɛ è ŋ̀óo su tòo ǹyɛɛ m̀ai, “Gbɛ̂ɛ ƃé Gâloŋ ŋɔnyii teêi tí ŋ̀ɛ́i?”

¹⁵ Deeƃé ǹyɛɛ m̀ai, “Abinɛ, lé surɔŋ ƃa yá? Yá f a gɔ-kuluƃa kɛ́tɛi Eezuɛ? Gɛ̀ ní lé ƃé kɛ̀ ífa pɔri gâloŋ mɛi kâai lai? Eêi kɛ̀ núu da kélee é pá káƃûui su eêi pɔ̀ri sâa baâi gbínii su.

¹⁶ Ya fɛɣɛ a zu-kɛ́tɛ! Tɔ̃yâ kpîŋ ma, Yâwɛɛ ŋɛ́i, m̀aa nɛ̃ɛ̂i a ka ínûai ká kélee ká sáa, kpɛ́ni fêi, káfe pɔri ní Yâwɛɛ ŋɔkâloŋ mɛi kâai. Ka gáa à kɛ̀ Gâloŋ ŋɔkpálai da ŋɔya ƃaa-ƃɔrɔŋ kɛ̀ ŋuŋ mɛi perei gáa naa”

¹⁷ Sɔ̂ɔ è gɔ̀lɔŋ a gɛ́ɛ Deeƃé ƃé kɛ̀ lônoi. È dòli ǹyɛɛi, “Ńoŋ Deeƃé, yá ƃé íwoo a tɛ̂i?” Ǹyɛɛ m̀ai, “Owoei Gâloŋ. Ŋ́oo ká tí.

¹⁸ Lé mɛni ƃé íkaa la ḿbôlui? Ŋa tá mɛni nyɔ́mɔɔ da kɛ́ a yá, kpaa máŋ ŋá tɔ̂ŋ da kara?

¹⁹ Kpera yɛ̂ íwoli tɔ́ɔ ŋá mɛni da ƃó yâ. À kɛ̀ Yâwɛɛ a gɛ́ ya tɔɔ ḿâ, gɛ̀ ní sâla kuláa a pâi gɛ̂i é ǹíi maa fáleŋ. Kɛ́lɛ à kɛ̀ ǹûai da-ni ƃa gɛ́ ya tɔɔ ḿâi, gɛ̀ ní kili-kɛ-zu káa ńyêei a gɛ́ɛ Yâwɛɛ a pâi dímɛnii ŋáa têei! Da ŋ́gɛ ŋa kùla Yâwɛɛ ŋɔlɔii ma díkɛ mò ḿâ a gɛ́ɛ ŋa Ɣâla da kpɛ́ni fɛlîi.

²⁰ Ífe ǹɛɛ naa ŋá sáa lɔii da kpɛ́ni su nyíi naa kôyaai Yâwɛɛ mai. Ḿaa mɛni fé ŋɔ́nɔ kpanaŋ ní é tɛ́ɛ kpîŋ misi! Lé mɛni ƃé Eezuɛ kaloŋ a ŋ́gɔ̂rii la yɛ̂ɛ sɛŋ ƃé ŋa kɛ̀ a ŋɔni ǹyéei mai?”

²¹ Nya ƃe Gâloŋ Sɔ̂ɔ è mò Deeƃé ma ǹyɛɛi, “Pɔri mâa è sâa kɛ̀ íyêei a gɛ́ɛ í ḿbaa. Kɛ́lɛ ífe gɛ́ ní. Ŋa mɛni nyɔ́mɔɔ támaa kɛ́ a yá. È kɛ̀ a pɔara mâa kɛ́tɛ a gɛ́ɛ ŋ́gɛ ŋwɛ̀li ŋá ípaa. Ŋa tûa yɛ̂ɛ ƃoo-nûu. Kɛ́lɛ ḿve ŋɔ́nɔ pâi kɔ̂i a gɛ́ɛ ŋá í páa. Ŋa mɛni nyɔ́mɔɔ ŋánaa kɛ́”

²² Deeƃé ǹyɛɛ m̀ai, “Gâloŋ, íkpalai ká! M̀ó íkɔ-kûluƃa-ŋai dɔnɔ ma é pá ganai.

²³ Yâwɛɛ è sâa ílɔ̀ ŋáwala-walai mu, kɛ́lɛ íkaa a ŋɔkâloŋ M̀ɛni ma ḿva pɔri mɛni nyɔ́mɔɔ da kɛ̂i a yá. Yâwɛɛ a deniŋ ƃó-ƃelai féla fè da diai tùa a zãai.

²⁴ Ŋá sâa íŋuŋ ma ƃò, ǹyaŋ ŋa Yâwɛɛ fɛlîi a gɛ́ɛ é ḿɛi káa é ŋ́uŋ ma ƃó.”

²⁵ Nya ƃe Sɔ̂ɔ è mò Deeƃé ma ǹyɛɛi, “Ńoŋ Deeƃé, ŋa Ǹuu-namui fɛlîi a gɛ́ɛ é lûwa láa yâ é gɛ́ í ƃûu ƃó.” Nya ƃe Sɔ̂ɔ è lì pôlu bɔ́-taai. Deeƃé máŋ é lí.